ಭಾರತದಿಂದ ಮೊದಲ ಕ್ವಾರ್ಟರ್ನಲ್ಲಿ 5 ಬಿಲಿಯನ್ ಡಾಲರ್ ಮೌಲ್ಯದ ಐಫೋನ್ ರಫ್ತು
India exports 5 billion dollar iPhones in 2026Q1: 2025-26ರ ಹಣಕಾಸು ವರ್ಷದ ಮೊದಲ ಕ್ವಾರ್ಟರ್ನಲ್ಲಿ ಭಾರತದಿಂದ ಐದು ಬಿಲಿಯನ್ ಡಾಲರ್ ಮೌಲ್ಯದ ಐಫೋನ್ ರಫ್ತಾಗಿದೆ. ಕಳೆದ ವರ್ಷದ ಇದೇ ತ್ರೈಮಾಸಿಕ ಅವಧಿಯಲ್ಲಿ 3 ಬಿಲಿಯನ್ ಡಾಲರ್ ಮೌಲ್ಯದ ಐಫೋನ್ ರಫ್ತಾಗಿತ್ತು. ಆದರೆ, ಹಿಂದಿನ ಕ್ವಾರ್ಟರ್ ಆದ ಜನವರಿಯಿಂದ ಮಾರ್ಚ್ವರೆಗಿನ ಕ್ವಾರ್ಟರ್ನಲ್ಲಿ 5.58 ಬಿಲಿಯನ್ ಡಾಲರ್ ಮೌಲ್ಯದ ಐಫೋನ್ ರಫ್ತಾಗಿತ್ತು.
ನವದೆಹಲಿ, ಜುಲೈ 20: ಭಾರತದಿಂದ ರಫ್ತಾಗುತ್ತಿರುವ ಸ್ಮಾರ್ಟ್ಫೋನ್ನಲ್ಲಿ ಆ್ಯಪಲ್ ಪಾಲು (iPhone exports) ಶೇ. 70ರಷ್ಟಿದೆ. 2025ರ ಏಪ್ರಿಲ್ನಿಂದ ಜೂನ್ವರೆಗಿನ ತ್ರೈಮಾಸಿಕದಲ್ಲಿ ಐದು ಬಿಲಿಯನ್ ಡಾಲರ್ ಮೌಲ್ಯದ ಐಫೋನ್ಗಳು ಭಾರತದಿಂದ ರಫ್ತಾಗಿವೆ ಎಂದು ಮನಿಕಂಟ್ರೋಲ್ ವೆಬ್ಸೈಟ್ನಲ್ಲಿ ವರದಿ ಪ್ರಕಟವಾಗಿದೆ. ಕಳೆದ ವರ್ಷದ ಇದೇ ಕ್ವಾರ್ಟರ್ನಲ್ಲಿ 3 ಬಿಲಿಯನ್ ಡಾಲರ್ ಮೌಲ್ಯದ ಐಫೋನ್ಗಳು ರಫ್ತಾಗಿದ್ದವು. ಅಮೆರಿಕ ಮತ್ತು ಚೀನಾ ದೇಶಗಳ ಒತ್ತಡದ ನಡುವೆಯೂ ಆ್ಯಪಲ್ ಕಂಪನಿ ಭಾರತದಲ್ಲಿ ಐಫೋನ್ ತಯಾರಿಕೆಯ ಪ್ರಮಾಣವನ್ನು ವರ್ಷದಿಂದ ವರ್ಷಕ್ಕೆ ಏರಿಸುತ್ತಲೇ ಹೋಗುತ್ತಿದೆ.
ಫಾಕ್ಸ್ಕಾನ್ ಮತ್ತು ಟಾಟಾ ಎಲೆಕ್ಟ್ರಾನಿಕ್ಸ್ ಕಂಪನಿಗಳು ಭಾರತದಲ್ಲಿ ಐಫೋನ್ಗಳನ್ನು ತಯಾರಿಸುವ ಕೆಲಸ ಮಾಡುತ್ತಿವೆ. ಜಾಗತಿಕ ಸ್ಮಾರ್ಟ್ಫೋನ್ ಸರಬರಾಜು ಸರಪಳಿಯಲ್ಲಿ ಭಾರತದ ಪಾತ್ರ ಗಟ್ಟಿಗೊಳ್ಳುತ್ತಿದೆ.
ಇದನ್ನೂ ಓದಿ: ಭಾರತಕ್ಕೇನು ಕಾದಿದೆ? ಒಪ್ಪಂದ ಮಾಡಿಕೊಂಡರೆ ಶೇ 10, ಇಲ್ಲದಿದ್ದರೆ ಶೇ. 27 ಟ್ಯಾರಿಫ್? ಟ್ರಂಪ್ ನಿಲುವೇನಾಗಬಹುದು?
