HCL Technologies FY21 Q4 Results; ಎಚ್ಸಿಎಲ್ ವಿಶೇಷ ಮಧ್ಯಂತರ ಡಿವಿಡೆಂಡ್ ತಲಾ 10 ರೂ. ಘೋಷಣೆ
ಎಚ್ಸಿಎಲ್ ಟೆಕ್ನಾಲಜೀಸ್ನಿಂದ 2020-21ನೇ ಸಾಲಿನ ನಾಲ್ಕನೇ ತ್ರೈಮಾಸಿಕದ ಫಲಿತಾಂಶವನ್ನು ಘೋಷಿಸಲಾಗಿದೆ. ಒಟ್ಟಾರೆ ನಿವ್ವಳ ಲಾಭ ಶೇ 6.1ರಷ್ಟು ಇಳಿಕೆಯಾಗಿ, ರೂ. 2,962 ಕೋಟಿಯನ್ನು ಮುಟ್ಟಿದೆ.
Updated on: Apr 23, 2021 | 11:34 PM
ಎಚ್ಸಿಎಲ್ ಟೆಕ್ನಾಲಜೀಸ್ನಿಂದ ಶುಕ್ರವಾರದಂದು 2021ರ ಜನವರಿಯಿಂದ- ಮಾರ್ಚ್ ತ್ರೈಮಾಸಿಕದ ಫಲಿತಾಂಶವನ್ನು ಪ್ರಕಟಿಸಲಾಗಿದೆ. ಕಳೆದ ವರ್ಷಕ್ಕೆ ಹೋಲಿಸಿದಲ್ಲಿ ಒಟ್ಟಾರೆ ನಿವ್ವಳ ಲಾಭ ಶೇ 6.1ರಷ್ಟು ಇಳಿಕೆಯಾಗಿ, ರೂ. 2,962 ಕೋಟಿಯನ್ನು ಮುಟ್ಟಿದೆ. ಇನ್ನು ಅಕ್ಟೋಬರ್ನಿಂದ ಡಿಸೆಂಬರ್ ಅವಧಿಯ ತ್ರೈಮಾಸಿಕಕ್ಕೆ ಹೋಲಿಸಿದಲ್ಲಿ ಶೇ 25.6ರಷ್ಟು ಲಾಭ ಇಳಿಕೆ ಆಗಿದೆ. ಅಂದಹಾಗೆ 2020- 21ನೇ ಆರ್ಥಿಕ ವರ್ಷದ ನಾಲ್ಕನೇ ತ್ರೈಮಾಸಿಕದಲ್ಲಿ ಏನು ಲಾಭ ಬಂದಿದೆಯೋ, ಅದು ಬಹಳ ಮಹತ್ವದ್ದು ಎನಿಸಿಕೊಂಡಿದೆ.
ಏಕೆಂದರೆ, ಒಂದು ಸಲದ ಬೋನಸ್ 728 ಕೋಟಿ ರೂಪಾಯಿ ಅಥವಾ ರೂ. 575 ಕೋಟಿ ರೂಪಾಯಿ ನಿವ್ವಳ ತೆರಿಗೆಯನ್ನು ಮಾರ್ಚ್ ತಿಂಗಳಲ್ಲಿ ಪಾವತಿಸಲಾಗಿದೆ ಎಂದು ಎಚ್ಸಿಎಲ್ ಟೆಕ್ ಬಿಡುಗಡೆ ಮಾಡಿದ ಮಾಹಿತಿಯಲ್ಲಿ ತಿಳಿಸಲಾಗಿದೆ. ಬೋನಸ್ ಸೇರಿಸಿಕೊಂಡಿದ್ದರೆ ಕಂಪೆನಿಯ ಲಾಭ ರೂ. 2,387 ಕೋಟಿ ಆಗಿರುತ್ತಿತ್ತು.
ಎಚ್ಸಿಎಲ್ ಕಂಪೆನಿಯ ಆದಾಯ ಕಳೆದ ವರ್ಷಕ್ಕಿಂತ ಶೇ 5.7ರಷ್ಟು ಹೆ್ಚ್ಚಳವಾಗಿ ರೂ. 19,642 ಕೋಟಿ ಆಗಿದೆ. ಇನ್ನು ಕಳೆದ ತ್ರೈಮಾಸಿಕಕ್ಕೆ ಹೋಲಿಸಿದಲ್ಲಿ ಶೇ 1.8ರಷ್ಟು ಜಾಸ್ತಿ ಆಗಿದೆ. FY21 ಹಣಕಾಸು ವರ್ಷದಲ್ಲಿ ಎಚ್ಸಿಎಲ್ ಟೆಕ್ ನಿವ್ವಳ ಲಾಭ ಅದರ ಹಿಂದಿನ ಆರ್ಥಿಕ ವರ್ಷಕ್ಕಿಂತ ಶೇಕಡಾ 17.6ರಷ್ಟು ಹೆಚ್ಚಾಗಿದೆ. ಇನ್ನು ಆದಾಯ ಶೇ 6.7ರಷ್ಟು ಮೇಲೇರಿ ರೂ. 75,379 ಕೋಟಿಯಾಗಿದೆ. FY22ರಲ್ಲಿ ಆದಾಯ ಬೆಳವಣಿಗೆ ಎರಡಂಕಿ ದಾಟಬಹುದು ಎಂಬ ನಿರೀಕ್ಷೆ ಎಚ್ಸಿಎಲ್ಗೆ ಇದೆ.
