Union Budget 2023: ಹಿರಿಯ ನಾಗರಿಕರಿಗೆ ಶುಭ ಸುದ್ದಿ; ಠೇವಣಿ ಮಿತಿ 30 ಲಕ್ಷ ರೂ.ಗೆ ಹೆಚ್ಚಳ

ನವದೆಹಲಿ: ಹಿರಿಯ ನಾಗರಿಕರ ಉಳಿತಾಯ ಯೋಜನೆಯಡಿ (Senior Citizens Savings Scheme) ಇಡಬಹುದಾದ ಠೇವಣಿ ಮಿತಿಯನ್ನು ಕೇಂದ್ರ ಸರ್ಕಾರ ಈ ಬಾರಿಯ ಬಜೆಟ್​ನಲ್ಲಿ (Union Budget 2023) 15 ಲಕ್ಷ ರೂ.ನಿಂದ 30 ಲಕ್ಷ ರೂ.ಗೆ ಹೆಚ್ಚಳ ಮಾಡಿದೆ. ಈ ಕುರಿತು ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಬಜೆಟ್ ಮಂಡನೆ ವೇಳೆ ಘೋಷಣೆ ಮಾಡಿದರು. ಹಿರಿಯ ನಾಗರಿಕರ ಉಳಿತಾಯ ಯೋಜನೆಯಡಿ 2023ರ ಜನವರಿ – ಮಾರ್ಚ್ ಅವಧಿಗೆ ಶೇ 8ರ ಬಡ್ಡಿ ದರವನ್ನು ಜನವರಿ ಆರಂಭದಲ್ಲಿ ಸರ್ಕಾರ ನಿಗದಿ ಮಾಡಿತ್ತು. ಹಿರಿಯ ನಾಗರಿಕರ ಉಳಿತಾಯಕ್ಕೆ ಮತ್ತಷ್ಟು ಪ್ರೋತ್ಸಾಹ ನೀಡುವ ದೃಷ್ಟಿಯಿಂದ ಮಿತಿ ಹೆಚ್ಚಳ ಮಾಡಲಾಗಿದೆ ಎಂದು ಸರ್ಕಾರ ತಿಳಿಸಿದೆ. ಹಿರಿಯ ನಾಗರಿಕರ ಉಳಿತಾಯ ಯೋಜನೆಯಡಿ ಉಳಿತಾಯಕ್ಕೆ ಕನಿಷ್ಠ 1,000 ರೂ. ಇರುವುದು ಮುಂದುವರಿಯಲಿದೆ. 5 ವರ್ಷಗಳ ಮೆಚ್ಯೂರಿಟಿ ಅವಧಿಯ ಯೋಜನೆ ಇದಾಗಿದೆ. ಜತೆಗೆ ಮಾಸಿಕ ಆದಾಯ ಮಾದರಿಯ ಠೇವಣಿಗಳ ಗರಿಷ್ಠ ಮಿತಿಯನ್ನು 4.5 ಲಕ್ಷ ರೂ.ನಿಂದ 9 ಲಕ್ಷ ರೂ.ವರೆಗೆ ಹೆಚ್ಚಿಸಲಾಗಿದೆ.

‘ಹಿರಿಯ ನಾಗರಿಕರ ಉಳಿತಾಯದ ಮಿತಿಯನ್ನು ಹೆಚ್ಚಿಸಿರುವುದು ಈ ಬಜೆಟ್​ನ ಸಕಾರಾತ್ಮಕ ಅಂಶ. ಸದ್ಯ ಈ ಯೋಜನೆಯಡಿ ವಾರ್ಷಿಕ ಶೇ 8ರ ಬಡ್ಡಿ ನೀಡಲಾಗುತ್ತಿದೆ. ಇದೀಗ ಮಿತಿ ಹೆಚ್ಚಿಸಿರುವುದರಿಂದ ಹಿರಿಯ ನಾಗರಿಕರು ದೊಡ್ಡ ಮೊತ್ತದ ಹೂಡಿಕೆದಾರರಾಗಲು ಅನುವು ಮಾಡಿಕೊಟ್ಟಂತಾಗಿದೆ’ ಎಂದು ಫಿಂಟೂ ಸಂಸ್ಥಾಪಕ ಮನೀಷ್ ಪಿ. ಅಭಿಪ್ರಾಯಪಟ್ಟಿದ್ದಾರೆ.

