Meta Layoffs: ವಾಟ್ಸಾಪ್, ಫೇಸ್ಬುಕ್ನಿಂದ 3ನೇ ಸುತ್ತಿನ ಲೇ ಆಫ್; ತಲೆ ಮೇಲೆ ಕೈಹೊತ್ತ ಮೆಟಾ ಉದ್ಯೋಗಿಗಳು

Global Tech Companies Job Cut Focus: ಜಾಗತಿಕ ದೈತ್ಯ ಕಂಪನಿಗಳು ಉದ್ಯೋಗ ಕಡಿತದ ಪೈಪೋಟಿಗೆ ಬಿದ್ದಂತಿದೆ. ಅಮೇಜಾನ್ 27,000 ಮಂದಿಗೆ ಲೇ ಆಫ್ ಮಾಡಿ ಮತ್ತೊಂದು ಸುತ್ತಿಗೆ ನಡೆದಿದೆ. ಮೆಟಾ ಪ್ಲಾಟ್ಫಾರ್ಮ್ ಕೂಡ 21,000 ಮಂದಿಯನ್ನು ಮನೆಗೆ ಕಳುಹಿಸಿ ಈಗ ಇನ್ನಷ್ಟು ಲೇ ಆಫ್ ನಡೆಸುತ್ತಿದೆ.

ಮೆಟಾ ಪ್ಲಾಟ್ಫಾರ್ಮ್

ಸುಗ್ಗನಹಳ್ಳಿ ವಿಜಯಸಾರಥಿ |
Updated on:Apr 19, 2023 | 2:33 PM

ಮುಖ್ಯಾಂಶಗಳು

ಕೆಲ ತಿಂಗಳ ಅಂತರದಲ್ಲಿ ಒಟ್ಟು 21,000 ಮಂದಿಯನ್ನು ಕೆಲಸದಿಂದ ವಜಾಗೊಳಿಸಿದ್ದ ಮೆಟಾ ಪ್ಲಾಟ್ಫಾರ್ಮ್ ಇದೀಗ 3ನೇ ಸುತ್ತಿನ ಲೇ ಆಫ್ಗೆ ಸಜ್ಜಾಗಿದೆ.
ಏಪ್ರಿಲ್ ಅಂತ್ಯದಲ್ಲಿ ಮತ್ತು ಮೇ ಅಂತ್ಯದಲ್ಲಿ ಮೆಟಾದ ಟೆಕ್ ಮತ್ತು ಬ್ಯುಸಿನೆಸ್ ವಿಭಾಗಗಳಿಂದ ಉದ್ಯೋಗಿಕಡಿತ ಆಗಬಹುದು.
ಈಗಾಗಲೇ 27,000 ಮಂದಿಯನ್ನು ಲೇ ಆಫ್ ಮಾಡಿರುವ ಇ ಕಾಮರ್ಸ್ ಕಂಪನಿ ಅಮೇಜಾನ್ ಇದೀಗ ಮತ್ತೊಂದು ಸುತ್ತಿನ ಲೇ ಆಫ್ ನಡೆಸುತ್ತಿರುವುದು ತಿಳಿದುಬಂದಿದೆ.

