Jeevan Utsav: ಎಲ್ಐಸಿಯಿಂದ ಇಂದು ಹೊಸ ಜೀವನ್ ಉತ್ಸವ್ ಪಾಲಿಸಿ ಬಿಡುಗಡೆ; ಇದರ ವಿಶೇಷತೆಗಳೇನು?
LIC Unveils New Plan: ಲೈಫ್ ಇನ್ಷೂರೆನ್ಸ್ ಕಾರ್ಪೊರೇಶನ್ ಸಂಸ್ಥೆ ನವೆಂಬರ್ 29, ಬುಧವಾರದಂದು ಜೀವನ್ ಉತ್ಸವ್ ಎಂಬ ಹೊಸ ಪಾಲಿಸಿ ಬಿಡುಗಡೆ ಮಾಡಿದೆ. ಇದರ ಕನಿಷ್ಠ ಪ್ರವೇಶ ವಯಸ್ಸು 8 ವರ್ಷ, ಗರಿಷ್ಠ ವಯಸ್ಸು 65 ವರ್ಷವಾಗಿದೆ. ಕನಿಷ್ಠ ಬೇಸಿಕ್ ಸಮ್ ಅಷ್ಯೂರ್ಡ್ 5 ಲಕ್ಷ ಇದ್ದು, 5ರಿಂದ 16 ವರ್ಷದವರೆಗೆ ಪ್ರೀಮಿಮಯ್ ಕಟ್ಟುವ ಅವಕಾಶ ಇದೆ.
ಮುಖ್ಯಾಂಶಗಳು
- ಲೈಫ್ ಇನ್ಷೂರೆನ್ಸ್ ಕಾರ್ಪೊರೇಶನ್ ಸಂಸ್ಥೆ ನವೆಂಬರ್ 29, ಬುಧವಾರದಂದು ಜೀವನ್ ಉತ್ಸವ್ ಎಂಬ ಹೊಸ ಪಾಲಿಸಿ ಬಿಡುಗಡೆ ಮಾಡಿದೆ.
- ಇದರ ಕನಿಷ್ಠ ಪ್ರವೇಶ ವಯಸ್ಸು 8 ವರ್ಷ, ಗರಿಷ್ಠ ವಯಸ್ಸು 65 ವರ್ಷವಾಗಿದೆ.
- ಕನಿಷ್ಠ ಬೇಸಿಕ್ ಸಮ್ ಅಷ್ಯೂರ್ಡ್ 5 ಲಕ್ಷ ಇದ್ದು, 5ರಿಂದ 16 ವರ್ಷದವರೆಗೆ ಪ್ರೀಮಿಮಯ್ ಕಟ್ಟುವ ಅವಕಾಶ ಇದೆ.
ನವದೆಹಲಿ, ನವೆಂಬರ್ 29: ದೇಶದ ಅತಿದೊಡ್ಡ ವಿಮಾ ಸಂಸ್ಥೆ ಎಲ್ಐಸಿ ಇದೀಗ ಹೊಸ ಪಾಲಿಸಿಯೊಂದನ್ನು (LIC new plan) ಅನಾವರಣಗೊಳಿಸಿದೆ. ಮುಂದಿನ ಕೆಲ ತಿಂಗಳಲ್ಲಿ ಎಲ್ಐಸಿಯಿಂದ ಇನ್ನೂ ಮೂರ್ನಾಲ್ಕು ಹೊಸ ಪಾಲಿಸಿಗಳು ಬಿಡುಗಡೆ ಆಗುವ ನಿರೀಕ್ಷೆ ಇದೆ. ಹೊಸ ಜೀವನ್ ಉತ್ಸವ್ ಪ್ಲಾನ್ (LIC Jeevan Utsav) ಅನ್ನು ನವೆಂಬರ್ 29, ಬುಧವಾರದಂದು ಬಿಡುಗಡೆ ಮಾಡಿರುವುದಾಗಿ ಎಲ್ಐಸಿ ಸಂಸ್ಥೆ ಬಿಎಸ್ಇಯಲ್ಲಿ ಸಲ್ಲಿಸಿರುವ ದಾಖಲೆಯಲ್ಲಿ (regulatory filing) ತಿಳಿಸಿದೆ.
ಎಲ್ಐಸಿ ಜೀವನ್ ಉತ್ಸವ್ ನಾನ್ ಲಿಂಕ್ಡ್, ನಾನ್ ಪಾರ್ಟಿಸಿಪೇಟಿಂಗ್ ಇನ್ಷೂರೆನ್ಸ್ ಪ್ಲಾನ್ ಆಗಿದೆ. ಅಂದರೆ, ಯಾವುದೇ ಈಕ್ವಿಟಿಗೆ ಜೋಡಣೆ ಆಗದ ಪ್ಲಾನ್. ಎಂಟು ವರ್ಷ ಮೇಲ್ಪಟ್ಟ ವ್ಯಕ್ತಿಗಳು ಈ ಪಾಲಿಸಿ ಪಡೆಯಬಹುದು. ಕನಿಷ್ಠ ಅಷ್ಯೂರ್ಡ್ ಮೊತ್ತ 5 ಲಕ್ಷ ರೂ ಇದೆ. ಮೆಚ್ಯೂರಿಟಿ ಬಳಿಕ ಈ ಕನಿಷ್ಠ ಗ್ಯಾರಂಟಿ ಮೊತ್ತದ ಶೇ. 10ರಷ್ಟು ಹಣವನ್ನು ಪಿಂಚಣಿ ರೂಪದಲ್ಲಿ ಕೊನೆಯವರೆಗೂ ಹಂಚಿಕೆ ಮಾಡಲಾಗುತ್ತದೆ.
