ಭಾರತ್ ಟ್ಯಾಕ್ಸಿ ಮಾದರಿಯಲ್ಲಿ ಸಹಕಾರಿ ಸಂಸ್ಥೆಗಳಿಂದಲೂ ಇನ್ಷೂರೆನ್ಸ್ ಸೇವೆ; ಸರ್ಕಾರ ಯೋಚನೆ

ನವದೆಹಲಿ, ಜುಲೈ 8: ಇನ್ಷೂರೆನ್ಸ್ ಕ್ಷೇತ್ರದಲ್ಲಿ ಮುಂದಿನ ದಿನಗಳಲ್ಲಿ ಸಹಕಾರಿ ಸಂಸ್ಥೆಗಳು (Co-operative societies) ಎಂಟ್ರಿ ಕೊಡಲಿವೆ. ಭಾರತದಲ್ಲಿ ಕೃಷಿ ಮತ್ತು ಸಾಲ ಸೇವೆಗಳಿಗೆ ಸೀಮಿತವಾಗಿದ್ದ ಸಹಕಾರಿ ಕ್ಷೇತ್ರದ ವ್ಯಾಪ್ತಿ ಈಗ ವಿಸ್ತರಣೆ ಆಗಲಿದೆ. ಸಹಕಾರಿ ಸಂಸ್ಥೆಗಳು ಸೇರಿ ಭಾರತ್ ಟ್ಯಾಕ್ಸಿಯನ್ನು (Bharat Taxi) ನಡೆಸುತ್ತಿರುವ ರೀತಿಯಲ್ಲಿ ಸಹಕಾರಿ ಸಂಸ್ಥೆಗಳಿಗೆ ಇನ್ಷೂರೆನ್ಸ್ ಸೇವೆ ಒದಗಿಸುವ ಅವಕಾಶ ನೀಡಲು ಸರ್ಕಾರ ಯೋಜಿಸಿದೆ. ರೈತರ ಸಹಕಾರಿ ಸಂಸ್ಥೆಯಾದ IFFCO ಮತ್ತು ಟೋಕಿಯೋ ಇನ್ಷೂರೆನ್ಸ್ ಕಂಪನಿಗಳ ಸಹಭಾಗಿತ್ವದಲ್ಲಿ ಸ್ಥಾಪನೆಯಾದ IFFCO ಟೋಕಿಯೋ ಜನರಲ್ ಇನ್ಷೂರೆನ್ಸ್ ಕಂಪನಿ ಒಳ್ಳೆಯ ಯಶಸ್ಸು ಪಡೆದಿದೆ. ಇದೇ ಸ್ಫೂರ್ತಿಯಲ್ಲಿ ಸರ್ಕಾರವು ಸಹಕಾರಿ ಸಂಸ್ಥೆಗಳ ಸಹಯೋಗದಲ್ಲಿ ಹೊಸ ಇನ್ಷೂರೆನ್ಸ್ ಕಂಪನಿ ಸ್ಥಾಪಿಸುವ ಇರಾದೆ ಹೊಂದಿದೆ.

ಕೇಂದ್ರ ಸಹಕಾರ ಸಚಿವ ಅಮಿತ್ ಶಾ ಅವರು ಮೊನ್ನೆಯಷ್ಟೇ ಈ ವಿಚಾರವನ್ನು ಬಹಿರಂಗಪಡಿಸಿದ್ದಾರೆ. ಸೋಮವಾರ ನಡೆದ ಸಹಕಾರ ಸಚಿವಾಲಯದ ಐದನೇ ಸಂಸ್ಥಾಪನಾ ದಿನದ ಸಮಾರಂಭದಲ್ಲಿ ಮಾತನಾಡುತ್ತಿದ್ದ ಅವರು ಎರಡು ಯೋಜನೆಗಳನ್ನು ಪ್ರಕಟಿಸಿದ್ದಾರೆ. ಒಂದು, ಸಹಕಾರಿ ತತ್ವದಲ್ಲಿ ಇನ್ಷೂರೆನ್ಸ್ ಸಂಸ್ಥೆ ಸ್ಥಾಪಿಸುವುದು. ಮತ್ತೊಂದು, ಯುಟಿಲಿಟಿ ಅಗ್ರಿಗೇಟರ್ ಕೋಆಪರೇಟಿವ್ ಸೇವೆ ಆರಂಭಿಸುವುದು. ಇನ್ಷೂರೆನ್ಸ್ ನಿಯಂತ್ರಣ ಪ್ರಾಧಿಕಾರವಾದ ಐಆರ್​ಡಿಎಐನ ಅನುಮೋದನೆ ಪಡೆದ ಬಳಿಕ ಕೆಲವೇ ತಿಂಗಳಲ್ಲಿ ಸಹಕಾರಿ ವಿಮಾ ಸಂಸ್ಥೆ ಆರಂಭಗೊಳ್ಳಬಹುದು.

ಇದನ್ನೂ ಓದಿ: ಎಸ್ಸೆಮ್ಮೆಸ್ ಅಲರ್ಟ್​ಗಳಿಗೆ ಗ್ರಾಹಕರಿಂದ ಹಣ ಪಡೆಯುವಂತಿಲ್ಲ; ಆರ್​ಬಿಐ ನಿಯಮದಿಂದ ಬ್ಯಾಂಕುಗಳಿಗೆ 300 ಕೋಟಿ ರೂ ಆದಾಯನಷ್ಟ?

