Green FD: ಗ್ರೀನ್ ಫಿಕ್ಸೆಡ್ ಡೆಪಾಸಿಟ್; ಗ್ರಾಹಕರ ಹಣದಿಂದ ಯಾರಿಗೆ ಸಾಲ? ಬ್ಯಾಂಕುಗಳಿಂದ ಆರ್ಬಿಐಗೆ ಮಾಹಿತಿ ಕಡ್ಡಾಯ; ಇದೇನಿದು ಗ್ರೀನ್ ಎಫ್ಡಿ?
RBI New Rules On Green Fixed Deposits: ಬದಲಾದ ನಿಯಮದ ಪ್ರಕಾರ, ಗ್ರೀನ್ ಡೆಪಾಸಿಟ್ ಪ್ಲಾನ್ನಲ್ಲಿ ಗ್ರಾಹಕ ಇರಿಸುವ ಠೇವಣಿ ಹಣವನ್ನು ಬ್ಯಾಂಕುಗಳು ಎಲ್ಲಿ ಹೂಡಿಕೆ ಮಾಡುತ್ತವೆ ಎಂಬುದನ್ನು ಆರ್ಬಿಐಗೆ ತಿಳಿಸುವುದು ಕಡ್ಡಾಯಪಡಿಸಲಾಗಿದೆ.
Updated on: Jun 02, 2023 | 1:46 PM
ಗ್ರೀನ್ ಬಾಂಡ್ ಬಗ್ಗೆ ನೀವು ಕೇಳಿರಬಹುದು. ಈಗ ಗ್ರೀನ್ ಫಿಕ್ಸೆಡ್ ಡೆಪಾಸಿಟ್ ಸ್ಕೀಮ್ಗಳು (Green FD) ಗ್ರಾಹಕರನ್ನು ಕೈಬೀಸಿ ಕರೆಯುತ್ತಿವೆ. ಈ ಹಸಿರು ನಿಶ್ಚಿತ ಠೇವಣಿ ಯೋಜನೆ ಸಂಬಂಧ ಆರ್ಬಿಐ ಹೊಸ ನಿಯಮ ಮಾಡಿದ್ದು, ಜೂನ್ 1ರಿಂದ ಇದು ಚಾಲ್ತಿಗೆ ಬಂದಿದೆ. ಈ ಬದಲಾದ ನಿಯಮದ ಪ್ರಕಾರ, ಗ್ರೀನ್ ಡೆಪಾಸಿಟ್ ಪ್ಲಾನ್ನಲ್ಲಿ ಗ್ರಾಹಕ ಇರಿಸುವ ಠೇವಣಿ ಹಣವನ್ನು ಬ್ಯಾಂಕುಗಳು ಎಲ್ಲಿ ಹೂಡಿಕೆ ಮಾಡುತ್ತವೆ ಎಂಬುದನ್ನು ಆರ್ಬಿಐಗೆ ತಿಳಿಸುವುದು ಕಡ್ಡಾಯಪಡಿಸಲಾಗಿದೆ. ಪರಿಸರ ಕಾಳಜಿಯಿಂದ ಠೇವಣಿ ಇಡುವ ಗ್ರಾಹಕರ ಹೂಡಿಕೆ ನೈಜ ಉದ್ದೇಶಕ್ಕೆ ಬಳಕೆ ಆಗುವುದನ್ನು ಖಾತ್ರಿಪಡಿಸಲು ರಿಸರ್ವ್ ಬ್ಯಾಂಕ್ ಇಂತಹದ್ದೊಂದು ನಿಯಮ ರೂಪಿಸಿದೆ.
ಏನಿದು ಗ್ರೀನ್ ಡೆಪಾಸಿಟ್?
