EPF withdraw: ಕೋವಿಡ್- 19 ಬಿಕ್ಕಟ್ಟಿಗೆ ಇಪಿಎಫ್​ನಿಂದ ಹಣ ವಿಥ್ ಡ್ರಾ ಮಾಡುವುದು ಹೇಗೆ? ಇಲ್ಲಿದೆ ಹಂತಹಂತವಾದ ವಿವರಣೆ

ಕೋವಿಡ್- 19 ಬಿಕ್ಕಟ್ಟು ಇರುವುದರಿಂದ ತಂತಮ್ಮ ಇಪಿಎಫ್ ಖಾತೆಯಿಂದ ಹಣ ವಿಥ್​ ಡ್ರಾ ಮಾಡಿಕೊಳ್ಳುವುದಕ್ಕೆ ಕಾರ್ಮಿಕರ ಭವಿಷ್ಯ ನಿಧಿ ಒಕ್ಕೂಟ (ಇಪಿಎಫ್​ಒ) ತನ್ನ ಚಂದಾದಾದರಿಗೆ ಅವಕಾಶ ನೀಡಿದೆ. ಆದರೆ ಈ ಬಗ್ಗೆ ಖಾತೆದಾರರಲ್ಲಿ ಹಲವು ಪ್ರಶ್ನೆಗಳಿವೆ. ಅವುಗಳಿಗೆ ಉತ್ತರ ನೀಡುವ ಪ್ರಯತ್ನವನ್ನು ಇಲ್ಲಿ ಮಾಡಲಾಗುತ್ತಿದೆ. ಇದರಿಂದ ಹಣದ ತುರ್ತು ಅಗತ್ಯ ಇರುವವರಿಗೆ ಅನುಕೂಲ ಆಗಬಹುದು.

* ಇಪಿಎಫ್​ನಿಂದ ಗರಿಷ್ಠ ಎಷ್ಟು ಹಣ ವಿಥ್​ ಡ್ರಾ ಮಾಡಬಹುದು? ಕೋವಿಡ್- 19ಗೆ ಸಂಬಂಧಿಸಿದ ಸಮಸ್ಯೆಗಳಿಗೆ ಹಣ ವಿಥ್ ಡ್ರಾ ಮಾಡುವಂತಿದ್ದರೆ ಮೂರು ತಿಂಗಳ ಮೂಲ ವೇತನ (ಬೇಸಿಕ್ ಪೇ) ಮತ್ತು ತುಟ್ಟಿ ಭತ್ಯೆ (ಡಿಎ) ಅಥವಾ ಖಾತೆಯಲ್ಲಿ ಇರುವಂಥ ಒಟ್ಟು ಮೊತ್ತದ ಶೇ 75ರಷ್ಟನ್ನು ತೆಗೆದುಕೊಳ್ಳಬಹುದು. ಒಂದು ಉದಾಹರಣೆ ನೋಡುವುದಾದರೆ ಬ್ಯಾಲೆನ್ಸ್ 3 ಲಕ್ಷ ರೂಪಾಯಿ ಇದೆ. ಬೇಸಿಕ್ ಹಾಗೂ ಡಿಎ ಸೇರಿ ತಿಂಗಳಿಗೆ 25 ಸಾವಿರ ರೂ. ಆಗುತ್ತದೆ. ಆಗ ಮೂರು ತಿಂಗಳ ಬೇಸಿಕ್ ಹಾಗೂ ಡಿಎ ಸೇರಿ 75 ಸಾವಿರ ರೂಪಾಯಿ ಹಾಗೂ ಪಿಎಫ್​ ಬಾಕಿಯಲ್ಲಿ ಶೇ 75ರಷ್ಟು ಅಂದರೆ 2.25 ಲಕ್ಷ ರೂ. ಆಗುತ್ತದೆ. ಆದ್ದರಿಂದ ಗರಿಷ್ಠ ಮೊತ್ತ 75 ಸಾವಿರ ರೂ. ಡ್ರಾ ಮಾಡಬಹುದು. ವಿಥ್​ ಡ್ರಾ ಮಾಡಬೇಕು ಅಂದುಕೊಂಡಾಗ ಯುನುವರ್ಸಲ್ ಅಕೌಂಟ್ ನಂಬರ್ (ಯುಎಎನ್), ಆಧಾರ್ ಕಾರ್ಡ್ ಸಂಖ್ಯೆ ಮತ್ತು ಚೆಕ್​ನ ಸ್ಕ್ಯಾನ್ಡ್ ಕಾಪಿ ಇಟ್ಟುಕೊಂಡಿರಬೇಕು.