“ಜಾಗತಿಕ ಆರ್ಥಿಕತೆ ಚೇತರಿಕೆ ಕಾಣಿಸಿಕೊಳ್ಳುತ್ತಿದ್ದಂತೆ ನಾವೆಲ್ಲ ಈ ಬಿಕ್ಕಟ್ಟಿನಿಂದ ಮೇಲೇಳುತ್ತೇವೆ. ಭವಿಷ್ಯದ ಸವಾಲುಗಳನ್ನು ಮುಟ್ಟಲು ಎಚ್ಸಿಎಲ್ ಇನ್ನಷ್ಟು ಉತ್ತಮವಾಗಿ ಸಜ್ಜಾಗಿದೆ ಎಂಬ ಬಗ್ಗೆ ನನಗೆ ಖಾತ್ರಿಯಿದೆ. ಆವಿಷ್ಕಾರ ಮತ್ತು ಹೊಸ ಅನ್ವೇಷಣೆಗಳ ಜತೆಜತೆಗೆ ಮಾನವೀಯ ಮೌಲ್ಯಗಳೊಂದಿಗೆ ನಾವು ಸಜ್ಜಾಗಿದ್ದೇವೆ. ನಮ್ಮ ಉದ್ಯಮ ಗುರಿಯನ್ನು ತಲುಪುತ್ತೇವೆ. ನಾವು ಎಲ್ಲಿ ಕೆಲಸ ಮಾಡುತ್ತೇವೋ ಅಲ್ಲಿನ ಸಾಮಾಜಿಕ- ಆರ್ಥಿಕ ಬೆಳವಣಿಗೆ ಜತೆಗೆ ಅದು ಹೊಂದಿಕೊಂಡಿದೆ,” ಎಂದು ಎಚ್ಸಿಎಲ್ ಟೆಕ್ ಅಧ್ಯಕ್ಷ ಮತ್ತು ಚೀಫ್ ಸ್ಟ್ರಾಟೆಜಿ ಆಫೀಸರ್ ಶಿವ್ ನಾಡಾರ್ ಹೇಳಿದ್ದಾರೆ.
ಈ ತ್ರೈಮಾಸಿಕದಲ್ಲಿ ಕಂಪೆನಿಗೆ ಅತಿ ಹೆಚ್ಚು ಹೊಸ ವ್ಯವಹಾರಗಳು, ಅಂದರೆ 3.1 ಬಿಲಿಯನ್ (310 ಕೋಟಿ) ಅಮೆರಿಕನ್ ಡಾಲರ್ನಷ್ಟು ಬಂದಿವೆ. ಇದರ ಜತೆಗೆ ಅತಿ ದೊಡ್ಡ ಪ್ರಮಾಣದಲ್ಲಿ ಕೆಲಸಗಳು ಬರುವುದು ಅಂತಿಮವಾಗಬೇಕಿದೆ ಎಂದು ಕಂಪೆನಿಯ ಅಧ್ಯಕ್ಷ ಮತ್ತು ಸಿಇಒ ಸಿ. ವಿಜಯ್ಕುಮಾರ್ ಹೇಳಿದ್ದಾರೆ. ಎಚ್ಸಿಎಲ್ ಟೆಕ್ನಿಂದ ಮೊದಲ ಮಧ್ಯಂತರ ಲಾಭಾಂಶ ಪ್ರತಿ ಷೇರಿಗೆ 6 ರೂಪಾಯಿ ಘೋಷಣೆ ಮಾಡಲಾಗಿದೆ. ಮತ್ತು FY22ಕ್ಕೆ ವಿಶೇಷ ಮಧ್ಯಂತರ ಡಿವಿಡೆಂಡ್ ಪ್ರತಿ ಷೇರಿಗೆ 10 ರೂಪಾಯಿ ಘೋಷಿಸಲಾಗಿದೆ. ಶುಕ್ರವಾರದ ದಿನಾಂತ್ಯಕ್ಕೆ ಬಿಎಸ್ಇಯಲ್ಲಿ ಎಚ್ಸಿಎಲ್ ಟೆಕ್ ಕಂಪೆನಿ ಷೇರಿನ ಬೆಲೆ ರೂ. 955.80 ಇತ್ತು.
ಇದನ್ನೂ ಓದಿ: ಇನ್ಫೋಸಿಸ್ ಲಾಭದಲ್ಲಿ ಶೇ 17ರಷ್ಟು ಏರಿಕೆ; ಪ್ರತಿ ಷೇರಿಗೆ 15 ರೂ. ಡಿವಿಡೆಂಡ್, 9,200 ಕೋಟಿ ತನಕ ಷೇರು ಬೈಬ್ಯಾಕ್
ಇದನ್ನೂ ಓದಿ: TCS FY21 Q4 results: ಟಿಸಿಎಸ್ ಲಾಭ ರೂ. 9246 ಕೋಟಿ; ಪ್ರತಿ ಷೇರಿಗೆ ತಲಾ 15 ರೂ. ಡಿವಿಡೆಂಡ್
(HCL Technologies announced FY21 Q4 results consolidated net profit of Rs 2962 crore)
