ಬಾಹ್ಯಾಕಾಶಕ್ಕೆ ಭಗವದ್ಗೀತೆ, ಉಪನಿಷದ್ ಕೊಂಡೊಯ್ದಿದ್ದ ಸುನಿತಾ ವಿಲಿಯಮ್ಸ್​ಗೆ ಗಣೇಶ ಲಕ್ ಚಾರ್ಮ್ ಅಂತೆ

ನವದೆಹಲಿ, ಮೇ 7: ಭಾರತ ಮೂಲದ ಅಮೆರಿಕನ್ ಗಗನಯಾತ್ರಿಯಾದ ಸುನೀತಾ ವಿಲಿಯಮ್ಸ್ (Sunita Williams) ಅವರಿಗೆ ಗಣೇಶ ಅದೃಷ್ಟದಾಯಕನಂತೆ. 58 ವರ್ಷದ ಅವರು ಇಂದು ಮಂಗಳವಾರ ಮೂರನೇ ಬಾರಿ ಗಗನಕ್ಕೆ ಹಾರುತ್ತಿದ್ದು, ಈ ವೇಳೆ ಗಣೇಶನ ವಿಗ್ರಹವನ್ನು ಕೊಂಡೊಯ್ಯಲಿದ್ದಾರೆ. ಹಿಂದೂ ದೇವರಾದ ಗಣೇಶ ನನಗೆ ಗುಡ್ ಲಕ್ ಚಾರ್ಮ್ (good luck charm) ಆಗಿದ್ದು, ಬಾಹ್ಯಾಕಾಶದಲ್ಲಿ ವಿಘ್ನ ವಿನಾಯಕನನ್ನು ಜೊತೆಯಲ್ಲಿ ಇರಿಸಿಕೊಳ್ಳಲು ಬಹಳ ಖುಷಿಯಾಗುತ್ತದೆ ಎಂದಿದ್ದಾರೆ ಸುನೀತಾ ವಿಲಿಯಮ್ಸ್. ಅಮೆರಿಕದ ಫ್ಲೋರಿಡಾ ರಾಜ್ಯದ ಕೇಪ್ ಕ್ಯಾನವರಲ್ ಎಂಬಲ್ಲಿಂದ ಬೋಯಿಂಗ್ ಸಂಸ್ಥೆಯ ಸ್ಟಾರ್​ಲೈನರ್ ಸ್ಪೇಸ್​ಕ್ರಾಫ್ಟ್​ನಲ್ಲಿ ಹೋಗಲಿರುವ ಇಬ್ಬರು ಗಗನಯಾತ್ರಿಕರಲ್ಲಿ ಸುನೀತಾ ಕೂಡ ಒಬ್ಬರು. ಬುಚ್ ವಿಲ್ಮೋರ್ ಅವರು ಸುನೀತಾ ಜೊತೆ ಇರುವ ಇನ್ನೊಬ್ಬ ಯಾತ್ರಿ. ಬಾಹ್ಯಾಕಾಶದಲ್ಲಿರುವ ಇಂಟರ್ನ್ಯಾಷನಲ್ ಸ್ಪೇಸ್ ಸ್ಟೇಷನ್​ಗೆ ಈ ಗಗನನೌಕೆ ತಲುಪಲಿದೆ.

