Supreme Court: ಫ್ಲಿಪ್​ಕಾರ್ಟ್​, ಅಮೆಜಾನ್​ ವಿರುದ್ಧ ಸಿಸಿಐ ವಿಚಾರಣೆಗೆ ತಡೆ ನೀಡಲು ಸಾಧ್ಯವಿಲ್ಲ ಎಂದ ಸುಪ್ರೀಂ ಕೋರ್ಟ್

ಇ-ಕಾಮರ್ಸ್ ಕಂಪೆನಿಗಳಾದ ಫ್ಲಿಪ್​ಕಾರ್ಟ್​ (Flipkart) ಹಾಗೂ ಅಮೆಜಾನ್​ಗೆ (Amazon) ಭಾರೀ ಹಿನ್ನಡೆ ಆಗಿದೆ. ಭಾರತದ ಸ್ಪರ್ಧಾ ಆಯೋಗ (ಸಿಸಿಐ)ದಿಂದ ಪ್ರಾಥಮಿಕ ವಿಚಾರಣೆಗೆ ಆದೇಶ ನೀಡಿರುವುದನ್ನು ತಡೆಯುವುದಕ್ಕೆ ಸಾಧ್ಯವಿಲ್ಲ ಎಂದು ಸುಪ್ರೀಂ ಕೋರ್ಟ್ ಶುಕ್ರವಾರ ಹೇಳಿದೆ. ಅಮೆಜಾನ್ ಹಾಗೂ ಫ್ಲಿಪ್​ಕಾರ್ಟ್​ಗಳಿಂದ ಸ್ಪರ್ಧಾವಿರೋಧಿ ಪದ್ಧತಿ ಅನುಸರಿಸಲಾಗುತ್ತಿದೆ ಎಂಬ ಆರೋಪದ ಹಿನ್ನೆಲೆಯಲ್ಲಿ ಆದೇಶ ನೀಡಲಾಗಿತ್ತು. ಮುಖ್ಯನ್ಯಾಯಮೂರ್ತಿಗಳಾದ ಎನ್​.ವಿ.ರಮಣ, ನ್ಯಾಯಮೂರ್ತಿಗಳಾದ ವಿನೀತ್ ಸರಣ್ ಹಾಗೂ ಸೂರ್ಯಕಾಂತ್​ರನ್ನು ಒಳಗೊಂಡ ಪೀಠವು ಕರ್ನಾಟಕ ಹೈಕೋರ್ಟ್​ನ ಆದೇಶದ ವಿಚಾರದಲ್ಲಿ ಮಧ್ಯಪ್ರವೇಶಿಸಲು ನಿರಾಕರಿಸಿತು. ಭಾರತದ ಸ್ಪರ್ಧಾ ಆಯೋಗದ ವಿಚಾರಣೆ ಆದೇಶಕ್ಕೆ ತಡೆ ನೀಡಲು ಸಾಧ್ಯವಿಲ್ಲ ಎಂದು ಕರ್ನಾಟಕ ಹೈಕೋರ್ಟ್​ ಈ ಹಿಂದೆಯೇ ತಿಳಿಸಿತ್ತು.

