ಚೆಕ್ ಲೀಫ್ ಅಪ್​ಲೋಡ್ ಬೇಕಿಲ್ಲ; ಇಪಿಎಫ್​​ನಲ್ಲಿ ಈ ಎರಡು ಕ್ರಮಗಳ ಎಫೆಕ್ಟ್; ಸೆಟಲ್ಮೆಂಟ್ ಪ್ರಕ್ರಿಯೆ ಈಗ ಇನ್ನೂ ವೇಗ

ನವದೆಹಲಿ, ಏಪ್ರಿಲ್ 3: ಉದ್ಯೋಗಿಗಳ ಭವಿಷ್ಯ ನಿಧಿ ಸಂಸ್ಥೆ (EPFO) ಕಳೆದ ಒಂದು ದಶಕದಲ್ಲಿ ಸಾಕಷ್ಟು ಬದಲಾವಣೆಗಳನ್ನು ಕಂಡಿದೆ. ಇಪಿಎಫ್ ಸದಸ್ಯರನ್ನು ಸೇರಿಸುವುದರಿಂದ ಹಿಡಿದು, ಇಪಿಎಫ್ ಹಣ ವಿತ್​​ಡ್ರಾ (EPF money withdrawal) ಮಾಡುವವರೆಗೂ ಹಲವು ಪ್ರಕ್ರಿಯೆಗಳು ಹಿಂದಿನದಕ್ಕಿಂತಲೂ ಸರಳಗೊಳ್ಳುತ್ತಾ ಹೋಗುತ್ತಿವೆ. ಅವಶ್ಯಕತೆಗೆ ತಕ್ಕಂತೆ ಬದಲಾವಣೆಗಳನ್ನು ಮಾಡುತ್ತಾ ಬರಲಾಗಿದೆ. ಈಗ ಇಪಿಎಫ್ ಖಾತೆ ಹೊಂದಿರುವವರು ಆನ್​​ಲೈನ್​​ನಲ್ಲೇ ಸುಲಭವಾಗಿ ಹಣ ವಿತ್​ಡ್ರಾ ಮಾಡಬಹುದಾದಷ್ಟು ಸಲೀಸಾಗಿದೆ. ಇತ್ತೀಚೆಗೆ ಇಪಿಎಫ್​​ಒ ಸಂಸ್ಥೆ ಇಪಿಎಫ್ ವಿತ್​​ಡ್ರಾಯಲ್ ಪ್ರಕ್ರಿಯೆಯಲ್ಲಿ ಎರಡು ಕ್ರಮಗಳನ್ನು ಕೈಗೊಂಡಿತ್ತು. ಅದು ಒಟ್ಟಾರೆ ಪ್ರಕ್ರಿಯೆ ಸರಳಗೊಳ್ಳಲು ಮತ್ತು ಸುಲಭಗೊಳ್ಳಲು ಸಾಧ್ಯವಾಗಿದೆ.

ಚೆಕ್ ಲೀಫ್​ನ ಫೋಟೋ ಅಪ್​ಲೋಡ್ ಮಾಡುವ ಪ್ರಕ್ರಿಯೆ

ನೀವು ಇಪಿಎಫ್ ಹಣ ವಿತ್​ಡ್ರಾ ಮಾಡಲು ಅರ್ಜಿ ಸಲ್ಲಿಸುವಾಗ ಬ್ಯಾಂಕ್ ಖಾತೆ ನಮೂದಿಸುವುದರ ಜೊತೆಗೆ ಚೆಕ್ ಲೀಫ್​​ನ ಫೋಟೋ ತೆಗೆದು ಅಪ್​​ಲೋಡ್ ಮಾಡಬೇಕಿತ್ತು. ಅಥವಾ ಬ್ಯಾಂಕ್ ಪಾಸ್​​ಬುಕ್​ ಅನ್ನು ಅಟೆಸ್ಟ್ ಮಾಡಿಸಬೇಕಿತ್ತು.

