MSP: ರಾಗಿ, ಜೋಳ ಇತ್ಯಾದಿ ಮುಂಗಾರು ಬೆಳೆಗಳಿಗೆ ಎಂಎಸ್​ಪಿ ಹೆಚ್ಚಳ ಸಾಧ್ಯತೆ; ಈ ವರ್ಷ ಗೋಧಿ ಖರೀದಿಯಲ್ಲಿ ಸರ್ಕಾರ ದಾಖಲೆ

ನವದೆಹಲಿ: ಈ ವರ್ಷದ ಮುಂಗಾರು ಬೆಳೆ ಅಥವಾ ಖಾರಿಫ್ ಬೆಳೆಗಳಿಗೆ (Kharif Crops) ಕನಿಷ್ಠ ಬೆಂಬಲ ಬೆಲೆ ಹೆಚ್ಚಿಸಲು ಕೇಂದ್ರ ಸರ್ಕಾರ ಚಿಂತಿಸುತ್ತಿದೆ ಎನ್ನುವ ಮಾಹಿತಿ ಮೂಲಗಳಿಂದ ದೊರೆತಿದೆ. ಅದರ ಪ್ರಕಾರ ವಿವಿಧ ಬೆಳೆಗಳಿಗೆ ಇರುವ ಎಂಎಸ್​ಪಿಯನ್ನು (Minimum Support Price) ಶೇ. 3ರಿಂದ 8ರಷ್ಟು ಏರಿಸುವ ಸಾಧ್ಯತೆ ಇದೆ. ಗೋಧಿ, ಭತ್ತ ಇತ್ಯಾದಿ ಬೆಳೆಗಳಿಗೆ ಸರ್ಕಾರ ಹೆಚ್ಚು ದರ ಕೊಟ್ಟು ಖರೀದಿಸಬಹುದು ಎನ್ನಲಾಗಿದೆ. 2040 ರೂ ಇರುವ ಭತ್ತದ ಎಂಎಸ್​ಪಿ ದರವನ್ನು 2,200 ರೂವರೆಗೂ ಏರಿಸುವ ಸಾಧ್ಯತೆ ಇದೆ. ಕ್ವಿಂಟಾಲ್ ರಾಗಿಗೆ ಇರುವ 3,578 ರೂ ಬೆಂಬಲ ಬೆಲೆಯನ್ನು 4,000 ರೂಗೆ ಏರಿಸಬಹುದು ಎನ್ನಲಾಗುತ್ತಿದೆ.

ಗೋಧಿ ಇತ್ಯಾದಿ ಹಿಂಗಾರು ಬೆಳೆಗಳಿಗೆ ಸರ್ಕಾರ ಇತ್ತೀಚೆಗೆ ಎಂಎಸ್​ಪಿ ದರ ಹೆಚ್ಚಿಸಿತ್ತು. ಈಗ ಮುಂಗಾರು ಬೆಳೆಗೂ ಸರ್ಕಾರದಿಂದ ಕನಿಷ್ಠ ಬೆಂಬಲ ಬೆಲೆ ಹೆಚ್ಚಳವಾಗಬಹುದು ಎಂದು ನಿರೀಕ್ಷಿಸಬಹುದು.

ಮುಂಗಾರು ಬೆಳೆಗಳಿಗೆ ಸದ್ಯ ಇರುವ ಎಂಎಸ್​ಪಿ ದರಗಳ ಪಟ್ಟಿ (2022-23)

• ಭತ್ತ: ಕ್ವಿಂಟಾಲ್​ಗೆ 2040 ರೂ
• ಜೋಳ (ಹೈಬ್ರಿಡ್): ಕ್ವಿಂಟಾಲ್​ಗೆ 2970 ರೂ
• ಮೆಕ್ಕೆ ಜೋಳ: ಕ್ವಿಂಟಾಲ್​ಗೆ 1,962 ರೂ
• ಬಿಳಿ ಜೋಳ: 2,350 ರೂ
• ರಾಗಿ: ಕ್ವಿಂಟಾಲ್​ಗೆ 3578 ರೂ
• ತೊಗರಿಬೇಳೆ: 6,600 ರೂ
• ಹೆಸರುಕಾಳು: 7,755 ರೂ
• ಶೇಂಗಾ: 5,850 ರೂ
• ಉದ್ದಿನಬೇಳೆ: 6,600 ರೂ
• ಸೋಯಾ: 4,300 ರೂ

