ಆಲೂಗಡ್ಡೆಯಿಂದ ಎಥನಾಲ್ ಇಂಧನ; ಸಿಪಿಆರ್ಐನಿಂದ ಸದ್ಯದಲ್ಲೇ ಪ್ರಾಯೋಗಿಕ ಘಟಕ
Ethanol from potato waste: ಪೆಟ್ರೋಲ್ಗೆ ಪರ್ಯಾಯವಾಗಿ ಎಥನಾಲ್ ಇಂಧನ ತಯಾರಿಸಲಾಗುತ್ತಿದೆ. ಕಬ್ಬು ಮತ್ತು ಮುಸುಕಿನ ಜೋಳದಿಂದ ಎಥನಾಲ್ ಉತ್ಪಾದನೆ ಆಗುತ್ತಿದೆ. ಈಗ ಆಲೂಗಡ್ಡೆಯಿಂದಲೂ ತಯಾರಿಸುವ ಕಾರ್ಯ ಶುರುವಾಗುತ್ತಿದೆ. ಸೆಂಟ್ರಲ್ ಪೊಟಾಟೋ ರೀಸರ್ಚ್ ಇನ್ಸ್ಟಿಟ್ಯೂಟ್ನಿಂದ ಪ್ರಾಯೋಗಿಕ ಘಟಕ ಸ್ಥಾಪನೆಗೆ ಪ್ರಸ್ತಾಪ ಬಂದಿದೆ. ಉತ್ತರಪ್ರದೇಶ ಅಥವಾ ಪಶ್ಚಿಮ ಬಂಗಾಳದಲ್ಲಿ ಘಟಕ ಆರಂಭಿಸಬಹುದು.
Updated on: Sep 24, 2024 | 6:11 PM
ನವದೆಹಲಿ, ಸೆಪ್ಟೆಂಬರ್ 24: ಪೆಟ್ರೋಲ್, ಡೀಸೆಲ್ ಇತ್ಯಾದಿ ಪೆಟ್ರೋಲಿಯಂ ಉತ್ಪನ್ನಗಳಿಂದ ಪರಿಸರಕ್ಕೆ ಹಾನಿಯಾಗುತ್ತದೆ. ಇದನ್ನು ತಪ್ಪಿಸಲು ಸರ್ಕಾರ ಎಲೆಕ್ಟ್ರಿಕ್ ವಾಹನಗಳ ಜೊತೆಗೆ ಪರಿಸರಕ್ಕೆ ಹಾನಿಯಾಗದ ಇತರ ಪರ್ಯಾಯ ಇಂಧನಗಳಿಗೆ ಒತ್ತು ಕೊಡುತ್ತಿದೆ. ಈ ಪರ್ಯಾಯ ಇಂಧನಗಳಲ್ಲಿ ಎಥನಾಲ್ ಕೂಡ ಒಂದು. ಸದ್ಯ ಕಬ್ಬು ಮತ್ತು ಜೋಳದಿಂದ ಎಥನಾಲ್ ಅನ್ನು ಹೆಚ್ಚಾಗಿ ತಯಾರಿಸಲಾಗುತ್ತಿದೆ. ಹಾಗೆಯೇ, ಸ್ಟಾರ್ಚ್ ಅಂಶ ಇರುವ ಆಲೂಗಡ್ಡೆ, ಮರಗೆಣಸು, ತರಕಾರಿಗಳಿಂದಲೂ ಎಥನಾಲ್ ಉತ್ಪಾದನೆ ಮಾಡಬಹುದು ಎಂಬುದು ಸಂಶೋಧನೆಗಳಿಂದ ದೃಢಪಟ್ಟಿದೆ. ಇದೀಗ ಆಲೂಗಡ್ಡೆಯಿಂದ ಎಥನಾಲ್ ಉತ್ಪಾದನೆ ಮಾಡುವ ತಂತ್ರಜ್ಞಾನವನ್ನು ಕೇಂದ್ರೀಯ ಆಲೂ ಸಂಶೋಧನಾ ಸಂಸ್ಥೆ (ಸಿಪಿಆರ್ಐ) ಅಭಿವೃದ್ಧಿಪಡಿಸಿದೆ. ಇದರ ಪ್ರಾಯೋಗಿಕ ಘಟಕ ಸದ್ಯದಲ್ಲೇ ಸ್ಥಾಪನೆ ಆಗಲಿದೆ.
ಶಿಮ್ಲಾ ಮೂಲದ ಸಿಪಿಆರ್ಐ ಸಂಸ್ಥೆ ಆಲೂಗಡ್ಡೆ ತ್ಯಾಜ್ಯವನ್ನು ಎಥನಾಲ್ ಆಗಿ ಹೇಗೆ ಪರಿವರ್ತಿಸಬಹುದು ಎಂದು ಲ್ಯಾಬ್ನಲ್ಲಿ ಯಶಸ್ವಿ ಪರೀಕ್ಷೆಗಳನ್ನು ಮಾಡಿದೆ. ಈ ತಂತ್ರಜ್ಞಾನ ಸರಿಯಾಗಿ ಕೆಲಸ ಮಾಡುತ್ತದಾ ಇಲ್ಲವಾ ಎಂಬುದನ್ನು ಪರೀಕ್ಷಿಸಲು ಉತ್ತರಪ್ರದೇಶ ಅಥವಾ ಪಶ್ಚಿಮ ಬಂಗಾಳದಲ್ಲಿ ಒಂದು ಪ್ರಾಯೋಗಿಕ ಘಟಕ ಸ್ಥಾಪಿಸಲು ಯೋಜಿಸಿದೆ.
