Aadhaar-PAN Link: ಈ ವ್ಯಕ್ತಿಗಳಿಗೆ ಆಧಾರ್-ಪಾನ್ ನಂಬರ್ ಲಿಂಕ್ ಬೇಕಾಗಿಲ್ಲ; ಯಾರಿಗೆಲ್ಲಾ ಇದೆ ವಿನಾಯಿತಿ? ಇಲ್ಲಿದೆ ವಿವರ
Exemption In Linking Aadhaar and PAN: ಕೆಲ ರಾಜ್ಯಗಳ ನಿವಾಸಿಗಳು ಸೇರಿದಂತೆ ಹಲವರಿಗೆ ಆಧಾರ್ ನಂಬರ್ ಮತ್ತು ಪಾನ್ ನಂಬರ್ ಲಿಂಕ್ ಮಾಡುವುದರಿಂದ ವಿನಾಯಿತಿ ಇದೆ. ಕೇಂದ್ರ ಹಣಕಾಸು ಸಚಿವಾಲಯ ಹೊರಡಿಸಿರುವ ನೋಟಿಫಿಕೇಶನ್ನ ವಿವರ ನೋಡಿ...
Updated on:Mar 10, 2023 | 6:33 PM
ಆಧಾರ್ ಜೊತೆ ಪಾನ್ ನಂಬರ್ ಜೋಡಿಸಬೇಕೆಂದು (Aadhaar PAN Linking) ಪ್ರತಿಯೊಬ್ಬರಿಗೂ ಸರ್ಕಾರ ಮನವಿ ಮಾಡುತ್ತಲೇ ಇದೆ. ಹಲವು ಬಾರಿ ಡೆಡ್ಲೈನ್ ವಿಸ್ತರಿಸುತ್ತಾ ಬಂದಿದೆ. ಇದೀಗ ಮಾರ್ಚ್ 31ಕ್ಕೆ ಅಂತಿಮ ಗಡುವು ನೀಡಲಾಗಿದೆ. ಇದೇ ವೇಳೆ ಕೆಲವರಿಗೆ ಮಾತ್ರ ಆಧಾರ್ ಮತ್ತು ಪಾನ್ ಜೋಡಣೆಯಿಂದ ವಿನಾಯಿತಿ (Exemption To Link Aadhaar with PAN) ನೀಡಲಾಗಿದೆ. ಇವರನ್ನು ಹೊರತುಪಡಿಸಿ ಉಳಿದವರೆಲ್ಲರೂ ಆಧಾರ್ ಪಾನ್ ಲಿಂಕ್ ಮಾಡುವುದು ಕಡ್ಡಾಯವಾಗಿದೆ.
1961ರ ಆದಾಯ ತೆರಿಗೆ ಕಾಯ್ದೆ (IT Act) ಪ್ರಕಾರ, ವಿನಾಯಿತಿ ವಿಭಾಗಕ್ಕೆ ಬಾರದ ಎಲ್ಲಾ ಪಾನ್ ಕಾರ್ಡ್ದಾರರು ತಮ್ಮ ಪಾನ್ ಮತ್ತು ಆಧಾರ್ ಅನ್ನು 2023 ಮಾರ್ಚ್ 31ರ ಒಳಗೆ ಲಿಂಕ್ ಮಾಡುವುದು ಕಡ್ಡಾಯವಾಗಿದೆ. ಲಿಂಕ್ ಆಗದ ಪಾನ್ ನಂಬರ್ಗಳು ಏಪ್ರಿಲ್ 1ರಿಂದ ನಿಷ್ಕ್ರಿಯಗೊಳ್ಳುತ್ತವೆ ಎಂದು ಆದಾಯ ತೆರಿಗೆ ಇಲಾಖೆ ಇತ್ತೀಚೆಗೆ ಟ್ವೀಟ್ ಮಾಡಿತ್ತು.
ಹಾಗಾದರೆ, ವಿನಾಯಿತಿ ವಿಭಾಗ ಅಥವಾ ಎಕ್ಸೆಂಪ್ಟ್ ಕೆಟಗರಿಯಲ್ಲಿರುವವರು ಯಾರು? 2017ರ ಮೇ ತಿಂಗಳಲ್ಲಿ ಕೇಂದ್ರ ಹಣಕಾಸು ಸಚಿವಾಲಯ ಈ ಬಗ್ಗೆ ಹೊರಡಿಸಿದ ಅಧಿಸೂಚನೆಯಲ್ಲಿ ಮಾಹಿತಿ ಇದೆ.
