International Consumer Day: ಇನ್ಷೂರೆನ್ಸ್ ಕ್ಲೈಮ್ಗೆ ಆಸ್ಪತ್ರೆಗೆ ದಾಖಲಾಗಲೇಬೇಕಾ? ಗ್ರಾಹಕರ ವೇದಿಕೆ ಕೊಟ್ಟ ತೀರ್ಪಿದು
Health Insurance Important Update: ಇನ್ಷೂರೆನ್ಸ್ ಹಣ ಪಡೆಯಲು ಆಸ್ಪತ್ರೆಗೆ ದಾಖಲಾಗಲೇಬೇಕು ಎಂದೇನಿಲ್ಲ. ವಡೋದರಾದ ಗ್ರಾಹಕರ ವೇದಿಕೆಯೊಂದು ಈ ನಿಟ್ಟಿನಲ್ಲಿ ವಿಮಾ ಗ್ರಾಹಕರ ಮೊಗದಲ್ಲಿ ಖುಷಿಕೊಡುವಂತಹ ತೀರ್ಪು ನೀಡಿದೆ.
Updated on: Mar 15, 2023 | 12:55 PM
ನವದೆಹಲಿ: ಸಾಮಾನ್ಯವಾಗಿ ಇನ್ಷೂರೆನ್ಸ್ ಕಂಪನಿಗಳು (Insurance Companies) ತಮ್ಮ ಗ್ರಾಹಕರು ಆಸ್ಪತ್ರೆಗೆ ದಾಖಲಾದರೆ ಮಾತ್ರ ವಿಮೆ ಸೇವೆ ಒದಗಿಸುತ್ತವೆ. ಈಗೀಗ ಕೆಲವೊಂದು ಸ್ಕೀಮ್ಗಳು ಆಸ್ಪತ್ರೆಗೆ ದಾಖಲಾಗದೇ ಪಡೆಯಲಾಗುವ ವೈದ್ಯಕೀಯ ಚಿಕಿತ್ಸೆಗೆ ವಿಮೆ ಒದಗಿಸುತ್ತವೆ. ಆದರೂ ಕೂಡ ಬಹುತೇಕ ಪ್ರಕರಣಗಳಲ್ಲಿ ವಿಮೆ ಕ್ಲೈಮ್ ಮಾಡಲು ಆಸ್ಪತ್ರೆಗೆ ದಾಖಲಾಗುವುದು (Hospitalization) ಕಡ್ಡಾಯ ಇದೆ. ವಿಮಾ ಕಂಪನಿಗಳ ಈ ಧೋರಣೆ ಅಥವಾ ನೀತಿ ಬಗ್ಗೆ ಬಹಳ ಮಂದಿ ಗ್ರಾಹಕರು ಹತಾಶಗೊಳ್ಳುವುದು ಹೌದು. ಇವರಿಗೆ ಗ್ರಾಹಕರ ವೇದಿಕೆಯಲ್ಲಿ (Consumer Forums) ನ್ಯಾಯ ಸಿಗುತ್ತದೆ. ಗ್ರಾಹಕರ ವೇದಿಕೆಯೊಂದರಲ್ಲಿ ಇಂಥದ್ದೊಂದು ಪ್ರಕರಣ ಬಂದಿದ್ದು, ಇನ್ಷೂರೆನ್ಸ್ ಕಂಪನಿಗೆ ಚಳಿ ಬಿಡಿಸಲಾಗಿದೆ. ಗುಜರಾತ್ ರಾಜ್ಯದ ವಡೋದರಾ ಕನ್ಸೂಮರ್ ಫೋರಂ ಇಂಥ ಒಂದು ವ್ಯಾಜ್ಯಕ್ಕೆ ನ್ಯಾಯ ಒದಗಿಸಿದೆ. ವಡೋದರಾ ನಿವಾಸಿ ರಮೇಶ್ ಚಂದ್ರ ಜೋಷಿ ಅವರಿಗೆ ಚಿಕಿತ್ಸಾ ವೆಚ್ಚ ಭರಿಸುವಂತೆ ನ್ಯಾಷನಲ್ ಇನ್ಷೂರೆನ್ಸ್ ಕಂಪನಿಗೆ ಆದೇಶಿಸಿದೆ.