ಸಹಕಾರಿ ಇನ್ಷೂರೆನ್ಸ್ ಕಂಪನಿ ಯಶಸ್ವಿಯಾಗುವುದಾ?

ಭಾರತದಲ್ಲಿ ಸಹಕಾರಿ ಕ್ಷೇತ್ರ ಬಹಳ ಬಲವಾಗಿದೆ. ಇಲ್ಲಿ ಎಂಟೂವರೆ ಲಕ್ಷ ಸಹಕಾರಿ ಸಂಸ್ಥೆಗಳಿವೆ. ಇದು ಬಹಳ ಬೃಹತ್ತಾದ ಸಂಖ್ಯೆ. ಸಣ್ಣ ನಗರ, ಪಟ್ಟಣ ಹಾಗೂ ಗ್ರಾಮೀಣ ಭಾಗಗಳಲ್ಲಿ ಸಹಕಾರಿ ಸಂಸ್ಥೆಗಳು ಬಹಳ ಶಕ್ತಿ ಹೊಂದಿವೆ. ಸಹಕಾರಿ ಬ್ಯಾಂಕುಗಳಲ್ಲಿ 22 ಕೋಟಿಗೂ ಅಧಿಕ ಡೆಪಾಸಿಟ್ ಅಕೌಂಟ್​ಗಳಿವೆ. 150ಕ್ಕೂ ಅಧಿಕ ಸಹಕಾರಿ ಸಂಸ್ಥೆಗಳು ಇನ್ಷೂರೆನ್ಸ್ ಉತ್ಪನ್ನಗಳನ್ನು ಮಾರಲು ಕಾರ್ಪೊರೇಟ್ ಏಜೆಂಟ್ ಆಗಿ ಕೆಲಸ ಮಾಡಿದ ಅನುಭವ ಹೊಂದಿವೆ.

ಇತ್ತೀಚೆಗೆ ಸರ್ಕಾರವು ಸಹಕಾರಿ ಕ್ಷೇತ್ರದಲ್ಲಿ ಗಮನಾರ್ಹ ಸುಧಾರಣೆಗಳನ್ನು ತಂದಿತ್ತು. ಅದರಲ್ಲಿ ಇನ್ಷೂರೆನ್ಸ್ ಉತ್ಪನ್ನಗಳನ್ನು ಮಾರುವ ವಿಚಾರದಲ್ಲಿ ಸಹಕಾರಿ ಸಂಸ್ಥೆಗಳು ಮಧ್ಯವರ್ತಿ ಪಾತ್ರಕ್ಕೆ ಸೀಮಿತವಾಗದೆ, ಖುದ್ದಾಗಿ ಇನ್ಷೂರೆನ್ಸ್ ಕಂಪನಿಗಳನ್ನು ಸ್ಥಾಪಿಸುವ ಅವಕಾಶ ಹೊಂದಿರುತ್ತವೆ.

ಇದನ್ನೂ ಓದಿ: ವಿಶ್ವ ಬ್ಯಾಂಕ್​ನ ಮೇಲ್ಮಧ್ಯಮ ಆದಾಯ ಮಟ್ಟ ದಾಟಿದ ಕರ್ನಾಟಕ; ತಮಿಳುನಾಡನ್ನೂ ಮೀರಿಸಿದ ಕರುನಾಡು; ಟಾಪ್-5ನಲ್ಲಿ ದಕ್ಷಿಣ ರಾಜ್ಯಗಳೇ ಹೆಚ್ಚು

ಭಾರತದ ವಿಮಾ ಕ್ಷೇತ್ರಕ್ಕೆ ಮತ್ತಷ್ಟು ಬಲ

2047ರೊಳಗೆ ದೇಶದ ಪ್ರತಿಯೊಬ್ಬರನ್ನೂ ವಿಮಾ ವ್ಯಾಪ್ತಿ ತರಬೇಕೆನ್ನುವುದು ಸರ್ಕಾರದ ಮಹತ್ವಾಕಾಂಕ್ಷೆ. ದಶಕದ ಹಿಂದೆ ಇನ್ಷೂರೆನ್ಸ್ ಸೆಕ್ಟರ್ ಅನ್ನು ಖಾಸಗಿ ಕ್ಷೇತ್ರಕ್ಕೆ ತೆರೆಯಲಾಗಿತ್ತು. ಇದರಿಂದ ಸೀಮಿತ ಮಟ್ಟದಲ್ಲಿ ಇನ್ಷೂರೆನ್ಸ್ ತಲುಪುವಿಕೆ ಸಾಧ್ಯವಾಗಿದೆ. ಅವುಗಳ ವ್ಯಾಪ್ತಿ ನಗರ ಪ್ರದೇಶಗಳಿಗೆ ಹೆಚ್ಚು ಸೀಮಿತವಾಗಿದೆ. ಆದರೆ, ಸಹಕಾರಿ ಸಂಸ್ಥೆಗಳು ಈ ಕ್ಷೇತ್ರಕ್ಕೆ ಇಳಿದರೆ ಹೆಚ್ಚಿನ ಜನರಿಗೆ ಇನ್ಷೂರೆನ್ಸ್ ಸೇವೆ ತಲುಪಿಸಲು ಸಾಧ್ಯವಾಗಬಹುದು.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