ಟೆಸ್ಲಾ ಸಿಇಒ ಆಗಿ ಇಲಾನ್ ಮಸ್ಕ್ಗೆ 89000000000000 ರೂ ಸಂಭಾವನೆ; ಬೇರೆ ಸಿಇಒಗಳಿಗಿಂತ ಸಾವಿರ ಪಟ್ಟು ಹೆಚ್ಚು ಹಣ
1 trillion USD compensation plan for Elon Musk: ವಿಶ್ವದ ಮೊದಲ ಟ್ರಿಲಿಯನೇರ್ ಆಗುವ ಹಾದಿಯಲ್ಲಿದ್ದಾರೆ ಇಲಾನ್ ಮಸ್ಕ್. ಟೆಸ್ಲಾದ ಸಿಇಒ ಆಗಿ ಇಲಾನ್ ಮಸ್ಕ್ ಅವರಿಗೆ 1 ಟ್ರಿಲಿಯನ್ ಡಾಲರ್ ಪೇ ಪ್ಯಾಕೇಜ್ ನೀಡಲಾಗುತ್ತದೆ. ಈ ಕಾಂಪೆನ್ಸೇಶನ್ ಪ್ಲಾನ್ಗೆ ಟೆಸ್ಲಾದ ಶೇ. 75ರಷ್ಟು ಷೇರುದಾರರ ಅನುಮೋದನೆ ಸಿಕ್ಕಿದೆ.
Updated on: Nov 07, 2025 | 3:09 PM
ವಿಶ್ವದ ಅತೀ ಶ್ರೀಮಂತ ವ್ಯಕ್ತಿ ಎನಿಸಿರುವ ಇಲಾನ್ ಮಸ್ಕ್ ಇದೀಗ ಇನ್ನೂ ಒಂದು ಹೆಜ್ಜೆ ಮುಂದೆ ಹೋಗಿ ವಿಶ್ವದ ಮೊದಲ ಟ್ರಿಲಿಯನೇರ್ ಆಗುವ ಹಾದಿಯತ್ತ ದಾಪುಗಾಲಿಡುತ್ತಿದ್ದಾರೆ. ಅವರು ಸಿಇಒ ಆಗಿರುವ ಟೆಸ್ಲಾ ಕಂಪನಿಯಲ್ಲಿ ಇಲಾನ್ ಮಸ್ಕ್ (Elon Musk) ಅವರಿಗೆ 1 ಟ್ರಿಲಿಯನ್ ಡಾಲರ್ ಮೊತ್ತದ ಸಂಭಾವನೆ ಸಿಗಲಿದೆ. ವಿಶ್ವದಲ್ಲಿ ಹಿಂದೆಂದೂ ಕಂಡು ಕೇಳರಿಯದಷ್ಟು ಸಂಭಾವನೆಯ ಪ್ಯಾಕೇಜ್ಗೆ ಟೆಸ್ಲಾದ ಶೇ. 75ರಷ್ಟು ಷೇರುದಾರರು ಸಮ್ಮತಿ ಕೊಟ್ಟಿದ್ದಾರೆ.
ಇಲಾನ್ ಮಸ್ಕ್ಗೆ ಇಷ್ಟು ಭಾರೀ ಸಂಭಾವನೆ ಸಿಗಲು ಷರತ್ತುಗಳಿವೆ…
ಇಲಾನ್ ಮಸ್ಕ್ ಅವರಿಗೆ 1 ಟ್ರಿಲಿಯನ್ ಡಾಲರ್ ಸಂಭಾವನೆಯನ್ನು ಒಂದು ವರ್ಷಕ್ಕೆ ನೀಡುವುದಲ್ಲ. ಸ್ಟಾಕ್ಗಳ ರೂಪದಲ್ಲಿ ನೀಡಲಾಗಿರುತ್ತದೆ. 1 ಟ್ರಿಲಿಯನ್ ಡಾಲರ್ ಅನ್ನು ರುಪಾಯಿಗೆ ಪರಿವರ್ತಿಸಿದರೆ 89 ಲಕ್ಷ ಕೋಟಿ ರೂ ಆಗುತ್ತದೆ. ಈ ದೊಡ್ಡ ಮೊತ್ತವನ್ನು ಪಡೆಯಬೇಕಾದರೆ ಇಲಾನ್ ಮಸ್ಕ್ ಅವರು ಕೆಲ ನಿಗದಿತ ಟಾರ್ಗೆಟ್ಗಳನ್ನು ಮುಟ್ಟಬೇಕು.
