ಎನ್​ಟಿಪಿಸಿಯಿಂದ ಭಾರೀ ಮೊತ್ತದ ಗುತ್ತಿಗೆ ಪಡೆದ ಬಳಿಕ ಬಿಎಚ್​ಇಎಲ್ ಷೇರುಬೆಲೆ ಏರುಗತಿಗೆ

ಮುಂಬೈ, ಆಗಸ್ಟ್ 31: ಬೆಂಗಳೂರು ಮೂಲದ ಭಾರತ್ ಹೆವಿ ಎಲೆಕ್ಟ್ರಿಕಲ್ಸ್ ಲಿ ಸಂಸ್ಥೆ (BHEL) ಷೇರುಬೆಲೆ ಏರುಗತಿಯಲ್ಲಿ ಮುಂದುವರಿದಿದೆ. ಉಷ್ಣ ವಿದ್ಯುತ್ ಸ್ಥಾವರ (Thermal Power Plant) ಸ್ಥಾಪಿಸಲು ಎನ್​ಟಿಪಿಸಿಯಿಂದ 15,530 ಕೋಟಿ ರೂ ಗುತ್ತಿಗೆ ಪಡೆದ ಒಂದು ದಿನದ ಬಳಿಕ ಆಗಸ್ಟ್ 31ರಂದು ಬಿಎಚ್​ಇಎಲ್ ಷೇರುಬೆಲೆ 52 ವಾರಗಳ ಗರಿಷ್ಠ ಮಟ್ಟಕ್ಕೆ ಏರಿದೆ. ಗುರುವಾರ ಬಿಎಚ್​ಇಎಲ್ ಷೇರುಬೆಲೆ ಶೇ. 1.7ರಷ್ಟು ಏರಿ 121.15 ರೂ ಮಟ್ಟಕ್ಕೆ ತಲುಪಿತ್ತು. ಇದರೊಂದಿಗೆ ಕಳೆದ ಐದು ದಿನದಲ್ಲಿ ಅದರ ಬೆಲೆ ಶೇ. 6ರಷ್ಟು ಹೆಚ್ಚಾಯಿತು. ಸದ್ಯ ಬಿಎಚ್​ಇಎಲ್ ಷೇರು 120.65 ರೂ ಬೆಲೆಯಲ್ಲಿ ವಹಿವಾಟು ಕಾಣುತ್ತಿದೆ. ನಿನ್ನೆ ದಿನಾಂತ್ಯದಲ್ಲಿ (ಆಗಸ್ಟ್ 30) ಅದು 118 ರೂ ಬೆಲೆಯಲ್ಲಿ ಅಂತ್ಯಗೊಂಡಿತ್ತು.

ಎನ್​ಟಿಪಿಸಿ ಸೇರಿ ಮೂರು ಪ್ರಮುಖ ಗುತ್ತಿಗೆ ಪಡೆದ ಬಿಎಚ್​ಇಎಲ್

ಛತ್ತೀಸ್​ಗಡದ ಲಾರಾ ಎಂಬಲ್ಲಿ 2×800 ಮೆಗಾವ್ಯಾಟ್ ಸೂಪರ್​ಕ್ರಿಟಿಕಲ್ ಥರ್ಮಲ್ ಪವರ್ ಪ್ರಾಜೆಕ್ಟ್​ನ ಎರಡನೇ ಹಂತದ ಯೋಜನೆಯ ಗುತ್ತಿಗೆಯನ್ನು ಎನ್​ಟಿಪಿಸಿ ವತಿಯಿಂದ ಬಿಎಚ್​ಇಎಲ್​ಗೆ ನೀಡಲಾಗಿದೆ. ಅಂತಾರಾಷ್ಟ್ರೀಯ ಬಿಡ್ಡಿಂಗ್ ಮೂಲಕ ಬಿಎಚ್​ಇಎಲ್ ಪಡೆದಿರುವ ಈ ಗುತ್ತಿಗೆಯ ಮೊತ್ತ 15,530 ಕೋಟಿ ರೂ ಆಗಿದೆ.