ಇದನ್ನೂ ಓದಿ: ಈ ವರ್ಷ ಜಿಡಿಪಿ ಹೆಚ್ಚಳ ಶೇ. 6.8; ಮುಂದಿನ ಸಭೆಯಲ್ಲೇ ಆರ್ಬಿಐನಿಂದ ಬಡ್ಡಿ ಇಳಿಕೆ: ಎಸ್ ಅಂಡ್ ಪಿ ನಿರೀಕ್ಷೆ
ಆಲೂಗಡ್ಡೆ ಉತ್ಪಾದನೆ ಚೀನಾ ಬಿಟ್ಟರೆ ಭಾರತದಲ್ಲೇ ಹೆಚ್ಚು. ವರ್ಷಕ್ಕೆ ಸರಾಸರಿಯಾಗಿ 5.6 ಕೋಟಿ ಟನ್ ಆಲೂಗಡ್ಡೆಯನ್ನು ಭಾರತದಲ್ಲಿ ಬೆಳೆಯಲಾಗುತ್ತದೆ. ತ್ಯಾಜ್ಯದ ಹಾಗೆ ಬಿಸಾಡಲಾಗುತ್ತಿರುವ ಆಲೂಗಡ್ಡೆ ಶೇ. 15ರಷ್ಟಿದೆ. ಫಸಲಿನ ಹಂತದಿಂದ ಹಿಡಿದು ಮಾರುಕಟ್ಟೆ ಬರುವವರೆಗೆ ಹಾಳಾಗುವ ಆಲೂಗಡ್ಡೆ ಪ್ರಮಾಣ ಇನ್ನೂ ಹೆಚ್ಚಿದೆ. ಇಷ್ಟೊಂದು ದೊಡ್ಡ ಪ್ರಮಾಣದ ಆಲೂಗಡ್ಡೆಯು ಎಥನಾಲ್ ಉತ್ಪಾದನೆಗೆ ಹೇಳಿ ಮಾಡಿಸಿದಂತಿರುತ್ತದೆ ಎಂಬುದು ತಜ್ಞರ ಅನಿಸಿಕೆ.
ಭಾರತದಲ್ಲಿ ಬೆಳೆಯಲಾಗುವ ಆಲೂಗಡ್ಡೆಯಲ್ಲಿ ಶೇ. 8-10ರಷ್ಟವು ಚಿಪ್ಸ್, ಫ್ರೈ ಇತ್ಯಾದಿ ಉತ್ಪನ್ನಗಳ ತಯಾರಿಕೆಗೆ ಬಳಕೆ ಆಗುತ್ತವೆ. ಕಟಾವು ಆದ ಬಳಿಕ ಅಸಮರ್ಪಕವಾದ ಉಗ್ರಾಣ ವ್ಯವಸ್ಥೆ, ಸಾಗಾಣಿಕೆ, ನಿರ್ವಹಣೆ ಇತ್ಯಾದಿ ಕಾರಣಗಳಿಂದ ಶೇ. 20-25ರಷ್ಟು ಆಲೂಗಡ್ಡೆ ಹಾಳಾಗಿ ಹೋಗುತ್ತವೆ ಎನ್ನುವ ಅಂದಾಜಿದೆ.
ಆಲೂಗಡ್ಡೆ ಹೆಚ್ಚಾಗಿ ಬೆಳೆಯಲಾಗುವ ಉತ್ತರಪ್ರದೇಶ ಅಥವಾ ಪಶ್ಚಿಮ ಬಂಗಾಳ ರಾಜ್ಯದಲ್ಲಿ ಸಿಪಿಆರ್ಐನ ಪ್ರಾಯೋಗಿಕ ಘಟಕವು ಸ್ಥಾಪನೆಯಾಗಬಹುದು. ಆಲೂಗಡ್ಡೆಯ ಸಿಪ್ಪೆ, ತ್ಯಾಜ್ಯ, ಕೊಳೆತ ಆಲೂಗಡ್ಡೆ, ಕಳಪೆ ಗುಣಮಟ್ಟದ ಆಲೂಗಡ್ಡೆಗಳನ್ನು ಸಂಗರಹಿಸಿ ಅದರಿಂದ ಎಥನಾಲ್ ಅನ್ನು ತಯಾರಿಸಲಾಗುತ್ತದೆ.
ಇದನ್ನೂ ಓದಿ: ಭಾರತದ ಶಕ್ತಿ..! ಅಮೆರಿಕದ ಸಹಭಾಗಿತ್ವದಲ್ಲಿ ಮೊದಲ ರಾಷ್ಟ್ರೀಯ ಭದ್ರತಾ ಸೆಮಿಕಂಡಕ್ಟರ್ ಫ್ಯಾಬ್ ಘಟಕ
ಸದ್ಯ ಪೆಟ್ರೋಲ್ಗೆ ಸೀಮಿತ ಪ್ರಮಾಣದಲ್ಲಿ ಎಥನಾಲ್ ಅನ್ನು ಮಿಶ್ರಣ ಮಾಡಿ ಮಾರಲಾಗುತ್ತಿದೆ. ಮುಂದಿನ ದಿನಗಳಲ್ಲಿ ಪೆಟ್ರೋಲ್ಗೆ ಶೇ. 90ಕ್ಕಿಂತಲೂ ಹೆಚ್ಚು ಎಥನಾಲ್ ಮಿಶ್ರಣ ಮಾಡುವ ಯೋಜನೆ ಅಥವಾ ಗುರಿ ಸರ್ಕಾರದ್ದಾಗಿದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
