ಬೆಂಗಳೂರಿನ ಹೈಪ್ರಿಕ್ಸ್; ಭಾರತದಲ್ಲಿ ಸೂಪರ್ಸೋನಿಕ್ ರಾಮ್ಜೆಟ್ ಎಂಜಿನ್ ನಿರ್ಮಿಸಿದ ಮೊದಲ ಖಾಸಗಿ ಕಂಪನಿ
Tezz, India's first privately built supersonic ramjet engine: ಬೆಂಗಳೂರಿನ ಹೈಪ್ರಿಕ್ಸ್ ಎನ್ನುವ ಹೊಸ ಸ್ಟಾರ್ಟಪ್ವೊಂದು ಸೂಪರ್ಸೋನಿಕ್ ರಾಮ್ಜೆಟ್ ಎಂಜಿನ್ ಅಭಿವೃದ್ಧಿಪಡಿಸಿದೆ. ಈ ಸಾಧನೆ ಮಾಡಿದ ಭಾರತದ ಮೊದಲ ಖಾಸಗಿ ಸಂಸ್ಥೆ ಎನಿಸಿದೆ. ಕೇವಲ ಐದು ತಿಂಗಳಲ್ಲಿ ತೇಜ್ ಹೆಸರಿನ ಈ ಎಂಜಿನ್ ತಯಾರಿಸಿರುವುದ ಗಮನಾರ್ಹ. ಹೈಪ್ರಿಕ್ಸ್ ಸಂಸ್ಥೆ ಈಗ ಕಿರಾ ಎಂ1 ಎನ್ನುವ ಆರ್ಟಿಲರಿ ಶೆಲ್ಗಳನ್ನು ನಿರ್ಮಿಸಲು ಮುಂದಾಗಿದೆ.
Updated on:Feb 16, 2025 | 7:58 PM
ಬೆಂಗಳೂರು, ಫೆಬ್ರುವರಿ 16: ಸ್ಟಾರ್ಟಪ್ ನಗರಿ ಎಂದು ಖ್ಯಾತವಾಗಿರುವ ಬೆಂಗಳೂರಿನಲ್ಲಿ ನಾನಾ ಕ್ಷೇತ್ರಗಳ ನವೋದ್ಯಮಗಳು ನೆಲೆ ನಿಂತಿವೆ. ಏರೋಸ್ಪೇಸ್ ಸೆಕ್ಟರ್ನಲ್ಲಿ ಒಂದು ವರ್ಷದ ಹಿಂದೆ ಆರಂಭವಾದ ಹೈಪ್ರಿಕ್ಸ್ ಎನ್ನುವ ಸ್ಟಾರ್ಟಪ್ ಬಹಳ ವೇಗವಾಗಿ ಸಾಧನೆಯ ಮೆಟ್ಟಿಲುಗಳನ್ನು ಹತ್ತತೊಡಗಿದೆ. ಸೂಪರ್ಸಾನಿಕ್ ಸ್ಪೀಡ್ನಲ್ಲಿ ಸಾಗಲು ಪುಷ್ಟಿ ನೀಡಬಲ್ಲ ರಾಮ್ಜೆಟ್ ಎಂಜಿನ್ಗಳನ್ನು ಈ ಕಂಪನಿ ಅಭಿವೃದ್ಧಿಪಡಿಸಿದೆ. ಭಾರತದ ಯಾವೊಂದು ಖಾಸಗಿ ಕಂಪನಿ ಮಾಡದ ಸಾಧನೆಯನ್ನು ಹೈಪ್ರಿಕ್ಸ್ ಮಾಡಿದೆ. ತೇಜ್ ಹೆಸರಿನ ಅವರ ರಾಮ್ಜೆಟ್ ಎಂಜಿನ್ ಅನ್ನು ಈ ಸಂಸ್ಥೆ ಕೇವಲ ಐದು ತಿಂಗಳಲ್ಲೇ ಅಭಿವೃದ್ಧಿಪಡಿಸಿರುವುದು ಗಮನಾರ್ಹ. ಸೂಪರ್ಸಾನಿಕ್ ಸ್ಪೀಡ್ ಎಂದರೆ ಶಬ್ದದ ವೇಗಕ್ಕಿಂತ ಹೆಚ್ಚಿನದ್ದು. ಈ ರಾಮ್ಜೆಟ್ ಎಂಜಿನ್ನ ವಾಹನಗಳು ಮ್ಯಾಕ್-4 ವೇಗದಲ್ಲಿ ಸಾಗಬಲ್ಲುವು.
ರಾಮ್ಜೆಟ್ ಎಂಜಿನ್ಗಳು ಜೆಟ್ ಹಾರುವಾಗಲೇ ಒಳಬರುವ ಗಾಳಿಯನ್ನು ಒತ್ತಿ, ಇಂಧನದೊಂದಿಗೆ ಸೇರಿ ಮುಂದೆ ಸಾಗಲು ಅನುವು ಮಾಡಿಕೊಡುತ್ತದೆ. ಈ ರೀತಿಯ ಎಂಜಿನ್ ಅನ್ನು ಕ್ಷಿಪ್ರ ಅವಧಿಯಲ್ಲಿ ತಯಾರಿಸುವುದು ಕನಸಿನ ಮಾತೇ ಆಗಿತ್ತು. ದೇವಮಾಲ್ಯ ಬಿಸವಾಸ್ ಮತ್ತು ದಿವ್ಯಾಂಶು ಮಂಡೋವರ ಎಂಬಿಬ್ಬರು ಯುವ ಸ್ನೇಹಿತರು ಛಲದಿಂದ ಈ ಸಾಧನೆ ಮಾಡಿ ತೋರಿಸಿದ್ದಾರೆ.
