Economic Survey; ಇಂದು ಪ್ರಕಟವಾಗಲಿದೆ ಆರ್ಥಿಕ ಸಮೀಕ್ಷಾ ವರದಿ; ಎಲ್ಲಿ, ಹೇಗೆ ವೀಕ್ಷಿಸಬಹುದು?

ನವದೆಹಲಿ: ಕೇಂದ್ರ ಬಜೆಟ್​​ಗೆ​ (Budget 2023) ಪೂರ್ವಭಾವಿಯಾಗಿ ಇಂದು (ಜನವರಿ 31) 2022-23ನೇ ಸಾಲಿನ ಆರ್ಥಿಕ ಸಮೀಕ್ಷಾ (Economic Survey) ವರದಿ ಪ್ರಕಟಗೊಳ್ಳಲಿದೆ. ಬಜೆಟ್ ಅಧಿವೇಶನ ಬೆಳಿಗ್ಗೆ 11 ಗಂಟೆಗೆ ಆರಂಭವಾಗಲಿದ್ದು, ಮೊದಲಿಗೆ ದ್ರೌಪದಿ ಮುರ್ಮು ಅವರು ಸಂಸತ್​ನ ಉಭಯ ಸದನಗಳನ್ನು ಉದ್ದೇಶಿಸಿ ಭಾಷಣ ಮಾಡಲಿದ್ದಾರೆ. ಬಳಿಕ ಪ್ರಸಕ್ತ ಹಣಕಾಸು ವರ್ಷದ ಆರ್ಥಿಕ ಬೆಳವಣಿಗೆಗೆ ಸಂಬಂಧಿಸಿದ ಆರ್ಥಿಕ ಸಮೀಕ್ಷಾ ವರದಿ ಪ್ರಕಟಗೊಳ್ಳಲಿದೆ. ಕೇಂದ್ರ ಬಜೆಟ್​ನ ಮುನ್ನಾ ದಿನ ಆರ್ಥಿಕ ಸಮೀಕ್ಷೆ ಪ್ರಕಟಿಸುವ ಸಂಪ್ರದಾಯ ದಶಕಗಳಿಂದಲೂ ನಡೆದುಬಂದಿದೆ. ಫೆಬ್ರವರಿ 1ರಂದು ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅವರು ಬಜೆಟ್ ಮಂಡನೆ ಮಾಡಲಿದ್ದಾರೆ. ಆರ್ಥಿಕ ಸಮೀಕ್ಷಾ ವರದಿಯನ್ನೂ ಸಂಸತ್​ನಲ್ಲಿ ನಿರ್ಮಲಾ ಸೀತಾರಾಮನ್ ಅವರೇ ಮಂಡಿಸಲಿದ್ದಾರೆ. ಬಳಿಕ ಮುಖ್ಯ ಆರ್ಥಿಕ ಸಲಹೆಗಾರ (CEA) ಡಾ. ವಿ. ಅನಂತ ನಾಗೇಶ್ವರನ್ ಅವರು ಪತ್ರಿಕಾಗೋಷ್ಠಿ ಮೂಲಕ ಆರ್ಥಿಕ ಸಮೀಕ್ಷಾ ವರದಿಯನ್ನು ಸಾರ್ವಜನಿಕವಾಗಿ ಬಹಿರಂಗಪಡಿಸಲಿದ್ದಾರೆ.

ಏನಿದು ಆರ್ಥಿಕ ಸಮೀಕ್ಷೆ?