ಸಿಸಿಐ ವಿಚಾರಣೆ ನಡೆಯಲೇಬೇಕು ಎಂದು ಪೀಠವು ಹೇಳಿದ್ದು, ಸಿಸಿಐಗೆ ಪ್ರತಿಕ್ರಿಯೆ ನೀಡಲು ಕೇಳಿದ ಕಾಲಾವಧಿ ವಿಸ್ತರಣೆಗೆ ಕಂಪೆನಿಗಳಿಗೆ ಅವಕಾಶ ಮಾಡಿಕೊಟ್ಟಿದೆ. “ಈ ಅದೇಶದಲ್ಲಿ ಮಧ್ಯಪ್ರವೇಶಿಸುವುದಕ್ಕೆ ನಮಗೆ ಯಾವ ಕಾರಣವೂ ಕಾಣುತ್ತಿಲ್ಲ. ಆದರೆ ಕಾಲಾವಕಾಶವು ಆಗಸ್ಟ್ 9ಕ್ಕೆ ಕೊನೆ ಆಗುತ್ತಿರುವುದರಿಂದ ಅದನ್ನು ನಾಲ್ಕು ವಾರ ವಿಸ್ತರಿಸಲಾಗಿದೆ,” ಎಂದು ಪೀಠವು ಹೇಳಿದೆ. “ಅಮೆಜಾನ್ ಮತ್ತು ಫ್ಲಿಪ್​ಕಾರ್ಟ್​ನಂಥ ಕಂಪೆನಿಗಳು ಸ್ವಯಂಪ್ರೇರಿತವಾಗಿ ವಿಚಾರಣೆಗೆ ಹೋಗಬೇಕು ಎಂದು ನಿರೀಕ್ಷೆ ಮಾಡುತ್ತೇವೆ. ಆದರೆ ನೀವು ಅದು ಕೂಡ ಬಯಸುತ್ತಿಲ್ಲವಾ? ನೀವು ಸಲ್ಲಿಕೆ ಮಾಡಲೇಬೇಕು ಹಾಗೂ ವಿಚಾರಣೆಗೆ ಅನುಮತಿಸಲೇಬೇಕು,” ಎಂದು ಭಾರತದ ಮುಖ್ಯ ನ್ಯಾಯಮೂರ್ತಿ ರಮಣ ಮೌಖಿಕವಾಗಿ ಅಹವಾಲು ಸಂದರ್ಭದಲ್ಲಿ ಹೇಳಿದ್ದಾರೆ.

ಹಿರಿಯ ವಕೀಲರಾದ ಗೋಪಾಲ್ ಸುಬ್ರಮಣಿಯಮ್ ಅಮೆಜಾನ್​ ಅನ್ನು ಪ್ರತಿನಿಧಿಸುತ್ತಿದ್ದು, ಸಿಸಿಐ ತನಿಖೆಗೆ ಅಗತ್ಯ ಇರುವ ಎರಡು ವಾಸ್ತವವನ್ನು ಸಲ್ಲಿಕೆ ಮಾಡಿದ್ದಾರೆ. ಅದರಲ್ಲಿ ಒಂದು, ಸ್ಪರ್ಧಾ ವಿರೋಧಿ ಒಪ್ಪಂದ, ಎರಡನೆಯದು, ಸ್ಪರ್ಧೆ ಮೇಲಾಗುವ ಪ್ರತಿಕೂಲ ಪರಿಣಾಮ. ಈ ಪ್ರಕರಣದಲ್ಲಿ ಎರಡೂ ಅಂಶ ಸಾಬೀತಾಗಿಲ್ಲ ಎಂದು ವಾದಿಸಿದ್ದಾರೆ. ಬುದ್ಧಿಯನ್ನು ಬಳಸದೆ ಸಿಸಿಐ ತನಿಖೆಗೆ ಆದೇಶ ನೀಡಲಾಗಿದೆ ಎಂದಿದ್ದು, ಫ್ಲಿಪ್​ಕಾರ್ಟ್​ ಪರ ವಕೀಲರಾದ ಡಾ. ಸಿಂಘ್ವಿ ಕೂಡ ಇದನ್ನೇ ತಮ್ಮ ವಾದದಲ್ಲಿ ಹೇಳಿದ್ದಾರೆ. ಸಿಸಿಐ ಅನ್ನು ಭಾರತದ ಸಾಲಿಸಿಟರ್ ಜನರಲ್ ತುಷಾರ್ ಮೆಹ್ತಾ ಹಾಗೂ ಹೆಚ್ಚುವರಿ ಸಾಲಿಸಿಟರ್ ಜನರಲ್ ಮಾಧವಿ ದಿವಾನ್ ಪ್ರತಿನಿಧಿಸಿದ್ದಾರೆ.

ಇದನ್ನೂ ಓದಿ: ಸ್ಪರ್ಧಾ ಆಯೋಗದ ತನಿಖೆಗೆ ತಡೆ ನೀಡಬೇಕೆಂಬ ಅಮೆಜಾನ್, ಫ್ಲಿಪ್​ಕಾರ್ಟ್​ ಮನವಿ ತಳ್ಳಿಹಾಕಿದ ಕರ್ನಾಟಕ ಹೈಕೋರ್ಟ್​

(Supreme Court Said Cannot Stay Enquiry Of Flipkart And Amazon Against Anti Competition Allegation By CCI )

Published On - 2:12 pm, Mon, 9 August 21