ಸಾಲಕ್ಕೆ ಬದಲಾಗಿ ಷೇರುಗಳನ್ನು ಕೊಟ್ಟ ಸ್ಪೈಸ್ಜೆಟ್; ವಿಮಾನ ಗುತ್ತಿಗೆ ನೀಡಿದವರಿಗೆ ಸಿಕ್ಕಲಿದೆ 4.8 ಕೋಟಿ ಷೇರು
Spicejet Updates: ಅರ್ಧದಷ್ಟು ವಿಮಾನಗಳ ಹಾರಾಟ ನಿಲ್ಲಿಸಿ ಬಿಕ್ಕಟ್ಟಿಗೆ ಸಿಲುಕಿರುವ ಸ್ಪೈಸ್ಜೆಟ್ ಸಂಸ್ಥೆ ಚೇತರಿಸಿಕೊಳ್ಳುವ ಹಾದಿಯಲ್ಲಿದೆ. 2,500 ಕೋಟಿ ರೂ ಮೊತ್ತದಷ್ಟು ಬಂಡವಾಳ ಸಂಗ್ರಹಿಸುವ ಪ್ರಸ್ತಾಪಕ್ಕೆ ಕಳೆದ ವಾರ ಸ್ಪೈಸ್ಜೆಟ್ ಷೇರುದಾರರು ಅನುಮೋದನೆ ನೀಡಿದ್ದರು. ಇದೀಗ 9 ವಿಮಾನ ಗುತ್ತಿಗೆ ಕಂಪನಿಗಳ ಬಾಕಿ ಸಾಲ ತೀರಿಸಲು 231 ಕೋಟಿ ರೂ ಮೊತ್ತದ 4.8 ಕೋಟಿ ಈಕ್ವಿಟಿ ಷೇರುಗಳನ್ನು ಹಂಚಿಕೆ ಮಾಡಲಾಗಿದೆ.
Updated on:Sep 05, 2023 | 12:43 PM
ನವದೆಹಲಿ, ಸೆಪ್ಟೆಂಬರ್ 5: ಬಿಕ್ಕಟ್ಟಿಗೆ ಸಿಲುಕಿರುವ ಸ್ಪೈಸ್ಜೆಟ್ ಸಂಸ್ಥೆ (Spicejet Airlines) ತನ್ನ ಅಸ್ತಿತ್ವ ಉಳಿಸಿಕೊಳ್ಳಲು ಹರಸಾಹಸ ನಡೆಸುತ್ತಿದೆ. ದಿವಾಳಿಯಾಗುವುದನ್ನು (Bankruptcy) ತಪ್ಪಿಸಿಕೊಳ್ಳಲು ಹೆಣಗುತ್ತಿರುವ ಸ್ಪೈಸ್ಜೆಟ್ ಇದೀಗ ಸಾಲಗಾರರ ಕಾಟ ತಪ್ಪಿಸಿಕೊಳ್ಳಲು ಷೇರುಗಳನ್ನು ಆಫರ್ ಮಾಡಿದೆ. ತನಗೆ ವಿಮಾನಗಳನ್ನು ಗುತ್ತಿಗೆ ಕೊಟ್ಟಿರುವವರ ಪೈಕಿ 9 ಸಂಸ್ಥೆಗಳಿಗೆ (Aircraft Lessors) 4.81 ಕೋಟಿ ಈಕ್ವಿಟಿ ಷೇರುಗಳನ್ನು ಆದ್ಯತಾ ಆಧಾರದಲ್ಲಿ ಸ್ಪೈಸ್ ಜೆಟ್ ಅಲಾಟ್ ಮಾಡಿದೆ. ಇದರೊಂದಿಗೆ ಈ 9 ಸಂಸ್ಥೆಗಳ 231 ಕೋಟಿ ರೂ ಮೊತ್ತದ ಸಾಲ ಈಗ ಷೇರಾಗಿ ಬದಲಾಗುತ್ತದೆ. ಸ್ಪೈಸ್ಜೆಟ್ನ ಷೇರುದಾರರು (Spicejet shareholders) ಕಳೆದ ವಾರ ಹಲವು ನಿರ್ಣಯಗಳಿಗೆ ಅನುಮೋದನೆ ನೀಡಿದ್ದರು. ಅದರಲ್ಲಿ ವಿಮಾನ ಗುತ್ತಿಗೆ ಸಂಸ್ಥೆಗಳಿಗೆ ಪಾವತಿಸಬೇಕಿದ್ದ ಬಾಕಿ ಹಣವನ್ನು ನೀಡುವುದೂ ಸೇರಿದೆ. ಹಾಗೆಯೇ, 2,500 ಕೋಟಿ ರೂ ಮೊತ್ತದ ಬಂಡವಾಳ ಸಂಗ್ರಹಿಸುವ ಕಾರ್ಯಗಳಿಗೂ ಷೇರುದಾರರ ಅನುಮೋದನೆ ಸಿಕ್ಕಿದೆ.
