Tata Motors: ಏಪ್ರಿಲ್​ 1ರಿಂದ ಅನ್ವಯಿಸುವಂತೆ ಟಾಟಾ ಮೋಟಾರ್ಟ್​ ವಾಣಿಜ್ಯ ವಾಹನಗಳ ಬೆಲೆ ಏರಿಕೆ

ಟಾಟಾ ಮೋಟಾರ್ಸ್​ನಿಂದ ವಾಣಿಜ್ಯ ವಾಹನಗಳ ಬೆಲೆಗಳನ್ನು ಏಪ್ರಿಲ್ 1,2022ರಿಂದ ಜಾರಿಗೆ ಬರುವಂತೆ ಏರಿಕೆ ಮಾಡುವುದಾಗಿ ಘೋಷಣೆ ಮಾಡಲಾಗಿದೆ.

Tata Motors: ಏಪ್ರಿಲ್​ 1ರಿಂದ ಅನ್ವಯಿಸುವಂತೆ ಟಾಟಾ ಮೋಟಾರ್ಟ್​ ವಾಣಿಜ್ಯ ವಾಹನಗಳ ಬೆಲೆ ಏರಿಕೆ
ಸಾಂದರ್ಭಿಕ ಚಿತ್ರ
TV9kannada Web Team

| Edited By: Srinivas Mata

Mar 22, 2022 | 2:58 PM

ಟಾಟಾ ಮೋಟಾರ್ಸ್ (Tata Motors) ಮಾರ್ಚ್ 22ನೇ ತಾರೀಕಿನ ಮಂಗಳವಾರದಂದು ತನ್ನ ವಾಣಿಜ್ಯ ವಾಹನ ಶ್ರೇಣಿಯ ಬೆಲೆಗಳನ್ನು ಶೇ 2ರಿಂದ 2.5ರಷ್ಟು ಹೆಚ್ಚಿಸುವುದಾಗಿ ಘೋಷಿಸಿದ್ದು, ಇದು ಮಾಡೆಲ್ ಮತ್ತು ವೇರಿಯಂಟ್ ಅನ್ನು ಅವಲಂಬಿಸಿ ಏಪ್ರಿಲ್ 1ನೇ ತಾರೀಕಿನಿಂದ ಜಾರಿಗೆ ಬರಲಿದೆ. ವಿನಿಮಯ ಕೇಂದ್ರದಲ್ಲಿನ ತನ್ನ ಫೈಲಿಂಗ್‌ನಲ್ಲಿ, ಟಾಟಾ ಮೋಟಾರ್ಸ್ ಇದನ್ನು “ಜಾರಿಗೆ ಬರಲಿರುವ ಬೆಲೆ ಏರಿಕೆ” ಎಂದು ಕರೆದಿದೆ. ಭಾರತದ ಅತಿದೊಡ್ಡ ವಾಣಿಜ್ಯ ವಾಹನ ತಯಾರಕ ಆದ ಟಾಟಾ ಕಂಪೆನಿಯು ಉಕ್ಕು, ಅಲ್ಯೂಮಿನಿಯಂ ಮತ್ತು ಇತರ ಅಮೂಲ್ಯ ಲೋಹಗಳಂತಹ ಸರಕುಗಳ ಬೆಲೆಗಳಲ್ಲಿ ಹೆಚ್ಚಳವನ್ನು ಉಲ್ಲೇಖಿಸಿದ್ದು, ಜತೆಗೆ ಇತರ ಕಚ್ಚಾ ವಸ್ತುಗಳ ಹೆಚ್ಚಿನ ವೆಚ್ಚಗಳು ಏರಿಕೆಗೆ ಕಾರಣಗಳಾಗಿವೆ ಎಂದಿದೆ.

“ಕಂಪೆನಿಯು ಹೆಚ್ಚಿದ ವೆಚ್ಚಗಳ ಗಮನಾರ್ಹ ಭಾಗವನ್ನು ತಗ್ಗಿಸಿಕೊಳ್ಳಲು ಉತ್ಪಾದನೆಯ ವಿವಿಧ ಹಂತಗಳಲ್ಲಿ ಕ್ರಮಗಳನ್ನು ಪ್ರಾರಂಭಿಸಿದೆ. ಒಟ್ಟಾರೆ ಇನ್​ಪುಟ್ ವೆಚ್ಚಗಳಲ್ಲಿನ ತೀಕ್ಷ್ಣ ಏರಿಕೆಯು ಅದರ ಸ್ವಲ್ಪ ಭಾಗವನ್ನು ಕನಿಷ್ಠ ಪ್ರಮಾಣದ ಬೆಲೆ ಏರಿಕೆ ಮೂಲಕ ದಾಟಿಸುವುದು ಅನಿವಾರ್ಯ ಎಂಬ ಸನ್ನಿವೇಶ ನಿರ್ಮಾಣ ಆಗುವಂತೆ ಮಾಡಿದೆ,” ಎಂದು ಹೇಳಿಕೆ ತಿಳಿಸಿದೆ. ಈ ಪ್ರಕಟಣೆಯ ನಂತರ ಟಾಟಾ ಮೋಟಾರ್ಸ್ ಷೇರು ಬಿಎಸ್‌ಇಯಲ್ಲಿ 3.75 ರೂಪಾಯಿ ಅಥವಾ ಶೇ 0.88ರಷ್ಟು ಇಳಿಕೆಯಾಗಿ, 424.20 ರೂಪಾಯಿಯಲ್ಲಿ ವಹಿವಾಟು ನಡೆಸಿತು.

