Credit Card spend: ಜನವರಿಯಲ್ಲಿ ಕ್ರೆಡಿಟ್ ಕಾರ್ಡ್​ನಿಂದ ಜನರ ವೆಚ್ಚ 1.84 ಲಕ್ಷ ಕೋಟಿ ರೂ

ಕ್ರೆಡಿಟ್ ಕಾರ್ಡ್ ಮೂಲಕ ಮಾಡಲಾಗುತ್ತಿರುವ ವೆಚ್ಚ ಕಳೆದ ತಿಂಗಳು (2025ರ ಜನವರಿ) 1.84 ಲಕ್ಷ ಕೋಟಿ ರೂಗೆ ಏರಿದೆ. ಹಿಂದಿನ ತಿಂಗಳಿಗೆ (2024ರ ಡಿಸೆಂಬರ್) ಹೋಲಿಸಿದರೆ ವೆಚ್ಚದಲ್ಲಿ ತುಸು ಇಳಿಕೆಯಾಗಿದೆಯಾದರೂ, ಹಿಂದಿನ ವರ್ಷದ ಇದೇ ತಿಂಗಳಿಗೆ (2024ರ ಜನವರಿ) ಹೋಲಿಸಿದರೆ ಕ್ರೆಡಿಟ್ ಕಾರ್ಡ್ ವೆಚ್ಚ ಶೇ. 10.8ರಷ್ಟು ಹೆಚ್ಚಳವಾಗಿದೆ. ಆರ್​ಬಿಐ ಬಿಡುಗಡೆ ಮಾಡಿದ ಇತ್ತೀಚಿನ ದತ್ತಾಂಶದ ಪ್ರಕಾರ ಎಚ್​ಡಿಎಫ್​ಸಿ ಬ್ಯಾಂಕ್​ನ ಕ್ರೆಡಿಟ್ ಕಾರ್ಡ್​ಗಳಿಂದ ಜನರು ಮಾಡುತ್ತಿರುವ ವೆಚ್ಚ ಜನವರಿಯಲ್ಲಿ 50,664 ಕೋಟಿ ರೂ ಇದೆ. ಇದರಲ್ಲಿ ಶೇ. 15.91ರಷ್ಟು ಏರಿಕೆ ಆಗಿದೆ.

ಐಸಿಐಸಿಐ ಬ್ಯಾಂಕ್ ಕ್ರೆಡಿಟ್ ಕಾರ್ಡ್ ವೆಚ್ ಶೇ. 20.25ರಷ್ಟು ಹೆಚ್ಚಳವಾಗಿ 35,682 ಕೋಟಿ ರೂ ಆಗಿದೆ. ಇನ್ನೊಂದೆಡೆ ಎಸ್​ಬಿಐ ಮತ್ತು ಎಕ್ಸಿಸ್ ಬ್ಯಾಂಕ್ ಕ್ರೆಡಿಟ್ ಕಾರ್ಡ್​ಗಳ ವೆಚ್ಚದಲ್ಲಿ ಇಳಿಮುಖವಾಗಿದೆ. ಎಸ್​ಬಿಐ ಕ್ರೆಡಿಟ್ ಕಾರ್ಡ್​ಗಳ ವೆಚ್ಚ ಶೇ. 6ರಷ್ಟು ಕುಸಿತವಾಗಿ 28,976 ಕೋಟಿ ರೂ ಆಗಿದೆ. ಎಕ್ಸಿಸ್ ಬ್ಯಾಂಕ್ ಶೇ. 7.38ರಷ್ಟು ಕುಸಿತ ಕಂಡಿದೆ. ಜನವರಿಯಲ್ಲಿ ಅದರ ಕ್ರೆಡಿಟ್ ಕಾರ್ಡ್​ಗಳ ವೆಚ್ಚ 13,673.41 ಕೋಟಿ ರೂಗೆ ಇಳಿದಿದೆ.