ಫೆಬ್ರುವರಿ ತಿಂಗಳಲ್ಲಿ ವಿಮಾನ ಗುತ್ತಿಗೆ ಸಂಸ್ಥೆ ಕಾರ್ಲೈಲ್ ಏವಿಯೇಶನ್ ಸಂಸ್ಥೆಗೆ ನೀಡಬೇಕಿದ್ದ 100 ಮಿಲಿಯನ್ ಡಾಲರ್ ಬಾಕಿ ಹಣವನ್ನು ಸ್ಪೈಸ್ಜೆಟ್ ಈಕ್ವಿಟಿ ಮತ್ತು ಡಿಬಂಚರ್ಗಳಾಗಿ ಪರಿವರ್ತಿಸಿ ಸಮಾಧಾನಗೊಲಿಸಿದೆ. ಈಗ ಬೇರೆ 9 ಸಂಸ್ಥೆಗಳ ಬಾಕಿ ಹಣವನ್ನೂ ಇದೇ ರೀತಿ ಈಕ್ವಿಟಿಯಾಗಿ ಪರಿವರ್ತಿಸಿದೆ.
ಇದನ್ನೂ ಓದಿ: ನಜಾರ ಟೆಕ್ನಾಲಜೀಸ್ ಮೇಲೆ ನಿಖಿಲ್ ಕಾಮತ್ 100 ಕೋಟಿ ರೂ ಹೂಡಿಕೆ; ಗೇಮಿಂಗ್ ಕಂಪನಿ ಬಗ್ಗೆ ಕಾಮತ್ಗೆ ಯಾಕೆ ಒಲವು?
ಒಂಬತ್ತು ಸಂಸ್ಥೆಗಳಿಗೆ 4.81 ಕೋಟಿ ಈಕ್ವಿಟಿ ಷೇರುಗಳನ್ನು ನೀಡಿರುವುದು ಮಾತ್ರವಲ್ಲ, ಸ್ಪೈಸ್ ಹೆಲ್ತ್ ಕೇರ್ ಪ್ರೈ ಲಿ ಸಂಸ್ಥೆಗೂ 3.41 ಕೋಟಿ ಈಕ್ವಿಟಿ ಷೇರುಗಳನ್ನು ವಿತರಿಸಿದೆ. 29.84 ರೂ ಇಷ್ಯೂ ಪ್ರೈಸ್ಲ್ಲಿ 13.15 ಕೋಟಿ ವಾರಂಟ್ಗಳನ್ನೂ ಕೊಟ್ಟಿದೆ.
ಸ್ಪೈಸ್ಜೆಟ್ ಸಂಸ್ಥೆ ನಾನಾ ಕಾರಣಗಳಿಂದ ತನ್ನ ಹಲವು ವಿಮಾನ ಹಾರಾಟ ಕಾರ್ಯಾಚರಣೆ ಸ್ಥಗಿತಗೊಳಿಸಿತ್ತು. ಒಂದು ಸಮಯದಲ್ಲಿ 67 ವಿಮಾನಗಳನ್ನು ಹೊಂದಿದ್ದ ಅದು ಈಗ 40ಕ್ಕಿಂತ ಕಡಿಮೆ ವಿಮಾನಗಳನ್ನು ಮಾತ್ರ ಕಾರ್ಯಾಚರಿಸುತ್ತಿದೆ. ಇನ್ನುಳಿದ ವಿಮಾನಗಳನ್ನು ಮತ್ತೆ ಕಾರ್ಯಾಚರಿಸುವ ಪ್ರಯತ್ನದಲ್ಲಿದೆ.
ಇದನ್ನೂ ಓದಿ: ಮೂರೇ ವರ್ಷದಲ್ಲಿ 1 ಲಕ್ಷಕ್ಕೆ 12 ಲಕ್ಷ ಲಾಭ; ಇದು ಬಿಸಿಎಲ್ ಇಂಡಸ್ಟ್ರೀಸ್ ಷೇರು ಚಮತ್ಕಾರ
ಸ್ಪೈಸ್ಜೆಟ್ ತೀವ್ರ ಬಿಕ್ಕಟ್ಟಿಗೆ ಸಿಲುಕಿದ ಬಳಿಕ ಅದರ ಮಾರುಕಟ್ಟೆಮೌಲ್ಯ ಗಣನೀಯವಾಗಿ ಕುಸಿದಿತ್ತು. ಹೊಸ ವೈಮಾನಿಕ ಸಂಸ್ಥೆ ಆಕಾಶ ಏರ್ಲೈನ್ಸ್ನ ಮಾರುಕಟ್ಟೆಮೊತ್ತಕ್ಕಿಂತಲೂ ಸ್ಪೈಸ್ಜೆಟ್ನದ್ದು ಕಡಿಮೆ ಆಗಿಹೋಗಿತ್ತು. ಇದೀಗ ಒಂದು ವಿಮಾನ ಗುತ್ತಿಗೆ ಕಂಪನಿಗಳಿಗೆ ಷೇರುಹಂಚಿಕೆ ಮಾಡಿ ಸಾಲ ತೀರಿಸಲು ಕ್ರಮ ಕೈಗೊಂಡ ಬಳಿಕ ಸ್ಪೈಸ್ಜೆಟ್ನ ಷೇರುಬೆಲೆ ಇಂದು (ಸೆ. 5) ಶೇ. 7ಕ್ಕಿಂತಲೂ ಹೆಚ್ಚಾಗಿರುವುದು ಗಮನಾರ್ಹ. ಮಂಗಳವಾರ ಬೆಳಗ್ಗೆ 10ಕ್ಕೆ ಅದರ ಷೇರುಬೆಲೆ 33 ರೂಗಿಂತ ಹೆಚ್ಚಾಗಿದೆ. ಅದರ ಒಟ್ಟು ಮಾರುಕಟ್ಟೆ ಬಂಡವಾಳ 1.98 ಲಕ್ಷಕೋಟಿ ರೂ ಆಗಿದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
Published On - 10:29 am, Tue, 5 September 23