ಟಾಟಾ ಸಮೂಹದ ಭಾಗ ಆಗಿರುವ ಟಾಟಾ ಮೋಟಾರ್ಸ್ 34-ಬಿಲಿಯನ್ ಡಾಲರ್ ಮೌಲ್ಯದ ವಾಹನ ತಯಾರಕ – ವಾಣಿಜ್ಯ ವಾಹನಗಳ (CV) ವಿಭಾಗದಲ್ಲಿ ಅಗ್ರಸ್ಥಾನದಲ್ಲಿದೆ ಮತ್ತು ಪ್ರಯಾಣಿಕ ವಾಹನಗಳ (PV) ವಿಭಾಗದಲ್ಲಿ ಅಗ್ರ ಮೂರು ಸ್ಥಾನಗಳಲ್ಲಿದೆ. ಇದು ಎಲೆಕ್ಟ್ರಿಕ್ ವೆಹಿಕಲ್ಸ್ (ಇವಿ) ಮೇಲೆ ಸಹ ಉತ್ಸುಕವಾಗಿದೆ ಹಾಗೂ ನೀತಿ ಚೌಕಟ್ಟನ್ನು ಅಭಿವೃದ್ಧಿಪಡಿಸಲು ಸರ್ಕಾರದೊಂದಿಗೆ ಸಂಪರ್ಕದಲ್ಲಿದ್ದು, ಸಕ್ರಿಯ ಪಾತ್ರವನ್ನು ವಹಿಸುತ್ತಿದೆ.

ಟಾಟಾ ಮೋಟಾರ್ಸ್ ಭಾರತ, ಇಟಲಿ, ದಕ್ಷಿಣ ಕೊರಿಯಾ, ಅಮೆರಿಕ ಮತ್ತು ಯುನೈಟೆಡ್​ ಕಿಂಗ್​ಡಮ್​ನಲ್ಲಿ ಆರ್​ಅಂಡ್​ಡಿ ಕೇಂದ್ರಗಳನ್ನು ಹೊಂದಿದ್ದು; ಮಾರ್ಚ್ 31, 2021ರಂತೆ 103 ಅಂಗಸಂಸ್ಥೆಗಳು, ಒಂಬತ್ತು ಸಹವರ್ತಿ ಕಂಪೆನಿಗಳು, ನಾಲ್ಕು ಜಂಟಿ ಉದ್ಯಮಗಳು ಮತ್ತು ಎರಡು ಜಂಟಿ ಕಾರ್ಯಾಚರಣೆಗಳ ಜಾಗತಿಕ ನೆಟ್‌ವರ್ಕ್‌ನಿಂದ ಬೆಂಬಲಿತವಾದ ಭಾರತ, ಇಂಡೋನೇಷ್ಯಾ, ದಕ್ಷಿಣ ಆಫ್ರಿಕಾ, ದಕ್ಷಿಣ ಕೊರಿಯಾ ಮತ್ತು ಥಾಯ್ಲೆಂಡ್‌ನಲ್ಲಿ ವ್ಯವಹಾರಗಳನ್ನು ನಡೆಸುತ್ತದೆ. ಇದರ ವಾಣಿಜ್ಯ ವಾಹನ (CV)ಗಳು ಮತ್ತು ಪ್ರಯಾಣಿಕರ ವಾಹನ (PV)ಗಳನ್ನು ಆಫ್ರಿಕಾ, ಆಸ್ಟ್ರೇಲಿಯಾ, ಮಧ್ಯಪ್ರಾಚ್ಯ, ರಷ್ಯಾ, ದಕ್ಷಿಣ ಅಮೆರಿಕಾ, ದಕ್ಷಿಣ ಏಷ್ಯಾ, ಆಗ್ನೇಯ ಏಷ್ಯಾ ಮತ್ತು ಇತರ ಸಿಐಎಸ್​ ದೇಶಗಳಲ್ಲಿ ಮಾರಾಟ ಮಾಡಲಾಗುತ್ತದೆ.

ಇದನ್ನೂ ಓದಿ: Tata Motors CNG: ಟಾಟಾ ಮೋಟಾರ್ಸ್ ಟಿಯಾಗೋ, ಟಿಗೊರ್ ಸಿಎನ್​ಜಿ ಭಾರತದಲ್ಲಿ ಬಿಡುಗಡೆ; ಬೆಲೆ, ವೈಶಿಷ್ಟ್ಯ ಇತರ ವಿವರ

ತಾಜಾ ಸುದ್ದಿ

Follow us on

Related Stories

Most Read Stories

Click on your DTH Provider to Add TV9 Kannada