ಇದನ್ನೂ ಓದಿ: NBFC: ಶ್ರೀರಾಮ್ ಕ್ಯಾಪಿಟಲ್ ಸೇರಿದಂತೆ 17 ಎನ್ಬಿಎಫ್ಸಿಗಳ ಲೈಸೆನ್ಸ್ ರದ್ದು; ಇಲ್ಲಿದೆ ಪಟ್ಟಿ
ಪಾನ್–ಆಧಾರ್ ಜೋಡಣೆಯಿಂದ ವಿನಾಯಿತಿ ಇರುವವರು:
- ಅಸ್ಸಾಂ, ಮೇಘಾಲಯ ಮತ್ತು ಜಮ್ಮು ಕಾಶ್ಮೀರ ರಾಜ್ಯಗಳಲ್ಲಿ ವಾಸಿಸುತ್ತಿರುವವರು
- 1961ರ ಆದಾಯ ತೆರಿಗೆ ಕಾಯ್ದೆ ಪ್ರಕಾರ ಅನಿವಾಸಿಗಳು
- ಹಿಂದಿನ ವರ್ಷದಲ್ಲಿ 80 ಅಥವಾ ಅದಕ್ಕಿಂತ ಮೇಲ್ಪಟ್ಟ ವರ್ಷಗಳ ವಯೋವೃದ್ಧರು
- ಭಾರತೀಯ ನಾಗರಿಕರಲ್ಲದವರು
ಕುತೂಹಲವೆಂದರೆ ಈ ಮೇಲಿನ ಪಟ್ಟಿಯಲ್ಲಿರುವ ವ್ಯಕ್ತಿಗಳು ಸ್ವಯಂ ಇಚ್ಛೆಯಿಂದ ತಮ್ಮ ಪಾನ್ ನಂಬರ್ ಮತ್ತು ಆಧಾರ್ ನಂಬರ್ ಅನ್ನು ಲಿಂಕ್ ಮಾಡಬೇಕೆಂದರೆ ನಿರ್ದಿಷ್ಟ ಶುಲ್ಕ ಪಾವತಿಸಬೇಕಾಗುತ್ತದೆ.
ಇನ್ನು, ಆಧಾರ್ ಕಾರ್ಡ್ ಮತ್ತು ಪಾನ್ ನಂಬರ್ ಜೋಡಣೆಯಿಂದ ಕೊಡಲಾಗಿರುವ ವಿನಾಯಿತಿ ಸೌಲಭ್ಯವು ಖಾಯಂ ಅಲ್ಲ. ಸರ್ಕಾರ ಈ ಪಟ್ಟಿಯನ್ನು ಪರಿಷ್ಕರಿಸಬಹುದು, ಅಥವಾ ಪುನರಾವಲೋಕಿಸಬಹುದು.
ಇದನ್ನೂ ಓದಿ: ELSS: ತೆರಿಗೆ ಉಳಿಸಲು ಎಸ್ಐಪಿಗೆ ಹಣ ಹಾಕುತ್ತಿದ್ದೀರಾ? ಇಎಲ್ಎಸ್ಎಸ್ ಅಂಶದತ್ತ ಗಮನ ಇರಲಿ
ಪಾನ್ ಮತ್ತು ಆಧಾರ್ ಲಿಂಕ್ ಮಾಡುವುದು ಹೇಗೆ?
ಈಗ ಆಧಾರ್ ನಂಬರ್ ಮತ್ತು ಪಾನ್ ನಂಬರ್ ಲಿಂಕ್ ಮಾಡುವ ಕೆಲಸ ಬಹಳ ಸುಲಭವಾಗಿದೆ. ಆನ್ಲೈನ್ ಮೂಲಕವಾದರೂ ಮಾಡಬಹುದು, ಸಮೀಪದ ಆಧಾರ್ ಸೇವಾ ಕೇಂದ್ರಕ್ಕೆ ಹೋಗಿ ಆಫ್ಲೈನ್ ಮೂಲಕವಾದರೂ ಮಾಡಬಹುದು. ಅಥವಾ ಎಸ್ಸೆಮ್ಮೆಸ್ ಮೂಲಕ ಇನ್ನೂ ಆರಾಮವಾಗಿ ಈ ಜೋಡಣೆ ಮಾಡಬಹುದು.
