PhonePe: ಫೋನ್ಪೇ ಆ್ಯಪ್ನಲ್ಲಿ ಇನ್ಕಮ್ ಟ್ಯಾಕ್ಸ್ ಹೊಸ ಫೀಚರ್; ಇಲಾಖೆ ಪೋರ್ಟಲ್ಗೆ ಹೋಗೋ ಅಗತ್ಯ ಇಲ್ಲ
Income Tax Feature in PhonePe: ಡಿಜಿಟಲ್ ಪಾವತಿ ಪ್ಲಾಟ್ಫಾರ್ಮ್ ಫೋನ್ ಪೇನಲ್ಲಿ ಈಗ ಇನ್ಕಮ್ ಟ್ಯಾಕ್ಸ್ ಎಂಬ ಹೊಸ ಫೀಚರ್ ಆರಂಭಿಸಲಾಗಿದೆ. ಬಹಳ ಸುಲಭವಾಗಿ ತೆರಿಗೆ ಪಾವತಿಸಲು ಇದು ಸಹಾಯವಾಗುತ್ತದೆ.
ಸರ್ಕಾರ ಆದಾಯ ತೆರಿಗೆ ಪಾವತಿ ವ್ಯವಸ್ಥೆಯನ್ನು (Income Tax Payment) ಹೆಚ್ಚೆಚ್ಚು ಸರಳಗೊಳಿಸುತ್ತಾ ಬರುತ್ತಿದೆ. ಈಗ ಫೋನ್ ಪೇನಲ್ಲಿ ಇನ್ಕಮ್ ಟ್ಯಾಕ್ಸ್ ಪೇಮೆಂಟ್ ಎಂಬ ಹೊಸ ಫೀಚರ್ ಆರಂಭವಾಗಿದೆ. ಇದರಲ್ಲಿ ಸೆಲ್ಫ್ ಅಸೆಸ್ಮೆಂಟ್ ಮತ್ತು ಅಡ್ವಾನ್ಸ್ ಟ್ಯಾಕ್ಸ್ ಅನ್ನು ಪಾವತಿಸಬಹುದು. ಇನ್ಕಮ್ ಟ್ಯಾಕ್ಸ್ ಪೋರ್ಟಲ್ಗೆ ಲಾಗಿನ್ ಆಗದೇ ಫೋನ್ಪೇ ಆ್ಯಪ್ನಲ್ಲಿರುವ ಈ ಹೊಸ ಫೀಚರ್ ಮೂಲಕವೇ ನೇರವಾಗಿ ತೆರಿಗೆ ಪಾವತಿಸಲು ಸಾಧ್ಯವಾಗಲಿದೆ.
ಇನ್ಕಮ್ ಟ್ಯಾಕ್ಸ್ ಪೇಮೆಂಟ್ ಎಂಬ ಹೊಸ ಫೀಚರ್ಗಾಗಿ ಪೇಮೇಟ್ ಎಂಬ ಡಿಜಿಟಲ್ ಬಿ2ಬಿ ಬ್ಯುಸಿನೆಸ್ ಸಂಸ್ಥೆ ಜೊತೆ ಫೋನ್ ಪೇ ಸಹಭಾಗಿತ್ವ ಹೊಂದಿದೆ. ಇನ್ಕಮ್ ಟ್ಯಾಕ್ಸ್ ಇಲಾಖೆಯ ಪೋರ್ಟಲ್ನಲ್ಲಿ ಐಟಿಆರ್ ಫೈಲಿಂಗ್ ಮಾಡಲು ಲೋಡಿಂಗ್ ಸಮಸ್ಯೆಗಳಿವೆ ಎಂದು ಬಹಳ ಮಂದಿ ದೂರುವುದಿದೆ. ಇದನ್ನು ತಪ್ಪಿಸಲು ಫೋನ್ ಪೇನಲ್ಲಿರುವ ಇನ್ಕಮ್ ಟ್ಯಾಕ್ಸ್ ಫೀಚರ್ ಅನ್ನು ಬಳಸಿಕೊಳ್ಳಬಹುದು.