2017, ಆಗಸ್ಟ್ ತಿಂಗಳಲ್ಲಿ ರಮೇಶ್ ಚಂದ್ರ ಜೋಷಿ ನ್ಯಾಷನಲ್ ಇನ್ಷೂರೆನ್ಸ್ ಕಂಪನಿ ತನ್ನ ಕ್ಲೈಮ್ ತಿರಸ್ಕರಿಸಿದೆ ಎಂದು ದೂರು ಕೊಟ್ಟಿದ್ದರು. ಈ ಬಗ್ಗೆ ವಿಚಾರಣೆ ನಡೆಸಿದ ಗ್ರಾಹಕರ ವೇದಿಕೆ, ವಿಮಾ ಕಂಪನಿಯ ಧೋರಣೆಯನ್ನು ತರಾಟೆಗೆ ತೆಗೆದುಕೊಂಡಿತು.
ಇವತ್ತಿನ ಕಾಲಘಟ್ಟದಲ್ಲಿ ಹೊಸ ರೀತಿಯ ಚಿಕಿತ್ಸೆಗಳು ಲಭ್ಯ ಇವೆ. ಹೆಚ್ಚು ಪರಿಣಾಮಕಾರಿ ಔಷಧಗಳನ್ನು ತಯಾರಿಸಲಾಗುತ್ತಿದೆ. ಅನೇಕ ಸಂದರ್ಭಗಳಲ್ಲಿ ರೋಗಿಗಳಿಗೆ ಬಹಳ ಕ್ಷಿಪ್ರವಾಗಿ ಚಿಕಿತ್ಸೆ ಕೊಡಲಾಗುತ್ತದೆ. ಆಸ್ಪತ್ರೆಗೆ ದಾಖಲಾಗುವ ಅವಶ್ಯಕತೆ ಬರುವುದಿಲ್ಲ ಎಂದು ವಡೋದರಾದ ಗ್ರಾಹಕರ ವೇದಿಕೆ ಅಭಿಪ್ರಾಯಪಟ್ಟಿದೆ. ನಂತರ ರಮೇಶ್ ಚಂದ್ರ ಜೋಷಿ ಅವರ ಚಿಕಿತ್ಸಾ ವೆಚ್ಚವನ್ನು ಭರಿಸುವಂತೆ ವಿಮಾ ಸಂಸ್ಥೆಗೆ ಆದೇಶಿಸಿತು.
ಹೆಲ್ತ್ ಇನ್ಷೂರೆನ್ಸ್ ಕ್ಲೈಮ್ ಮಾಡುವುದು ಹೇಗೆ?
ವೈದ್ಯಕೀಯ ಇನ್ಷೂರೆನ್ಸ್ ಅನ್ನು ನೀವು ಹೊಂದಿದ್ದರೆ ಎರಡು ರೀತಿಯಲ್ಲಿ ವಿಮಾ ಸೌಲಭ್ಯ ಪಡೆಯಬಹುದು. ಕ್ಯಾಷ್ಲೆಸ್ ಸೌಲಭ್ಯ ಬಳಸಬಹುದು. ಇದರಲ್ಲಿ ಆಸ್ಪತ್ರೆಗೆ ದಾಖಲಾಗಬೇಕಾಗುತ್ತದೆ. ನೊಂದಣಿ ಮತ್ತು ಕೆಲ ಸರ್ಜಿಕಲ್ ವಸ್ತುಗಳ ವೆಚ್ಚ ಬಿಟ್ಟು ಬಹುತೇಕ ಉಳಿದವಕ್ಕೆ ರೋಗಿ ಹಣ ನೀಡುವ ಅವಶ್ಯಕತೆ ಇರುವುದಿಲ್ಲ. ಇನ್ಷೂರೆನ್ಸ್ ಕಾರ್ಡ್ ತೋರಿಸಿದರೆ ಸಾಕು, ಆಸ್ಪತ್ರೆಯವರು ಇನ್ಷೂರೆನ್ಸ್ ಕಂಪನಿಯನ್ನು ಸಂಪರ್ಕಿಸಿ ನಿಮಗೆ ಕ್ಯಾಷ್ಲೆಸ್ ಚಿಕಿತ್ಸಾ ಸೌಲಭ್ಯ ಒದಗಿಸುತ್ತಾರೆ.
