ಅಮೆರಿಕ ಅಧ್ಯಕ್ಷ ಜೋ ಬೈಡೆನ್ ಆಡಳಿತದಲ್ಲಿದ್ದಾರೆ 130ಕ್ಕಿಂತಲೂ ಹೆಚ್ಚು ಭಾರತೀಯ ಮೂಲದವರು

ವಾಷಿಂಗ್ಟನ್: ಅಮೆರಿಕ ಅಧ್ಯಕ್ಷ ಜೋ ಬೈಡೆನ್ (US President Joe Biden) ಅವರು ಇಲ್ಲಿಯವರೆಗೆ 130 ಕ್ಕೂ ಹೆಚ್ಚು ಭಾರತೀಯ-ಅಮೆರಿಕನ್ನರನ್ನು ತಮ್ಮ ಆಡಳಿತದಲ್ಲಿ ಪ್ರಮುಖ ಸ್ಥಾನಗಳಿಗೆ ನೇಮಿಸಿದ್ದಾರೆ. ಇದು ಅಮೆರಿಕದ ಜನಸಂಖ್ಯೆಯ ಸುಮಾರು ಒಂದು ಶೇಕಡಾವನ್ನು ಹೊಂದಿರುವ ಸಮುದಾಯದಿಂದ ಉತ್ತಮ ಪ್ರಾತಿನಿಧ್ಯವಾಗಿದೆ. ಈ ಮೂಲಕ ಬೈಡೆನ್ 2020 ರಲ್ಲಿ ಅಧ್ಯಕ್ಷೀಯ ಅಭ್ಯರ್ಥಿಯಾಗಿ ಸಮುದಾಯಕ್ಕೆ ನೀಡಿದ ಭರವಸೆಯನ್ನು ಪೂರೈಸಿದ್ದಾರೆ. ಅದೇ ವೇಳೆ 80 ಕ್ಕೂ ಹೆಚ್ಚು ಭಾರತೀಯ-ಅಮೆರಿಕನ್ನರನ್ನು ನೇಮಿಸಿದ್ದ ಅವರ ಹಿಂದಿನ ಅಧ್ಯಕ್ಷರಾದ ಡೊನಾಲ್ಡ್ ಟ್ರಂಪ್ ಮತ್ತು  ಬರಾಕ್ ಒಬಾಮ ಅವರ ದಾಖಲೆಯನ್ನು ಸಹ ಬೈಡೆನ್ ಮುರಿದಿದ್ದಾರೆ. ಒಬಾಮ ತಮ್ಮ ಎಂಟು ವರ್ಷಗಳ ಅಧ್ಯಕ್ಷರಾಗಿದ್ದ ಅವಧಿಯಲ್ಲಿ 60 ಕ್ಕೂ ಹೆಚ್ಚು ಭಾರತೀಯ-ಅಮೆರಿಕನ್ನರನ್ನು ಪ್ರಮುಖ ಸ್ಥಾನಗಳಿಗೆ ನೇಮಿಸಿದ್ದರು. ಯುಎಸ್ ಹೌಸ್ ಆಫ್ ರೆಪ್ರೆಸೆಂಟೇಟಿವ್ಸ್‌ನಲ್ಲಿ ನಾಲ್ವರು ಸೇರಿದಂತೆ ವಿವಿಧ ರಾಜ್ಯ ಮತ್ತು ಫೆಡರಲ್ ಹಂತಗಳಲ್ಲಿ 40 ಕ್ಕೂ ಹೆಚ್ಚು ಭಾರತೀಯ-ಅಮೆರಿಕನ್ನರು ಚುನಾಯಿತರಾಗಿದ್ದಾರೆ. 20 ಕ್ಕೂ ಹೆಚ್ಚು ಭಾರತೀಯ-ಅಮೆರಿಕನ್ನರು ಪ್ರಮುಖ ಅಮೆರಿಕ ಕಂಪನಿಗಳಲ್ಲಿದ್ದಾರೆ.

ರೊನಾಲ್ಡ್ ರೇಗನ್ ಅವರ ಅವಧಿಯಲ್ಲಿ ಮೊಟ್ಟಮೊದಲ ಅಧ್ಯಕ್ಷೀಯ ನೇಮಕಾತಿಯನ್ನು ಮಾಡಲಾಯಿತು, ಈ ಬಾರಿ ಬೈಡೆನ್ ಅವರ ಆಡಳಿತದ ಬಹುತೇಕ ಎಲ್ಲಾ ಇಲಾಖೆಗಳು ಮತ್ತು ಏಜೆನ್ಸಿಗಳಿಗೆ ಭಾರತೀಯ-ಅಮೆರಿಕನ್ನರನ್ನು ನೇಮಿಸಿದ್ದಾರೆ.

