ಬೈಜೂಸ್ನ ಒಂದು ಭಾಗದ ಸಾಲ ತೀರಿಸಿದ ಮಣಿಪಾಲ್ ಸಂಸ್ಥೆಯ ರಂಜನ್ ಪೈ; ಅದಕ್ಕೆ ಬದಲಾಗಿ ಆಕಾಶ್ ಬೋರ್ಡ್ನಲ್ಲಿ ಸದಸ್ಯತ್ವ
Ranjan Pai Help to Byju's: ಹಣಕಾಸು ಸಂಕಷ್ಟಕ್ಕೆ ಸಿಲುಕಿರುವ ಬೈಜುಸ್ಗೆ ಶಿಕ್ಷಣೋದ್ಯಮಿ ರಂಜನ್ ಪೈಕಿ ಸಹಾಯಹಸ್ತ ಚಾಚಿದ್ದಾರೆ. ಬೈಜುಸ್ ಮಾಡಿರುವ ಹಲವು ಸಾಲಗಳಲ್ಲಿ ಒಂದು ಭಾಗವನ್ನು ರಂಜನ್ ಪೈ ಅವರು ತೀರಿಸಿದ್ದಾರೆ. ಡೇವಿಡ್ಸನ್ ಕೆಂಪ್ನರ್ ಸಂಸ್ಥೆಯ 800 ಕೋಟಿ ರೂ ಮೊತ್ತದ ಸಾಲವನ್ನು ಬೈಜುಸ್ ಬಾಕಿ ಉಳಿಸಿಕೊಂಡಿತ್ತು. ಈ ಹಣಕ್ಕೆ 600 ಕೋಟಿ ರೂನಷ್ಟು ಬಡ್ಡಿ ಸೇರಿ ಒಟ್ಟು ಸಾಲದ ಮೊತ್ತ 1,400 ಕೋಟಿ ರೂ ಆಗಿತ್ತು.
ಬೆಂಗಳೂರು, ನವೆಂಬರ್ 12: ಹಣಕಾಸು ಸಂಕಷ್ಟಕ್ಕೆ ಸಿಲುಕಿರುವ ಬೈಜುಸ್ಗೆ ಶಿಕ್ಷಣೋದ್ಯಮಿ ರಂಜನ್ ಪೈ (Ranjan Pai) ಸಹಾಯಹಸ್ತ ಚಾಚಿದ್ದಾರೆ. ಬೈಜುಸ್ ಮಾಡಿರುವ ಹಲವು ಸಾಲಗಳಲ್ಲಿ (Debts of Byju’s) ಒಂದು ಭಾಗವನ್ನು ರಂಜನ್ ಪೈ ಅವರು ತೀರಿಸಿದ್ದಾರೆ. ಅಮೆರಿಕದ ಡೇವಿಡ್ಸನ್ ಕೆಂಪ್ನರ್ (Davidson Kempner) ಎಂಬ ಅಸೆಟ್ ಮ್ಯಾನೇಜ್ಮೆಂಟ್ ಸಂಸ್ಥೆಯ ಸಾಲವನ್ನು ರಂಜನ್ ಪೈ 1,400 ಕೋಟಿ ರೂ ಒಪ್ಪಂದದಲ್ಲಿ ಖರೀದಿಸಿರುವುದು ತಿಳಿದುಬಂದಿದೆ. ಇಂಡಿಯನ್ ಎಕ್ಸ್ಪ್ರೆಸ್ ಪತ್ರಿಕೆಯಲ್ಲಿ ಬಂದಿರುವ ವರದಿ ಪ್ರಕಾರ, ಮಣಿಪಾಲ್ ಶಿಕ್ಷಣ ಮತ್ತು ಮೆಡಿಕಲ್ ಗ್ರೂಪ್ನ ಛೇರ್ಮನ್ ರಂಜನ್ ಪೈ ಅವರು ಬೈಜೂಸ್ಗೆ ಸೇರಿದ ಆಕಾಶ್ ಎಜುಕೇಶನ್ ಸರ್ವಿಸಸ್ನ ಬೋರ್ಡ್ನಲ್ಲಿ ಸ್ಥಾನ ಪಡೆಯಲಿದ್ದಾರೆ.
ಡೇವಿಡ್ಸನ್ ಕೆಂಪ್ನರ್ ಸಂಸ್ಥೆಯ 800 ಕೋಟಿ ರೂ ಮೊತ್ತದ ಸಾಲವನ್ನು ಬೈಜುಸ್ ಬಾಕಿ ಉಳಿಸಿಕೊಂಡಿತ್ತು. ಈ ಹಣಕ್ಕೆ 600 ಕೋಟಿ ರೂನಷ್ಟು ಬಡ್ಡಿ ಸೇರಿ ಒಟ್ಟು ಸಾಲದ ಮೊತ್ತ 1,400 ಕೋಟಿ ರೂ ಆಗಿತ್ತು. ಇದಕ್ಕೆ ಬದಲಾಗಿ ಆಕಾಶ್ ಸಂಸ್ಥೆಯಲ್ಲಿ ಡೇವಿಡ್ ಕೆಂಪ್ನರ್ ಶೇ. 15ರಿಂದ 20ರಷ್ಟು ಷೇರುಪಾಲು ಹೊಂದಿದೆ. ಈಗ ರಂಜನ್ ಪೈ ಅವರು 1,400 ಕೋಟಿ ರೂ ಕೊಟ್ಟು ಸಾಲ ತೀರಿಸಿರುವುದರಿಂದ ಆಕಾಶ್ನಲ್ಲಿ ಕೆಂಪ್ನರ್ ಹೊಂದಿರುವ ಷೇರುಪಾಲು ಪೈ ಅವರಿಗೆ ರವಾನೆಯಾಗಲಿದೆ.