ಇದನ್ನೂ ಓದಿ: UPI: ಪೇಟಿಎಂ, ಫೋನ್​ಪೇ ಇತ್ಯಾದಿ ಬಳಸಿ ಜನರು ಮೇ ತಿಂಗಳಲ್ಲಿ ನಡೆಸಿದ ವಹಿವಾಟು 14 ಲಕ್ಷ ಕೋಟಿ ರೂ

ಐದು ತಿಂಗಳಲ್ಲಿ 262 ಲಕ್ಷ ಟನ್ ಗೋಧಿ ಖರೀದಿಸಿದ ಸರ್ಕಾರ

ಕನಿಷ್ಠ ಬೆಂಬಲ ಬೆಲೆ ದರದಲ್ಲಿ ಈ ವರ್ಷ ಇದೂವರೆಗೂ ಕೇಂದ್ರ ಸರ್ಕಾರ ರೈತರಿಂದ 262 ಲಕ್ಷ ಟನ್​ಗಳಷ್ಟು ಗೋಧಿ ಖರೀದಿ ಮಾಡಿದೆ. ಒಟ್ಟು 47,000 ಕೋಟಿ ರೂ ಹಣವನ್ನು ಈ ಗೋಧಿ ಬೆಳೆದ ರೈತರಿಗೆ ತಲುಪಿಸಲಾಗಿದೆ. 21.27 ಲಕ್ಷ ರೈತರಿಗೆ ಅನುಕೂಲವಾಗಿದೆ.

ಕಳೆದ ವರ್ಷ (2022) ಕೇಂದ್ರ ಸರ್ಕಾರ ಎಂಎಸ್​ಪಿ ದರದಲ್ಲಿ ರೈತರಿಂದ 188 ಲಕ್ಷ ಟನ್​ಗಳಷ್ಟು ಗೋಧಿ ಖರೀದಿ ಮಾಡಿತ್ತು. ಈ ವರ್ಷ ಕೇವಲ 5 ತಿಂಗಳಲ್ಲಿ ಆ ಮೊತ್ತವನ್ನು ಮೀರಿಸಿ ಖರೀದಿ ಡೆದಿದೆ. ಹಿಂಗಾರು ಋತು ಅಥವಾ ರಾಬಿ ಋತುವಿನ ಬೆಳೆಯಾದ ಗೋಧಿಗೆ ಕೇಂದ್ರ ಸರ್ಕಾರ ಕನಿಷ್ಠ ಬೆಂಬಲ ಬೆಲೆಯನ್ನು ಕ್ವಿಂಟಾಲ್​ಗೆ 2,125 ರೂಗೆ ನಿಗದಿ ಮಾಡಿದೆ.

ಇದನ್ನೂ ಓದಿ: Arecanut Price 01 ಜೂನ್: ಅಡಿಕೆ ರೇಟ್, ಇಂದಿನ ಅಡಿಕೆ ಧಾರಣೆ ಎಲ್ಲೆಲ್ಲಿ ಎಷ್ಟಿದೆ? ಇಲ್ಲಿದೆ ಮಾಹಿತಿ

ಹಿಂಗಾರು ಬೆಳೆಗಳಿಗೆ ಇರುವ ಎಂಎಸ್​ಪಿ ದರ (2023-24)

• ಗೋಧಿ: ಕ್ವಿಂಟಾಲ್​ಗೆ 2,125 ರೂ
• ಬಾರ್ಲಿ: 1,634 ರೂ
• ಸಾಸಿವೆ: 5,450 ರೂ
• ಅವರೆ: 6,000 ರೂ
• ಕಡಲೆ: 5,335 ರೂ

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