ಮೇಡ್ ಇನ್ ಇಂಡಿಯಾ ಸ್ಮಾರ್ಟ್ಫೋನ್; 2024-25ರಲ್ಲಿ 1.70 ಲಕ್ಷ ಕೋಟಿ ರೂ ರಫ್ತು ಗುರಿ
Smartphone exports from India: 2024-25ರ ಹಣಕಾಸು ವರ್ಷದಲ್ಲಿ ಭಾರತದಿಂದ 20 ಬಿಲಿಯನ್ ಡಾಲರ್ ಮೌಲ್ಯದ ಸ್ಮಾರ್ಟ್ಫೋನ್ಗಳ ರಫ್ತಾಗಬಹುದು ಎಂದು ಸರ್ಕಾರ ನಿರೀಕ್ಷಿಸಿದೆ. ಆ್ಯಪಲ್ ಐಫೋನ್ಗಳ ತಯಾರಿಕೆ ಮತ್ತು ರಫ್ತು ಹೆಚ್ಚಾಗಿರುವುದರಿಂದ ಒಟ್ಟಾರೆ ಸ್ಮಾರ್ಟ್ಫೋನ್ ರಫ್ತು ಈ ವರ್ಷ ಅಧಿಕಗೊಳ್ಳಬಹುದು. 2023-24ರಲ್ಲಿ 15 ಬಿಲಿಯನ್ ಡಾಲರ್ ಮೌಲ್ಯದ ಸ್ಮಾರ್ಟ್ಫೋನ್ಗಳ ರಫ್ತಾಗಿತ್ತು. ಇದರಲ್ಲಿ ಆ್ಯಪಲ್ ಪಾಲು 10 ಬಿಲಿಯನ್ ಡಾಲರ್ ಇತ್ತು.
Updated on: Jan 15, 2025 | 9:32 AM
ನವದೆಹಲಿ, ಜನವರಿ 15: ಪ್ರಸಕ್ತ ಹಣಕಾಸು ವರ್ಷದಲ್ಲಿ 20 ಬಿಲಿಯನ್ ಡಾಲರ್ ಪ್ರಮಾಣದಷ್ಟು ಸ್ಮಾರ್ಟ್ಫೋನ್ ರಫ್ತು ಮಾಡುವ ನಿರೀಕ್ಷೆಯಲ್ಲಿ ಸರ್ಕಾರ ಇದೆ. 2023-24ರ ಹಣಕಾಸು ವರ್ಷದಲ್ಲಿ ಭಾರತದಿಂದ 15 ಬಿಲಿಯನ್ ಡಾಲರ್ನಷ್ಟು ಸ್ಮಾರ್ಟ್ಫೋನ್ಗಳು ಜಾಗತಿಕ ಮಾರುಕಟ್ಟೆಗೆ ಪೂರೈಕೆಯಾಗಿದ್ದವು. ಈಗ 2024-25ರ ವರ್ಷದಲ್ಲಿ ಶೇ. 30ರಷ್ಟು ಹೆಚ್ಚು ಸ್ಮಾರ್ಟ್ಫೋನ್ಗಳ ರಫ್ತಿಗೆ ಗುರಿ ಇಡಲಾಗಿದೆ. ಹಿಂದಿನ ವರ್ಷದಲ್ಲಿ ಆದ 15 ಬಿಲಿಯನ್ ಡಾಲರ್ ಸ್ಮಾರ್ಟ್ಫೋನ್ ರಫ್ತಿನಲ್ಲಿ ಆ್ಯಪಲ್ನ ಪಾಲು 10 ಬಿಲಿಯನ್ ಡಾಲರ್ ಇತ್ತು. ಈ ವರ್ಷವೂ ಆ್ಯಪಲ್ ಐಫೋನ್ಗಳ ರಫ್ತು ಗಣನೀಯವಾಗಿ ಏರಿಕೆ ಆಗಿರುವ ಹಿನ್ನೆಲೆಯಲ್ಲಿ ಒಟ್ಟಾರೆ ಸ್ಮಾರ್ಟ್ಫೋನ್ ರಫ್ತು ಹೊಸ ಮೈಲಿಗಲ್ಲು ಮುಟ್ಟುವ ನಿರೀಕ್ಷೆ ಇದೆ.