ಇದನ್ನೂ ಓದಿ: Income Tax Rebate: ಸಿಹಿ ಸುದ್ದಿ; ಆದಾಯ ತೆರಿಗೆ ವಿನಾಯಿತಿ ಮಿತಿ 7 ಲಕ್ಷ ರೂ.ಗೆ ವಿಸ್ತರಣೆ

ಇಷ್ಟೇ ಅಲ್ಲದೆ, ಸ್ವಾತಂತ್ರ್ಯದ ಅಮೃತ ಮಹೋತ್ಸವ ಅಥವಾ ಆಜಾದಿ ಕಾ ಅಮೃತ್ ಮಹೋತ್ಸವ್ ಅಂಗವಾಗಿ ಮಹಿಳೆಯರಿಗಾಗಿ ಸರ್ಕಾರ ‘ಮಹಿಳಾ ಸಮ್ಮಾನ್ ಬಚತ್ ಪತ್ರ’ ಸಣ್ಣ ಉಳಿತಾಯ ಯೋಜನೆ ಆರಂಭಿಸಲಿದೆ. ಒಂದು ಬಾರಿಯ ಸಣ್ಣ ಉಳಿತಾಯ ಯೋಜನೆ ಇದಾಗಿದ್ದು, ಎರಡು ವರ್ಷಗಳ ಅವಧಿಗೆ ಠೇವಣಿ ಇಡಬಹುದಾಗಿದೆ. 2025ರ ಮಾರ್ಚ್​​​ವರೆಗಿನ ಅವಧಿಗೆ ಈ ಯೋಜನೆ ಮುಕ್ತವಾಗಿರಲಿದೆ. 2 ಲಕ್ಷ ರೂ.ವರೆಗೆ ಈ ಯೋಜನಯಡಿ ಹೂಡಿಕೆ ಮಾಡಬಹುದಾಗಿದ್ದು, ಶೇ 7.5ರ ಬಡ್ಡಿ ದೊರೆಯಲಿದೆ.

ಬ್ಯಾಂಕ್​ಗಿಂತ ಹೆಚ್ಚು ಸಿಗುತ್ತೆ ಬಡ್ಡಿ

ಹಿರಿಯ ನಾಗರಿಕರ ಉಳಿತಾಯ ಯೋಜನೆ ಠೇವಣಿ ಅಥವಾ ಎಸ್​ಸಿಎಸ್​ಎಸ್ ಬಡ್ಡಿ ದರ ಈಗ ಶೇ 8 ಆಗಿದೆ. ಇದು ಬ್ಯಾಂಕ್​ಗಳು ಹಿರಿಯ ನಾಗರಿಕರ ಠೇವಣಿಗೆ ನೀಡುವ ಬಡ್ಡಿಗಿಂತಲೂ 50ರಿಂದ 75 ಮೂಲಾಂಶದಷ್ಟು ಹೆಚ್ಚಾಗಿದೆ. 60 ವರ್ಷ ಮೇಲ್ಪಟ್ಟವರು ಈ ಠೇವಣಿ ಇಡಬಹುದಾಗಿದೆ. 60 ವರ್ಷಕ್ಕಿಂತ ಕಡಿಮೆ ವಯಸ್ಸಿನವರು, 55 ವರ್ಷ ಮೇಲ್ಪಟ್ಟವರಾದರೆ ಸ್ವಯಂ ನಿವೃತ್ತಿ ಯೋಜನೆಯಡಿ ಠೇವಣಿ ಇಡಬಹುದಾಗಿದೆ.

ಬಜೆಟ್​ ಕುರಿತ ಮತ್ತಷ್ಟು ಮಾಹಿತಿಗೆ ಇಲ್ಲಿ ಕ್ಲಿಕ್ ಮಾಡಿ