ಕೊರೊನಾ ಗೆದ್ದವನ ದೇಹಕ್ಕೆ ಮತ್ತೊಮ್ಮೆ ವಕ್ಕರಿಸಿದ ವೈರಸ್​!

ಕೊರೊನಾ ಅನ್ನೋದು ಕೇವಲ ಮಾಮೂಲಿ ಜ್ವರ ಇದ್ದಂಗೆ. ಮನುಷ್ಯನ ದೇಹವನ್ನು ಹೊಕ್ಕುವ ಈ ವೈರಸ್​ ಆತನಿಗೆ ಸ್ವಲ್ಪ ದಿನಗಳ ಕಾಲ ಕಾಟಕೊಟ್ಟು ನಂತರ ತನ್ನ ಪಾಡಿಗೆ ತಾನೇ ಹೊರಟುಹೋಗುತ್ತದೆ ಅಂತಾ ಯಾರಾದ್ರೂ ನಿಮಗೆ ಹೇಳಿದ್ರೇ ಈ ಸ್ಟೋರಿ ನೀವು ಓದಲೇ ಬೇಕು.

ಕಳೆದ ಏಪ್ರಿಲ್​ನಲ್ಲಿ ಕೊರೊನಾ ವಿರುದ್ಧ ಹೋರಾಡಿ ಯಶಸ್ವಿಯಾಗಿ ಗುಣಮುಖನಾಗಿದ್ದೇನೆ ಎಂದು ಸಂಭ್ರಮಿಸುತ್ತಿದ್ದ ಚೀನಾದ ಹಾಂಗ್​ಕಾಂಗ್ ನಗರದ 33 ವರ್ಷದ ನಿವಾಸಿಗೆ ವೈರಸ್​ ಮತ್ತೊಮ್ಮೆ ದೊಡ್ಡ ಶಾಕ್​ ನೀಡಿದೆ. ಹೌದು, ಸೋಂಕಿನಿಂದ ಗುಣಮುಖನಾದ ಬಳಿಕ ಕೆಲಸದ ನಿಮಿತ್ತ ಯೂರೋಪ್​ಗೆ ತೆರಳಿದ್ದ ಈ ಸಾಫ್ಟ್​ವೇರ್​ ಉದ್ಯೋಗಿ ತಾಯ್ನಾಡಿಗೆ ಮರಳಿಬಂದ ವೇಳೆ ಆತನಲ್ಲಿ ಮತ್ತೊಮ್ಮೆ ಸೋಂಕು ಪತ್ತೆಯಾಗಿದೆ ಎಂದು ಟೆಕ್ಕಿಯ ತಪಾಸಣೆ ನಡೆಸಿದ ಹಾಂಗ್​ಕಾಂಗ್ ವಿಶ್ವವಿದ್ಯಾಲಯದ ಸಂಶೋಧನಾಕಾರರು ಮಾಹಿತಿ ನೀಡಿದ್ದಾರೆ. ಇದರಿಂದ ಈ 33 ವರ್ಷದ ಸೋಂಕಿತ ಇಡೀ ಜಗತ್ತಿನಲ್ಲಿ ಕೊರೊನಾ ವೈರಸ್​ನಿಂದ ಮತ್ತೊಮ್ಮೆ ಅಟ್ಯಾಕ್​ ಆಗಿರೋ ಮೊದಲನೇ ದಾಖಲಿತ ಕೇಸ್​ ಎಂದು ತಿಳಿಸಿದ್ದಾರೆ.

ಎರಡನೇ ಬಾರಿ ಕೊರೊನಾ ಪಾಸಿಟಿವ್​ ಆದ ಸೋಂಕಿತನು ಕೊರೊನಾದ ಯಾವುದೇ ಗುಣಲಕ್ಷಣಗಳನ್ನ ಪ್ರದರ್ಶಿಸಿಲ್ಲವಂತೆ. ಈತನ ಮೇಲೆ ಪರೀಕ್ಷೆ ನಡೆಸಿದ ವೈದ್ಯರಿಗೆ ಟೆಕ್ಕಿಗೆ ಕೊರೊನಾದ ಎರಡು ಪ್ರಭೇದಗಳು ದಾಳಿ ಮಾಡಿದೆ ಎಂದು ತಿಳಿದುಬಂದಿದೆ. ಜೊತೆಗೆ, ಮನುಷ್ಯನನ್ನ ಪದೇ ಪದೇ ಕಾಡುವ ಸಾಮಾನ್ಯ ಶೀತದಂತೆ ಈ ಕೊರೊನಾ ವೈರಸ್ ಸಹ ಮತ್ತೊಮ್ಮೆ ತಗಲುವ ಸಾಧ್ಯತೆಯಿದೆ ಎಂಬ ಮಾಹಿತಿ ನೀಡಿದ್ದಾರೆ.

ಇದಲ್ಲದೆ, ಸೋಂಕಿತನು ಕೊರೊನಾದ ಗುಣಲಕ್ಷಣಗಳನ್ನ ತೋರಿಸದೆ ಇದ್ದರೂ ತನ್ನಿಂದ ಇತರರಿಗೆ ಸೋಂಕು ಹರಡುವ ಸಾಧ್ಯತೆಯಿದೆ ಎಂದು ವೈದ್ಯಕೀಯ ತಜ್ಞರು ತಿಳಿಸಿದ್ದಾರೆ. ಜೊತೆಗೆ, ಕೊರೊನಾದಿಂದ ಗುಣಮುಖರಾದೋರಿಗೆ ಮತ್ತೊಮ್ಮೆ ವೈರಸ್​ ವಕ್ಕರಿಸುವ ಸಾಧ್ಯತೆ ಅವರವರ ರೋಗ ನಿರೋಧಕ ಶಕ್ತಿ ಮತ್ತು ಎರಡನೇ ಬಾರಿ ಅಟ್ಯಾಕ್​ ಮಾಡುವ ವೈರಸ್​ನ ಪ್ರಭೇದದ ಮೇಲೆ ನಿಶ್ಚಯವಾಗಲಿದೆ ಎಂದು ಅಮೆರಿಕಾದ ಸಾಂಕ್ರಾಮಿಕ ರೋಗ ತಜ್ಞ ಥಾಮಸ್​ ಫೈಲ್ ಅಭಿಪ್ರಾಯಪಟ್ಟಿದ್ದಾರೆ.