2024ರಲ್ಲಿ ಮ್ಯೂಚುವಲ್ ಫಂಡ್ಗಳಿಗೆ ಹರಿದುಬಂತು 17 ಲಕ್ಷ ಕೋಟಿ ರೂ ಹೂಡಿಕೆ; ಒಟ್ಟಾರೆ ನಿರ್ವಹಿತ ಆಸ್ತಿ 68 ಲಕ್ಷ ಕೋಟಿ ರೂ
2024ರ ನವೆಂಬರ್ ತಿಂಗಳವರೆಗೂ ಮ್ಯುಚುವಲ್ ಫಂಡ್ಗಳಿಗೆ ಹರಿದುಬಂದ ಹೂಡಿಕೆಯ ಮೊತ್ತ 17 ಲಕ್ಷ ಕೋಟಿ ರೂ ಇದೆ. ನಿವ್ವಳ ಒಳಹರಿವು 9.14 ಲಕ್ಷ ಕೋಟಿ ರೂ. ಎಸ್ಐಪಿಗಳ ಮೂಲಕ ಎರಡು ಲಕ್ಷ ಕೋಟಿ ರೂಗೂ ಅಧಿಕ ಹೂಡಿಕೆಗಳು ಮ್ಯೂಚುವಲ್ ಫಂಡ್ಗೆ ಸಿಕ್ಕಿದೆ. ಮಾಸಿಕ ಎಸ್ಐಪಿಗಳ ಮೊತ್ತ ಇಪ್ಪತ್ತೈದು ಸಾವಿರ ಕೋಟಿ ರೂ ದಾಟಿದೆ. ಅಂದರೆ ತಿಂಗಳಿಗೆ ಎಸ್ಐಪಿಗಳ ಮೂಲಕ 25,000 ಕೋಟಿ ರೂಗೂ ಅಧಿಕ ಹೂಡಿಕೆಯು ಮ್ಯೂಚುವಲ್ ಫಂಡ್ಗಳಿಗೆ ಹೋಗುತ್ತಿದೆ.
Updated on:Dec 24, 2024 | 8:16 PM
ನವದೆಹಲಿ, ಡಿಸೆಂಬರ್ 24: ಈ ವರ್ಷ ಒಟ್ಟಾರೆಯಾಗಿ ಷೇರು ಮಾರುಕಟ್ಟೆ ಭರ್ಜರಿಯಾಗಿ ಹಿಗ್ಗಿರುವುದು ಹೌದು. ಮ್ಯೂಚುವಲ್ ಫಂಡ್ಗಳ ಜನಪ್ರಿಯತೆ ದಿನೇ ದಿನೇ ಹೆಚ್ಚುತ್ತಿದೆ. ಮಾರುಕಟ್ಟೆಯಲ್ಲಿ ಹೂಡಿಕೆ ಮಾಡಲು ಮ್ಯೂಚುವಲ್ ಫಂಡ್ ಉತ್ತಮ ಮಾರ್ಗಗಳಲ್ಲಿ ಒಂದೆನಿಸಿದೆ. ಅಂತೆಯೇ, 2024ರಲ್ಲಿ ಮ್ಯುಚುವಲ್ ಫಂಡ್ಗಳಿಗೆ ಹರಿದುಬಂದಿರುವ ಬಂಡವಾಳ 17 ಲಕ್ಷ ಕೋಟಿ ರೂ ಎನ್ನಲಾಗಿದೆ. ಹೂಡಿಕೆಗಳು ಹೆಚ್ಚಿರುವುದು ಮಾತ್ರವಲ್ಲ, ಹೂಡಿಕೆದಾರರ ಸಂಖ್ಯೆಯೂ ಸಖತ್ತಾಗಿ ಹೆಚ್ಚಿದೆ. 2023ರಲ್ಲೂ ಮ್ಯೂಚುವಲ್ ಫಂಡ್ಗಳು ದಾಖಲೆಯ ಮೊತ್ತದ ಹೂಡಿಕೆಗಳನ್ನು ಪಡೆದಿದ್ದವು. ಅದು ಈ ವರ್ಷವೂ ಮುಂದುವರಿದಿದೆ. 2025ರ ಹೊಸ ವರ್ಷದಲ್ಲೂ ಇದೇ ಟ್ರೆಂಡ್ ಮುಂದುವರಿಯುವ ನಿರೀಕ್ಷೆ ಇದೆ.
2024ರಲ್ಲಿ ಮ್ಯೂಚುವಲ್ ಫಂಡ್ಗೆ ಬಂದಿರುವ ನಿವ್ವಳ ಒಳಹರಿವು 9.14 ಲಕ್ಷ ಕೋಟಿ ರೂ ಎನ್ನಲಾಗಿದೆ. ಅಂದರೆ, ಮ್ಯುಚುವಲ್ ಫಂಡ್ನಿಂದ ಹೂಡಿಕೆ ಹಿಂಪಡೆದಿರುವುದನ್ನು ಕಳೆದು ಬಂದ ಹೊಸ ಹೂಡಿಕೆಗಳ ಪ್ರಮಾಣ ಅದು. ಎಸ್ಐಪಿಗಳ ಮೂಲಕವೇ ಮ್ಯೂಚುವಲ್ ಫಂಡ್ಗಳಿಗೆ 2.4 ಲಕ್ಷ ಕೋಟಿ ರೂ ಹೂಡಿಕೆ ಸಂದಾಯವಾಗಿದೆ. ಈ ಮಾಹಿತಿಯನ್ನು ಮ್ಯುಚುವಲ್ ಫಂಡ್ ಉದ್ಯಮ ಸಂಸ್ಥೆ (ಎಎಂಎಫ್ಐ) ನೀಡಿದೆ.
