ಅದಾನಿ ವಿಲ್ಮರ್​ನ ಸಂಪೂರ್ಣ ಪಾಲು ಬಿಟ್ಟುಕೊಡಲು ಅದಾನಿ ಗ್ರೂಪ್ ಮುಂದು; ಎಣ್ಣೆ ಬಿಸಿನೆಸ್​ನಿಂದ ಅದಾನಿ ಹೊರಬರೋದು ಯಾಕೆ?

ನವದೆಹಲಿ, ನವೆಂಬರ್ 6: ಅದಾನಿ ಗ್ರೂಪ್​ಗೆ ಸೇರಿದ ಅದಾನಿ ವಿಲ್ಮರ್ (Adani Wilmar) ಕಂಪನಿಯ ಶೇ. 40ಕ್ಕೂ ಹೆಚ್ಚು ಪಾಲನ್ನು ಮಾರಾಟಕ್ಕಿಡಲಾಗಿರುವುದು ತಿಳಿದುಬಂದಿದೆ. ವರದಿ ಪ್ರಕಾರ, ಅದಾನಿ ವಿಲ್ಮರ್​ನಲ್ಲಿ ಅದಾನಿ ಗ್ರೂಪ್ ಶೇ. 43.97ರಷ್ಟು ಪಾಲು ಇದೆ. ಇಷ್ಟನ್ನೂ ಗ್ರೂಪ್ ಮಾರಲು ಹೊರಟಿದೆ. ವಿವಿಧ ಬಹುರಾಷ್ಟ್ರೀಯ ಕಂಪನಿಗಳ ಜೊತೆ ಅದಾನಿ ಗ್ರೂಪ್ ಮಾತುಕತೆ ನಡೆಸಲು ಮುಂದಾಗಿದ್ದು, ಇನ್ನೊಂದು ತಿಂಗಳಲ್ಲಿ ಒಪ್ಪಂದಕ್ಕೆ ಸಹಿ ಬೀಳಬಹುದು ಎನ್ನಲಾಗಿದೆ. ಎಕನಾಮಿಕ್ ಟೈಮ್ಸ್ ಪತ್ರಿಕೆಯಲ್ಲಿ ಈ ಬಗ್ಗೆ ಇಂದು ವರದಿ ಪ್ರಕಟವಾಗಿದೆ. ಕೇವಲ ಮೂಲಗಳನ್ನು ಉಲ್ಲೇಖಿಸಿ ಪ್ರಕಟಿಸಲಾಗಿರುವ ಈ ವರದಿ ಪ್ರಕಾರ ಅದಾನಿ ವಿಲ್ಮರ್​ನಲ್ಲಿರುವ ಶೇ. 43.97ರಷ್ಟು ಪಾಲು 2.5ರಿಂದ 3 ಬಿಲಿಯನ್ ಡಾಲರ್ (ಸುಮಾರು 20ರಿಂದ 25 ಸಾವಿರ ಕೋಟಿ ರೂ) ಮೊತ್ತಕ್ಕೆ ಮಾರಾಟವಾಗಬಹುದು ಎಂಬ ನಿರೀಕ್ಷೆಯಲ್ಲಿ ಗೌತಮ್ ಅದಾನಿ ಇದ್ದಾರೆ.

ಅದಾನಿ ವಿಲ್ಮರ್ ಸಂಸ್ಥೆ ಅಡಿಯಲ್ಲಿ ಫಾರ್ಚೂನ್ ಬ್ರ್ಯಾಂಡ್​ನ ಹಲವು ಅಡುಗೆ ಎಣ್ಣೆಗಳು ಮಾರುಕಟ್ಟೆಯಲ್ಲಿವೆ. ಅದರ ಜೊತೆಗೆ ಐಸ್ ಕ್ರೀಮ್, ಬಿಸ್ಕತ್ ಇತ್ಯಾದಿ ಹಲವು ಅಡುಗೆ ವಸ್ತುಗಳನ್ನು ಸಂಸ್ಥೆ ತಯಾರಿಸುತ್ತದೆ. ಸಿಂಗಾಪುರದ ವಿಲ್ಮರ್ ಇಂಟರ್ನ್ಯಾಷನಲ್ ಮತ್ತು ಅದಾನಿ ಗ್ರೂಪ್ ಜೊತೆ ಸೇರಿ 1999ರಲ್ಲಿ ಈ ಸಂಸ್ಥೆಯನ್ನು ಸ್ಥಾಪಿಸಿದ್ದವು. ಇದರಲ್ಲಿ ಅದಾನಿ ಗ್ರೂಪ್ ಶೇ. 43.97ರಷ್ಟು ಪಾಲು ಹೊಂದಿದರೆ, ವಿಲ್ಮರ್ ಇಂಟರ್ನ್ಯಾಷನಲ್ ಶೇ. 43.87ರಷ್ಟು ಪಾಲು ಹೊಂದಿದೆ. ಇದೀಗ ತನ್ನ ಅಷ್ಟೂ ಪಾಲನ್ನು ಯಾವುದಾದರೂ ಸಂಸ್ಥೆಗೆ ಮಾರಲು ಅದಾನಿ ಗ್ರೂಪ್ ಹೊರಟಿದೆ.

ಇದನ್ನೂ ಓದಿ: Inspiring: ಸ್ಲಂನಲ್ಲಿ ಬೆಳೆದು, 12 ವರ್ಷಕ್ಕೆ ಮದುವೆಯಾಗಿ, ಕೌಟುಂಬಿಕ ಹಿಂಸಾಚಾರಕ್ಕೊಳಗಾದರೂ ಜಗ್ಗದೇ ಬೆಳೆದ ಕಲ್ಪನಾ ಸರೋಜ್; ಇವತ್ತು 7 ಕಂಪನಿಗಳ ಒಡತಿ

ಅದಾನಿ ವಿಲ್ಮರ್​ನಿಂದ ಅದಾನಿ ಗ್ರೂಪ್ ಹಿಂದಕ್ಕೆ ಸರಿಯುತ್ತಿರುವುದು ಯಾಕೆ?

ಅದಾನಿ ಗ್ರೂಪ್ ಉದ್ದಿಮೆಗಳು ಸಾಕಷ್ಟು ವಿಸ್ತಾರ ಪಡೆದಿವೆ. ಅಡುಗೆ ಎಣ್ಣೆ ಈಗ ಅದರ ಪ್ರಮುಖ ಬಿಸಿನೆಸ್ ಆಗಿ ಉಳಿದಿಲ್ಲ. ಪೋರ್ಟ್, ಏರ್​ಪೋರ್ಟ್, ಇನ್​ಫ್ರಾಸ್ಟ್ರಕ್ಚರ್ ಇತ್ಯಾದಿ ದೊಡ್ಡ ಬಂಡವಾಳದ ಕ್ಷೇತ್ರಗಳಲ್ಲಿ ಗ್ರೂಪ್ ದೊಡ್ಡ ವ್ಯವಹಾರಗಳನ್ನು ಹೊಂದಿದೆ. ಈ ಪ್ರಮುಖ ಕ್ಷೇತ್ರಗಳತ್ತ ಗಮನ ಕೇಂದ್ರೀಕರಿಸುವ ಸಲುವಾಗಿ ಅದಾನಿ ವಿಲ್ಮರ್ ಇತ್ಯಾದಿ ಕೆಲ ಬಿಸಿನೆಸ್​ಗಳಿಂದ ಹೊರಬರಲು ಗ್ರೂಪ್ ನಿರ್ಧರಿಸಿರಬಹುದು ಎನ್ನಲಾಗುತ್ತಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