ಇಪಿಎಫ್ ವಿಥ್​ ಡ್ರಾ ಮಾಡುವ ಹಂತಗಳಾವುವು? ಹಣಕಾಸಿನ ತುರ್ತು ಎಂಬುದು ಕುತ್ತಿಗೆ ತನಕ ಬಂದಾಗ ಪರ್ಸನಲ್ ಲೋನ್​ನಂಥ ದುಬಾರಿ ಸಾಲಗಳಿಗೆ ತೆರಳುವ ಬದಲಿಗೆ ಇಪಿಎಫ್​ನಿಂದ ವಿಥ್​ಡ್ರಾ ಮಾಡವುದು ಉತ್ತಮ ಆಯ್ಕೆಯಾಗುತ್ತದೆ. ಕೋವಿಡ್​ಗೆ ಸಂಬಂಧಿಸಿದ ಹಣಕಾಸು ತುರ್ತಿನ ಸಂದರ್ಭದಲ್ಲಿ ಇಪಿಎಫ್ ಹಣ ವಿಥ್ ಡ್ರಾ ಮಾಡುವ ನಿಯಮಾವಳಿಗಳು ಹೀಗಿವೆ.

ಹಂತ 1: https://unifiedportal-mem.epfindia.gov.in/memberinterface/ ಈ ವೆಬ್​ಸೈಟ್​ಗೆ ಲಾಗಿನ್ ಆಗಿ. ಹಂತ 2: ಲಾಗಿನ್ ಆದ ಮೇಲೆ UAN ಸಂಖ್ಯೆ ನಮೂದಿಸಿ, ಅದು ನಿಮ್ಮ ಪೇ ಸ್ಲಿಪ್​ನಲ್ಲಿ ಇರುತ್ತದೆ. ಒಂದು ವೇಳೆ ನೋಂದಣಿ ಆಗಿದ್ದಲ್ಲಿ ಪಾಸ್​ವರ್ಡ್ ಹಾಕಿ ಮತ್ತು Captchaವನ್ನು ಸಹ ನಮೂದಿಸಿ. ಹಂತ 3: ಮೇಲ್ಭಾಗದ ಟಾಪ್​ನಲ್ಲಿ “ಆನ್​ಲೈನ್ ಸರ್ವೀಸ್” ಎಂಬುದು ಇರುತ್ತದೆ. ONLINE CLAIM (FORM 31, 19, 10C ಮತ್ತು 10D). ಅದರ ಮೇಲೆ ಕ್ಲಿಕ್ ಮಾಡಿ. ಹಂತ 4: ಹೊಸ ವೆಬ್​ಪೇಜ್ ತೆರೆದುಕೊಳ್ಳುತ್ತದೆ. ಅದರಲ್ಲಿ ಹೆಸರು, ಜನ್ಮ ದಿನಾಂಕ, ಆಧಾರ್​ನ ಕೊನೆಯ ನಾಲ್ಕು ಸಂಖ್ಯೆ ಇರುತ್ತದೆ. ವೆಬ್​ ಪೇಜ್​ನಲ್ಲಿ ಬ್ಯಾಂಕ್ ಖಾತೆಯನ್ನು ನಮೂದಿಸಬೇಕು. ಒಂದು ಸಲ ಭರ್ತಿ ಮಾಡಿದ ಮೇಲೆ Verify ಎಂಬುದರ ಮೇಲೆ ಕ್ಲಿಕ್ ಮಾಡಬೇಕು. ವೆರಿಫೈ ಆದ ಮೇಲೆ “Certificate Of Undertaking” ಕೇಳಿ ಪಾಪ್- ಅಪ್ ಒಂದು ತೆರೆಯ ಮೇಲೆ ಕಾಣಿಸಿಕೊಳ್ಳುತ್ತದೆ. ಹಂತ 5: ಆ ನಂತರ Proceed for online claim ಮೇಲೆ ಕ್ಲಿಕ್ ಮಾಡಿ. ಹಂತ 6: ಡ್ರಾಪ್ – ಡೌನ್ ಮೆನುದಲ್ಲಿ EPF advance (Form 31) ಅಂತ ಇದ್ದು, ಅದರ ಮೇಲೆ ಕ್ಲಿಕ್ ಮಾಡಬೇಕು. ಹಂತ 7: ಹಣ ಡ್ರಾ ಮಾಡುವ ಉದ್ದೇಶ ತಿಳಿಸಬೇಕು ಮತ್ತು ಅಲ್ಲಿ ಕೋವಿಡ್-19 ಎಂಬುದನ್ನು ನಮೂದಿಸಬೇಕು. ಹಂತ 8: ವಿಥ್​ಡ್ರಾ ಮೊತ್ತವನ್ನು ನಮೂದಿಸಬೇಕು ಮತ್ತು ಚೆಕ್​ನ ಸ್ಕ್ಯಾನ್ಡ್​ ಕಾಪಿಯನ್ನು ಅಪ್​ಲೋಡ್ ಮಾಡಬೇಕು. ಹಂತ 9: ಒನ್​ ಟೈಮ್ ಪಾಸ್​ವರ್ಡ್ (ಒಟಿಪಿ) ಕಳುಹಿಸಲಾಗುತ್ತದೆ. ಅದನ್ನು ಭರ್ತಿ ಮಾಡಿ, ಪ್ರಕ್ರಿಯೆಗಳನ್ನು ಪೂರ್ಣಗೊಳಿಸಬೇಕು.

ಅರ್ಜಿಯನ್ನು ಹಾಕಿದ ಮೇಲೆ ಅದರ ಸ್ಥಿತಿಗತಿಯನ್ನು ತಿಳಿಯಬಹುದು. ಅದೇ ಪುಟದಲ್ಲಿ ಆನ್​ಲೈನ್ ಸರ್ವೀಸ್ ಇದ್ದು, ಅಲ್ಲಿ ಸರ್ವೀಸ್ ಟ್ರಾಕ್ ಮಾಡಬಹುದು. ಟ್ರಾಕ್ ಸರ್ವೀಸಸ್ ಎಂಬುದರ ಮೇಲೆ ಕ್ಲಿಕ್ ಮಾಡಿ, ಅರ್ಜಿಯ ಸ್ಥಿತಿಗತಿ ತಿಳಿಯಬಹುದು. ಅಂದಹಾಗೆ ಬಹಳ ವೇಗವಾಗಿ ಬ್ಯಾಂಕ್​ ಖಾತೆಗೆ ಹಣ ವರ್ಗಾವಣೆ ಆಗುತ್ತದೆ. ಏಕೆಂದರೆ, ಕೋವಿಡ್- 19 ಆರ್ಥಿಕ ಬಿಕ್ಕಟ್ಟು ಇರುವುದರಿಂದ ಬೇಗ ವಿಲೇವಾರಿ ಆಗುತ್ತದೆ.

ಇದನ್ನೂ ಓದಿ: EPF account: ಇಪಿಎಫ್ ಖಾತೆ ವರ್ಗಾವಣೆ, ವಿಥ್​ಡ್ರಾ ಬಗ್ಗೆ ನಿಮಗೆ ಗೊತ್ತಿರಲೇಬೇಕಾದ ಸಂಗತಿಗಳಿವು

(Here is the step by step details for money withdraw and amount limit that can be withdrawn from EPFO for Covid- 19 crisis)

Published On - 1:35 pm, Mon, 24 May 21