ಇದನ್ನೂ ಓದಿ: 2025ರಲ್ಲಿ ಷೇರು ಮಾರುಕಟ್ಟೆಗೆ 14 ದಿನ ರಜೆ; ಅ. 21ರಂದು ಮುಹೂರ್ತ ಟ್ರೇಡಿಂಗ್; ಇಲ್ಲಿದೆ ರಜಾದಿನಗಳ ಪಟ್ಟಿ
2024ರಲ್ಲಿ 17 ಲಕ್ಷ ಕೋಟಿ ರೂ ಒಳಹರಿವು ಸೇರಿದಂತೆ ಮ್ಯೂಚುವಲ್ ಫಂಡ್ಗಳು ನಿರ್ವಹಿಸುತ್ತಿರುವ ಒಟ್ಟಾರೆ ಹೂಡಿಕೆಗಳು (ಎಯುಎಂ) 68 ಲಕ್ಷ ಕೋಟಿ ರೂ ಆಗಿದೆ. ಇದು ಹೊಸ ದಾಖಲೆ ಎನಿಸಿದೆ. 2023ರಲ್ಲಿ ಫಂಡ್ಗಳ ಎಯುಎಂ 50.78 ಲಕ್ಷ ಕೋಟಿ ರೂ ಇತ್ತು. ಈ ವರ್ಷ ನವೆಂಬರ್ ಅಂತ್ಯದವರೆಗಿನ ದತ್ತಾಂಶ ಇದಾಗಿದೆ. ಡಿಸೆಂಬರ್ ಮುಗಿಯುವಷ್ಟರಲ್ಲಿ ಮ್ಯೂಚುವಲ್ ಫಂಡ್ಗಳಿಗೆ ಇನ್ನಷ್ಟು ಹೂಡಿಕೆಗಳು ಹರಿದುಬರುವುದು ನಿಶ್ಚಿತವಾಗಿದ್ದು ಒಟ್ಟಾರೆ ಎಯುಎಂ 70 ಲಕ್ಷ ಕೋಟಿ ರೂ ದಾಟುವ ಎಲ್ಲಾ ಸಾಧ್ಯತೆಯೂ ಇದೆ.
2023ರಲ್ಲಿ ಮ್ಯೂಚುವಲ್ ಫಂಡ್ಗಳ ನಿರ್ವಹಿತ ಆಸ್ತಿ 11 ಲಕ್ಷ ಕೋಟಿ ರೂನಷ್ಟು ಸೇರ್ಪಡೆಯಾಗಿತ್ತು. ಹಿಂದಿನ ವರ್ಷಕ್ಕಿಂತ ಶೇ. 27ರಷ್ಟು ಹೆಚ್ಚಾಗಿತ್ತು. ಈ ವರ್ಷ ಈ ಎರಡೂ ಅಂಶಗಳಲ್ಲಿ ಹೊಸ ದಾಖಲೆ ಬರೆಯಲಾಗಿದೆ. ಕಳೆದ ನಾಲ್ಕು ವರ್ಷಗಳಲ್ಲಿ ಈ ಉದ್ಯಮಕ್ಕೆ ಬಂದ ಹೂಡಿಕೆ ಬರೋಬ್ಬರಿ 30 ಲಕ್ಷ ಕೋಟಿ ರೂ.
ಇದನ್ನೂ ಓದಿ: ಬಂಡವಾಳ ಮಾರುಕಟ್ಟೆಯಿಂದ ಕಂಪನಿಗಳು ಪಡೆದ ಫಂಡಿಂಗ್ 10 ವರ್ಷದಲ್ಲಿ 10 ಪಟ್ಟು ಹೆಚ್ಚಳ: ವರದಿ
ಈಕ್ವಿಟಿ ಮ್ಯೂಚುವಲ್ ಫಂಡ್ಗಳಿಗೆ ಸಿಂಹಪಾಲು
ಮ್ಯೂಚುವಲ್ ಫಂಡ್ ಉದ್ಯಮದಲ್ಲಿ 45 ಅಸೆಟ್ ಮ್ಯಾನೇಜ್ಮೆಂಟ್ ಕಂಪನಿಗಳಿವೆ. 2024ರಲ್ಲಿ ಒಟ್ಟಾರೆ ಈ ಉದ್ಯಮಕ್ಕೆ ಬಂದ ನಿವ್ವಳ ಹೂಡಿಕೆ ಒಳಹರಿವು 9.14 ಲಕ್ಷ ಕೋಟಿ ರೂ. ಈ ಪೈಕಿ ಈಕ್ವಿಟಿ ಸ್ಕೀಮ್ಗಳಿಗೆ 3.54 ಲಕ್ಷ ಕೋಟಿ ರೂ ಸಿಕ್ಕಿದೆ. ಹೈಬ್ರಿಡ್ ಸ್ಕೀಮ್ಗಳಿಗೆ 1.44 ಲಕ್ಷ ಕೋಟಿ ರೂ, ಡೆಟ್ ಸ್ಕೀಮ್ಗಳಿಗೆ 2.88 ಲಕ್ಷ ಕೋಟಿ ರೂ ಹೂಡಿಕೆ ಸಿಕ್ಕಿದೆ.
ಎಸ್ಐಪಿಗಳ ಜನಪ್ರಿಯತೆಯೂ ಹೆಚ್ಚುತ್ತಿದೆ. ಮಾಸಿಕ ಎಸ್ಐಪಿಗಳು ಅಕ್ಟೋಬರ್ ಮತ್ತು ನವೆಂಬರ್ ತಿಂಗಳಲ್ಲಿ 25,000 ಕೋಟಿ ರೂ ಗಡಿದಾಟಿದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
Published On - 8:14 pm, Tue, 24 December 24
