ಏಪ್ರಿಲ್ 3ಕ್ಕೆ ಆರ್ಬಿಐನ ಎಂಪಿಸಿ ಸಭೆ ಶುರು; ಬಡ್ಡಿದರ ಈ ಬಾರಿಯೂ ಹೆಚ್ಚಳ ಇಲ್ಲವಾ? ಸಭೆಯಿಂದ ನಿರೀಕ್ಷೆಗಳಿವು
RBI MPC Meet from Arpil 3rd: ಆರ್ಬಿಐನ ಎಂಪಿಸಿ ಸಭೆ ಏಪ್ರಿಲ್ 3ರಂದು ಆರಂಭವಾಗಲಿದೆ. ಏಪ್ರಿಲ್ 5ರಂದು ಆರ್ಬಿಐ ಗವರ್ನರ್ ಶಕ್ತಿಕಾಂತ ದಾಸ್ ಈ ಸಭೆಯ ನಿರ್ಧಾರಗಳನ್ನು ತಿಳಿಸಲಿದ್ದಾರೆ. ಗವರ್ನರ್ ದಾಸ್ ಅವರೂ ಸೇರಿ ಆರು ಮಂದಿ ಸದಸ್ಯರಿರುವ ಮಾನಿಟರಿ ಪಾಲಿಸಿ ಕಮಿಟಿಯಲ್ಲಿ ಮಹತ್ವದ ರೆಪೋ ರೇಟ್ ಇತ್ಯಾದಿ ವಿಚಾರಗಳ ಬಗ್ಗೆ ಚರ್ಚಿಸಿ ತೀರ್ಮಾನ ಕೈಗೊಳ್ಳಲಾಗುತ್ತದೆ.
ನವದೆಹಲಿ, ಏಪ್ರಿಲ್ 1: ಭಾರತೀಯ ರಿಸರ್ವ್ ಬ್ಯಾಂಕ್ನ ಹಣಕಾಸು ನೀತಿ ಸಮಿತಿ (RBI MPC) ಈ ಆರ್ಥಿಕ ವರ್ಷದ ಮೊದಲ ಸಭೆ ಏಪ್ರಿಲ್ 3ರಂದು ಆರಂಭಿಸಲಿದೆ. ಆರ್ಥಿಕತೆ ಸಕಾರಾತ್ಮಕವಾಗಿದ್ದರೂ ಹಣದುಬ್ಬರ ತೀರಾ ಆಶಾದಾಯಕವಾಗಿಲ್ಲ. ಈ ಹಿನ್ನೆಲೆಯಲ್ಲಿ ಎಂಪಿಸಿ ಸಭೆಯಲ್ಲಿ ತೆಗೆದುಕೊಳ್ಳುವ ತೀರ್ಮಾನಗಳ ಬಗ್ಗೆ ಎಲ್ಲರ ಕುತೂಹಲ ಇದೆ. ಏಪ್ರಿಲ್ 3ರಿಂದ 5ರವರೆಗೆ ನಡೆಯಲಿರವ ಎಂಪಿಸಿ ಸಭೆಯಲ್ಲಿ ಆರ್ಬಿಐನ ಪ್ರಮುಖ ಪಾಲಿಸಿಗಳನ್ನು ಮುಂದುವರಿಸಲು ನಿರ್ಧರಿಸುವ ಸಾಧ್ಯತೆ ಇದೆ. ಸಾಲ ಮತ್ತು ಠೇವಣಿಯ ಬಡ್ಡಿದರ (Repo and Reverse Repo Rates), ಹಣದ ಹರಿವು ಸಂಕುಚಿತಗೊಳಿಸುವುದು (Withdrawal of Accommodation) ಈ ನೀತಿಯಲ್ಲಿ ಯಾವುದೇ ಬದಲಾವಣೆ ಮಾಡದಿರಲು ಎಂಪಿಸಿ ಸಭೆ ನಿರ್ಧರಿಸಬಹುದು ಎನ್ನಲಾಗಿದೆ.
ಹಣದುಬ್ಬರ ಆರ್ಬಿಐನ ನಿರೀಕ್ಷೆಯ ಮಟ್ಟದಲ್ಲಿ ಇಲ್ಲ. ಅದು ನಿಗದಿ ಮಾಡಿರುವ ತಾಳಿಕೆ ಮಿತಿಯಾದ ಶೇ. 6ರ ಒಳಗೆ ಇದೆಯಾದರೂ ಹಣದುಬ್ಬರವನ್ನು ಶೇ. 4ರ ಸಮೀಪಕ್ಕೆ ತರುವ ಸಾಧ್ಯತೆ ಸದ್ಯಕ್ಕಂತೂ ಕಾಣುತ್ತಿಲ್ಲ. ಹಣದುಬ್ಬರ ನಿಯಂತ್ರಣಕ್ಕೆ ಆರ್ಬಿಐ ಬಳಿ ಇರುವ ಪ್ರಮುಖ ಅಸ್ತ್ರಗಳಲ್ಲಿ ರೆಪೋ ದರ ಏರಿಕೆ ಮಾಡುವುದು ಮತ್ತು ಹಣದ ಹರಿವು ಕಡಿಮೆ ಮಾಡುವುದು ಪ್ರಮುಖವಾದುವು.
