Adani Group: ಅದಾನಿ ಸಮೂಹ ಕಂಪೆನಿಯ ವಿದೇಶೀ ಫಂಡ್​ಗಳ ಖಾತೆ ನಿರ್ಬಂಧಿಸಿಲ್ಲ ಎಂದ ಎನ್​ಎಸ್​ಡಿಎಲ್

ಅದಾನಿ ಸಮೂಹ ಕಂಪೆನಿಯ ದೊಡ್ಡ ಪ್ರಮಾಣದ ಷೇರು ಪಾಲುದಾರ ಮೂರು ವಿದೇಶಿ ಫಂಡ್​ಗಳ ಖಾತೆಯನ್ನು ನಿರ್ಬಂಧಿಸಿಲ್ಲ ಎಂದು ನ್ಯಾಷನಲ್ ಸೆಕ್ಯೂರಿಟೀಸ್ ಡೆಪಾಸಿಟರಿ ಲಿಮಿಟಿಡ್ (ಎನ್​ಎಸ್​ಡಿಎಲ್​) ಹಿರಿಯ ಅಧಿಕಾರಿಗಳು ಅದಾನಿ ಸಮೂಹ ಕಂಪೆನಿಗಳಿಗೆ ತಿಳಿಸಿದ್ದಾರೆ. “ನಿಮ್ಮ ಇಮೇಲ್ ಖಾತೆಯಲ್ಲಿ ತಿಳಿಸಿರುವ ಡಿಮ್ಯಾಟ್​ ಖಾತೆಗಳ ಸ್ಥಿತಿ ಎನ್​ಎಸ್​ಡಿಎಲ್​ ಸಿಸ್ಟಮ್​ನಲ್ಲಿ ಸಕ್ರಿಯವಾಗಿವೆ,” ಎಂದು ಎನ್​ಎಸ್​ಡಿಎಲ್ ಉಪಾಧ್ಯಕ್ಷ ರಾಕೇಶ್ ಮೆಹ್ತಾ ಅವರು ಅದಾನಿ ಅಧಿಕಾರಿಗಳಿಗೆ ಹೇಳಿದ್ದಾರೆ. ಮೆಹ್ತಾ ಅವರು ನಿರ್ದಿಷ್ಟವಾಗಿ ಅಲ್ಬುಲಾ ಇನ್​ವೆಸ್ಟ್​ಮೆಂಟ್ ಫಂಡ್, ಕ್ರೆಸ್ಟಾ ಫಂಡ್ ಮತ್ತು ಎಪಿಎಂಎಸ್​ ಇನ್​ವೆಸ್ಟ್​ಮೆಂಟ್​ ಫಂಡ್​ಗೆ ಸಂಬಂಧಿಸಿದಂತೆಯೇ ಖಾತೆಯ ಕುರಿತು ತಿಳಿಸಿದ್ದಾರೆ. ಈ ಮೂರೂ ಫಂಡ್​ಗಳು ಸೇರಿ ಅದಾನಿ ಎಂಟರ್​ಪ್ರೈಸಸ್, ಅದಾನಿ ಗ್ರೀನ್ ಎನರ್ಜಿ, ಅದಾನಿ ಟ್ರಾನ್ಸ್​ಮಿಷನ್ ಮತ್ತು ಅದಾನಿ ಟೋಟಲ್ ಗ್ಯಾಸ್ ಇವೆಲ್ಲವೂ ಸೇರಿ ರೂ. 43,500 ಕೋಟಿಗೂ ಹೆಚ್ಚು ಮೌಲ್ಯದ ಷೇರು ಹೊಂದಿದೆ.