ಆನ್ಲೈನ್ ಮೂಲಕ: ಇನ್ಕಂ ಟ್ಯಾಕ್ಸ್ ಇ ಫೈಲಿಂಗ್ ವೆಬ್ಸೈಟ್ಗೆ ಹೋಗಿ ಪಾನ್ ಮತ್ತು ಆಧಾರ್ ನಂಬರ್ ಅನ್ನು ಜೋಡಿಸಲು ಅವಕಾಶ ಇದೆ. ಅಥವಾ ಇನ್ಕಂ ಟ್ಯಾಕ್ಸ್ ಪೋರ್ಟಲ್ಗೆ ಹೋಗಿಯೂ ಮಾಡಬಹುದು. ಪೋರ್ಟಲ್ ಮುಖ್ಯಪುಟದ ಎಡಬದಿಯಲ್ಲಿರುವ ಕಾಲಂನಲ್ಲಿ ಲಿಂಕ್ ಆಧಾರ್ ಅನ್ನು ಕಾಣಬಹುದು. ಅದನ್ನು ಕ್ಲಿಕ್ ಮಾಡಿದರೆ ಪಾನ್ ನಂಬರ್ ಮತ್ತು ಆಧಾರ್ ನಂಬರ್ ಅನ್ನು ಭರ್ತಿ ಮಾಡಿ ಲಿಂಕ್ ಮಾಡಬಹುದು.
ಎಸ್ಸೆಮ್ಮೆಸ್: ಮೊಬೈಲ್ನಲ್ಲಿ ಎಸ್ಸೆಮ್ಮೆಸ್ ಕಳುಹಿಸುವ ಮೂಲಕವೂ ಪಾನ್ ಮತ್ತು ಆಧಾರ್ ಲಿಂಕ್ ಮಾಡಬಹುದು. ಮೆಸೇಜ್ನಲ್ಲಿ UIDPAN ಹಾಗು 12 ಅಂಕಿಗಳ ಆಧಾರ್ ನಂಬರ್ ಮತ್ತು 10 ಅಂಕಿಯ ಪಾನ್ ನಂಬರ್ ಅನ್ನು ಟೈಪಿಸಿ 567678 ಅಥವಾ 56161 ಸಂಖ್ಯೆಗೆ ಮೆಸೇಜ್ ಕಳುಹಿಸಬೇಕು. ಸಂದೇಶದ ಸ್ಯಾಂಪಲ್: UIDPAN <space> <12 digit Aadhaar number> <10 digit PAN>
ಆಫ್ಲೈನ್ ಮೂಲಕ: ಯಾವುದೇ ಪಾನ್ ಸರ್ವಿಸ್ ಸೆಂಟರ್ ಅಥವಾ ಆಧಾರ್ ಸೇವಾ ಕೇಂದ್ರಗಳಿಗೆ ಹೋಗಿಯೂ ನಾವು ಪಾನ್ ಮತ್ತು ಆಧಾರ್ ನಂಬರ್ಗಳನ್ನು ಲಿಂಕ್ ಮಾಡಬಹುದು.
ಗಡುವಿನೊಳಗೆ ಲಿಂಕ್ ಮಾಡದಿದ್ದರೆ ಏನಾಗುತ್ತದೆ?
ಆಧಾರ್ ಮತ್ತು ಪಾನ್ ನಂಬರ್ ಜೋಡಣೆಗೆ ಮಾರ್ಚ್ 31ಕ್ಕೆ ಅಂತಿಮ ವಾಯಿದೆ ಕೊಡಲಾಗಿದೆ. ಅಷ್ಟರೊಳಗೆ ಮಾಡದಿದ್ದರೆ ಪಾನ್ ನಂಬರ್ ನಿಷ್ಕ್ರಿಯಗೊಳ್ಳುತ್ತದೆ. ಆ ದಿನಾಂಕದ ಬಳಿಕ ನೀವು ಲಿಂಕ್ ಮಾಡಬಹುದಾದರೂ ಅದಕ್ಕೆ ದೊಡ್ಡ ಮೊತ್ತದ ಶುಲ್ಕ ಪಾವತಿಸಬೇಕಾಗುತ್ತದೆ. ಒಂದು ವೇಳೆ ನಿಷ್ಕ್ರಿಯಗೊಂಡಿರುವ ಪಾನ್ ನಂಬರ್ ಅನ್ನು ನೀವು ಯಾವುದಾದರೂ ವಹಿವಾಟಿನಲ್ಲಿ ಬಳಕೆ ಮಾಡಿದರೆ 10 ಸಾವಿರ ರೂ ದಂಡ ಕಟ್ಟಬೇಕಾಗುತ್ತದೆ. ಕೆಲ ಸಂದರ್ಭಗಳಲ್ಲಿ ಜೈಲು ಶಿಕ್ಷೆಯೂ ಆಗಬಹುದು.
ಇನ್ನಷ್ಟು ವ್ಯವಹಾರ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
Published On - 6:33 pm, Fri, 10 March 23