ಇದನ್ನೂ ಓದಿ: ವಂಚಕ ಲೋನ್ ಆ್ಯಪ್ಗಳ ಉಪಟಳ ನಿಗ್ರಹಕ್ಕೆ ಸರ್ಕಾರ ತರುತ್ತಿದೆ ಡಿಜಿಟಾ ಅಸ್ತ್ರ
ರೆಪೋ ದರ ಏರಿಸಿದರೆ ಆರ್ಥಿಕ ಬೆಳವಣಿಗೆ ಕುಂಠಿತಗೊಳ್ಳುತ್ತದೆ. ದರ ಇಳಿಸಿದರೆ ಹಣದುಬ್ಬರ ಹೆಚ್ಚುತ್ತದೆ. ಹೀಗಾಗಿ, ಆರ್ಬಿಐ ವಿತ್ಡ್ರಾಯಲ್ ಆಫ್ ಅಕಾಮೊಡೇಶನ್ ನೀತಿಯನ್ನು ಮುಂದುವರಿಸಿಕೊಂಡು ಹೋಗಬಹುದು. ವೇರಿಯಬಲ್ ರೇಟ್ ರಿವರ್ಸ್ ರೆಪೋ (ವಿಆರ್ಆರ್ಆರ್) ಹರಾಜುಗಳನ್ನು ಬಳಸಿ ಆರ್ಬಿಐ ಹಣದ ಸರಬರಾಜನ್ನು ಕಡಿಮೆಗೊಳಿಸುತ್ತದೆ. ಈ ನೀತಿಯಲ್ಲಿ ಬ್ಯಾಂಕುಗಳಿಂದ ಆರ್ಬಿಐ ಕಿರು ಅವಧಿ ಸಾಲ ಪಡೆಯುತ್ತದೆ. ಬ್ಯಾಂಕುಗಳ ಬಳಿ ಸಾರ್ವಜನಿಕರಿಗೆ ನೀಡಲು ಹೆಚ್ಚು ಫಂಡ್ ಇಲ್ಲದಂತೆ ಮಾಡುವುದು ಆರ್ಬಿಐ ಗುರಿ. ಇದು ತಾತ್ಕಾಲಿಕ ಮಾತ್ರ. ಹಣದುಬ್ಬರ ನಿಯಂತ್ರಣಕ್ಕೆ ಬಂದ ಬಳಿಕ ಈ ನೀತಿಯನ್ನು ಸಡಿಲಗೊಳಿಸಲಾಗುತ್ತದೆ.
ಸದ್ಯ ಎಂಪಿಸಿ ಸಭೆಯಲ್ಲಿ ರೆಪೋ ದರ ಮತ್ತು ವಿತ್ಡ್ರಾಯಲ್ ಆಫ್ ಅಕಾಮಡೇಶನ್ ಈ ಎರಡು ನೀತಿಯನ್ನು ಮುಂದುವರಿಸಬಹುದು. ಇವಲ್ಲದೇ ಎಂಪಿಸಿ ಸಭೆಯಲ್ಲಿ ಆರ್ಥಿಕತೆ ಬಗ್ಗೆ ಆರ್ಬಿಐನ ನಿರೀಕ್ಷೆ, ಅಂದಾಜು, ಒಟ್ಟಾರೆ ನೋಟ ಇವೆಲ್ಲವೂ ಚರ್ಚೆಗೆ ಬರಲಿವೆ. 2023-24ರ ಹಣಕಾಸು ವರ್ಷದ ಮೊದಲ ಮೂರು ಕ್ವಾರ್ಟರ್ಗಳಲ್ಲಿ ಜಿಡಿಪಿ ನಿರೀಕ್ಷೆಮೀರಿ ಉತ್ತಮವಾಗಿದೆ. ಕೊನೆಯ ಕ್ವಾರ್ಟರ್ನ ಅಂಕಿ ಅಂಶ ಬರಬೇಕಿದೆ. ಈ ಹಣಕಾಸು ವರ್ಷ ಮತ್ತು ಮುಂಬರುವ ಹಣಕಾಸು ವರ್ಷಕ್ಕೆ ಜಿಡಿಪಿ ಎಷ್ಟು ಬೆಳೆಯಬಹುದು ಎಂದು ಆರ್ಬಿಐ ಅಂದಾಜು ಮಾಡಬಹುದು.
ಇದನ್ನೂ ಓದಿ: ಭಾರತೀಯ ರಿಸರ್ವ್ ಬ್ಯಾಂಕ್ 90 ವರ್ಷ ಸಂಸ್ಮರಣಾರ್ಥ 90 ರೂ ವಿಶೇಷ ನಾಣ್ಯ ಬಿಡುಗಡೆ
ಏಪ್ರಿಲ್ 3, ಬುಧವಾರ ಆರಂಭವಾಗಿ ಎಪ್ರಿಲ್ 5, ಶುಕ್ರವಾರದವರೆಗೂ ಎಂಪಿಸಿ ಸಭೆ ನಡೆಯಲಿದೆ. ಶುಕ್ರವಾರ ಬೆಳಗ್ಗೆ 10 ಗಂಟೆಗೆ ಆರ್ಬಿಐ ಗವರ್ನರ್ ಶಕ್ತಿಕಾಂತ ದಾಸ್ ಸುದ್ದಿಗೋಷ್ಠಿ ಉದ್ದೇಶಿಸಿ ಮಾತನಾಡಿ ಎಂಪಿಸಿ ಸಭೆಯ ನಿರ್ಧಾರಗಳನ್ನು ಬಹಿರಂಗಪಡಿಸಲಿದ್ದಾರೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