ಇದನ್ನೂ ಓದಿ: ಚೀನಾ ತರಹ ಬೇಡ; ನಿಯಂತ್ರಣ ಬಿಟ್ಟರೆ ಹಣ ಹರಿದುಬರುತ್ತೆ: ಭಾರತಕ್ಕೆ ಖ್ಯಾತ ಹೂಡಿಕೆದಾರ ಮಾರ್ಕ್ ಮೋಬಿಯಸ್ ಸಲಹೆ
ಆಕಾಶ್ ಎಜುಕೇಶನ್ ಸರ್ವಿಸ್ ಸಂಸ್ಥೆ ಬೈಜುಸ್ನ ಅತಿದೊಡ್ಡ ಆಸ್ತಿಯಾಗಿದೆ. ಡೇವಿಡ್ಸನ್ ಕೆಂಪ್ನರ್ ಸಂಸ್ಥೆ ಆಕಾಶ್ನಲ್ಲಿ ಎರಡು ಸದಸ್ಯರನ್ನು ಹೊಂದಿದೆ. ರಂಜನ್ ಪೈಗೆ ಷೇರು ವರ್ಗಾವಣೆ ಆದ ಬಳಿಕ ಆಕಾಶ್ ಬೋರ್ಡ್ನಿಂದ ಆ ಇಬ್ಬರು ಸದಸ್ಯರು ನಿರ್ಗಮಿಸಲಿದ್ದಾರೆ. ಮಣಿಪಾಲ್ ಶಿಕ್ಷಣ ಸಂಸ್ಥೆಯ ಮುಖಸ್ಥರಾದ ರಂಜನ್ ಪೈ ಅವರು ಬೋರ್ಡ್ ಸದಸ್ಯತ್ವ ಪಡೆಯುವುದಲ್ಲದೇ ಇನ್ನೂ ಇಬ್ಬರು ಸದಸ್ಯರನ್ನು ನಾಮನಿರ್ದೇಶಿಸುವ ಹಕ್ಕು ಹೊಂದಿದ್ದಾರೆ.
ಆಕಾಶ್ನೊಂದಿಗೆ ರಂಜನ್ ಪೈ ಅವರ ಸಂಬಂಧ ಇಷ್ಟಕ್ಕೇ ಸೀಮಿತವಾಗಿರುವುದಿಲ್ಲ. ಮತ್ತೊಂದು ಹೂಡಿಕೆ ಸಂಸ್ಥೆ ಬ್ಲ್ಯಾಕ್ಸ್ಟೋನ್ ಆಕಾಶ್ ಸಂಸ್ಥೆಯಲ್ಲಿ ಹೊಂದಿರುವ ಷೇರುಪಾಲನ್ನು ಅವರು ಖರೀದಿಸಲಿದ್ದಾರೆ. ಅಲ್ಲದೇ ಆಕಾಶ್ ಸಂಸ್ಥಾಪಕರುಗಳಾದ ಚೌಧರಿ ಕುಟುಂಬ ಹೊಂದಿರುವ ಒಂದಷ್ಟು ಷೇರುಪಾಲನ್ನೂ ಪೈ ಪಡೆಯಲಿದ್ದಾರೆ. ಇವೆಲ್ಲವೂ ನೆರವೇರಿದಲ್ಲಿ ಆಕಾಶ್ ಎಜುಕೇಶನ್ ಸರ್ವಿಸಸ್ ಸಂಸ್ಥೆಯಲ್ಲಿ ರಂಜನ್ ಪೈ ಹೊಂದಿರುವ ಷೇರುಪಾಲು ಶೇ. 30ರಷ್ಟಾಗುತ್ತದೆ.
ಇದನ್ನೂ ಓದಿ: ಒಂದು ವರ್ಷದಲ್ಲಿ ಲಾಭ ತಂದಿರುವುದು ಯಾವುದು? ಷೇರುಪೇಟೆಗಿಂತ ಚಿನ್ನ ಹೆಚ್ಚು ಲಾಭ ತರುತ್ತದಾ?
ಮೂಲಗಳ ಪ್ರಕಾರ ಪ್ರೊಮೋಟರ್ಸ್ಗಳಾದ ಚೌಧುರಿ ಕುಟುಂಬ ಶೇ. 18ರಿಂದ 20ರಷ್ಟು ಷೇರು ಹೊಂದಿದೆ. ಇದರಲ್ಲಿ ಕಾಲು ಭಾಗದಷ್ಟು, ಅಂದರೆ ಶೇ. 5ರಷ್ಟು ಷೇರುಗಳನ್ನು ಪೈ ಅವರು 10 ಬಿಲಿಯನ್ ಡಾಲರ್ ಮೊತ್ತಕ್ಕೆ (83,000 ಕೋಟಿ ರೂ) ಖರೀದಿಸಬಹುದು ಎನ್ನಲಾಗಿದೆ. ಇವೆಲ್ಲವೂ ಆದ ಬಳಿಕ ಆಕಾಶ್ ಚೌಧರಿ ಅವರು ಸಂಸ್ಥೆಯ ಸಿಇಒ ಆಗಿ ಮರಳಿ ಬರಲಿದ್ದಾರೆ ಎನ್ನಲಾಗಿದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
Published On - 4:44 pm, Sun, 12 November 23