ಪ್ರತೀ ಕಾರ್ಡ್​ನ ಸರಾಸರಿ ವೆಚ್ಚದಲ್ಲಿ ಶೇ. 1.09ರಷ್ಟು ಏರಿಕೆ ಆಗಿದೆ. 2025ರ ಜನವರಿಯಲ್ಲಿ ಒಂದು ಕಾರ್ಡ್​ಗೆ ಸರಾಸರಿಯಾಗಿ 16,910 ರೂ ಬಳಕೆ ಆಗಿರುವುದು ಆರ್​ಬಿಐ ಬಿಡುಗಡೆ ಮಾಡಿದ ದತ್ತಾಂಶದಿಂದ ತಿಳಿದುಬರುತ್ತದೆ. ಪ್ರಮುಖ ಕ್ರೆಡಿಟ್ ಕಾರ್ಡ್​ಗಳ ಪೈಕಿ ಐಸಿಐಸಿಐ ಮಾತ್ರವೇ ಸರಾಸರಿ ಕಾರ್ಡ್ ವೆಚ್ಚದಲ್ಲಿ ಗಣನೀಯ ಏರಿಕೆ ಕಂಡಿರುವುದು. ಜನವರಿ ತಿಂಗಳಲ್ಲಿ ಐಸಿಐಸಿಐ ಕಾರ್ಡ್​ನ ಸರಾಸರಿ ಬಳಕೆ ಶೇ. 11.69ರಷ್ಟು ಏರಿಕೆ ಆಗಿ 19,730 ರೂ ಮುಟ್ಟಿದೆ. ಎಚ್​ಡಿಎಫ್​ಸಿ ಬ್ಯಾಂಕ್, ಎಸ್​ಬಿಐ, ಎಕ್ಸಿಸ್ ಬ್ಯಾಂಕುಗಳ ಕ್ರೆಡಿಟ್ ಕಾರ್ಡ್​ಗಳ ಸರಾಸರಿ ವೆಚ್ಚವು ಹಿಂದಿನ ವರ್ಷದಕ್ಕಿಂತ ಕಡಿಮೆ ಇದೆ.

ಇದನ್ನೂ ಓದಿ: ಕೃಷಿ ಕ್ಷೇತ್ರಕ್ಕೆ ಎಐ ಟೆಕ್ನಾಲಜಿ ಎಷ್ಟು ಲಾಭಕಾರಿ ಗೊತ್ತಾ? ಭಾರತೀಯ ರೈತರ ಉದಾಹರಣೆ ಕೊಟ್ಟ ಮೈಕ್ರೋಸಾಫ್ಟ್ ಮುಖ್ಯಸ್ಥ ಸತ್ಯಾ ನಾದೆಲ್ಲ

ಹೊಸ ಕಾರ್ಡ್​ಗಳ ವಿತರಣೆಯಲ್ಲಿ ಇಳಿಕೆ

ಜನವರಿ ತಿಂಗಳಲ್ಲಿ ಹೊಸ ಕ್ರೆಡಿಟ್ ಕಾರ್ಡ್​ಗಳ ಸಂಖ್ಯೆ ಶೇ. 9.4ರಷ್ಟು ಹೆಚ್ಚಾಗಿದೆ. ಇದರೊಂದಿಗೆ ಚಾಲನೆಯಲ್ಲಿರುವ ಒಟ್ಟು ಕ್ರೆಡಿಟ್ ಕಾರ್ಡ್​ಗಳ ಸಂಖ್ಯೆ 10.9 ಕೋಟಿಗೆ ಏರಿದೆ. ಜನವರಿಯಲ್ಲಿ ಎಚ್​ಡಿಎಫ್​ಸಿ ಬ್ಯಾಂಕ್ 2,99,761 ಹೊಸ ಕಾರ್ಡ್​ಗಳನ್ನು ಮಾರಿದೆ. ಎಸ್​ಬಿಐ 2,34,537 ಕ್ರೆಡಿಟ್ ಕಾರ್ಡ್​ಗಳನ್ನು ವಿತರಿಸಿದೆ. ಐಸಿಐಸಿಐ ಬ್ಯಾಂಕ್​ನ 1,83,157 ಕ್ರೆಡಿಟ್ ಕಾರ್ಡ್​ಗಳು ಮಾರಾಟವಾಗಿವೆ. ಆದರೆ, ಎಕ್ಸಿಸ್ ಬ್ಯಾಂಕ್​ನ ಬಳಕೆ ಇರುವ ಕ್ರೆಡಿಟ್ ಕಾರ್ಡ್​ಗಳ ಸಂಖ್ಯೆ 14,862ರಷ್ಟು ಕಡಿಮೆ ಆಗಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