ಫೋನ್ ಪೇನಲ್ಲಿ ಕ್ರೆಡಿಟ್ ಕಾರ್ಡ್ ಅಥವಾ ಯುಪಿಐ ಬಳಸಿ ತೆರಿಗೆ ಹಣ ಪಾವತಿಸಬಹುದು. ಕೆಲ ಬ್ಯಾಂಕುಗಳ ಕ್ರೆಡಿಟ್ ಕಾರ್ಡ್ ಮೂಲಕ ಪಾವತಿಸಿದರೆ ರಿವಾರ್ಡ್ ಕೂಡ ಸಿಗಬಹುದು.
ಇದನ್ನೂ ಓದಿ: Tax Collection: ತೆರಿಗೆ ದರ ಹೆಚ್ಚಿಸಿಲ್ಲ, ಆದರೂ ತೆರಿಗೆ ಸಂಗ್ರಹ ಹೆಚ್ಚಿಸಿದ್ದೇವೆ: ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್
ಫೋನ್ ಪೇನಲ್ಲಿ ತೆರಿಗೆ ಪಾವತಿಸುವುದು ಹೇಗೆ?
- ಮೊಬೈಲ್ನಲ್ಲಿ ಫೋನ್ ಪೇ ಆ್ಯಪ್ ತೆರೆಯಿರಿ
- ಮುಖ್ಯಪುಟದಲ್ಲಿ ರೀಚಾರ್ಜ್ ಅಂಡ್ ಪೇ ಬಿಲ್ಸ್ ಸ್ಲಾಟ್ನಲ್ಲಿ ಇನ್ಕಮ್ ಟ್ಯಾಕ್ಸ್ ಫೀಚರ್ ಕಾಣಬಹುದು. ಅದನ್ನು ಕ್ಲಿಕ್ ಮಾಡಿ
- ನೀವು ಪ್ರಸಕ್ತ ಅಸೆಸ್ಮೆಂಟ್ ವರ್ಷದಲ್ಲಿ ಯಾವ ತೆರಿಗೆ ಪಾವತಿಸಬೇಕು ಎಂಬುದನ್ನು ಆಯ್ದುಕೊಳ್ಳಿ
- ಪ್ಯಾನ್ ಕಾರ್ಡ್ ವಿವರ ನೀಡಿ
- ತೆರಿಗೆ ಮೊತ್ತ ನಮೂದಿಸಿ ಕ್ರೆಡಿಟ್ ಕಾರ್ಡ್ ಅಥವಾ ಯುಪಿಐ ಮೂಲಕ ಹಣ ಪಾವತಿಸಿ
- ಎರಡು ಕಾರ್ಯ ದಿನಗಳೊಳಗೆ ನೀವು ಪಾವತಿಸಿದ ಹಣ ಆದಾಯ ತೆರಿಗೆ ಇಲಾಖೆಗೆ ಸಲ್ಲಿಕೆಯಾಗುತ್ತದೆ.
ಏಳು ಕೋಟಿಗೂ ಹೆಚ್ಚು ಮಂದಿಯಿಂದ ಐಟಿಆರ್ ಸಲ್ಲಿಕೆ
ಆದಾಯ ತೆರಿಗೆ ಪೋರ್ಟಲ್ನಲ್ಲಿ ಒಟ್ಟು 11.39 ಕೋಟಿ ವೈಯಕ್ತಿಕ ನೊಂದಾಯಿತರು ಇದ್ದಾರೆ. ಎರಡು ದಿನಗಳ ಹಿಂದೆ ಕೇಂದ್ರ ಸರ್ಕಾರ ನೀಡಿದ ಮಾಹಿತಿ ಪ್ರಕಾರ 7.40 ಕೋಟಿಗೂ ಹೆಚ್ಚು ಮಂದಿ ಐಟಿಆರ್ ಸಲ್ಲಿಕೆ ಮಾಡಿದ್ದಾರೆ. ಕಳೆದ ವರ್ಷಕ್ಕಿಂತ ಈ ಬಾರಿ ಐಟಿಆರ್ಗಳ ಸಂಖ್ಯೆ ಗಣನೀಯವಾಗಿ ಹೆಚ್ಚಾಗಿದೆ. ಇದರಲ್ಲಿ 5 ಕೋಟಿಗೂ ಹೆಚ್ಚು ಮಂದಿ ತೆರಿಗೆ ಬಾಧ್ಯತೆ ಇಲ್ಲವೆಂದು ಘೋಷಿಸಿದವರೇ ಇದ್ದಾರೆ.
ಇನ್ನಷ್ಟು ಪರ್ಸನಲ್ ಫೈನಾನ್ಸ್ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