ಇದನ್ನೂ ಓದಿ: ಎಐನಿಂದ ಕೋಡಿಂಗ್ ಕೆಲಸಕ್ಕೆ ಕತ್ತರಿ; ಭಾರತದ ಐಟಿ ಸೆಕ್ಟರ್ ಕಥೆ ಹೇಗೆ? ಸಾಫ್ಟ್ವೇರ್ ಕಂಪನಿಗಳ ಮುಂದಿನ ದಾರಿ ಏನು?
ಮುಂದಿನ ತಲೆಮಾರಿನ ಕ್ಷಿಪಣಿಗಳ ತಯಾರಿಕೆಗೆ ತೇಜ್ ಎಂಜಿನ್ ಬಹಳ ಉಪಯೋಗಕ್ಕೆ ಬರುತ್ತದೆ ಎಂದು ಹೇಳಲಾಗುತ್ತದೆ. ಕ್ಷಿಪಣಿ ಮಾತ್ರವಲ್ಲ, ಫೈಟರ್ ಜೆಟ್, ಆರ್ಟಿಲರಿ ಶೆಲ್ಗಳ ತಯಾರಿಕೆಗೆ ಈ ಎಂಜಿನ್ಗಳು ಉಪಯುಕ್ತ ಎನಿಸುತ್ತವೆ.
ಸರ್ಕಾರದಿಂದ ಹೆಚ್ಚಿನ ನೆರವು ಇಲ್ಲದಿದ್ದರೂ ಮತ್ತು ಖಾಸಗಿ ಹೂಡಿಕೆದಾರರ ನೆರವಿಲ್ಲದಿದ್ದರೂ ಹೈಪ್ರಿಕ್ಸ್ ಹಲವು ಅಡೆತಡೆಗಳನ್ನು ದಾಟಿ, ಸೀಮಿತ ಬಜೆಟ್ನಲ್ಲಿ ಈ ಎಂಜಿನ್ ನಿರ್ಮಿಸಿದೆ.
ಕಿರಾ ಎಂ1 ಎನ್ನುವ ಆರ್ಟಿಲರಿ ಶೆಲ್ ನಿರ್ಮಿಸುತ್ತಿರುವ ಹೈಪ್ರಿಕ್ಸ್
ಬೆಂಗಳೂರಿನ ಈ ಡಿಫೆನ್ಸ್ ಮತ್ತು ಏರೋಸ್ಪೇಸ್ ಕಂಪನಿಯು ತೇಜ್ ಎಂಜಿನ್ ಬಲಿಕ ಈಗ ಕಿರಾ ಎಂ1 ಎನ್ನುವ ಹೆಸರಿನ ಆರ್ಟಿಲರಿ ಶೆಲ್ಗಳನ್ನು ತಯಾರಿಸುತ್ತಿದೆ. ಈ ಶೆಲ್ಗಳಿಗೆ ರಾಮ್ಜೆಟ್ ಎಂಜಿನ್ ಶಕ್ತಿ ಇರಲಿದೆ.
ಇದನ್ನೂ ಓದಿ: ಅಮೆರಿಕದ ಮಾರುಕಟ್ಟೆಗೆ ಪರ್ಯಾಯ ಕಷ್ಟ; ಚೀನೀ ಕಂಪನಿಗಳಿಗೆ ಸಂಕಷ್ಟಗಳ ಮೇಲೆ ಸಂಕಷ್ಟ
ಆರ್ಟಿಲರಿ ಶೆಲ್ಗಳು ಸೇನೆಗೆ ಬಹಳ ಮುಖ್ಯ. ಗನ್ಗಳ ಮೂಲಕ ಮಿಸೈಲ್ ರೀತಿಯ ದೊಡ್ಡ ಬಾಂಬ್ಗಳನ್ನು ಹಾರಿಸಬಹುದು. ಭಾರತದಲ್ಲಿ ಸದ್ಯ ಒಂದು ವರ್ಷದಲ್ಲಿ ಮೂರು ಲಕ್ಷದಷ್ಟು ಆರ್ಟಿಲರಿ ಶೆಲ್ಗಳನ್ನು ನಿರ್ಮಿಸುವ ಸಾಮರ್ಥ್ಯ ಇದೆ. ಆದರೆ, ಯುದ್ಧಕಾಲದಲ್ಲಿ 18 ಲಕ್ಷ ಶೆಲ್ಗಳ ಅವಶ್ಯಕತೆ ಇರುತ್ತದೆ. ಈ ಕೊರತೆ ನೀಗಬೇಕೆಂದರೆ ಹೆಚ್ಚೆಚ್ಚು ಸಂಸ್ಥೆಗಳು ಆರ್ಟಿಲರಿ ಶೆಲ್ಗಳನ್ನು ತಯಾರಿಸುವಂತಾಗಬೇಕು. ಈ ಹಿನ್ನೆಲೆಯಲ್ಲಿ ಹೈಪ್ರಿಕ್ಸ್ಗೆ ಉತ್ತಮ ಬಿಸಿನೆಸ್ ಅವಕಾಶಗಳಿವೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
Published On - 7:55 pm, Sun, 16 February 25