ಆಸ್ಪತ್ರೆಯಲ್ಲಿ ಕ್ಯಾಷ್ಲೆಸ್ ಇಲ್ಲದಿದ್ದರೆ ವಿವಿಧ ದಾಖಲೆಗಳನ್ನು ನೀಡಬೇಕಾಗುತ್ತದೆ. ಇದು ಆಸ್ಪತ್ರೆಯಿಂದ ಡಿಸ್ಚಾರ್ಜ್ ಆದ ಬಳಿಕ ಅಗತ್ಯ ದಾಖಲೆಗಳನ್ನು ಇನ್ಷೂರೆನ್ಸ್ ಕಂಪನಿಗೆ ಸಲ್ಲಿಸಬೇಕು. ಯಾವ್ಯಾವ ದಾಖಲೆಗಳು ಎಂಬುದು ಇಲ್ಲಿ ಕೆಳಗಿವೆ:
- ಇನ್ಷೂರೆನ್ಸ್ ಕಾರ್ಡ್
- ಕ್ಲೈಮ್ ಫಾರ್ಮ್
- ವೈದ್ಯರ ಪ್ರಿಸ್ಕ್ರಿಪ್ಷನ್ಸ್
- ವೈದ್ಯಕೀಯ ತಪಾಸಣಾ ದಾಖಲೆಗಳು
- ಹಣ ಪಾವತಿಸಿದ ರಸೀದಿ ಸೇರಿದಂತೆ ಆಸ್ಪತ್ರೆ ಬಿಲ್ಗಳು
- ಔಷಧದ ರಸೀದಿಗಳು
- ಡಿಸ್ಚಾರ್ಜ್ ಸಮ್ಮರಿ
ಈ ಎಲ್ಲಾ ದಾಖಲೆಗಳನ್ನು ಆಸ್ಪತ್ರೆಯವರೇ ನಿಮಗೆ ಜೋಡಿಸಿ ಕೊಡುತ್ತಾರೆ. ಅವುಗಳನ್ನು ಸ್ಕ್ಯಾನ್ ಮಾಡಿ ಆನ್ಲೈನ್ನಲ್ಲೇ ಸಲ್ಲಿಸುವ ಅವಕಾಶ ಇರುತ್ತದೆ. ಹಾಗೆಯೇ, ಆ ಎಲ್ಲಾ ದಾಖಲೆಗಳ ಜೆರಾಕ್ಸ್ ಮಾಡಿಸಿ ನಿಮ್ಮಲ್ಲಿ ಇಟ್ಟುಕೊಳ್ಳಬೇಕು. ಮೂಲ ಪ್ರತಿಗಳನ್ನು ಕೊರಿಯರ್ ಮೂಲಕ ಇನ್ಷೂರೆನ್ಸ್ ಕಂಪನಿ ನಿಗದಿಪಡಿಸಿದ ಏಜೆನ್ಸಿಯ ಕಚೇರಿಗೆ ಪೋಸ್ಟ್ ಮೂಲಕ ಕಳುಹಿಸಬೇಕು. ನಿಮ್ಮ ಕ್ಲೈಮ್ ಅರ್ಜಿಯಲ್ಲಿ ಬ್ಯಾಂಕ್ ಖಾತೆ ನಂಬರ್, ಪಾನ್ ನಂಬರ್ ಇತ್ಯಾದಿಯನ್ನು ನಮೂದಿಸಬೇಕಾಗುತ್ತದೆ. ನಿಮ್ಮ ಕ್ಲೈಮ್ ಹಣ ಸಂದಾಯವಾಗಲು 15ದಿನದಿಂದ ಕೆಲ ತಿಂಗಳೇ ಆಗಬಹುದು.
