IIT Campus Recruitment: ಐಐಟಿ ಕ್ಯಾಂಪಸ್ ನೇಮಕಾತಿಯಲ್ಲಿ 9000 ಉದ್ಯೋಗ ಆಫರ್; 160ರಷ್ಟು 1 ಕೋಟಿ ರೂ. ವೇತನ
ವಾಣಿಜ್ಯ ಮಾಧ್ಯಮವೊಂದರ ಪ್ರಕಾರ ಈ ವರ್ಷ ಮೊದಲ ಹಂತದ ಕ್ಯಾಂಪಸ್ ನೇಮಕಾತಿಯಲ್ಲಿ 9000 ಆಫರ್ ನೀಡಲಾಗಿದೆ. ಅದರಲ್ಲಿ 160ರಷ್ಟು 1 ಕೋಟಿ ರೂಪಾಯಿಯ ವಾರ್ಷಿಕ ವೇತನ ಪ್ಯಾಕೇಜ್ ಒಳಗೊಂಡಿದೆ.
Updated on: Dec 23, 2021 | 6:34 PM
ಭಾರತದ ಅಗ್ರ ಎಂಟು ಇಂಡಿಯನ್ ಇನ್‌ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿ (IITs) ವಿದ್ಯಾರ್ಥಿಗಳು ಸುಮಾರು 9,000 ಉದ್ಯೋಗಗಳ ಆಫರ್ ಪಡೆದಿದ್ದಾರೆ. ಇದರಲ್ಲಿ ನೇಮಕಾತಿಯ ಮೊದಲ ಹಂತದಲ್ಲಿ ಸುಮಾರು 160 ಆಫರ್ಗಳು ವಾರ್ಷಿಕ ವೇತನ ತಲಾ 1 ಕೋಟಿ ರೂಪಾಯಿಗೆ ಮಾಡಲಾಗಿದೆ ಎಂದು ಮನಿಕಂಟ್ರೋಲ್ ವರದಿ ಮಾಡಿದೆ. ಈ ವರ್ಷ ಹಳೆಯ ಕ್ಯಾಂಪಸ್‌ಗಳಲ್ಲಿ ಸರಾಸರಿ ವೇತನ ಹೆಚ್ಚಳ ಇಲ್ಲಿಯವರೆಗೆ ಶೇ 15ರಿಂದ 35ರಷ್ಟಿದೆ. ಇದು ಗಣ್ಯ ಎಂಜಿನಿಯರಿಂಗ್ ಕಾಲೇಜುಗಳ ಕ್ಯಾಂಪಸ್ ನೇಮಕಾತಿಯ ಅತ್ಯಂತ ಯಶಸ್ವಿ ವರ್ಷಗಳಲ್ಲಿ ಒಂದಾಗಿದೆ. ಉನ್ನತ ಟೆಕ್ ಪ್ರತಿಭೆಗಳಿಗಾಗಿ ತೀವ್ರ ಕಾರ್ಪೊರೇಟ್ ಕದನದ ಮಧ್ಯೆ ಆಕರ್ಷಕ ಪ್ಯಾಕೇಜ್‌ಗಳೊಂದಿಗೆ ಐಐಟಿ ವಿದ್ಯಾರ್ಥಿಗಳನ್ನು ನೇಮಿಸಿಕೊಳ್ಳಲು ಕಂಪೆನಿಗಳು ಸ್ಪರ್ಧೆ ನಡೆಸಿವೆ. ಖಚಿತವಾಗಿ ಹೇಳುವುದಾದರೆ, ಐಐಟಿ ಉದ್ಯೋಗಗಳು ವಿಶಾಲವಾದ ಕಾರ್ಮಿಕ ಮಾರುಕಟ್ಟೆಯ ಮಾಪಕವಲ್ಲ. ಇದು ಸಾಕಷ್ಟು ಸಂಕೀರ್ಣ ಸಂಗತಿಗಳಿಂದ ಕೂಡಿದೆ. ಹಾಗಿದ್ದರೂ ವಿಶೇಷ ಹುದ್ದೆಗಳನ್ನು ತುಂಬಲು ಪ್ರಮುಖ ಪ್ರತಿಭೆಗಳಿಗೆ ನೇಮಕಾತಿ ಮಾಡುವವರ ಅಗತ್ಯವನ್ನು ಇದು ಸೂಚಿಸುತ್ತದೆ.