ನವದೆಹಲಿ: ಮೆಟಾ ಪ್ಲಾಟ್ಫಾರ್ಮ್ ಸಂಸ್ಥೆಯ ಲೇ ಆಫ್ ದಾಹ ಮುಂದುವರಿದಿದೆ. ವಾಟ್ಸಾಪ್, ಫೇಸ್ಬುಕ್, ಇನ್ಸ್ಟಾಗ್ರಾಮ್ ಮತ್ತು ರಿಯಾಲಿಟಿ ಲ್ಯಾಬ್ಸ್ ಒಳಗೊಂಡಿರುವ ಮೆಟಾ ಪ್ಲಾಟ್ಫಾರ್ಮ್ನಲ್ಲಿ (Meta Platforms) ಮ್ಯಾನೇಜ್ಮೆಂಟ್ 3ನೇ ಸುತ್ತಿನ ಉದ್ಯೋಗಕಡಿತ ಕಾರ್ಯಕ್ಕೆ ಅಣಿಯಾಗಿದೆ. ಉದ್ಯೋಗಿಗಳ ಸಂಖ್ಯೆ ಕಡಿಮೆ ಮಾಡಿ ಸಂಸ್ಥೆಯನ್ನು ಇನ್ನಷ್ಟು ಬಲಯುತಗೊಳಿಸುವ ನಿಟ್ಟಿನಲ್ಲಿ ಈ ಜಾಬ್ ಕಟ್ (Layoffs) ಪ್ರಕ್ರಿಯೆಯನ್ನು ಮೆಟಾ ಮುಂದುವರಿಸುತ್ತಿದೆ. ಮಾರ್ಕ್ ಝುಕರ್ಬರ್ಗ್ ನೇತೃತ್ವದ ಮೆಟಾ ಪ್ಲಾಟ್ಫಾರ್ಮ್ಸ್ ಕಳೆದ ವರ್ಷದ ನವೆಂಬರ್ನಲ್ಲಿ 11,000 ಉದ್ಯೋಗಿಗಳನ್ನು ಕೆಲಸದಿಂದ ವಜಾಗೊಳಿಸಿತ್ತು. ಮಾರ್ಚ್ ತಿಂಗಳಲ್ಲಿ 10,000 ಮಂದಿಯನ್ನು ಲೇ ಆಫ್ ಮಾಡಿತ್ತು. ಹೀಗೆ ಕಳೆದ ಆರು ತಿಂಗಳಲ್ಲಿ ಒಟ್ಟು 21 ಸಾವಿರ ಮೆಟಾ ಉದ್ಯೋಗಿಗಳು ಕೆಲಸ ಕಳೆದುಕೊಂಡಿದ್ದಾರೆ. ಈಗ ಅದು ಸಾಲದೆಂಬಂತೆ ಮೂರನೇ ಸುತ್ತಿನ ಲೇ ಆಫ್ಗೆ ಮೆಟಾ ಕೈ ಹಾಕಿರುವುದು ತಿಳಿದುಬಂದಿದೆ. ಈ ಮೂರನೇ ಸುತ್ತಿನಲ್ಲಿ ಎಷ್ಟು ಮಂದಿ ಕೆಲಸ ಕಳೆದುಕೊಳ್ಳುತ್ತಾರೆ ಎಂಬುದು ಗೊತ್ತಾಗಿಲ್ಲ.

ಹೊಸ ಸುತ್ತಿನ ಉದ್ಯೋಗಿ ಕಡಿತಕ್ಕೆ ಎಲ್ಲಾ ಮ್ಯಾನೇಜರ್ಗಳಿಗೂ ಸೂಚನೆ ನೀಡಲಾಗಿರುವುದು ಗೊತ್ತಾಗಿದೆ. ಕೆಲಸ ತೆಗೆಯಬಹುದಾದ ಉದ್ಯೋಗಿಗಳನ್ನು ಗುರುತಿಸಿ ಸದ್ಯ ಪಟ್ಟಿ ಮಾಡುವಂತೆ ಮ್ಯಾನೇಜರ್ಗಳಿಗೆ ತಿಳಿಸಲಾಗಿದೆ. 5 ಸಾವಿರಕ್ಕೂ ಹೆಚ್ಚು ಮಂದಿಯಾದರೂ ಈ ಮೂರನೇ ಸುತ್ತಿನ ಲೇ ಆಫ್ನಲ್ಲಿ ಕೆಲಸ ಕಳೆದುಕೊಳ್ಳುವ ಸಾಧ್ಯತೆ ಇದೆ. ಟೆಕ್ ವಿಭಾಗಗಳಿಂದ ಏಪ್ರಿಲ್ ಕೊನೆಯ ವಾರದಲ್ಲಿ ಲೇ ಆಫ್ ಅಗಬಹುದು. ಮೇ ತಿಂಗಳ ಕೊನೆಯಲ್ಲಿ ಮೆಟಾ ಪ್ಲಾಟ್ಫಾರ್ಮ್ನ ಬ್ಯುಸಿನೆಸ್ ವಿಭಾಗಗಳಿಂದ ಉದ್ಯೋಗಿಕಡಿತ ಆಗಬಹುದು ಎಂದು ಹೇಳಲಾಗಿದೆ.

ಇದನ್ನೂ ಓದಿ: Disney Layoff: 7,000 ಸಾಲಲ್ಲ, ಇನ್ನೊಂದು ಸುತ್ತು ಉದ್ಯೋಗಿಗಳ ವಜಾ ನಿರ್ಧಾರ ಮಾಡಿದ ಡಿಸ್ನಿ; ಕೆಲಸ ಕಳೆದುಕೊಳ್ಳುವವರ ಸಂಖ್ಯೆ ಎಷ್ಟು?

