ಬ್ರಿಟನ್​ನ ವಿವಿಧ ವೀಸಾ ದರಗಳಲ್ಲಿ ಹೆಚ್ಚಳ; ಇಂಗ್ಲೆಂಡ್ ಪ್ರಯಾಣ ಇನ್ನು ದುಬಾರಿ

ಲಂಡನ್, ಅಕ್ಟೋಬರ್ 4: ಪ್ರಧಾನಿ ರಿಷಿ ಸುನಕ್ ನೇತೃತ್ವದ ಬ್ರಿಟನ್ ಸರ್ಕಾರ (britain government) ಇಂದು ವೀಸಾ ದರ ಏರಿಸಿದೆ. ಎಲ್ಲಾ ವಿಭಾಗದ ವೀಸಾ ಶುಲ್ಕ ದರ (visa fee) ಹೆಚ್ಚಿಸಲಾಗಿದೆ. ಆರು ತಿಂಗಳ ಅವಧಿಯವರೆಗಿನ ವೀಸಾ, 2, 5 ಮತ್ತು 10 ವರ್ಷದ ಅವಧಿಗಳ ವೀಸಾ, ಆರೋಗ್ಯ ವೀಸಾ ಇತ್ಯಾದಿ ಎಲ್ಲವುಗಳ ಶುಲ್ಕ ಹೆಚ್ಚಳವಾಗಿವೆ. ಕುಶಲ ಕಾರ್ಮಿಕರು, ವಲಸಿಗರ ವೀಸಾ ದರವೂ ಇಂದಿನಿಂದ ಹೆಚ್ಚಾಗಿದೆ. ಭಾರತೀಯರು ಸೇರಿದಂತೆ ಎಲ್ಲಾ ವಿದೇಶೀಯರಿಗೂ ಬ್ರಿಟನ್ ವೀಸಾ ಶುಲ್ಕ ಬೆಲೆ ಹೆಚ್ಚಳ ಅನ್ವಯ ಆಗಲಿದೆ. ಬ್ರಿಟನ್​ನ ಗೃಹ ಕಚೇರಿ ವಕ್ತಾರರು (home office spokesperson) ಈ ಬಗ್ಗೆ ಮಾಹಿತಿ ನೀಡಿದ್ದು, ‘ಬಹಳ ಮುಖ್ಯವಾದ ಸಾರ್ವಜನಿಕ ಸೇವೆಗಳು ಮತ್ತು ಪಬ್ಲಿಕ್ ಸೆಕ್ಟರ್​ಗೆ ಹಣ ಒದಗಿಸಬೇಕಾದ ಹಿನ್ನೆಲೆಯಲ್ಲಿ ವೀಸಾ ಅರ್ಜಿಗಳಿಗೆ ಶುಲ್ಕ ಹೆಚ್ಚಿಸುವ ಕ್ರಮ ನ್ಯಾಯಯುತ ಎನಿಸಿದೆ,’ ಎಂದು ಹೇಳಿದ್ದಾರೆ.

ಆರು ತಿಂಗಳೊಳಗಿನ ವೀಸಾ ದರವನ್ನು 15 ಜಿಬಿಪಿಯಷ್ಟು (ಗ್ರೇಟ್ ಬ್ರಿಟನ್ ಪೌಂಡ್) ಹೆಚ್ಚಿಸಲಾಗಿದೆ. ಅಂದರೆ, ಈ ಕಿರು ಅವಧಿ ವೀಸಾ 1,500 ರೂನಷ್ಟು ಬೆಲೆ ಹೆಚ್ಚಳ ಕಾಣಲಿದೆ. ಸದ್ಯ 100 ಜಿಬಿಪಿ ಇರುವ ಈ ಕಿರು ಅವಧಿ ವೀಸಾ ಬೆಲೆ 115 ಪೌಂಡ್​ಗೆ ಏರಲಿದೆ. ಅಂದರೆ ಸುಮಾರು 11,500 ರೂ ಆಗಲಿದೆ.