ಭಾರತೀಯ-ಅಮೆರಿಕನ್ನರು ಸೇವಾ (ಸೇವೆ) ಪ್ರಜ್ಞೆ ಇರುವವರಾಗಿದ್ದು ಇದು ಖಾಸಗಿ ವಲಯದ ಬದಲಿಗೆ ಸಾರ್ವಜನಿಕ ಸೇವೆಯಲ್ಲಿ ಸ್ಥಾನಗಳನ್ನು ಪಡೆಯಲು ಅವರ ಉತ್ಸಾಹದಲ್ಲಿ ಪ್ರತಿಫಲಿಸುತ್ತದೆ ಎಂದು ಸಿಲಿಕಾನ್ ವ್ಯಾಲಿ ಮೂಲದ ಉದ್ಯಮಿ, ಲೋಕೋಪಕಾರಿ ಮತ್ತು ಸಾಹಸೋದ್ಯಮ ಬಂಡವಾಳಗಾರ ಎಂ ಆರ್ ರಂಗಸ್ವಾಮಿ ಹೇಳಿರುವುದಾಗಿ ಪಿಟಿಐ ವರದಿ ಮಾಡಿದ್ದಾರೆ.

ಬೈಡೆನ್ ಆಡಳಿತವು ಇಲ್ಲಿಯವರೆಗಿನ ಅತಿದೊಡ್ಡ ಗುಂಪನ್ನು ನೇಮಿಸಿದೆ ಅಥವಾ ನಾಮನಿರ್ದೇಶನ ಮಾಡಿದೆ. ನಮ್ಮ ಜನರು ಮತ್ತು ಯುನೈಟೆಡ್ ಸ್ಟೇಟ್ಸ್‌ಗಾಗಿ ಅವರ ಸಾಧನೆಗಳ ಬಗ್ಗೆ ನಾವು ಹೆಮ್ಮೆಪಡುತ್ತೇವೆ ಎಂದು ಹೇಳಬೇಕಾಗಿಲ್ಲ ಎಂದು ರಂಗಸ್ವಾಮಿ ಹೇಳಿದರು. ರಂಗಸ್ವಾಮಿ ಅವರು ಭಾರತೀಯ ಮೂಲದ ನಾಯಕರಿಗಾಗಿ ಯುಎಸ್ ಮೂಲದ ಜಾಗತಿಕ ಸಂಸ್ಥೆಯಾದ ಇಂಡಿಯಾಸ್ಪೊರಾ ಸಂಸ್ಥಾಪಕ ಮತ್ತು ಮುಖ್ಯಸ್ಥರಾಗಿದ್ದಾರೆ. ಇಂಡಿಯಾಸ್ಪೊರಾ ಭಾರತೀಯ ಮೂಲದ ನಾಯಕರ ಲೆಕ್ಕಾಚಾರವನ್ನು ಹೊಂದಿರುತ್ತದೆ.

ಸೆನೆಟರ್ ದಿನಗಳಿಂದಲೂ ಭಾರತೀಯ ಸಮುದಾಯಗಳೊಂದಿಗೆ ನಿಕಟ ಬಾಂಧವ್ಯ ಇಟ್ಟುಕೊಂಡಿರುವ ಬೈಡೆನ್ ತಮ್ಮ ಭಾರತೀಯ ಸಂಬಂಧದ ಬಗ್ಗೆ ಆಗಾಗ್ಗೆ ತಮಾಷೆ ಮಾಡುತ್ತಾನೆ. ಅವರು 2020 ರಲ್ಲಿ ಭಾರತೀಯ ಮೂಲದ ಕಮಲಾ ಹ್ಯಾರಿಸ್ ಅವರನ್ನು ಉಪಾಧ್ಯಕ್ಷೆ ಮಾಡುವ ಮೂಲಕ ಇತಿಹಾಸ ನಿರ್ಮಿಸಿದರು. ಇಂಡಿಯಾಸ್ಪೊರಾ ಸಂಗ್ರಹಿಸಿದ ವೈಟ್ ಹೌಸ್‌ನಲ್ಲಿರುವ ಭಾರತೀಯ-ಅಮೆರಿಕನ್ನರ ಪಟ್ಟಿಯು ಶ್ವೇತಭವನದ ಒಳಗೆ ಅಥವಾ ಬೈಡೆನ್‌ನ ಓವಲ್ ಆಫೀಸ್‌ನಲ್ಲಿ ಭಾರತೀಯ-ಅಮೆರಿಕನ್ ಉಪಸ್ಥಿತಿಯನ್ನು ಹೊಂದಿರದ ಕೆಲವು ಸಭೆಗಳು ಮಾತ್ರ ಇರುತ್ತವೆ ಎಂದಿದೆ.

ಬೈಡೆನ್ ಅವರ ಭಾಷಣ ಬರಹಗಾರ ವಿನಯ್ ರೆಡ್ಡಿ ಕೋವಿಡ್ 19 ನಿರ್ವಹಣೆಯಲ್ಲಿ ಅವರ ಮುಖ್ಯ ಸಲಹೆಗಾರ ಡಾ ಆಶಿಶ್ ಝಾ, ಹವಾಮಾನ ನೀತಿಯ ಸಲಹೆಗಾರ ಸೋನಿಯಾ ಅಗರ್ವಾಲ್, ಅಪರಾಧ ನ್ಯಾಯದ ವಿಶೇಷ ಸಹಾಯಕ ಚಿರಾಗ್ ಬೈನ್ಸ್, ಸಿಬ್ಬಂದಿ ನಿರ್ವಹಣೆಯ ಕಚೇರಿಯ ಮುಖ್ಯಸ್ಥ ಕಿರಣ್ ಅಹುಜಾ, ಅವರ ಹಿರಿಯ ಸಲಹೆಗಾರರಾದ ನೀರಾ ಟಂಡೆನ್ ಮತ್ತು ಅವರ ಸಲಹೆಗಾರರಾಗಿ ರಾಹುಲ್ ಗುಪ್ತಾ ಇದ್ದಾರೆ.