ಮಾರ್ಚ್ ಅಂತ್ಯದ ಕ್ವಾರ್ಟರ್ನಲ್ಲಿ 5.58 ಬಿಲಿಯನ್ ಡಾಲರ್ ಐಫೋನ್ ರಫ್ತು
ಕಳೆದ ಹಣಕಾಸು ವರ್ಷದ ಕೊನೆಯ ಕ್ವಾರ್ಟರ್ ಆದ ಜನವರಿಯಿಂದ ಮಾರ್ಚ್ವರೆಗಿನ ಅವಧಿಯಲ್ಲಿ5.58 ಬಿಲಿಯನ್ ಡಾಲರ್ ಮೌಲ್ಯದ ಐಫೋನ್ಗಳನ್ನು ಭಾರತದಿಂದ ಸರಬರಾಜು ಮಾಡಲಾಗಿತ್ತು. ಯಾವುದೇ ಕ್ವಾರ್ಟರ್ನಲ್ಲಿ ಅತಿಹೆಚ್ಚು ಐಫೋನ್ ರಫ್ತಾಗಿದ್ದು ಅದೇ ಮೊದಲು. ಡೊನಾಲ್ಡ್ ಟ್ರಂಪ್ ಅವರು ಏಪ್ರಿಲ್ನಿಂದ ಅಧಿಕ ಟ್ಯಾರಿಫ್ ವಿಧಿಸುವ ಎಚ್ಚರಿಕೆ ನೀಡಿದ್ದರಿಂದ ಆ್ಯಪಲ್ ಕಂಪನಿ ಮಾರ್ಚ್ನೊಳಗೆ ಐಫೋನ್ ದಾಸ್ತಾನು ಹೆಚ್ಚಿಸಿತ್ತು. ಹೀಗಾಗಿ, ಮೇಡ್ ಇನ್ ಇಂಡಿಯಾ ಐಫೋನ್ಗಳು ಮಾರ್ಚ್ ತಿಂಗಳಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ಅಮೆರಿಕವನ್ನು ತಲುಪಿದ್ದವು. ಆ ಕ್ವಾರ್ಟರ್ನಲ್ಲಿ ಅತಿಹೆಚ್ಚು ಐಫೋನ್ ರಫ್ತಾಗಲು ಇದು ಪ್ರಮುಖ ಕಾರಣ.
ಜೂನ್ ಕ್ವಾರ್ಟರ್ನಲ್ಲಿ ಮಂಕಾಗುವ ಐಫೋನ್ ಸೇಲ್ಸ್
ಸಾಮಾನ್ಯವಾಗಿ ಆ್ಯಪಲ್ ಕಂಪನಿ ಸೆಪ್ಟೆಂಬರ್ ತಿಂಗಳಲ್ಲಿ ಹೊಸ ಐಫೋನ್ ಅನಾವರಣಗೊಳಿಸುತ್ತದೆ. ಹೀಗಾಗಿ, ಜೂನ್ ಅಂತ್ಯದ ಕ್ವಾರ್ಟರ್ ಮತ್ತು ಸೆಪ್ಟೆಂಬರ್ ಅಂತ್ಯದ ಕ್ವಾರ್ಟರ್ಗಳಲ್ಲಿ ಐಫೋನ್ ಮಾರಾಟ ಕಡಿಮೆ ಇರುತ್ತದೆ. ಹೀಗಾಗಿ, ಈ ಬಾರಿಯ ಜೂನ್ ಕ್ವಾರ್ಟರ್ನಲ್ಲಿ ಭಾರತದಿಂದ 5 ಬಿಲಿಯನ್ ಡಾಲರ್ ಮೌಲ್ಯದ ಐಫೋನ್ಗಳು ರಫ್ತಾಗಿರುವುದು ಗಮನಾರ್ಹ ಸಂಗತಿ.
ಇದನ್ನೂ ಓದಿ: ಭಾರತದ ಪ್ರಾಜೆಕ್ಟ್ ವಿಷ್ಣು; ಸೆಕೆಂಡ್ಗೆ 2-3 ಕಿಮೀ ವೇಗವಾಗಿ ಹೋಗಬಲ್ಲ ಹೊಸ ಕ್ಷಿಪಣಿ ಸದ್ಯದಲ್ಲೇ
ಭಾರತದಲ್ಲಿ 2024-25ರ ಹಣಕಾಸು ವರ್ಷದಲ್ಲಿ ಒಟ್ಟಾರೆ ಸ್ಮಾರ್ಟ್ಫೋನ್ ತಯಾರಿಕೆ 64 ಬಿಲಿಯನ್ ಡಾಲರ್ ಮುಟ್ಟಿದೆ. ಇದರಲ್ಲಿ 24.1 ಬಿಲಿಯನ್ ಡಾಲರ್ನಷ್ಟು ರಫ್ತಾಗಿದೆ. ಅಂದರೆ, ಕಳೆದ ಹಣಕಾಸು ವರ್ಷದಲ್ಲಿ ಶೇ. 38ರಷ್ಟು ಮೇಡ್ ಇನ್ ಇಂಡಿಯಾ ಫೋನ್ಗಳು ವಿದೇಶಗಳಿಗೆ ಹೋಗಿವೆ.
2014-15ರಲ್ಲಿ ಭಾರತದಿಂದ ರಫ್ತಾಗುವ ಸರಕುಗಳಲ್ಲಿ ಸ್ಮಾರ್ಟ್ಫೋನ್ 167ನೇ ಸ್ಥಾನದಲ್ಲಿತ್ತು. ಈಗ ಅದು ಎಂಜಿನಿಯರಿಂಗ್ ಸರಕು ಮತ್ತು ಪೆಟ್ರೋಲಿಯಂ ಬಳಿಕ ಅತಿಹೆಚ್ಚು ರಫ್ತಾಗುವ ವಸ್ತುವಾಗಿದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