ಇನ್ನು, ಸ್ಟುಡೆಂಟ್ ವೀಸಾ ದರ 127 ಪೌಂಡ್​ನಷ್ಟು ಹೆಚ್ಚಲಿದೆ. ಇದರೊಂದಿಗೆ ಹೊರದೇಶಗಳಿಂದ ವಿದ್ಯಾರ್ಥಿಗಳು ಬ್ರಿಟನ್​ಗೆ ಹೋಗಲು ವೀಸಾ ಪಡೆಯಬೇಕಾದರೆ 490 ಜಿಬಿಪಿ ಶುಲ್ಕ ಪಾವತಿಸಬೇಕು. ಸುಮಾರು 50,000 ರೂ ಆಗುತ್ತದೆ. ಆದರೆ, 6 ತಿಂಗಳಿಗೂ ಹೆಚ್ಚಿರುವ ಮತ್ತು 11 ತಿಂಗಳಿಗೂ ಕಡಿಮೆ ಇರುವ ಶಾರ್ಟ್ ಟರ್ಮ್ ಕೋರ್ಸ್​ಗಳನ್ನು ಕಲಿಯಲು ಬೇಕಿರುವ ವೀಸಾದ ಶುಲ್ಕದಲ್ಲಿ ಯಾವುದೇ ಹೆಚ್ಚಳ ಇರುವುದಿಲ್ಲ.

ಇದನ್ನೂ ಓದಿ: ಫೇಸ್​ಬುಕ್​ನಿಂದ ಇನ್ನಷ್ಟು ಲೇ ಆಫ್; ವರ್ಚುವಲ್ ರಿಯಾಲಿಟಿ ಟೀಮ್​ಗೆ ಕಾದಿದೆಯಾ ಸಂಕಷ್ಟ?

ವೀಸಾ ಶುಲ್ಕ ಏರಿಕೆ ವಿವರ

• ಫ್ಯಾಮಿಲಿ, ಸೆಟಲ್ಮೆಂಟ್, ಸಿಟಿಜನ್​ಶಿಪ್ ವೀಸಾ ಶುಲ್ಕ ಶೇ. 20ರಷ್ಟು ಏರಿಕೆ
• ವರ್ಕ್ ಮತ್ತು ವಿಸಿಟ್ ವೀಸಾ ಶುಲ್ಕ ಶೇ. 15ರಷ್ಟು ಹೆಚ್ಚಳ
• ಇಮೈಗ್ರೇಶನ್ ಹೆಲ್ತ್ ಸರ್ಚಾರ್ಜ್ (ವಲಸಿಗರ ಆರೋಗ್ಯ ಶುಲ್ಕ) ಒಂದು ವರ್ಷಕ್ಕೆ 1,035 ಜಿಬಿಪಿ.
• ಆರು ತಿಂಗಳೊಳಗಿನ ವಿಸಿಟ್ ವೀಸಾ ಶುಲ್ಕ 115 ಜಿಬಿಪಿ
• ಸ್ಟುಡೆಂಟ್ ವೀಸಾ ಶುಲ್ಕ 490 ಜಿಬಿಪಿ

ಇದನ್ನೂ ಓದಿ: ಅಮೆರಿಕದ ಕ್ರಿಪ್ಟಾನ್, ಟೆಕ್ಸಾಸ್ ಇನ್ಸ್​ಟ್ರುಮೆಂಟ್ಸ್, ಇಆರ್​ಪಿ ಲಾಜಿಕ್ ಕಂಪನಿಗಳಿಂದ ಕರ್ನಾಟಕದಲ್ಲಿ ಹೂಡಿಕೆ ಸಾಧ್ಯತೆ

ಕುಶಲ ಕಾರ್ಮಿಕರಿಗೆ ಪ್ರಮಾಣಿತ ಪ್ರಾಯೋಜಕತ್ವ (ಸರ್ಟಿಫಿಕೇಟ್ ಸ್ಪಾನ್ಸರ್​ಶಿಪ್) 3 ವರ್ಷಕ್ಕಿಂತ ಕಡಿಮೆ ಇದ್ದರೆ ಅವರಿಗೆ ವೀಸಾ ಶುಲ್ಕ 719 ಜಿಬಿಪಿ ಇರುತ್ತದೆ. ಪ್ರಾಯೋಜಕತ್ವ 3 ವರ್ಷ ಮೇಲ್ಪಟ್ಟಿದ್ದರೆ ವಲಸೆ ಶುಲ್ಕ 1,420 ಜಿಬಿಪಿ ಇರುತ್ತದೆ.

ಇವುಗಳ ಜೊತೆಗೆ ಬ್ರಿಟನ್ ಪೌರತ್ವ ಪಡೆಯಲು ಅರ್ಜಿ ಇತ್ಯಾದಿಯ ಶುಲ್ಕಗಳಲ್ಲೂ ಹೆಚ್ಚಲ ಮಾಡಲಾಗಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