ಗ್ರೀನ್ ಡೆಪಾಸಿಟ್ನಲ್ಲಿ ಗ್ರಾಹಕರು ಇರಿಸುವ ಠೇವಣಿ ಹಣವನ್ನು ಪರಿಸರಸ್ನೇಹಿ ಯೋಜನೆಗಳಿಗೆ ಬಳಕೆ ಮಾಡಲಾಗುತ್ತದೆ. ಮರುಬಳಕೆ ಇಂಧನ ಯೋಜನೆ, ಎಲೆಕ್ಟ್ರಿಕ್ ವಾಹನ ತಯಾರಿಕೆ, ಕಸ ತ್ಯಾಜ್ಯ ನಿರ್ವಹಣೆ ಇತ್ಯಾದಿ ಯೋಜನೆಗಳಿಗೆ ಬ್ಯಾಂಕುಗಳು ಸಾಲ ಕೊಡಲು ಗ್ರೀನ್ ಡೆಪಾಸಿಟ್ ಹಣವನ್ನು ಬಳಸುತ್ತವೆ. ವಿಶ್ವಸಂಸ್ಥೆ ಸುಸ್ಥಿರ ಅಭಿವೃದ್ಧಿ ಗುರಿ (ಯುನೈಟೆಡ್ ನೇಷನ್ಸ್ ಸಸ್ಟೈನಬಲ್ ಡೆವಲಪ್ಮೆಂಟ್ ಗೋಲ್ಸ್) ಈಡೇರಿಸುವ ಯೋಜನೆಗಳಿಗೆ ಈ ಹಣ ವ್ಯಯವಾಗಬೇಕು. ಬೇರೆ ಯಾವ ಯೋಜನೆಗಳಿಗೂ ಗ್ರೀನ್ ಡೆಪಾಸಿಟ್ನ ಹಣವನ್ನು ಸಾಲವಾಗಿ ನೀಡುವಂತಿಲ್ಲ. ಗ್ರೀನ್ ಬಾಂಡ್ಗಳಂತೆಯೇ ಗ್ರೀನ್ ಡೆಪಾಸಿಟ್ಗಳೂ ಬಳಕೆಯ ಅಗುತ್ತವೆ.
ತಮ್ಮ ಹಣ ಪರಿಸರಸ್ನೇಹಿ ಕಾರ್ಯಗಳಿಗೆ ಸಹಾಯವಾಗಲಿ ಎಂಬ ಉದ್ದೇಶ ಇರುವವರು ಇಂಥ ಗ್ರೀನ್ ಸ್ಕೀಮ್ಗಳನ್ನು ಪಡೆದುಕೊಳ್ಳಬಹುದು. ಪರಿಸರಸ್ನೇಹಿ ಯೋಜನೆಗಳಿಗೆ ತಮ್ಮ ಕೈಲಾದ ಸಹಾಯ ಮಾಡಿದ ತೃಪ್ತಿ ಹೂಡಿಕೆದಾರರಿಗೆ ಸಿಗುತ್ತದೆ.
ಗ್ರೀನ್ ಡೆಪಾಸಿಟ್ ಸ್ಕೀಂಗೆ ಬಡ್ಡಿ ಎಷ್ಟು ಇತ್ಯಾದಿ ವಿವರ…
ಯೂನಿಯನ್ ಬ್ಯಾಂಕ್, ಡಿಬಿಎಸ್ ಬ್ಯಾಂಕ್, ಎಚ್ಎಸ್ಬಿಸಿ, ಎಚ್ಡಿಎಫ್ಸಿ ಬ್ಯಾಂಕ್, ಇಂಡಸ್ಇಂಡ್ ಬ್ಯಾಂಕ್, ಫೆಡರಲ್ ಬ್ಯಾಂಕ್ ಹೀಗೆ ಬಹುತೇಕ ಎಲ್ಲಾ ಪ್ರಮುಖ ಬ್ಯಾಂಕುಗಳಲ್ಲೂ ಗ್ರಾಹಕರು ಗ್ರೀನ್ ಫಿಕ್ಸೆಡ್ ಡೆಪಾಸಿಟ್ ಇಡಬಹುದು. ಇದಕ್ಕೆ ನೀಡಲಾಗುವ ಬಡ್ಡಿ ವಿವಿಧ ಬ್ಯಾಂಕುಗಳಲ್ಲಿ ವಿವಿಧ ದರಗಳಿವೆ.
ಇದನ್ನೂ ಓದಿ: UPI: ಪೇಟಿಎಂ, ಫೋನ್ಪೇ ಇತ್ಯಾದಿ ಬಳಸಿ ಜನರು ಮೇ ತಿಂಗಳಲ್ಲಿ ನಡೆಸಿದ ವಹಿವಾಟು 14 ಲಕ್ಷ ಕೋಟಿ ರೂ
ಎಚ್ಡಿಎಫ್ಸಿಯ ಗ್ರೀನ್ ಎಫ್ಡಿ ಸ್ಕೀಮ್ನಲ್ಲಿ 3 ವರ್ಷದಿಂದ 5 ವರ್ಷದವರೆಗಿನ ಅವಧಿಯ ಠೇವಣಿಗೆ ವರ್ಷಕ್ಕೆ ಶೇ. 7.3ರಷ್ಟು ಬಡ್ಡಿ ಕೊಡಲಾಗುತ್ತದೆ. ಹಿರಿಯ ನಾಗರಿಕರಿಗೆ ಶೇ. 0.25ರಷ್ಟು ಹೆಚ್ಚು ಬಡ್ಡಿ ಬರುತ್ತದೆ.
ಇನ್ನಷ್ಟು ಪರ್ಸನಲ್ ಫೈನಾನ್ಸ್ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