“ಈ ವರ್ಷ ಐಐಟಿ-ಮದ್ರಾಸ್ ವಿದ್ಯಾರ್ಥಿಗಳು 27 ರೂ.1 ಕೋಟಿ + ಆಫರ್ಗಳು ಪಡೆದಿದ್ದಾರೆ,” ಎಂದು ಐಐಟಿ-ಮದ್ರಾಸ್‌ನ ಸಲಹೆಗಾರ (ತರಬೇತಿ ಮತ್ತು ನಿಯೋಜನೆ) ಸಿ.ಎಸ್.ಶಂಕರ್ ರಾಮ್ ಹೇಳಿದ್ದಾರೆ. “ಸಂಸ್ಥೆಯು ಕಳೆದ ವರ್ಷ ಯಾವುದೇ (ರೂ. 1 ಕೋಟಿ + ಸಂಬಳದ ಕೊಡುಗೆಗಳನ್ನು) ಆಫರ್ ಪಡೆದಿರಲಿಲ್ಲ. ಮತ್ತು ಇದು ದೇಶೀಯ ಮತ್ತು ಅಂತರಾಷ್ಟ್ರೀಯ ಆಫರ್ಗಳನ್ನು ಒಳಗೊಂಡಿದೆ,” ಎಂದು ಐಐಟಿ-ಮದ್ರಾಸ್‌ನ ಪ್ರಾಧ್ಯಾಪಕರೂ ಆಗಿರುವ ಶಂಕರ್ ರಾಮ್ ಡಿಸೆಂಬರ್ 23ರಂದು ಖಾಸಗಿ ಮಾಧ್ಯಮವೊಂದರ ಪ್ರಶ್ನೆಗಳಿಗೆ ಇಮೇಲ್ ಪ್ರತಿಕ್ರಿಯೆಯಲ್ಲಿ ತಿಳಿಸಿದ್ದಾರೆ.
ಐಐಟಿ ಮದ್ರಾಸ್ ವಿದ್ಯಾರ್ಥಿಗಳು ಕಳೆದ ವರ್ಷ ಪಡೆದ 1,017 ಆಫರ್ಗೆ ಹೋಲಿಸಿದರೆ ಈ ವರ್ಷ ನೇಮಕಾತಿ ಋತುವಿನ ಮೊದಲ ಹಂತದಲ್ಲಿ 1,327 ಆಫರ್ಗಳನ್ನು ಸ್ವೀಕರಿಸಿದ್ದಾರೆ. ಇದು ಟೆಕ್ ಪ್ರತಿಭೆಗಳಿಗೆ ನೇಮಕಾತಿ ಕಂಪೆನಿಗಳಿಂದ ಹೆಚ್ಚಿನ ಬೇಡಿಕೆಯನ್ನು ಸೂಚಿಸುತ್ತದೆ. ಇಲ್ಲಿಯ ತನಕ ಕನಿಷ್ಠ ಶೇ 77ರಷ್ಟು ವಿದ್ಯಾರ್ಥಿಗಳು ಉದ್ಯೋಗಾವಕಾಶಗಳ ಆಫರ್ಗಳನ್ನು ಪಡೆದಿದ್ದಾರೆ.