ಇದನ್ನೂ ಓದಿ: ಎಸ್​​ಜಿಬಿ ಹೂಡಿಕೆದಾರರಿಗೆ ಸರ್ಕಾರ ಕೊಡಬೇಕಾದ ಬಾಕಿ: 12,06,92,00,00,000 ರೂ

ಆದರೆ, ಯುಎಎನ್ ನಂಬರ್ ಸೀಡಿಂಗ್ ವೇಳೆ ಇಪಿಎಫ್ ಸದಸ್ಯರ ಹೆಸರು ಮತ್ತು ಬ್ಯಾಂಕ್ ಖಾತೆಯ ಪರಿಶೀಲನೆ ನಡೆಸಲಾಗಿರುವುದರಿಂದ ಹೊಸದಾಗಿ ಚೆಕ್ ಲೀಫ್ ಅಪ್​​​ಲೋಡ್ ಮಾಡುವ ಕ್ರಮ ಅವಶ್ಯಕ ಇರುವುದಿಲ್ಲ.

ಚೆಕ್ ಲೀಫ್ ಫೋಟೋ ಅಪ್​ಲೋಡ್ ಮಾಡುವಾಗ ಸಾಕಷ್ಟು ಬಾರಿ ಫೋಟೋ ಗುಣಮಟ್ಟ ಸರಿಯಾಗಿ ಇರುವುದಿಲ್ಲ. ಇದರಿಂದ ಕ್ಲೇಮ್ ತಿರಸ್ಕೃತಗೊಳ್ಳುತ್ತಿದ್ದುದೇ ಹೆಚ್ಚು. ಹೀಗಾಗಿ, ಈ ಅನವಶ್ಯಕ ಪ್ರಕ್ರಿಯೆಯನ್ನು ನಿಲ್ಲಿಸಲು ಇಪಿಎಫ್​​ಒ ನಿರ್ಧರಿಸಿ, ಕಳೆದ ವರ್ಷ ಪ್ರಾಯೋಗಿಕವಾಗಿ ಇದನ್ನು ಜಾರಿಗೆ ತಂದಿತು. ಈಗ ಅದನ್ನು ಎಲ್ಲಾ ಇಪಿಎಫ್ ಖಾತೆದಾರರಿಗೂ ಜಾರಿ ಮಾಡಲಾಗುತ್ತಿದೆ.

ಇದನ್ನೂ ಓದಿ: 2024-25ಕ್ಕೆ ಇಪಿಎಫ್ ಹಣಕ್ಕೆ ಶೇ. 8.25 ಬಡ್ಡಿ: ಸಿಬಿಟಿ ನಿರ್ಧಾರ; 1952ರಿಂದೀಚೆಗಿನ ಇಪಿಎಫ್ ಬಡ್ಡಿದರಗಳ ಪಟ್ಟಿ

ಬ್ಯಾಂಕ್ ಖಾತೆ ಜೋಡಣೆಗೆ ಉದ್ಯೋಗದಾತರ ಅನುಮೋದನೆ ಅವಶ್ಯಕತೆ ಇಲ್ಲ…

ಯುಎಎನ್​​ಗೆ ಬ್ಯಾಂಕ್ ಅಕೌಂಟ್ ವಿವರವನ್ನು ಜೋಡಿಸುವುದು ಅವಶ್ಯಕತೆ ಇರುತ್ತದೆ. ಇಪಿಎಫ್ ಸದಸ್ಯರು ಬ್ಯಾಂಕ್ ಖಾತೆ ಸೀಡಿಂಗ್​​ಗೆ ಅರ್ಜಿ ಸಲ್ಲಿಸಿದ ಬಳಿಕ ಉದ್ಯೋಗದಾತರ (ಕಂಪನಿ) ಅನುಮೋದನೆ ಬೇಕಾಗುತ್ತದೆ. ಬ್ಯಾಂಕ್​​ನಿಂದ ವೆರಿಫಿಕೇಶನ್ ಆಗಲು 3 ದಿನ ಆಗುತ್ತದೆ. ಉದ್ಯೋಗದಾತರಿಂದ ವೆರಿಫೈ ಆಗಲು ಸರಾಸರಿ 13 ದಿನವಾಗುತ್ತಿದೆ. ಉದ್ಯೋಗದಾತರ ಅನುಮೋದನೆ ಅವಶ್ಯಕತೆ ಇಲ್ಲದಿರುವುದರಿಂದ ಆ ಪ್ರಕ್ರಿಯೆ ತೆಗೆದುಹಾಕಲು ನಿರ್ಧರಿಸಲಾಗಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