ಇದನ್ನೂ ಓದಿ: ಎಬಿಆರ್​ವೈ ಸ್ಕೀಮ್ ಮೂಲಕ ನಿರೀಕ್ಷೆಮೀರಿ ಹೊಸ ಉದ್ಯೋಗಸೃಷ್ಟಿ; ಸರ್ಕಾರದಿಂದ ದತ್ತಾಂಶ ಬಿಡುಗಡೆ

ಫ್ಯಾಕ್ಟರಿಯ ವಿನ್ಯಾಸ, ಎಂಜಿನಿಯರಿಂಗ್, ತಯಾರಿಕೆ, ಸರಬರಾಜು, ಕಟ್ಟಡನಿರ್ಮಾಣ, ಟೆಸ್ಟಿಂಗ್ ಮತ್ತು ಕಮಿಷನಿಂಗ್ ಇತ್ಯಾದಿ ಇನ್ನೂ ಹಲವು ಕಾರ್ಯಗಳು ಈ ಗುತ್ತಿಗೆಯಲ್ಲಿ ಒಳಗೊಂಡಿವೆ. ಎರಡು ಯೂನಿಟ್​ಗಳನ್ನು ಮಾಡಲಾಗಿದ್ದು ಪ್ರತಿಯೊಂದಕ್ಕೂ ನಿಗದಿತ ಗುರಿ ನೀಡಲಾಗಿದೆ. ಯೂನಿಟ್-1 ಅನ್ನು ಪೂರ್ಣಗೊಳಿಸಲು 48 ತಿಂಗಳು (4 ವರ್ಷ), ಯೂನಿಟ್-2 ಅನ್ನು ಪೂರ್ಣಗೊಳಿಸಲು 52 ತಿಂಗಳ ಕಾಲಾವಕಾಶ ಕೊಡಲಾಗಿದೆ. ಈ ಡೆಡ್​ಲೈನ್ ಒಳಗೆ ಪ್ರಾಜೆಕ್ಟ್ ಮುಗಿಯಬೇಕೆಂದು ಕಟ್ಟುನಿಟ್ಟಾಗಿ ತಿಳಿಸಲಾಗಿದೆ.

ಎನ್​ಟಿಪಿಸಿ ಗುತ್ತಿಗೆ ಪಡೆಯುವ ಮುನ್ನ ಬಿಎಚ್​ಇಎಲ್ ಸಂಸ್ಥೆ ಎನ್​ಎಚ್​ಪಿಸಿ ಮತ್ತು ಅದಾನಿ ಕಂಪನಿಯಿಂದ ಇತ್ತೀಚೆಗಷ್ಟೇ ಎರಡು ಗುತ್ತಿಗೆಗಳನ್ನು ಪಡೆದಿತ್ತು.

ಇದನ್ನೂ ಓದಿ: ಅದಾನಿ ಕಂಪನಿಗಳ ವಿರುದ್ಧ ಮತ್ತೆ ವಂಚನೆ ಆರೋಪ; ಇದು ಸೋರೋಸ್ ಪಿತೂರಿ ಎಂದ ಅದಾನಿ ಗ್ರೂಪ್

ಎನ್​ಎಚ್​ಪಿಸಿಯಿಂದ 2,242 ಕೋಟಿ ರೂ ಮೊತ್ತದ ಪ್ರಾಜೆಕ್ಟ್ ಸಿಕ್ಕಿದೆ. ಇನ್ನು, ಮಹಾನ್ ಎನರ್ಜೆನ್ ಲಿ ಸಂಸ್ಥೆಯಿಂದ 2×800 ಮೆಗಾವ್ಯಾಟ್ ಪವರ್ ಪ್ರಾಜೆಕ್ಟ್ ಮಧ್ಯಪ್ರದೇಶದ ಬಂಧೋರಾ ಎಂಬಲ್ಲಿ ಸ್ಥಾಪನೆಯಾಗಲಿದೆ. ಇದರ ಗುತ್ತಿಗೆ ಮೊತ್ತ 4,000 ಕೋಟಿ ರೂ ಆಗಿದೆ. ಮಹಾನ್ ಎನರ್ಜೆನ್ ಸಂಸ್ಥೆ ಅದಾನಿ ಪವರ್​ನ ಅಂಗಸಂಸ್ಥೆಯಾಗಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