ಇತರ ಕ್ಯಾಂಪಸ್ ನೇಮಕಾತಿಗಳು ಐಐಟಿ ಕಾನ್ಪುರದಲ್ಲಿ ಮೊದಲ ಹಂತದಲ್ಲಿ 1,330ಕ್ಕೂ ಹೆಚ್ಚು ಆಫರ್ಗಳನ್ನು ನೀಡಲಾಗಿದೆ ಮತ್ತು ಸರಾಸರಿ ವೇತನ ಸುಮಾರು ಶೇ 35ರಷ್ಟು ಹೆಚ್ಚಾಗಿದೆ. ಐಐಟಿ- ಕಾನ್ಪುರ್ ಗ್ರ್ಯಾನ್ಯುಲರ್ ವಿವರಗಳನ್ನು ಒಟ್ಟು ಮಾಡಲಾಗುತ್ತಿದೆ. ಮುಂದಿನ ವಾರದಲ್ಲಿ ಔಪಚಾರಿಕ ಹೇಳಿಕೆಯನ್ನು ಬಿಡುಗಡೆ ಮಾಡಬಹುದು ಎಂದು ಉದ್ಯೋಗ ಸಂಯೋಜಕರು ತಿಳಿಸಿದ್ದಾರೆ. ಐಐಟಿ-ರೂರ್ಕಿಯಲ್ಲಿ, ನೇಮಕಾತಿ ಋತುವಿನ ಮೊದಲ ಹಂತದಲ್ಲಿ 32 ಅಂತರಾಷ್ಟ್ರೀಯ ಉದ್ಯೋಗಗಳು ಸೇರಿದಂತೆ 1,243 ಆಫರ್ಗಳನ್ನು ಸ್ವೀಕರಿಸಲಾಗಿದೆ. ಐಐಟಿ-ರೂರ್ಕಿಯ ವಕ್ತಾರರ ಪ್ರಕಾರ, ಮೊದಲ ಹಂತದಲ್ಲಿ ಸುಮಾರು 281 ಕಂಪೆನಿಗಳು ಭಾಗವಹಿಸಿದ್ದವು. ಮತ್ತು ಇದರಲ್ಲಿ ಉದ್ಯೋಗಾವಕಾಶ ಬಯಸಿದ್ದವರಲ್ಲಿ ಶೇ 80ಕ್ಕಿಂತ ಹೆಚ್ಚು ವಿದ್ಯಾರ್ಥಿಗಳನ್ನು ನೇಮಿಸಿಕೊಳ್ಳಲಾಗಿದೆ.
ಅದೇ ರೀತಿ, ಐಐಟಿ-ಖರಗ್‌ಪುರದಲ್ಲಿ 1,600ಕ್ಕೂ ಹೆಚ್ಚು ಉದ್ಯೋಗಗಳನ್ನು ಅದರ ವಿದ್ಯಾರ್ಥಿಗಳಿಗೆ ನೀಡಲಾಯಿತು. ಐಐಟಿ ದೆಹಲಿ ವಿದ್ಯಾರ್ಥಿಗಳು 1,250 ಆಫರ್ಗಳನ್ನು ಸ್ವೀಕರಿಸಿದ್ದಾರೆ. ಐಐಟಿ-ಬಾಂಬೆಯಲ್ಲಿ, ಮೊದಲ ಹಂತದಲ್ಲಿ ದಾಖಲೆಯ 1,382 ಆಫರ್ಗಳನ್ನು ಸ್ವೀಕರಿಸಲಾಗಿದೆ ಎಂದು ವಾಣಿಜ್ಯ ಮಾಧ್ಯಮವೊಂದರಲ್ಲಿ ಈ ವಾರದ ಆರಂಭದಲ್ಲಿ ವರದಿ ಆಗಿದೆ. ಐಐಟಿ ಗುವಾಹತಿಯಲ್ಲಿ ಮೊದಲ ಹಂತದ ನೇಮಕಾತಿಗಳು ಇನ್ನೂ ನಡೆಯುತ್ತಿದೆ. ಇದುವರೆಗೆ 843 ವಿದ್ಯಾರ್ಥಿಗಳು ಉದ್ಯೋಗದ ಆಫರ್ಗಳನ್ನು ಪಡೆದಿದ್ದಾರೆ ಮತ್ತು ಹೆಚ್ಚಿನವುಗಳು ಪೈಪ್‌ಲೈನ್‌ನಲ್ಲಿವೆ ಎಂದು ಹೇಳಲಾಗಿದೆ. “ಹಂತ-1ರ ನೇಮಕಾತಿ ಇನ್ನೂ ನಡೆಯುತ್ತಿದೆ. ಇಲ್ಲಿಯವರೆಗೆ ಐಐಟಿ-ಜಿಯ ಒಟ್ಟು 843 ವಿದ್ಯಾರ್ಥಿಗಳು ಸ್ಥಾನ ಪಡೆದಿದ್ದಾರೆ. ಕಳೆದ ವರ್ಷ ಈ ವೇಳೆಗೆ ಒಟ್ಟು 610 ವಿದ್ಯಾರ್ಥಿಗಳು ಸ್ಥಾನ ಪಡೆದಿದ್ದರು,” ಎಂದು ಐಐಟಿ-ಗುವಾಹತಿಯ ಅಧಿಕಾರಿ ಹೇಳಿದ್ದಾರೆ. ಅದೇ ರೀತಿ, ವಾರಾಣಸಿಯ ಐಐಟಿಯಲ್ಲಿ (ಬನಾರಸ್ ಹಿಂದೂ ವಿಶ್ವವಿದ್ಯಾಲಯ) ಪೂರ್ವ-ನೇಮಕಾತಿ ಸೇರಿದಂತೆ 1,100ಕ್ಕೂ ಹೆಚ್ಚು ಆಫರ್ಗಳನ್ನು ನೀಡಲಾಗಿದೆ.
“ಇತ್ತೀಚಿನ ವರ್ಷಕ್ಕೆ ಹೋಲಿಸಿದರೆ ನಾವು ಈ ವರ್ಷ ನೇಮಕಾತಿಯಲ್ಲಿ ಬಹಳ ಮುಂದಿದ್ದೇವೆ. ಕಂಪೆನಿಗಳು ಹೆಚ್ಚು ನೇಮಕ ಮಾಡಿಕೊಳ್ಳಲು ಉತ್ಸುಕವಾಗಿವೆ ಮತ್ತು ತಂತ್ರಜ್ಞಾನ ಸಂಸ್ಥೆಗಳು ಉತ್ತಮ ಆಫರ್ಗಳನ್ನು ನೀಡುತ್ತಿವೆ,” ಎಂದು ವಾರಾಣಸಿಯ IIT (BHU) ನೇಮಕಾತಿ ಸಂಯೋಜಕರೊಬ್ಬರು ಹೇಳಿದ್ದಾರೆ.
ರೂ. 1 ಕೋಟಿ ಕ್ಲಬ್ ಐಐಟಿ ಪದವೀಧರರ ರೂ. 1 ಕೋಟಿ ಸಂಬಳದ ಕ್ಲಬ್ ದೊಡ್ಡದಾಗುತ್ತಿದೆ. ಡಿಸೆಂಬರ್ 22ರ ಅಂತ್ಯದ ವೇಳೆಗೆ ವಿವಿಧ ಹಳೆಯ ಐಐಟಿಗಳಿಂದ ಕನಿಷ್ಠ 160 ವಿದ್ಯಾರ್ಥಿಗಳು ದೇಶೀಯ ಮತ್ತು ಅಂತರಾಷ್ಟ್ರೀಯ ನೇಮಕಾತಿ ಕಂಪೆನಿಗಳಿಂದ ರೂ.1 ಕೋಟಿ ವಾರ್ಷಿಕ ಸಂಬಳದ ಆಫರ್ಗಳನ್ನು ಪಡೆದಿದ್ದಾರೆ.
