Axis Bank: ಆ್ಯಕ್ಸಿಸ್​ಗೆ ಮುಳುವಾದ ಸಿಟಿ ಡೀಲ್; ದಾಖಲೆ ಲಾಭ ಕಾಣಬೇಕಿದ್ದ ಬ್ಯಾಂಕ್​ಗೆ ಬರೋಬ್ಬರಿ 5,728.4 ಕೋಟಿ ರೂ ನಷ್ಟ

ಮುಂಬೈ: ಭಾರತದ ಅತಿದೊಡ್ಡ ಖಾಸಗಿ ಹಣಕಾಸು ಸಂಸ್ಥೆಗಳಲ್ಲಿ ಒಂದಾದ ಆ್ಯಕ್ಸಿಸ್ ಬ್ಯಾಂಕ್ (Axis Bank) ಜನವರಿಯಿಂದ ಮಾರ್ಚ್​ವರೆಗಿನ ತ್ರೈಮಾಸಿಕ ಅವಧಿಯಲ್ಲಿ 5,728.4 ಕೋಟಿ ರೂನಷ್ಟು ನಿವ್ವಳ ನಷ್ಟ (Net Loss) ತೋರಿಸಿದೆ. ಈ ಪರಿ ಹಿನ್ನಡೆ ಕಾಣಲು ಕಾರಣವಾಗಿದ್ದು ಆ್ಯಕ್ಸಿಸ್ ಬ್ಯಾಂಕ್ ಮತ್ತು ಸಿಟಿಬ್ಯಾಂಕ್ ಇಂಡಿಯಾ ಒಪ್ಪಂದ. ಸಿಟಿಬ್ಯಾಂಕ್ ಇಂಡಿಯಾವನ್ನು ವಿಲೀನ ಮಾಡುವ ಈ ಡೀಲ್​ನಿಂದ ಆ್ಯಕ್ಸಿಸ್ ಬ್ಯಾಂಕ್​ಗೆ ಬರೋಬ್ಬರಿ 12,490 ಕೋಟಿ ರೂ ನಷ್ಟ ಆಗಿರುವುದು ವರದಿಯಾಗಿದೆ. ಒಂದು ವೇಳೆ ಈ ಒಪ್ಪಂದ ಆಗಿಲ್ಲದೇ ಹೋಗಿದ್ದರೆ ಆ್ಯಕ್ಸಿಸ್ ಬ್ಯಾಂಕ್ ಮಾರ್ಚ್ ಅಂತ್ಯದ ಕ್ವಾರ್ಟರ್​ನಲ್ಲಿ ಭರ್ಜರಿ ಲಾಭ ಕಾಣಬಹುದಾಗಿತ್ತು.