ಔದ್ಯಮಿಕ ದತ್ತಾಂಶದ ಪ್ರಕಾರ ಏಪ್ರಿಲ್ನಿಂದ ನವೆಂಬರ್ ತಿಂಗಳವರೆಗೆ ಮೇಡ್ ಇನ್ ಇಂಡಿಯಾ ಸ್ಮಾರ್ಟ್ಫೋನ್ಗಳ ರಫ್ತು ಪ್ರಮಾಣ 12 ಬಿಲಿಯನ್ ಡಾಲರ್ ಗಡಿ ದಾಟಿದೆ. ಡಿಸೆಂಬರ್ನದ್ದು ಸೇರಿ ಇನ್ನೂ ನಾಲ್ಕು ತಿಂಗಳಲ್ಲಿ ಮತ್ತಷ್ಟು ಎಂಟು ಬಿಲಿಯನ್ ಡಾಲರ್ ಮೌಲ್ಯದ ಸ್ಮಾರ್ಟ್ಫೋನ್ಗಳ ರಫ್ತಾಗಬಹುದು ಎಂಬುದು ಸರ್ಕಾರದ ಎಣಿಕೆ.
ಇದನ್ನೂ ಓದಿ: ರಿಯಲ್ ಎಸ್ಟೇಟ್ನಲ್ಲಿ ಸರ್ಕಲ್ ರೇಟ್ ಎಂದರೇನು? ಮಾರ್ಕೆಟ್ ರೇಟ್ಗೂ ಅದಕ್ಕೂ ಏನು ವ್ಯತ್ಯಾಸ? ಇಲ್ಲಿದೆ ವಿವರ
ಜಾಗತಿಕ ಸ್ಮಾರ್ಟ್ಫೋನ್ ಮಾರುಕಟ್ಟೆ 2022 ಮತ್ತು 2023ರಲ್ಲಿ ಕಳೆಗುಂದಿತ್ತು. 2024ರಲ್ಲಿ ಮಾರುಕಟ್ಟೆ ಗರಿಗೆದರಿದೆ. ಒಟ್ಟಾರೆ ಜಾಗತಿಕ ಆರ್ಥಿಕತೆಯ ಬೆಳವಣಿಗೆ ಉತ್ತಮವಾಗಿರುವುದರಿಂದ ಸ್ಮಾರ್ಟ್ಫೋನ್ ಮಾರುಕಟ್ಟೆ ಕೂಡ ಚೇತರಿಸಿಕೊಂಡಿರಬಹುದು. ಹೀಗಾಗಿ, ಭಾರತದ ಸ್ಮಾರ್ಟ್ಫೋನ್ ರಫ್ತು ಈ ವರ್ಷ ಸೇರಿದಂತೆ ಮುಂಬರುವ ದಿನಗಳಲ್ಲಿ ಗಣನೀಯವಾಗಿ ಹೆಚ್ಚಬಹುದು ಎನ್ನಲಾಗಿದೆ.