ಈ ಮೂರನೇ ಸುತ್ತಿನ ಜಾಬ್ ಕಟ್ ಬಳಿಕ ಮೆಟಾ ಪ್ಲಾಟ್ಫಾರ್ಮ್ನ ವಿವಿಧ ಕಂಪನಿಗಳಲ್ಲಿ ಉಳಿದುಕೊಳ್ಳುವ ಉದ್ಯೋಗಿಗಳನ್ನು ಬೇರೆ ಬೇರೆ ಕಡೆ ಮರುನಿಯೋಜನೆ ಮಾಡುವ ಸಾಧ್ಯತೆ ಇದೆ. ಸದ್ಯ, ಈ ಲೇ ಆಫ್ ಪಟ್ಟಿ ಮಾಡುವ ಕಾರ್ಯ ಸುಗಮವಾಗಲೆಂದು ಅಮೆರಿಕದಲ್ಲಿರುವ ಮೆಟಾ ಕಚೇರಿಯಲ್ಲಿನ ಎಲ್ಲಾ ಉದ್ಯೋಗಿಗಳನ್ನೂ ವರ್ಕ್ ಫ್ರಂ ಹೋಮ್ಗೆ ಕಳುಹಿಸುವ ಸಾಧ್ಯತೆಯೂ ಇದೆ.

ಅಮೇಜಾನ್ನಲ್ಲೂ ಮತ್ತೊಂದು ಸುತ್ತಿನ ಲೇ ಆಫ್

ಜಾಗತಿಕ ಇ–ಕಾಮರ್ಸ್ ದೈತ್ಯ ಅಮೇಜಾನ್ ಕೂಡ ಲೇ ಆಫ್ ಭರಾಟೆ ನಿಲ್ಲಿಸುತ್ತಿಲ್ಲ. ಈಗಾಗಲೇ 27,000 ಮಂದಿ ಉದ್ಯೋಗಿಗಳನ್ನು ಮನೆಗೆ ಕಳುಹಿಸಿರುವ ಅಮೇಜಾನ್ ಇದೀಗ ಮತ್ತೊಂದು ಸುತ್ತಿನ ಲೇ ಆಫ್ ನಡೆಸಿದೆ. ಅಮೇಜಾನ್ನ ಜಾಹೀರಾತು ವಿಭಾಗದಲ್ಲಿ ಜಾಬ್ ಕಟ್ ಮಾಡಲಾಗಿದೆ. ಆದರೆ, ಇಷ್ಟು ಮಂದಿ ಕೆಲಸ ಕಳೆದುಕೊಂಡಿದ್ದಾರೆ ಎಂಬ ಸಂಖ್ಯೆ ಸಿಕ್ಕಿಲ್ಲ.

ಅಮೇಜಾನ್ನ ರೀಟೇಲ್, ಡಿವೈಸ್, ನೇಮಕಾತಿ ಮತ್ತು ಎಚ್ಆರ್ ವಿಭಾಗದಲ್ಲಿ ಮೊದಲ ಸುತ್ತಿನ ಲೇ ಆಫ್ ಆಗಿತ್ತು. ಎರಡನೇ ಸುತ್ತಿನಲ್ಲಿ ಜಾಹೀರಾತು, ಕ್ಲೌಡ್ ಕಂಪ್ಯೂಟಿಂಗ್, ಟ್ವಿಚ್ ಲೈವ್ ಸ್ಟ್ರೀಮಿಂಗ್ ಮತ್ತು ಎಚ್ಅರ್ ತಂಡಗಳಲ್ಲಿ ಜಾಬ್ ಕಟ್ ಆಗಿತ್ತು. ಈ ಎರಡು ಸುತ್ತಿನಲ್ಲಿ ಒಟ್ಟು 27 ಸಾವಿರ ಮಂದಿ ಕೆಲಸ ಕಳೆದುಕೊಂಡಿದ್ದರು. ಇ–ಕಾಮರ್ಸ್ ಸೆಕ್ಟರ್ನಲ್ಲಿ ಇದು ಅತಿದೊಡ್ಡ ಲೇ ಆಫ್ ಎಂದು ದಾಖಲೆ ಬರೆದಿದೆ.