ಎಂಟು ಪ್ರಮುಖ ಮೂಲಸೌಕರ್ಯ ವಲಯಗಳ ಬೆಳವಣಿಗೆ ಜುಲೈನಲ್ಲಿ ಶೇ. 5.4; ಈ ವರ್ಷ ಭರ್ಜರಿ ಓಟ

ನವದೆಹಲಿ, ಆಗಸ್ಟ್ 20: ಭಾರತದ ಎಂಟು ಪ್ರಮುಖ ಮೂಲಸೌಕರ್ಯ ವಲಯಗಳ (Core Sector) ಬೆಳವಣಿಗೆಯ ದರವು 2026ರ ಜುಲೈ ತಿಂಗಳಲ್ಲಿ ಉತ್ತಮವಾದ 5.4% ಬೆಳವಣಿಗೆ ದಾಖಲಿಸಿದೆ. ಆದರೆ, ಹಿಂದಿನ ತಿಂಗಳಲ್ಲಿ (ಜೂನ್) ಇದು 6% ಇತ್ತು. ಅದಕ್ಕೆ ಹೋಲಿಸಿದರೆ ಜುಲೈನಲ್ಲಿ ಪ್ರಮುಖ ಇನ್​ಫ್ರಾಸ್ಟ್ರಕ್ಚರ್ ಸೆಕ್ಟರ್​ಗಳ ಬೆಳವಣಿಗೆ ತುಸು ಮಂದಗೊಂಡಿದೆ. ಆದರೆ, ಈ ಹಣಕಾಸು ವರ್ಷದಲ್ಲಿ ಈವರೆಗೆ ಸಾಧಿಸಿರುವ ಪ್ರಗತಿಯು ಹಿಂದಿನ ವರ್ಷದ ಇದೇ ಅವಧಿಗೆ ತುಲನೆ ಮಾಡಿದರೆ ಬಹಳ ಹೆಚ್ಚಿನ ಮಟ್ಟದಲ್ಲಿದೆ.

2026-27ರ ಹಣಕಾಸು ವರ್ಷದಲ್ಲಿ ಏಪ್ರಿಲ್​ನಿಂದ ಜುಲೈವರೆಗಿನ ಅವಧಿಯಲ್ಲಿ ಎಂಟು ಕೋರ್ ಸೆಕ್ಟರ್​ಗಳ ಬೆಳವಣಿಗೆ ದರ 4.3% ಇದೆ. ಹಿಂದಿನ ವರ್ಷದಲ್ಲಿ ಇದು 1.5% ಮಾತ್ರವೇ ಇತ್ತು. ಇನ್ನು, 2025ರ ಜುಲೈನಲ್ಲಿ ಇದು 3.2% ಇತ್ತು. ಹೀಗಾಗಿ, ಈಗ ಈ ಮೂಲಸೌಕರ್ಯ ವಲಯಗಳಲ್ಲಿ ಆಗುತ್ತಿರುವ ಪ್ರಗತಿ ಗಮನಾರ್ಹವೆನಿಸಿದೆ.

ಇದನ್ನೂ ಓದಿ: ಭಾರತದಲ್ಲಿ ಜೆನ್ 2 ಸೆಟಿಲೈಟ್ ಸೇವೆ ಅನುಮತಿಗಾಗಿ ಸ್ಟಾರ್​ಲಿಂಕ್ ಮತ್ತೊಮ್ಮೆ ಅರ್ಜಿ

ಎಂಟು ಪ್ರಮುಖ ಮೂಲಸೌಕರ್ಯ ಕ್ಷೇತ್ರಗಳು ಯಾವುವು?

1. ಪೆಟ್ರೋಲಿಯಂ ರಿಫೈನರಿ ಉತ್ಪನ್ನಗಳು
2. ವಿದ್ಯುತ್
3. ಉಕ್ಕು
4. ಕಲ್ಲಿದ್ದಲು
5. ಕಚ್ಚಾ ತೈಲ
6. ನೈಸರ್ಗಿಕ ಅನಿಲ
7. ಸಿಮೆಂಟ್
8. ರಸಗೊಬ್ಬರ

ಈ ಮೇಲಿನ ಉದ್ಯಮಗಳನ್ನು ಪ್ರಮುಖ ಮೂಲಸೌಕರ್ಯ ಕ್ಷೇತ್ರಗಳೆಂದು ಪರಿಗಣಿಸಲಾಗಿದೆ. ಭಾರತದ ಕೈಗಾರಿಕೆಗಳ ಉತ್ಪನ್ನಗಳ ಸೂಚ್ಯಂಕದಲ್ಲಿ ಈ ಎಂಟು ಉದ್ಯಮಗಳಿಗೆ ನೀಡಲಾಗಿರುವ ಒಟ್ಟು ತೂಕ 40.27% ಎನ್ನಲಾಗಿದೆ. ಹೀಗಾಗಿ, ಐಐಪಿ ಇಂಡೆಕ್ಸ್​ನಲ್ಲಿ ಈ ಪ್ರಮುಖ ಇನ್​ಫ್ರಾಸ್ಟ್ರಕ್ಚರ್ ಸೆಕ್ಟರ್​ಗಳು ಪ್ರಮುಖ ಪಾತ್ರ ವಹಿಸುತ್ತವೆ.

ಇದನ್ನೂ ಓದಿ: ಹೊಸ ಮೈಲಿಗಲ್ಲು ಮುಟ್ಟಿದ ಅಮೆರಿಕದ ಸಾಲ; ಹತ್ತು ವರ್ಷದಲ್ಲಿ ಸಾಲದ ಹೊರೆ ಎರಡು ಪಟ್ಟು ಏರಿಕೆ

ಮುಂಚೂಣಿಯಲ್ಲಿರುವ ಕ್ಷೇತ್ರಗಳು: ಈ ಮೂಲಸೌಕರ್ಯ ಸೆಕ್ಟರ್​ಗಳ ಬೆಳವಣಿಗೆಗೆ ಮುಖ್ಯವಾಗಿ ಕಬ್ಬಿಣದ ಅದಿರು (Iron ore) ಮತ್ತು ಸಿಮೆಂಟ್ (Cement) ಕ್ಷೇತ್ರಗಳ ಉತ್ತಮ ಪ್ರದರ್ಶನ ಕಾರಣವಾಗಿದೆ. ಕಲ್ಲಿದ್ದಲು, ಸಿಮೆಂಟ್, ವಿದ್ಯುತ್, ಕಬ್ಬಿಣ ಅದಿರು, ರಿಫೈನರಿ ಉತ್ಪನ್ನಗಳ ಉತ್ಪಾದನೆ ಹೆಚ್ಚಿದ್ದರಿಂದ ಜುಲೈನಲ್ಲಿ ಈ ಕೋರ್ ಸೆಕ್ಟರ್​ಗಳು ಉತ್ತಮ ಬೆಳವಣಿಗೆ ಹೊಂದಲು ಸಾಧ್ಯವಾಗಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