Nifty: ಇದೇ ಮೊದಲ ಬಾರಿಗೆ 18,000 ಪಾಯಿಂಟ್ಸ್​ ಮೀರಿದ ಷೇರುಪೇಟೆ ಸೂಚ್ಯಂಕ ನಿಫ್ಟಿ

ಭಾರತದ ಷೇರು ಮಾರುಕಟ್ಟೆ ಸೂಚ್ಯಂಕವಾದ ನಿಫ್ಟಿ ಅಕ್ಟೋಬರ್ 11ನೇ ತಾರೀಕಿನ ಸೋಮವಾರದಂದು 18,000 ಪಾಯಿಂಟ್ಸ್ ಗಡಿ ದಾಟಿ, ಹೊಸ ದಾಖಲೆ ಬರೆಯಿತು. ಇದೇ ಮೊದಲ ಬಾರಿಗೆ ನಿಫ್ಟಿ 18 ಸಾವಿರ ಪಾಯಿಂಟ್ಸ್ ಗಡಿ ದಾಟಿದೆ. ರಿಲಯನ್ಸ್​ ಇಂಡಸ್ಟ್ರೀಸ್ ಮತ್ತು ಬ್ಯಾಂಕಿಂಗ್​ ವಲಯದ ಸ್ಟಾಕ್​ಗಳು ಮಾಹಿತಿ ತಂತ್ರಜ್ಞಾನ ಕ್ಷೇತ್ರದ ಟಿಸಿಎಸ್​ನಂಥ ಸ್ಟಾಕ್​ಗಳಲ್ಲಿ ಕಂಡುಬಂದ ದುರ್ಬಲತೆಯನ್ನೂ ಮೀರಿ ನಿಂತವು. ಈ ವರದಿ ಪ್ರಕಟ ಆಗುವ ಹೊತ್ತಿಗೆ ನಿಫ್ಟಿ 112.80 ಪಾಯಿಂಟ್ಸ್ ಅಥವಾ ಶೇ 0.63ರಷ್ಟು ಮೇಲೇರಿ 18,008 ಪಾಯಿಂಟ್ಸ್​ನೊಂದಿಗೆ ವ್ಯವಹರಿಸುತ್ತಿತ್ತು. ಇನ್ನು ಸೆನ್ಸೆಕ್ಸ್ 310.04 ಪಾಯಿಂಟ್ಸ್ ಅಥವಾ ಶೇ 0.52ರಷ್ಟು ಹೆಚ್ಚಳವಾಗಿ, 60,369.10 ಪಾಯಿಂಟ್ಸ್​​ನೊಂದಿಗೆ ವ್ಯವಹರಿಸುತ್ತಿತ್ತು. ನಿಫ್ಟಿ ಬ್ಯಾಂಕ್​ ಸೂಚ್ಯಂಕವು 441.40 ಅಥವಾ ಶೇ 1.17ರಷ್ಟು ಮೇಲೇರಿ 38,216.70 ಪಾಯಿಂಟ್ಸ್​ನಲ್ಲಿತ್ತು.

ಭಾರತದ ರೂಪಾಯಿ ಮೌಲ್ಯವು ಅಮೆರಿಕನ್ ಡಾಲರ್ ವಿರುದ್ಧ 17 ಪೈಸೆಯಷ್ಟು ಕುಸಿತ ಕಂಡು, ದಿನದ ಕನಿಷ್ಠ ಮಟ್ಟವಾದ 75.16 ತಲುಪಿತ್ತು. ಹೆಚ್ಚುತ್ತಿರುವ ಕಚ್ಚಾ ತೈಲ ದರದಗಳು ಮತ್ತು ವಿದೇಶೀ ಮಾರುಕಟ್ಟೆಯಲ್ಲಿ ಹೂಡಿಕೆದಾರರು ಅಮೆರಿಕನ್ ಡಾಲರ್​ನಲ್ಲಿ ಹೂಡಿಕೆ ಮಾಡುವುದಕ್ಕೆ ಉತ್ಸಾಹ ತೋರುತ್ತಿರುವುದು ಬಲ ತಂದಿದೆ. ಶುಕ್ರವಾರದಂದು ಡಾಲರ್ ವಿರುದ್ಧ ರೂಪಾಯಿ ಮೌಲ್ಯ 74.99ಕ್ಕೆ ಸ್ಥಿರವಾಗಿತ್ತು. ವಿದೇಶೀ ಸಾಂಸ್ಥಿಕ ಹೂಡಿಕೆದಾರರು (ಎಫ್​ಐಐ) ಶುಕ್ರವಾರ ಬಂಡವಾಳ ಮಾರುಕಟ್ಟೆಯಲ್ಲಿ ನಿವ್ವಳ ಮಾರಾಟಗಾರರಾಗಿದ್ದರು. ವಿನಿಮಯದ ದತ್ತಾಂಶದ ಪ್ರಕಾರ, ಶುಕ್ರವಾರದಂದು 64.01 ಕೋಟಿ ರೂಪಾಯಿ ಮೌಲ್ಯದ ಷೇರುಗಳನ್ನು ಮಾರಾಟ ಮಾಡಿದ್ದಾರೆ. ಜಾಗತಿಕ ತೈಲ ಬೆಂಚ್​ಮಾರ್ಕ್ ಬ್ರೆಂಟ್ ಕಚ್ಚಾ ಫ್ಯೂಚರ್ಸ್ ಶೇ 1.43ರಷ್ಟು ಮೇಲೇರಿ ಪ್ರತಿ ಬ್ಯಾರೆಲ್​ಗೆ (1 ಬ್ಯಾರೆಲ್​ಗೆ 158.987 ಲೀಟರ್) 83.57 ಅಮೆರಿಕನ್ ಡಾಲರ್ ಆಗಿದೆ.

ನಿಫ್ಟಿಯಲ್ಲಿ ಏರಿಕೆ ಕಂಡ ಪ್ರಮುಖ ಷೇರುಗಳು ಮತ್ತು ಶೇಕಡಾವಾರು ಪ್ರಮಾಣ ಟಾಟಾ ಮೋಟಾರ್ಸ್ ಶೇ 9.04 ಕೋಲ್ ಇಂಡಿಯಾ ಶೇ 4.43 ಮಾರುತಿ ಸುಜುಕಿ ಶೇ 3.37 ಎನ್​ಟಿಪಿಸಿ ಶೇ 3.26 ಕೊಟಕ್ ಮಹೀಂದ್ರಾ ಶೇ 3.18

ನಿಫ್ಟಿಯಲ್ಲಿ ಇಳಿಕೆ ಕಂಡ ಪ್ರಮುಖ ಷೇರುಗಳು ಮತ್ತು ಶೇಕಡಾವಾರು ಪ್ರಮಾಣ ಟಿಸಿಎಸ್​ ಶೇ -5.25 ಟೆಕ್ ಮಹೀಂದ್ರಾ ಶೇ -1.54 ಭಾರ್ತಿ ಏರ್​ಟೆಲ್​ ಶೇ -0.65 ಎಚ್​ಡಿಎಫ್​ಸಿ ಲೈಫ್ ಶೇ -0.62 ಬ್ರಿಟಾನಿಯಾ ಶೇ -0.52

ಇದನ್ನೂ ಓದಿ: Tata Consultancy Services: ಕೆಲವೇ ನಿಮಿಷದಲ್ಲಿ ಟಿಸಿಎಸ್ ಕಂಪೆನಿ ಷೇರುದಾರರ ಸಾವಿರಾರು ಕೋಟಿ ರೂಪಾಯಿ ಉಡೀಸ್