ಐಐಟಿ-ಮದ್ರಾಸ್ ಅಂತಹ 27 ಆಫರ್ಗಳನ್ನು ನೀಡಲಾಗಿದೆ ಎಂದು ಹೇಳಿದರೆ, ಐಐಟಿ-ಕಾನ್ಪುರದಲ್ಲಿ ಈ ಸಂಖ್ಯೆ 49. ಅಧಿಕೃತವಾಗಿ ಸಂಬಳ ಪ್ಯಾಕೇಜ್‌ಗಳನ್ನು ಬಹಿರಂಗಪಡಿಸದ ಐಐಟಿ-ದೆಹಲಿಯ ವಿದ್ಯಾರ್ಥಿಗಳು ಕನಿಷ್ಠ 30 ಅಂತಹ ಆಫರ್ಗಳನ್ನು ಪಡೆದಿದ್ದಾರೆ ಎಂದು ಈ ಬೆಳವಣಿಗೆ ತಿಳಿದಿರುವವರು ಹೇಳಿದ್ದಾರೆ. ಐಐಟಿ-ದೆಹಲಿಯ ನೇಮಕಾತಿ ಸೆಲ್ ಹೆಚ್ಚಿನ ಮೌಲ್ಯದ ವೇತನ ಸಂಖ್ಯೆಗಳನ್ನು ದೃಢೀಕರಿಸಲು ಅಥವಾ ಕಾಮೆಂಟ್ ಮಾಡಲು ನಿರಾಕರಿಸಿದೆ. ಆದರೆ “ಪ್ರತಿಕ್ರಿಯೆಯು ತುಂಬಾ ಚೆನ್ನಾಗಿದೆ, ಮತ್ತು ನಾವು ಈ ಬಗ್ಗೆ ಪ್ರತಿಕ್ರಿಯಿಸುವುದಿಲ್ಲ,” ಎಂದು ಹೇಳಿದೆ. ಐಐಟಿ-ದೆಹಲಿಯಲ್ಲಿ ಒಟ್ಟಾರೆ ಸರಾಸರಿ ವೇತನಕವು ಹಿಂದಿನ ವರ್ಷಕ್ಕೆ ಹೋಲಿಸಿದರೆ ಶೇ 20ಕ್ಕಿಂತ ಹೆಚ್ಚಿದೆ.
ಐಐಟಿ-ರೂರ್ಕಿಯಲ್ಲಿ ಕನಿಷ್ಠ 11 ವಿದ್ಯಾರ್ಥಿಗಳು ರೂ.1 ಕೋಟಿ ಆಫರ್ಗಳು ಮತ್ತು ಐಐಟಿ-ಗುವಾಹತಿಯಲ್ಲಿ ಇದುವರೆಗೆ ಈ ಸಂಖ್ಯೆ ಐದು ಆಗಿದೆ. ಮತ್ತು ವಾರಾಣಸಿಯ ಐಐಟಿ (BHU) ನಲ್ಲಿ ಇಬ್ಬರು ಈ ಸಂಖ್ಯೆಯ ವೇತನ ಪಡೆದಿದ್ದಾರೆ. ಐಐಟಿ-ಖರಗ್‌ಪುರದಲ್ಲಿ ಈ ಸಂಖ್ಯೆ 20ಕ್ಕೂ ಹೆಚ್ಚು ಮತ್ತು ಐಐಟಿ-ಬಾಂಬೆಯಲ್ಲಿ 12ಕ್ಕೂ ಹೆಚ್ಚಿದೆ. ಈ ಪ್ಯಾಕೇಜ್‌ಗಳನ್ನು ಏನೇನು ಒಳಗೊಳ್ಳಲಿದೆ ಎಂಬ ಹಿನ್ನೆಲೆಯಲ್ಲಿ ನೋಡಬೇಕು. ಏಕೆಂದರೆ ಅವುಗಳು ಸಾಮಾನ್ಯವಾಗಿ ಉದ್ಯೋಗಿ ಸ್ಟಾಕ್ ಆಪ್ಷನ್ಗಳು, ಬೋನಸ್‌ಗಳು, ವೇರಿಯಬಲ್ ಪೇ, ಜೀವನ ಭತ್ಯೆಗಳ ವೆಚ್ಚ ಮತ್ತು ಟೇಕ್-ಹೋಮ್ ಸಂಬಳವನ್ನು ಮೀರಿದ ಇತರ ಆಡ್-ಆನ್‌ಗಳನ್ನು ಒಳಗೊಂಡಿರುತ್ತವೆ.
ಇದನ್ನೂ ಓದಿ: SBI Recruitment: ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾದಿಂದ 1200ಕ್ಕೂ ಹೆಚ್ಚು ಹುದ್ದೆಗಳ ಭರ್ತಿಗೆ ಅರ್ಜಿ ಆಹ್ವಾನ