ಆರ್ಥಿಕ ಸಮೀಕ್ಷೆ ಕೂಡ ಕೇಂದ್ರ ಬಜೆಟ್​ನಂತೆ ವಾರ್ಷಿಕ ಆರ್ಥಿಕ ಚಟುವಟಿಕೆಗಳಿಗೆ ಸಂಬಂಧಿಸಿದ ವಿವರಗಳ ದಾಖಲೆ. ಕೇಂದ್ರ ಹಣಕಾಸು ಸಚಿವಾಲಯದ ಅಧೀನದಲ್ಲಿರುವ ಆರ್ಥಿಕ ವ್ಯವಹಾರಗಳ ಇಲಾಖೆ ಇದನ್ನು ಸಿದ್ಧಪಡಿಸುತ್ತದೆ. ದೇಶದ ಮುಖ್ಯ ಆರ್ಥಿಕ ಸಲಹೆಗಾರರು ಆರ್ಥಿಕ ಸಮೀಕ್ಷೆ ತಯಾರಿಯ ಪ್ರಮುಖ ಜವಾಬ್ದಾರಿ ವಹಿಸಿರುತ್ತಾರೆ. ಬಜೆಟ್​ ಮಂಡನೆಗೂ ಮುನ್ನಾ ದಿನ ಇದನ್ನು ಸಂಸತ್​ನ ಉಭಯ ಸದನಗಳಲ್ಲಿ ಮಂಡನೆ ಮಾಡಲಾಗುತ್ತದೆ. ಪ್ರಸಕ್ತ ಹಣಕಾಸು ವರ್ಷದಲ್ಲಿ ದೇಶದ ಆರ್ಥಿಕ ಚಟುವಟಿಕೆಗಳಿಗೆ ಸಂಬಂಧಿಸಿದ ಸಂಪೂರ್ಣ ವಿವರಗಳನ್ನು ಆರ್ಥಿಕ ಸಮೀಕ್ಷೆ ಒಳಗೊಂಡಿರುತ್ತದೆ.

ಇದನ್ನೂ ಓದಿ: Economic Survey; ಏನಿದು ಆರ್ಥಿಕ ಸಮೀಕ್ಷೆ, ಇದರ ಮಂಡನೆ ಹಿಂದಿನ ಮರ್ಮವೇನು? ಇಲ್ಲಿದೆ ವಿವರ

ಆರ್ಥಿಕ ಸಮೀಕ್ಷೆಯ ನೇರ ಪ್ರಸಾರ ಎಲ್ಲಿ ವೀಕ್ಷಿಸಬಹುದು?

ಕೇಂದ್ರ ಸರ್ಕಾರದ ಅಧಿಕೃತ ಚಾನೆಲ್​ಗಳಾದ ಸಂಸದ್​ ಟಿವಿ ಮೂಲಕ ಆರ್ಥಿಕ ಸಮೀಕ್ಷೆಯ ನೇರ ಪ್ರಸಾರ ನೋಡಬಹುದು. ಪಿಐಬಿ ಇಂಡಿಯಾ ಕೂಡ ಲೈವ್​ಸ್ಟ್ರೀಮ್ ಮಾಡಲಿದೆ. ಪಿಐಬಿ ಯೂಟ್ಯೂಬ್​ ಲಿಂಕ್​​ ಹೀಗಿದೆ (https://www.youtube.com/@pibindia/videos). ಹಣಕಾಸು ಸಚಿವಾಲಯದ ಫೇಸ್​ಬುಕ್ ಪುಟದಲ್ಲಿಯೂ (https://www.facebook.com/finmin.goi) ನೇರ ಪ್ರಸಾರ ವೀಕ್ಷಿಸಬಹುದು. ಟ್ವಿಟರ್​​ನಲ್ಲಿಯೂ (https://twitter.com/FinMinIndia) ಲೈವ್ ಅಪ್​ಡೇಟ್ಸ್ ದೊರೆಯಲಿದೆ. ಆರ್ಥಿಕ ಸಮೀಕ್ಷೆ ಮಂಡನೆಯಾದ ಬಳಿಕ ಅದರ ಪ್ರತಿಯನ್ನು (https://www.indiabudget.gov.in/economicsurvey) ಈ ಲಿಂಕ್​ ಮೂಲಕ ಡೌನ್​ಲೋಡ್ ಮಾಡಿಕೊಳ್ಳಲೂ ಅವಕಾಶವಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿ ಓದಲು ಇಲ್ಲಿ ಕ್ಲಿಕ್ ಮಾಡಿ

Published On - 12:03 pm, Mon, 30 January 23