ಕೊರೊನಾ ವೈರಾಣು ಮೂಲ ಪತ್ತೆಗೆ ಚೀನಾದ ವುಹಾನ್ ಪ್ರಯೋಗಾಲಯಕ್ಕೆ ಕಾಲಿಟ್ಟ WHO ತಂಡ
Coronavirus ಮೂಲ ಪತ್ತೆಹಚ್ಚುವ ವಿಚಾರದಲ್ಲಿ ವಿಶ್ವ ಆರೋಗ್ಯ ಸಂಸ್ಥೆಯ ತಂಡದ ಮೇಲೆ ಅತ್ಯಂತ ದೊಡ್ಡ ಜವಾಬ್ದಾರಿ ಇದ್ದು, ಚೀನಾದ ಒಳಗೆ ಮತ್ತು ಹೊರಗಿನಿಂದಲೂ ಕೊರೊನಾ ಮೂಲವನ್ನು ಬಹಿರಂಗಪಡಿಸುವಂತೆ ರಾಜಕೀಯ ಒತ್ತಡಗಳು ಬರುತ್ತಿವೆ ಎನ್ನಲಾಗಿದೆ.
ಕೊರೊನಾ ವೈರಾಣುವಿನ ಜನ್ಮಭೂಮಿ ಎಂಬ ಅಪಖ್ಯಾತಿಗೆ ತುತ್ತಾಗಿರುವ ಚೀನಾದ ವುಹಾನ್ನಲ್ಲಿರುವ ಪ್ರಯೋಗಾಲಯಕ್ಕೆ ವಿಶ್ವ ಆರೋಗ್ಯ ಸಂಸ್ಥೆಯ ತಂಡ ಭೇಟಿ ನೀಡಿದೆ. ಇಂದು ಮುಂಜಾನೆ ಪ್ರಯೋಗಾಲಯಕ್ಕೆ ತೆರಳಿರುವ ತಜ್ಞರ ತಂಡ ಕೊರೊನಾ ವೈರಾಣುವಿನ ಉಗಮಕ್ಕೆ ಕಾರಣವಾದ ಅಂಶಗಳನ್ನು ಪತ್ತೆಹಚ್ಚುವ ಪ್ರಯತ್ನದಲ್ಲಿದೆ.
ವೈರಾಣು ತಜ್ಞ ಪೀಟರ್ ಬೆನ್ ಎಂಬರೆಕ್ ನೇತೃತ್ವದಲ್ಲಿ ರೂಪುಗೊಂಡಿರುವ ವಿಶ್ವ ಆರೋಗ್ಯ ಸಂಸ್ಥೆಯ ತಂಡ, ಇಂದು ಬೆಳಗ್ಗೆಯೇ ವುಹಾನ್ ನಗರದಲ್ಲಿರುವ ಪ್ರಯೋಗಾಲಯಕ್ಕೆ ಕಾಲಿಟ್ಟಿದೆ. ಸದ್ಯ ಇಡೀ ಜಗತ್ತು ಕೊರೊನಾಕ್ಕೆ ಕಾರಣ ಚೀನಾ ಎಂದು ಬೊಟ್ಟು ಮಾಡುತ್ತಿದ್ದರೂ ಡ್ರ್ಯಾಗನ್ ದೇಶ ಮಾತ್ರ ಈ ಆರೋಪವನ್ನು ತಿರಸ್ಕರಿಸುತ್ತಲೇ ಇದೆ. ಆದರೆ, ಇಂದು ಭೇಟಿ ನೀಡಿರುವ ತಂಡ ಕೊರೊನಾದ ಹಿಂದಿನ ರಹಸ್ಯವನ್ನು ಬಯಲು ಮಾಡಲಿದೆಯಾ ಎಂಬ ಕುತೂಹಲ ಜಗತ್ತಿನಾದ್ಯಂತ ಗರಿಗೆದರಿದೆ.
ಈ ಕುರಿತು ಪ್ರತಿಕ್ರಿಯೆ ನೀಡಿರುವ ತಂಡದ ಸದಸ್ಯ ಮತ್ತು ಎಕೋ ಹೆಲ್ತ್ ಅಲಯನ್ಸ್ ಮುಖ್ಯಸ್ಥ ಪೀಟರ್ ದಾಸ್ಝಕ್, ಇವತ್ತು ನಮ್ಮ ಪಾಲಿಗೆ ಅತ್ಯಂತ ಮಹತ್ವಪೂರ್ಣ ದಿನವಾಗಲಿದೆ ಎಂಬ ನಂಬಿಕೆಯಲ್ಲಿ ಆಗಮಿಸಿದ್ದೇವೆ. ಇಲ್ಲಿನ ಪ್ರಮುಖ ವ್ಯಕ್ತಿಗಳನ್ನು ಭೇಟಿ ಮಾಡಿ ನಮ್ಮಲ್ಲಿರುವ ಸಂದೇಹ ಮತ್ತು ಪ್ರಶ್ನೆಗಳನ್ನು ಮುಂದಿಡಲಿದ್ದೇವೆ. ಕೇಳಬೇಕಾದ ವಿಚಾರಗಳನ್ನು ಕೇಳಲಿದ್ದೇವೆ ಎಂದು ತಿಳಿಸಿದ್ದಾರೆ.
ಕೆಲದಿನಗಳ ಹಿಂದೆಯೇ ಚೀನಾಕ್ಕೆ ಆಗಮಿಸಿದ್ದ ಈ ವಿಶೇಷ ತಂಡ ಇದೀಗ 14 ದಿನಗಳ ಕ್ವಾರಂಟೈನ್ ಅವಧಿ ಮುಗಿಸಿ, ಕೆಲ ರಾಜತಾಂತ್ರಿಕ ನಿಯಮಗಳನ್ನು ಪಾಲಿಸಿದ ನಂತರ ಅಧ್ಯಯನಕ್ಕೆ ಮುಂದಾಗಿದೆ. ಸದ್ಯ ವಿಶ್ವ ಆರೋಗ್ಯ ಸಂಸ್ಥೆಯ ತಂಡದ ಮೇಲೆ ಅತ್ಯಂತ ದೊಡ್ಡ ಜವಾಬ್ದಾರಿ ಇದ್ದು, ಚೀನಾದ ಒಳಗೆ ಮತ್ತು ಹೊರಗಿನಿಂದಲೂ ಕೊರೊನಾ ಮೂಲವನ್ನು ಬಹಿರಂಗಪಡಿಸುವಂತೆ ರಾಜಕೀಯ ಒತ್ತಡಗಳು ಬರುತ್ತಿವೆ ಎನ್ನಲಾಗಿದೆ.