ಸಿಟಿಬ್ಯಾಂಕ್ ಡೀಲ್​ನಿಂದಾದ ನಷ್ಟವನ್ನು ತೆಗೆದಿಟ್ಟು ನೋಡಿದರೆ ಈ ವರ್ಷ ಮೊದಲ ಮೂರು ತಿಂಗಳ ಅವಧಿಯಲ್ಲಿ ಆ್ಯಕ್ಸಿಸ್ ಬ್ಯಾಂಕ್ 6,625 ಕೋಟಿ ರೂ ಲಾಭ ಕಾಣುತ್ತಿತ್ತು. ಕಳೆದ ವರ್ಷದ ಇದೇ ಅವಧಿಯಲ್ಲಿ ಆ್ಯಕ್ಸಿಸ್ ಬ್ಯಾಂಕ್ 4,118 ಕೋಟಿ ರೂ ನಿವ್ವಳ ಲಾಭ ತೋರಿಸಿತ್ತು. ಅದಕ್ಕೆ ಹೋಲಿಸಿದರೆ ಈ ಬಾರಿ ಅದರ ನಿವ್ವಳ ಲಾಭ ಶೇ. 61ರಷ್ಟು ಹೆಚ್ಚಾಗುತ್ತಿತ್ತು. ಬ್ಲೂಮ್​ಬರ್ಗ್ ನಡೆಸಿದ ತಜ್ಞರ ಸಮೀಕ್ಷೆಯಲ್ಲಿ ಆ್ಯಕ್ಸಿಸ್ ಬ್ಯಾಂಕ್ ಈ ಕ್ವಾರ್ಟರ್​ನಲ್ಲಿ 2,531.6 ಕೋಟಿ ಲಾಭ ಮಾಡಬಹುದು ಎಂದು ಅಂದಾಜು ಮಾಡಲಾಗಿತ್ತು. ಈ ನಿರೀಕ್ಷೆಮೀರಿದಷ್ಟು ಲಾಭವನ್ನು ಆ್ಯಕ್ಸಿಸ್ ಕಂಡಿದೆ. ಅದರ ದುರದೃಷ್ಟಕ್ಕೆ ಸಿಟಿಬ್ಯಾಂಕ್ ಇಂಡಿಯಾದ ಒಪ್ಪಂದದಿಂದ ಆದ ನಷ್ಟವು ಅದರ ಭರ್ಜರಿ ಲಾಭವನ್ನು ಪೂರ್ಣವಾಗಿ ಮಸುಕಾಗಿಸಿದೆ.

ಆ್ಯಕ್ಸಿಸ್ ಬ್ಯಾಂಕ್​ಗೆ ಬಡ್ಡಿಯಿಂದ ಬಂದ ಆದಾಯ ಎಷ್ಟು?

ಬ್ಯಾಂಕುಗಳಿಗೆ ಮೂಲ ಆದಾಯ ಅದು ನೀಡುವ ಸಾಲಕ್ಕೆ ವಿಧಿಸುವ ಬಡ್ಡಿಯಿಂದ ಸಿಗುತ್ತದೆ. ಈ ರೀತಿ ಬಡ್ಡಿಯಿಂದ ಬಂದ ಆದಾಯ 2023 ಜನವರಿಯಿಂದ ಮಾರ್ಚ್​ವರೆಗಿನ ತ್ರೈಮಾಸಿಕ ಅವಧಿಯಲ್ಲಿ ಆ್ಯಕ್ಸಿಸ್ ಬ್ಯಾಂಕ್ ಶೇ. 33ರಷ್ಟು ಹೆಚ್ಚಳ ಕಂಡಿದೆ. ಈ ಅವಧಿಯಲ್ಲಿ ಇದರ ನಿವ್ವಳ ಬಡ್ಡಿ ಆದಾಯ 11,742 ಕೋಟಿ ರೂ ದಾಖಲಾಗಿದೆ. ಇತರ ಮೂಲಗಳಿಂದ ಆ್ಯಕ್ಸಿಸ್ ಬ್ಯಾಂಕ್​ಗೆ 4,895 ಕೋಟಿ ರೂ ಆದಾಯ ಬಂದಿದೆ.

ಆ್ಯಕ್ಸಿಸ್ ಬ್ಯಾಂಕ್ ಷೇರು ಕುಸಿತ; ಗಾಬರಿಬಿದ್ದರಾ ಹೂಡಿಕೆದಾರರು?