ಇದನ್ನೂ ಓದಿ: ಕರ್ನಾಟಕದಿಂದ ಮಹತ್ವಾಕಾಂಕ್ಷಿ ಹೆಜ್ಜೆ; ಮುಂದಿನ 5 ವರ್ಷದಲ್ಲಿ 25,000 ಸ್ಟಾರ್ಟಪ್ಗಳ ಸ್ಥಾಪನೆಗೆ ಗುರಿ
ಇಲಾನ್ ಮಸ್ಕ್ ಅವರಿಗೆ ನೀಡಲಾಗಿರುವ ಕೆಲ ಗುರಿಗಳು
- ಮುಂದಿನ 10 ವರ್ಷಗಳಲ್ಲಿ 2 ಕೋಟಿ ಟೆಸ್ಲಾ ವಾಹನಗಳ ಮಾರಾಟವಾಗಬೇಕು
- ಟೆಸ್ಲಾದ ಮಾರುಕಟ್ಟೆ ಸಂಪತ್ತು 8.5 ಟ್ರಿಲಿಯನ್ ಡಾಲರ್ ದಾಟಬೇಕು
- 10 ಲಕ್ಷ ರೋಬೋ ಟ್ಯಾಕ್ಸಿಗಳ ಮಾರಾಟವಾಗಬೇಕು
ಈ ಮೇಲಿನವರು ಇಲಾನ್ ಮಸ್ಕ್ ಅವರಿಗೆ ನೀಡಲಾಗಿರುವ ಕೆಲ ಗುರಿಗಳಾಗಿವೆ. ಮಸ್ಕ್ ಅವರಿಗೆ ಸಂಭಾವನೆಯನ್ನು ಹಂತ ಹಂತವಾಗಿ ನೀಡಲಾಗುತ್ತದೆ. ಕಾಂಪೆನ್ಸೇಶನ್ ಪ್ಯಾಕೇಜ್ ಅನ್ನು 12 ಟ್ರ್ಯಾಂಚ್ಗಳಲ್ಲಿ ನೀಡಲಾಗುತ್ತದೆ. ಎಲ್ಲಾ ಗುರಿಗಳನ್ನು ಮುಟ್ಟಬೇಕೆಂದಿಲ್ಲ. ಗುರಿ ಮುಟ್ಟಲು ವಿಫಲರಾದರೂ ಕೆಲ ಬಿಲಿಯನ್ ಡಾಲರ್ಗಳಷ್ಟಾದರೂ ಹಣವನ್ನು ಇಲಾನ್ ಮಸ್ಕ್ ಪಡೆಯುತ್ತಾರೆ.
ಟೆಸ್ಲಾದಲ್ಲಿ ಇಲಾನ್ ಮಸ್ಕ್ ಸದ್ಯ ಶೇ. 13ರಷ್ಟು ಷೇರುಪಾಲು ಹೊಂದಿದ್ದಾರೆ. ಈ ಕಾಂಪೆನ್ಸೇಶನ್ ಪ್ಲಾನ್ ಪೂರ್ಣವಾಗಿ ಈಡೇರಿದರೆ ಮಸ್ಕ್ ಅವರ ಷೇರುಪಾಲು ಶೇ. 25ಕ್ಕೆ ಏರುತ್ತದೆ. ಇವೆಲ್ಲವೂ ಕೂಡ ಇಲಾನ್ ಮಸ್ಕ್ ಅವರ ಶ್ರೀಮಂತಿಕೆಯನ್ನು ಊಹಾತೀತ ಮಟ್ಟಕ್ಕೆ ಹೊತ್ತೊಯ್ಯುತ್ತವೆ.
ಇದನ್ನೂ ಓದಿ: ಕೇವಲ 30 ರೂಗೆ ರಾಕೆಟ್ ಸರ್ವಿಸ್; ಚೆನ್ನೈ ಕಂಪನಿಯಿಂದ ಮರುಬಳಕೆಯ ಎಲೆಕ್ಟ್ರಿಕ್ ರಾಕೆಟ್ ಆವಿಷ್ಕಾರ
ಇತರ ಸಿಇಒಗಳ ಪ್ಯಾಕೇಜ್ ಹೇಗಿದೆ?
ಇಲಾನ್ ಮಸ್ಕ್ ಅವರಿಗೆ ನೀಡಲು ಉದ್ದೇಶಿಸಲಾಗಿರುವ ಕಾಂಪೆನ್ಸೇಶನ್ ಪ್ಯಾಕೇಜ್ 1 ಟ್ರಿಲಿಯನ್ ಡಾಲರ್ ಮೊತ್ತದ್ದಿದೆ. ವಿಶ್ವದ 500 ಅತಿದೊಡ್ಡ ಕಂಪನಿಗಳ (ಫಾರ್ಚೂನ್ 500) ಸಿಇಒಗಳ ಕಾಂಪೆನ್ಸೇಶನ್ ಅನ್ನು ಒಟ್ಟುಸೇರಿಸಿದರೆ, ಅದರ ಹತ್ತು ಪಟ್ಟು ಹೆಚ್ಚು ಸಂಭಾವನೆಯನ್ನು ಮಸ್ಕ್ ಪಡೆಯುತ್ತಾರೆ.
ಮೈಕ್ರೋಸಾಫ್ಟ್ನ ಸಿಇಒ ಸತ್ಯ ನಾದೆಲ್ಲಾ ಅವರಿಗೆ ಸಿಕ್ಕಿರುವ ಕಾಂಪೆನ್ಸೇಶನ್ 79.1 ಮಿಲಿಯನ್ ಡಾಲರ್. ಇದು ಸದ್ಯ ಸಿಇಒಗಳ ಪೈಕಿ ಗರಿಷ್ಠ ಸಂಭಾವನೆ. ಆ್ಯಪಲ್ ಸಿಇಒ ಟಿಮ್ ಕುಕ್ ಸಂಭಾವನೆ 74.6 ಮಿಲಿಯನ್ ಡಾಲರ್. ಈ ಎಪ್ಪತ್ತು ಮಿಲಿಯನ್ ಡಾಲರ್ ಸಂಭಾವನೆ ಮಟ್ಟ ದಾಟಿರುವುದು ಇವರಿಬ್ಬರು ಮಾತ್ರವೇ. ಈಗ ಇಲಾನ್ ಮಸ್ಕ್ ಅವರ ಸಂಭಾವನೆಯು ಇವರಿಗಿಂತ ಸಾವಿರ ಪಟ್ಟು ಹೆಚ್ಚಾಗಿದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
