ಎಲ್ಲಿಂದಲೋ ತಂದು ಅಸೆಂಬಲ್ ಮಾಡಿದ್ರೆ ಮೇಡ್ ಇನ್ ಇಂಡಿಯಾ ಆಗಲ್ಲ; ಎಲ್ಲವೂ ಇಲ್ಲಿಯೇ ತಯಾರಾಗಬೇಕು: ಸೌರಫಲಕ ವಿಚಾರದಲ್ಲಿ ಸರ್ಕಾರ ಬಿಗಿ ಧೋರಣೆ

ನವದೆಹಲಿ, ಅಕ್ಟೋಬರ್ 22: ಸಂಪೂರ್ಣವಾಗಿ ಭಾರತದಲ್ಲೇ ತಯಾರಾದ ಸೌರಫಲಕಗಳನ್ನು ಮಾತ್ರವೇ ನೊಂದಣಿ ಮಾಡುವ ಯೋಜನೆಯಲ್ಲಿ ಕೇಂದ್ರ ಸರ್ಕಾರ ಇದೆ. ಐಫೋನ್​ಗಳನ್ನು ಅಸೆಂಬಲ್ ಮಾಡಲಾಗುವಂತೆ ಸೌರಫಲಕಗಳನ್ನು ಭಾರತದಲ್ಲಿ ಅಸೆಂಬಲ್ ಮಾಡಿದರೆ ಅಂಥ ಸೋಲಾರ್ ಪ್ಯಾನಲ್​ಗಳನ್ನು ಸರ್ಕಾರ ಸ್ವೀಕರಿಸದೇ ಹೋಗುವ ಸಾಧ್ಯತೆ ಇದೆ. ಕೇಂದ್ರ ಹೊಸ ಮತ್ತು ಮರುಬಳಕೆ ಶಕ್ತಿ ಸಚಿವ ಆರ್ ಕೆಲ ಸಿಂಗ್ ಅವರು ಈ ಬಗ್ಗೆ ಮಾಹಿತಿ ನೀಡಿದ್ದು, ಮುಂದಿನ ಮೂರ್ನಾಲ್ಕು ವರ್ಷದಲ್ಲಿ ಎಎಲ್​ಎಂಎಂ ಅಡಿಯಲ್ಲಿ ಭಾರತದಲ್ಲೇ ತಯಾರಾದ ಸೆಲ್, ವೇಫರ್ ಮತ್ತು ಪಾಲಿಸಿಲಿಕಾನ್​ಗಳಿಂದ ಮಾಡಲಾದ ಸೋಲಾರ್ ಪ್ಯಾನಲ್​ಗಳನ್ನು ಮಾತ್ರ ನೊಂದಣಿ ಮಾಡಲು ಯೋಜಿಸಲಾಗಿರುವ ವಿಚಾರವನ್ನು ತಿಳಿಸಿದ್ದಾರೆ. ಈ ನಿಟ್ಟಿನಲ್ಲಿ ತಮ್ಮ ಸಚಿವಾಲಯದ ಸಂಬಂಧಿತ ಅಧಿಕಾರಿಗಳು ಈ ನಿಟ್ಟಿನಲ್ಲಿ ಒಂದು ಸ್ಪಷ್ಟ ನೀತಿ ಸಿದ್ಧಪಡಿಸುವಂತೆ ಸಚಿವರು ತಿಳಿಸಿದ್ದಾರೆ.