ಸುನೀತಾ ವಿಲಿಯಮ್ಸ್ ಹುಟ್ಟಿದ್ದು ಅಮೆರಿಕದಲ್ಲೇ ಆದರೂ ಅವರ ಕುಟುಂಬದ ಮೂಲ ಗುಜರಾತ್. ಗಗನಯಾತ್ರೆ ಕೈಗೊಂಡ ಭಾರತ ಮೂಲದ ಮೊದಲ ಮಹಿಳೆ ಎನಿಸಿದ್ದಾರೆ. 2006 ಮತ್ತು 2012ರಲ್ಲಿ ಅವರು ಐಎಸ್​ಎಸ್​ಗೆ ಹೋಗಿ ಬಂದಿದ್ದರು. 2006ರಲ್ಲಿ ಬಾಹ್ಯಾಕಾಶಕ್ಕೆ ಹೋದಾಗ ಸುನೀತಾ ವಿಲಿಯಮ್ಸ್ ಭಗವದ್ಗೀತೆ ಪುಸ್ತಕ ತೆಗೆದುಕೊಂಡು ಹೋಗಿದ್ದರು. 2012ರಲ್ಲಿ ಉಪನಿಷದ್ ಗ್ರಂಥವನ್ನು ತೆಗೆದುಕೊಂಡು ಹೋಗಿದ್ದರು. ಈಗ ಮೂರನೇ ಫ್ಲೈಟ್​ನಲ್ಲಿ ಅವರು ಗಣೇಶನ ವಿಗ್ರಹವನ್ನು ಜೊತೆಗೆ ತೆಗೆದುಕೊಂಡು ಹೋಗುತ್ತಿದ್ದಾರೆ.

ಸುನೀತಾ ವಿಲಿಯಮ್ಸ್ ಈವರೆಗೆ ಏಳು ಬಾರಿ ಸ್ಪೇಸ್​ವಾಕ್ ಮಾಡಿದ್ದಾರೆ. 50 ಗಂಟೆ 40 ನಿಮಿಷ ಕಾಲ ಸ್ಪೇಸ್ ವಾಕ್ ಮಾಡಿದ್ದಾರೆ. ಇಷ್ಟು ಅವಧಿ ಸ್ಪೇಸ್ ವಾಕ್ ಮಾಡಿರುವ ಮೊದಲ ಮಹಿಳೆ ಎಂಬ ದಾಖಲೆ ಅವರದ್ದಾಗಿದೆ.

ಇದನ್ನೂ ಓದಿ: ಹೂವಿನ ಜೊತೆ ನಾರೂ ಸ್ವರ್ಗಕ್ಕೆ; ಚೀನಾದ ಮೂನ್ ಮಿಷನ್ ಜೊತೆ ಪಾಕಿಸ್ತಾನದ ಚಂದ್ರ ಯೋಜನೆ; ನೆರೆಯ ದೇಶಕ್ಕೆ ಹೊಸ ಇತಿಹಾಸ

ಅಮೆರಿಕ ವರ್ಷಕ್ಕೆ ಕನಿಷ್ಠ ಎರಡು ಬಾರಿಯಾದರೂ ಗಗನಯಾತ್ರಿಗಳನ್ನು ಬಾಹ್ಯಾಕಾಶಕ್ಕೆ ಕಳುಹಿಸಲು ಯೋಜಿಸಿದೆ. ಸ್ಪೇಸ್​ಎಕ್ಸ್​ ಸಂಸ್ಥೆಯ ಡ್ರಾಗನ್ ಸ್ಪೇಸ್​ಕ್ರಾಫ್ಟ್ ಮತ್ತು ಬೋಯಿಂಗ್ ಸಂಸ್ಥೆಯ ಸ್ಟಾರ್ಲೈನರ್ ಸ್ಪೇಸ್​ಕ್ರಾಫ್ಟ್ ಅನ್ನು ಈ ಕಾರ್ಯಕ್ಕೆ ಬಳಸಲು ಅಮೆರಿಕದ ನಾಸಾ ನಿರ್ಧರಿಸಿದೆ. ಬೋಯಿಂಗ್​ನ ಸ್ಟಾರ್​ಲೈನರ್ ಗಗನನೌಕೆ ಇದೇ ಮೊದಲ ಬಾರಿಗೆ ಬಾಹ್ಯಾಕಾಶಕ್ಕೆ ಯಾತ್ರಿಕರನ್ನು ಕರೆದೊಯ್ಯುತ್ತಿರುವುದು. ಹೀಗಾಗಿ, ಬೋಯಿಂಗ್ ಸಂಸ್ಥೆಗೆ ಈ ಫ್ಲೈಟ್ ಬಹಳ ಮುಖ್ಯ ಘಟ್ಟವಾಗಿದೆ.

ಇನ್ನಷ್ಟು ವಿದೇಶ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