ಕಳೆದ ವಾರ ಅಮೆರಿಕದಲ್ಲಿನ ಭಾರತದ ರಾಯಭಾರಿ ತರಂಜಿತ್ ಸಿಂಗ್ ಸಂಧು ಅವರು ಸ್ವಾತಂತ್ರ್ಯ ದಿನಾಚರಣೆಯ ಸಂದರ್ಭದಲ್ಲಿ ಇಂಡಿಯಾ ಹೌಸ್‌ನಲ್ಲಿ ಸ್ವಾಗತವನ್ನು ಆಯೋಜಿಸಿದಾಗ, ಅವರ ಆಡಳಿತದ ಭಾರತೀಯ-ಅಮೆರಿಕನ್ನರು ಅಮೆರಿಕ ಸರ್ಕಾರದ ಬಹುತೇಕ ಎಲ್ಲಾ ಪ್ರಮುಖ ಶಾಖೆಗಳನ್ನು ಪ್ರತಿನಿಧಿಸುತ್ತಿದ್ದರು. ಯುವ ವೇದಾಂತ್ ಪಟೇಲ್ ಈಗ ರಾಜ್ಯ ಇಲಾಖೆಯಲ್ಲಿ ಉಪ ವಕ್ತಾರರಾಗಿದ್ದರೆ, ಗರಿಮಾ ವರ್ಮಾ ಪ್ರಥಮ ಮಹಿಳೆಯ ಕಚೇರಿಯಲ್ಲಿ ಡಿಜಿಟಲ್ ನಿರ್ದೇಶಕರಾಗಿದ್ದಾರೆ. ಬೈಡೆನ್ ಹಲವಾರು ಭಾರತೀಯ-ಅಮೆರಿಕನ್ನರನ್ನು ಪ್ರಮುಖ ರಾಯಭಾರಿ ಸ್ಥಾನಗಳಿಗೆ ನಾಮನಿರ್ದೇಶನ ಮಾಡಿದ್ದಾರೆ.

ಇಂಡಿಯಾಸ್ಪೋರಾ ಸಿದ್ಧಪಡಿಸಿದ ಪಟ್ಟಿಯ ಪ್ರಕಾರ 40ಕ್ಕೂ ಹೆಚ್ಚು ಭಾರತೀಯ-ಅಮೆರಿಕನ್ನರು ದೇಶಾದ್ಯಂತ ವಿವಿಧ ಕಚೇರಿಗಳಿಗೆ ಆಯ್ಕೆಯಾಗಿದ್ದಾರೆ. ಡಾ ಅಮಿ ಬೇರಾ, ರೋ ಖನ್ನಾ, ರಾಜಾ ಕೃಷ್ಣಮೂರ್ತಿ ಮತ್ತು ಪ್ರಮೀಳಾ ಜಯಪಾಲ್ ಈ ನಾಲ್ವರು ಹೌಸ್ ಆಫ್ ರೆಪ್ರೆಸೆಂಟೇಟಿವ್ಸ್‌ನಲ್ಲಿದ್ದಾರೆ. ನಾಲ್ವರು ಮೇಯರ್‌ಗಳೂ ಸೇರಿದ್ದಾರೆ.

ಭಾರತೀಯ-ಅಮೆರಿಕನ್ನರಾದ ಗೂಗಲ್‌ನ ಸುಂದರ್ ಪಿಚೈ ಮತ್ತು ಮೈಕ್ರೋಸಾಫ್ಟ್‌ನ ಸತ್ಯ ನಾಡೆಲ್ಲಾ ನೇತೃತ್ವದಲ್ಲಿ, ಎರಡು ಡಜನ್‌ಗಿಂತಲೂ ಹೆಚ್ಚು ಭಾರತೀಯ-ಅಮೆರಿಕನ್ನರು ಅಮೆರಿಕ ಕಂಪನಿಗಳ ಮುಖ್ಯಸ್ಥರಾಗಿದ್ದಾರೆ. ಇತರರಲ್ಲಿ ಅಡೋಬ್‌ನ ಶಾಂತನು ನಾರಾಯಣ್, ಜನರಲ್ ಅಟಾಮಿಕ್ಸ್‌ನ ವಿವೇಕ್ ಲಾಲ್, ಡೆಲಾಯ್ಟ್‌ನ ಪುನಿತ್ ರೆಂಜನ್, ಫೆಡೆಕ್ಸ್‌ನ ರಾಜ್ ಸುಬ್ರಮಣ್ಯಂ ಸೇರಿದ್ದಾರೆ.

Published On - 5:05 pm, Wed, 24 August 22