ಆ್ಯಕ್ಸಿಸ್ ಬ್ಯಾಂಕ್ ತನ್ನ ತ್ರೈಮಾಸಿಕ ವರದಿಯಲ್ಲಿ ನಷ್ಟ ತೋರಿಸುತ್ತಿದ್ದಂತೆಯೇ ಷೇರುಪೇಟೆಯಲ್ಲಿ ಅದರ ಷೇರು ಬೆಲೆ ಕುಸಿಯತೊಡಗಿದೆ. ಏಪ್ರಿಲ್ 28 ಶುಕ್ರವಾರ ಬೆಳಗ್ಗೆ 890 ರೂ ಇದ್ದ ಆ್ಯಕ್ಸಿಸ್ ಬ್ಯಾಂಕ್ ಷೇರು ಬೆಲೆ ಮಧ್ಯಾಹ್ನ 12:45ಕ್ಕೆ 855 ರುಪಾಯಿಗೆ ಇಳಿದಿತ್ತು. ಅಂದರೆ ಸುಮಾರು 35 ರುಪಾಯಿಗಳಷ್ಟು ಕುಸಿತ ಕಂಡಿದೆ ಆ್ಯಕ್ಸಿಸ್ ಬ್ಯಾಂಕ್ ಷೇರು. ಇದು ಆ್ಯಕ್ಸಿಸ್ ಬ್ಯಾಂಕ್​ನ ಕ್ವಾರ್ಟರ್ ರಿಪೋರ್ಟ್ ವರದಿಯ ಪರಿಣಾಮ.

ಆ್ಯಕ್ಸಿಸ್ ಬ್ಯಾಂಕ್​ಗೆ ಇದು ದುರದೃಷ್ಟದ ಮುಂದುವರಿಕೆಯೇ ಸರಿ. ಸಿಟಿಬ್ಯಾಂಕ್ ಡೀಲ್​ನಿಂದ ಆದ 12,490 ಕೋಟಿ ರೂ ನಷ್ಟದ ಕಾರಣದಿಂದ ಆ್ಯಕ್ಸಿಸ್ ಬ್ಯಾಂಕ್​ನ ಭರ್ಜರಿ ಲಾಭ ಮುಚ್ಚಿಹೋಗಿ 5,361 ಕೋಟಿ ರೂ ನಷ್ಟ ತೋರಿಸಬೇಕಾಯಿತು. ನಷ್ಟಕ್ಕೆ ಕಾರಣ ಏನೆಂದು ಅವಲೋಕಿಸದ ಕಾರಣಕ್ಕೋ, ಅಥವಾ ಬ್ಯಾಂಕ್​ನ ಹಣಕಾಸು ಸ್ಥಿತಿ ಇನ್ನೂ ಕೆಟ್ಟದಾಗಬಹುದು ಎಂಬ ಭಯಕ್ಕೋ ಷೇರುದಾರರು ಗಾಬರಿ ಬಿದ್ದು ಕಡಿಮೆ ಬೆಲೆಗೆ ಬಿಕರಿ ಮಾಡುತ್ತಿರುವಂತಿದೆ ಷೇರುಪೇಟೆಯಲ್ಲಿನ ಚಟುವಟಿಕೆ.

ಆದರೆ, ಅನೇಕ ಬ್ರೋಕರೇಜ್ ಕಂಪನಿಗಳು ಆ್ಯಕ್ಸಿಸ್ ಷೇರಿಗೆ ಸಕಾರಾತ್ಮಕ ಅಭಿಪ್ರಾಯ ನೀಡಿದ್ದಾರೆ. ಈಗ ಆ್ಯಕ್ಸಿಸ್ ಬ್ಯಾಂಕ್​ನ ಷೇರು ಹಿನ್ನಡೆ ಕಾಣುತ್ತಿದೆಯಾದರೂ ಅದು ತಾತ್ಕಾಲಿಕ ಮಾತ್ರ. ಅದು ಮಾರ್ಚ್ ಅಂತ್ಯದ ಕ್ವಾರ್ಟರ್​ನಲ್ಲಿ ತೋರಿರುವ ಸರ್ವೋನ್ನತಿಯನ್ನು ಗಮನಿಸಿದಾಗ ಅದರ ಷೇರಿಗೆ ಮುಂದಿನ ದಿನಗಳಲ್ಲಿ ಬೇಡಿಕೆ ಹೆಚ್ಚಬಹುದು ಎಂದು ನಿರೀಕ್ಷಿಸಲಾಗಿದೆ.

Published On - 1:09 pm, Fri, 28 April 23