ಏನಿದು ಎಎಲ್​ಎಂಎಂ?: ಇದು ಮಾಡಲ್ ಮತ್ತು ತಯಾರಕರ ಅನುಮೋದಿತ ಪಟ್ಟಿ. ಸೌರ ಫಲಕಗಳನ್ನು ದೇಶೀಯವಾಗಿ ತಯಾರಿಸುವ ಕಾರ್ಯಕ್ಕೆ ಉತ್ತೇಜನ ನೀಡಲು ಈ ಯೋಜನೆ ರೂಪಿಸಲಾಗಿದೆ. ಸೌರಶಕ್ತಿ ಪಡೆಯಲು ಸೌರಫಲಕಗಳು ಬೇಕು. ಸೋಲಾರ್ ಸೆಲ್, ವೇಫರ್ ಮತ್ತು ಪಾಲಿಸಿಲಿಕಾನ್​ಗಳು ಸೌರ ಫಲಕದ ಪ್ರಮುಖ ಭಾಗಗಳು. ಬಹಳಷ್ಟು ಕಂಪನಿಗಳು ಈ ಮೂರು ವಸ್ತುಗಳನ್ನು ಬೇರೆ ದೇಶಗಳಿಂದ ಭಾರತಕ್ಕೆ ತರಿಸಿಕೊಂಡು ಅಸೆಂಬಲ್ ಮಾಡಿ, ಮೇಡ್ ಇನ್ ಇಂಡಿಯಾ ಎಂದು ಬ್ರ್ಯಾಂಡ್ ಮಾಡುತ್ತಿವೆ. ಆದರೆ, ಸರ್ಕಾರ ಇದನ್ನು ಒಪ್ಪದೇ ಇರಲು ನಿರ್ಧರಿಸಿದೆ.

ಇದನ್ನೂ ಓದಿ: ಭಾರತದ ಸೆಮಿಕಂಡಕ್ಟರ್ ಮಹತ್ವಾಕಾಂಕ್ಷೆಗೆ ಇಸ್ರೇಲೀ ಶಕ್ತಿ; ಭಾರತದಲ್ಲಿ ಚಿಪ್ ಫ್ಯಾಕ್ಟರಿ ಸ್ಥಾಪಿಸಲು ಟವರ್ ಸೆಮಿಕಂಡಕ್ಟರ್ ಆಸಕ್ತಿ

‘ನಮ್ಮ ನೀತಿಗಳಲ್ಲಿ ಬದಲಾವಣೆ ಮಾಡುತ್ತೇವೆ. ಮೇಡ್ ಇನ್ ಇಂಡಿಯಾ ಸೆಲ್​ಗಳ ಮಾಡ್ಯೂಲ್​ಗಳನ್ನು ಮಾತ್ರವೇ ರಕ್ಷಿಸುತ್ತೇವೆ. ಒಂದು ಅಥವಾ ಎರಡು ವರ್ಷದಲ್ಲಿ ಅಂಥದ್ದೊಂದು ನೀತಿಯನ್ನು ತರುತ್ತೇವೆ. ಅದಾದ ಬಳಿಕ 1-2 ವರ್ಷಗಳ ನಂತರ ವೇಫರ್ ಮತ್ತು ಪಾಲಿಸಿಲಿಕಾನ್ ಅನ್ನೂ ಕೂಡ ಭಾರತದಲ್ಲಿ ತಯಾರಿಸಬೇಕೆಂಬ ನೀತಿ ತರುತ್ತೇವೆ. ಆಗ ನಿಜವಾದ ಮೇಕ್ ಇನ್ ಇಂಡಿಯಾ ಎನಿಸುತ್ತದೆ’ ಎಂದು ಆರ್ ಕೆ ಸಿಂಗ್ ಹೇಳಿದ್ದಾರೆ.

‘ನೀವು ಹೊರಗಿನಿಂದ ಸೆಲ್ ಆಮದು ಮಾಡಿ ಇಲ್ಲಿಗೆ ತಂದು ಅಸೆಂಬಲ್ ಮಾಡುತ್ತೀರಿ. ಶೇ. 90ರಷ್ಟು ಭಾಗವು ಮೇಡ್ ಇನ್ ಚೀನಾ ಆದರೂ ನೀವು ಮೇಡ್ ಇನ್ ಇಂಡಿಯಾ ಎಂದು ಹೇಳಿ ಮಾರುತ್ತೀರಿ. ಇದು ಮುಂದೆ ಆಗುವುದಿಲ್ಲ’ ಎಂದು ನ್ಯೂ ಅಂಡ್ ರಿನಿವಬಲ್ ಎನರ್ಜಿ ಸಚಿವರು ತಿಳಿಸಿದ್ದಾರೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