ಇದನ್ನೂ ಓದಿ: ಜೀವ ಪ್ರಮಾಣಪತ್ರ ಸಲ್ಲಿಸಲು ಎರಡೇ ದಿನ ಬಾಕಿ; ನ. 30ಕ್ಕೆ ಕೊಡದಿದ್ದರೆ ಪಿಂಚಣಿ ಸಿಗೋದಿಲ್ವಾ?
ಹೊಸ ಎಲ್ಐಸಿ ಜೀವನ್ ಉತ್ಸವ್ ಪ್ಲಾನ್ನಲ್ಲಿ ಕನಿಷ್ಠ ಪ್ರವೇಶ ವರ್ಷ 8 ವರ್ಷವಾಗಿದೆ. ಗರಿಷ್ಠ ವಯೋಮಿತಿ 65 ವರ್ಷ ಇದೆ. ಪ್ರೀಮಿಯಮ್ ಕಟ್ಟುವ ಅವಧಿ 5ರಿಂದ ಆರಂಭವಾಗಿ 16 ವರ್ಷದವರೆಗೂ ಇದೆ. ಇದರಲ್ಲಿ ಎರಡು ಪೇಔಟ್ ಆಯ್ಕೆಗಳಿವೆ. ರೆಗ್ಯುಲರ್ ಇನ್ಕಮ್ ಅಥವಾ ಫ್ಲೆಕ್ಸಿ ಇನ್ಕಮ್ ಆಯ್ಕೆಗಳನ್ನು ಪಡೆಯಬಹುದು. ಈ ಎರಡೂ ಆಯ್ಕೆಗಳಲ್ಲಿ ನಿರ್ದಿಷ್ಟ ಮೊತ್ತವನ್ನು ನಿಯಮಿತವಾಗಿ ನಿಮಗೆ ಕೊಡಲಾಗುತ್ತದೆ.
ನಿಮ್ಮ ಬೇಸಿಕ್ ಸಮ್ ಅಷ್ಯೂರ್ಡ್ನ ಶೇ. 10ರಷ್ಟು ಮೊತ್ತವನ್ನು ನಿಮ್ಮ ಪಾಲಿಸಿ ಅವಧಿಯ ನಂತರದ 3 ವರ್ಷದ ಬಳಿಕ ಹಂಚಿಕೆ ಮಾಡಲು ಆರಂಭಿಸಲಾಗುತ್ತದೆ. ಉದಾಹರಣೆಗೆ, ನೀವು 8 ವರ್ಷ ಪ್ರೀಮಿಯಮ್ ಕಟ್ಟುವ ಪಾಲಿಸಿ ಆಯ್ದುಕೊಂಡಿದ್ದರೆ 11ನೇ ವರ್ಷದಿಂದ ಪೇ ಔಟ್ ಆರಂಭವಾಗುತ್ತದೆ.
ಇದನ್ನೂ ಓದಿ: LIC Scheme: ನಿವೃತ್ತಿ ಬಳಿಕ ವರ್ಷಕ್ಕೆ 1 ಲಕ್ಷ ರೂ ಪಿಂಚಣಿ ಬರಲು ಪಾಲಿಸಿ ಮೊತ್ತ ಎಷ್ಟು ಬೇಕು?
ಇನ್ನು, ಫ್ಲೆಕ್ಸಿ ಇನ್ಕಮ್ ಪೇಔಟ್ ಆಯ್ಕೆ ಪಡೆದುಕೊಂಡಿದ್ದರೆ ಕನಿಷ್ಠ ಗ್ಯಾರಂಟಿ ಮೊತ್ತದ ಶೇ. 10ರಷ್ಟು ಹಣವನ್ನು ಪ್ರತೀ ಪಾಲಿಸಿ ವರ್ಷದ ಕೊನೆಗೆ ನಿಮಗೆ ಕೊಡಲಾಗುತ್ತದೆ. ಒಂದು ವೇಳೆ ನಿಮಗೆ ಈ ನಿಯಮಿತ ಪೇಔಟ್ ಬೇಡ, ಪಾಲಿಸಿಯಲ್ಲೇ ಆ ಹಣ ಮುಂದುವರಿಯಲಿ ಎಂದಿದ್ದರೆ ಅದಕ್ಕೂ ಅವಕಾಶ ಇದೆ. ಈ ರೀತಿಯ ಹಣಕ್ಕೆ ಎಲ್ಐಸಿ ವರ್ಷಕ್ಕೆ ಶೇ. 5.5ರಷ್ಟು ಬಡ್ಡಿ ಸೇರಿಸಿ ತುಂಬಿಸುತ್ತಾ ಹೋಗುತ್ತದೆ.
ನಿಮ್ಮ ಪೇಔಟ್ ಹಣವನ್ನು ಹಿಂಪಡೆಯಲು ವರ್ಷಕ್ಕೆ ಒಮ್ಮೆ ಅವಕಾಶ ಇರುತ್ತದೆ. ಬಡ್ಡಿ ಸೇರಿದಂತೆ ಜಮೆ ಆದ ಎಲ್ಲಾ ಲಾಭಗಳ ಶೇ. 75ರಷ್ಟು ಮೊತ್ತವನ್ನು ನೀವು ವಿತ್ಡ್ರಾ ಮಾಡಬಹುದು. ಉಳಿದ ಹಣಕ್ಕೆ ಎಲ್ಐಸಿ ಬಡ್ಡಿ ಸೇರಿಸುವುದನ್ನು ಮುಂದುವರಿಸುತ್ತದೆ.
ಇನ್ನಷ್ಟು ಪರ್ಸನಲ್ ಫೈನಾನ್ಸ್ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
Published On - 2:52 pm, Wed, 29 November 23