ಪಿಎಲ್ಐ ಸ್ಕೀಮ್ನ ಪರಿಣಾಮವಾಗಿ ಭಾರತವು ಇಂದು ಚೀನಾ ಬಿಟ್ಟರೆ ಅತಿ ಹೆಚ್ಚು ಮೊಬೈಲ್ ಫೋನ್ ತಯಾರಿಸುವ ದೇಶವಾಗಿದೆ. 2023-24ರಲ್ಲಿ 4.10 ಲಕ್ಷ ಕೋಟಿ ರೂ ಮೌಲ್ಯದ ಮೊಬೈಲ್ ಫೋನ್ಗಳನ್ನು ತಯಾರಿಸಲಾಗಿದೆ. ಒಟ್ಟು 10 ಕಂಪನಿಗಳಿಗೆ ಮೊಬೈಲ್ ಫೋನ್ ತಯಾರಿಸಲು ಪಿಎಲ್ಐ ಸ್ಕೀಮ್ನ ಸೌಲಭ್ಯ ಕೊಡಲಾಗಿದೆ. ಈ ಉದ್ಯಮವು ಈಗಾಗಲೇ ಮೂರು ಲಕ್ಷ ನೇರ ಉದ್ಯೋಗ ಹಾಗೂ ಆರು ಲಕ್ಷ ಪರೋಕ್ಷ ಉದ್ಯೋಗಗಳನ್ನು ಸೃಷ್ಟಿಸಿರುವುದು ಗಮನಾರ್ಹ.
ಲ್ಯಾಪ್ಟಾಪ್ ತಯಾರಿಕೆ ಘಟಕಕ್ಕೆ ಚಾಲನೆ
ತೈವಾನ್ ಮೂಲದ ಎಂಎಸ್ಐ ಸಹಯೋಗದಲ್ಲಿ ಭಾರತದ ಸಿರ್ಮಾ ಟೆಕ್ನಾಲಜೀಸ್ (Syrma SGS Technologies) ಸಂಸ್ಥೆ ಚೆನ್ನೈನಲ್ಲಿ ಲ್ಯಾಪ್ಟಾಪ್ ತಯಾರಿಸಲು ಹೊಸ ಅಸೆಂಬ್ಲಿ ಲೈನ್ ಅನ್ನು ತೆರೆದಿದೆ. ಕೇಂದ್ರ ಸಚಿವ ಡಾ. ಎ ವೈಷ್ಣವ್ ಮೊನ್ನೆ ಈ ಘಟಕಕ್ಕೆ ಚಾಲನೆ ನೀಡಿದ್ದಾರೆ. ಈ ಸಿರ್ಮಾ ಎಸ್ಜಿಎಸ್ನ ಘಟಕದಲ್ಲಿ ವರ್ಷಕ್ಕೆ ಒಂದು ಲಕ್ಷ ಲ್ಯಾಪ್ಟಾಪ್ಗಳನ್ನು ಅಸೆಂಬಲ್ ಮಾಡಬಹುದಾಗಿದೆ. ಮುಂದಿನ ಒಂದೆರಡು ವರ್ಷದಲ್ಲಿ ಇಲ್ಲಿ ಲ್ಯಾಪ್ಟಾಪ್ ಅಸೆಂಬ್ಲಿಂಗ್ ಸಾಮರ್ಥ್ಯ ಹತ್ತು ಲಕ್ಷಕ್ಕೆ ಹೆಚ್ಚಾಗಬಹುದು.
ಇದನ್ನೂ ಓದಿ: ಪರ್ಸನಲ್ ಲೋನ್: ನಿಶ್ಚಿತ ಬಡ್ಡಿದರ ಆಯ್ಕೆಗೆ ಅವಕಾಶ ಇರಬೇಕು: ಆರ್ಬಿಐ ನಿಯಮ
ಸಿರ್ಮಾ ಎಸ್ಜಿಎಸ್ ಟೆಕ್ನಾಲಜಿ ಸಂಸ್ಥೆ ಚೆನ್ನೈನಲ್ಲಿ ನಾಲ್ಕು ಎಲೆಕ್ಟ್ರಾನಿಕ್ಸ್ ಮ್ಯಾನುಫ್ಯಾಕ್ಚರಿಂಗ್ ಘಟಕಗಳನ್ನು ಹೊಂದಿದೆ. ಅದರಲ್ಲಿ ಒಂದರಲ್ಲಿ ಲ್ಯಾಪ್ಟಾಪ್ ತಯಾರಿಕೆ ನಡೆಯುತ್ತಿದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