ಮನಿಕಂಟ್ರೋಲ್​ನಿಂದ ಮೇಲ್​ಗಳ ವಿನಿಮಯವನ್ನು ಪರಿಶೀಲಿಸಲಾಗಿದೆ ಎನ್ನಲಾಗಿದೆ. ಎನ್​ಎಸ್​ಡಿಎಲ್​ ವೆಬ್​ಸೈಟ್​ನಲ್ಲಿ ಈಗಲೂ ಈ ಮೂರು ವಿದೇಶೀ ಪೋರ್ಟ್​ಫೋಲಿಯೋ ಇನ್ವೆಸ್ಟರ್ಸ್ (ಎಫ್​ಪಿಐ) ಖಾತೆಗಳು ಸ್ಥಗಿತವಾಗಿವೆ ಅಂತಲೇ ತೋರಿಸುತ್ತಿದೆ. ಆದರೆ ಈಗ ಹಳೇ ಪ್ರಕರಣಗಳಿಗೆ ಸಂಬಂಧಿಸಿದಂತೆ ಕ್ರಮವನ್ನು ಕೈಗೊಳ್ಳಲಾಗಿದೆ, ಎಂದು ಹೆಸರು ಹೇಳಲು ಇಚ್ಛಿಸದ ಎನ್​ಎಸ್​ಡಿಎಲ್ ಅಧಿಕಾರಿಗಳು ಮನಿಕಂಟ್ರೋಲ್​ಗೆ ಮಾಹಿತಿ ನೀಡಿದ್ದಾರೆ. ಎನ್​ಎಸ್​ಡಿಎಲ್​ನ ಅಧಿಕಾರಿಗಳ ಹೇಳಿಕೆಯನ್ನೇ ಉದಾಹರಿಸಿ, ರಾಯಿಟರ್ಸ್ ಸುದ್ದಿ ಸಂಸ್ಥೆ ಕೂಡ ವರದಿ ಮಾಡಿದೆ. ಎನ್​ಎಸ್​ಡಿಎಲ್​ನಿಂದ ಯಾವುದೇ ಕ್ರಮ ಕೈಗೊಳ್ಳಿಲ್ಲ ಎಂದು ಮೂಲಗಳು ರಾಯಿಟರ್ಸ್​ಗೆ ತಿಳಿಸಿವೆ.

ಮಾರುಕಟ್ಟೆ ತಜ್ಞರು ಹೇಳುವ ಪ್ರಕಾರ, ನಿಯಂತ್ರಕರು ಅಥವಾ ಡೆಪಾಸಿಟರಿಯಿಂದ ಕೆಲವು ಸಂಸ್ಥೆಗಳ ಖಾತೆಯನ್ನು ಸ್ಥಗಿತಗೊಳಿಸುವುದು ಅಂದರೆ ಭಾರತೀಯ ಮಾರುಕಟ್ಟೆಯಲ್ಲಿ ಎಲ್ಲ ಷೇರುಗಳು ಅಥವಾ ವಹಿವಾಟುಗಳನ್ನು ಅಮಾನತು ಅಥವಾ ಸ್ಥಗಿತ ಮಾಡಿದಂತೆ ಅಲ್ಲ. ವಿವಿಧ ಬ್ರೋಕರೇಜ್​ಗಳನ್ನು ವ್ಯವಹಾರ ಮಾಡದಂತೆ ನಿರ್ಬಂಧಿಸಿದರೂ ಮತ್ತು ಹೊಸ ಗ್ರಾಹಕರನ್ನು ಸೇರ್ಪಡೆ ಮಾಡಿಕೊಳ್ಳುವುದನ್ನು ನಿರ್ಬಂಧಿಸಿದ್ದರೂ ಈಗಾಗಲೇ ಇರುವ ಗ್ರಾಹಕರಿದ್ದರೂ ವ್ಯವಹಾರ ನಡೆಸುವುದಕ್ಕೆ ಬ್ರೋಕಿಂಗ್ ಪ್ಲಾಟ್​ಫಾರ್ಮ್​ ಬಳಸಬಹುದಾಗಿರುತ್ತದೆ. ಇನ್ನೂ ಮುಂದುವರಿದು ಹೇಳಬೇಕು ಅಂದರೆ, ನಿಯಮ ಉಲ್ಲಂಘಿಸಿದವರ ವಿರುದ್ಧ ಕ್ರಮ ತೆಗೆದುಕೊಳ್ಳುವಾಗ ನಿಯಂತ್ರಕರು ನಿರ್ಬಂಧ ಹೇರುವ ಮುನ್ನ ಷೇರು ಮಾರಾಟಕ್ಕೆ ಅವಕಾಶ ನೀಡುತ್ತಾರೆ. ಆದರೆ ಹೊಸ ಖರೀದಿಗೆ ಅವಕಾಶ ನೀಡಲ್ಲ.

ಷೇರುದಾರರ ಡಿಮ್ಯಾಟ್​ ಖಾತೆಯನ್ನು ನಿರ್ಬಂಧಿಸುವುದಕ್ಕೆ ಸೆಬಿಯಿಂದ ಸೆಬಿ ಕಾಯ್ದೆ 1992, ಸೆಕ್ಷನ್ 11 ಮತ್ತು 11Bಯಲ್ಲಿ ಅವಕಾಶ ಇದೆ. ಆದರೆ ಆ ಎರಡೂ ಸಂದರ್ಭದಲ್ಲಿ ನಿಯಂತ್ರಕರಿಂದ ಸಾರ್ವಜನಿಕ ಆದೇಶವನ್ನು ನೀಡಬೇಕು. ಸೆಬಿಯ ಸ್ವತಂತ್ರ ನಿರ್ದೇಶನಗಳು ಅಥವಾ ಸರ್ಕಾರ ಅಥವಾ ಕೋರ್ಟ್ ಆದೇಶ, ಡೆಪಾಸಿಟರಿಗಳು ತಾವಾಗಿಯೇ ಷೇರುದಾರರ ಷೇರುಗಳನ್ನು ಸ್ಥಗಿತ ಮಾಡುವುದಕ್ಕೆ ಸಾಧ್ಯವಿಲ್ಲ. ಒಂದೋ ಡೆಪಾಸಿಟರಿ ಪಾರ್ಟಿಸಿಪೆಂಟ್​ನಿಂದ ಸ್ವಯಂಪ್ರೇರಿತವಾಗಿ ಅಥವಾ ಸಾರ್ವಜನಿಕ ಆದೇಶ ಲಭ್ಯ ಇಲ್ಲದಿದ್ದಾಗ ಗ್ರಾಹಕರಿಂದ ಮನವಿ ಬಂದು ಅದರ ಮೇಲೆ ಕ್ರಮ ಕೈಗೊಳ್ಳಬೇಕು.

ಎನ್​ಎಸ್​ಡಿಎಲ್​ನಿಂದ ಅದಾನಿ ಸಮೂಹದ ಪ್ರಮುಖ ವಿದೇಶೀ ಹೂಡಿಕೆದಾರರ ಡಿಮ್ಯಾಟ್​ ಖಾತೆ ನಿರ್ಬಂಧಿಸಲಾಗಿ ಎಂದು ಸುದ್ದಿಯಾಗಿ, ಜೂನ್ 14ನೇ ತಾರೀಕಿನ ಸೋಮವಾರ ಬಿಎಸ್​ಇ ಸೆನ್ಸೆಕ್ಸ್​ನಲ್ಲಿ ಅದಾನಿ ಸಮೂಹದ ಕಂಪೆನಿಗಳಿಗೆ ಭಾರೀ ಹೊಡೆತ ಬಿತ್ತು. ಅದಾನಿ ಪೋರ್ಟ್ಸ್ ಶೇ 8.36ರಷ್ಟು, ಅದಾನಿ ಪವರ್ ಶೇ 4.99 ಸೇರಿ ಇತರ ಷೇರುಗಳು ಭಾರೀ ಇಳಿಕೆ ಕಂಡವು.

ಇದನ್ನೂ ಓದಿ: Adani group: ಎಫ್​ಪಿಐ ಫಂಡ್​ ಹೂಡಿಕೆದಾರರ ಖಾತೆಗೆ ನಿರ್ಬಂಧ ವಿಧಿಸಿರುವ ವರದಿ ನಿರಾಕರಿಸಿದ ಅದಾನಿ ಸಮೂಹ

ಇದನ್ನೂ ಓದಿ: ಷೇರುಪೇಟೆಯಲ್ಲಿ ಪತರಗುಟ್ಟಿದ ಅದಾನಿ ಕಂಪನಿಯ ಷೇರು ಬೆಲೆ; ಮೂರು ಗಂಟೆಯಲ್ಲಿ 92 ಸಾವಿರ ಕೋಟಿ ರೂ ಗಂಟು ನಷ್ಟ

ಇದನ್ನೂ ಓದಿ: Gautam Adani: 2021ರಲ್ಲಿ 3 ಲಕ್ಷ ಕೋಟಿ ರೂ.ಗೂ ಹೆಚ್ಚಾಯಿತು ಅದಾನಿ ಆಸ್ತಿ; ಇದು ಅಪಾಯದ ಅದೃಷ್ಟ ಎನ್ನುತ್ತಾರೆ ವಿಶ್ಲೇಷಕರು

(NSDL clarified that, it has not frozen any foreign funds accounts which are invested in Adani group companies)