ಯುಪಿಐ ಬಳಕೆದಾರರ ಆ್ಯಪ್ ಆಯ್ಕೆಗಳ ಮೇಲೆ ಪ್ರಭಾವ ಬೀರುತ್ತಿವೆಯಾ ರಿವಾರ್ಡ್ಸ್, ಕ್ಯಾಷ್​​ಬ್ಯಾಕ್ ಆಫರ್​ಗಳು?

ಬೆಂಗಳೂರು, ಜುಲೈ 24: ಪ್ರತೀ ನಿತ್ಯ ಹಲವು ಕೋಟಿ ಪಾವತಿ ವಹಿವಾಟುಗಳನ್ನು ನಿರ್ವಹಿಸುತ್ತಿರುವ ಭಾರತದ ಯುಪಿಐ ಸಿಸ್ಟಂನಲ್ಲಿ ಗ್ರಾಹಕರ ವರ್ತನೆ ವಿಚಾರವಾಗಿ ಗಮನಾರ್ಹ ಸಂಗತಿಯೊಂದು ವೇದ್ಯವಾಗಿದೆ. ‘ಎಂಪವರ್ ಇಂಡಿಯಾ’ ಸಂಸ್ಥೆ ಬಿಡುಗಡೆ ಮಾಡಿದ ವರದಿಯೊಂದರ ಪ್ರಕಾರ ಯುಪಿಐ ಆ್ಯಪ್​ಗಳು ನೀಡುವ ಕ್ಯಾಷ್​ಬ್ಯಾಕ್, ರಿವಾರ್ಡ್ಸ್ ಇತ್ಯಾದಿ ಆಫರ್​ಗಳಿಗೆ ಬಳಕೆದಾರರು ಒಲವು ತೋರಿಸುತ್ತಿದ್ದಾರೆನ್ನಲಾಗಿದೆ. ಶೇ. 89 ರಷ್ಟು ಯುಪಿಐ ಬಳಕೆದಾರರು ಪಾವತಿ ಆ್ಯಪ್‌ ಅನ್ನು ಆಯ್ಕೆ ಮಾಡುವಾಗ ರಿವಾರ್ಡ್‌ಗಳು ಮತ್ತು ಕ್ಯಾಶ್‌ಬ್ಯಾಕ್‌ಗಳನ್ನು ಪ್ರಮುಖವಾಗಿ ಪರಿಗಣಿಸುತ್ತಾರೆ. ಅಷ್ಟೇ ಅಲ್ಲದೆ, ಶೇಕಡಾ 83 ರಷ್ಟು ಬಳಕೆದಾರರು ಉತ್ತಮ ರಿವಾರ್ಡ್‌ಗಳಿಗಾಗಿ ತಮ್ಮ ಹಾಲಿ ಆ್ಯಪ್‌ ಅನ್ನು ಬದಲಾಯಿಸಲು ಸಿದ್ಧರಾಗಿದ್ದಾರೆ. ಶೇ 94 ರಷ್ಟು ಜನರು ಒಂದು ಯುಪಿಐ ಆ್ಯಪ್‌ನಿಂದ ಮತ್ತೊಂದು ಆ್ಯಪ್‌ಗೆ ಬದಲಾಗುವಾಗ ರಿವಾರ್ಡ್‌ಗಳಿಗೇ ಹೆಚ್ಚಿನ ಪ್ರಾಮುಖ್ಯತೆ ನೀಡುತ್ತಾರೆ. ಶೇ. 88 ರಷ್ಟು ಬಳಕೆದಾರರು ಉತ್ತಮ ಆಫರ್‌ಗಳನ್ನು ಹುಡುಕಲು ವಿವಿಧ ಯುಪಿಐ ಆ್ಯಪ್‌ಗಳನ್ನು ಸಕ್ರಿಯವಾಗಿ ಹೋಲಿಸುತ್ತಾರೆ.

ಈ ಎಲ್ಲಾ ಅಂಕಿ-ಅಂಶಗಳು, ರಿವಾರ್ಡ್‌ಗಳು ಇನ್ನು ಮುಂದೆ ಕೇವಲ ತಾತ್ಕಾಲಿಕ ಪ್ರಚಾರದ ಕೊಡುಗೆಗಳಾಗಿ ಉಳಿದಿಲ್ಲ; ಬದಲಿಗೆ ಅವು ಗ್ರಾಹಕರು ಪಾವತಿಯ ನಿರ್ಧಾರಗಳನ್ನು ತೆಗೆದುಕೊಳ್ಳುವಲ್ಲಿ ಪ್ರಭಾವ ಬೀರುವ ಅತ್ಯಂತ ಪ್ರಮುಖ ಅಂಶವಾಗಿವೆ ಎಂಬುದನ್ನು ಎತ್ತಿ ತೋರಿಸುತ್ತವೆ. ಎಂಪವರ್ ಇಂಡಿಯಾ ಸಂಸ್ಥೆ ಪ್ರಾಥಮಿಕ ಮತ್ತು ದ್ವಿತೀಯಕ ಹಂತದ ಸಂಶೋಧನೆಗಳ ಆಧಾರದ ಮೇಲೆ ಸಿದ್ಧಪಡಿಸಿದ ಈ ವರದಿಯಲ್ಲಿ ಈ ವಿಚಾರಗಳಿವೆ.

ಬೇರೆ ಆ್ಯಪ್‌ಗಳಿಗೆ ಬದಲಾಯಿಸಿಕೊಂಡ ಬಳಕೆದಾರರ ಪೈಕಿ, ಶೇ. 59 ರಷ್ಟು ಜನರು ತಾವು ಹಿಂದಿನ ಪ್ಲಾಟ್‌ಫಾರ್ಮ್ ಅನ್ನು ತೊರೆಯಲು ‘ಕಳಪೆ ರಿವಾರ್ಡ್‌ಗಳು ಮತ್ತು ಬೆನಿಫಿಟ್ಸ್​ಗಳು’ ಪ್ರಮುಖ ಕಾರಣ ಎಂದು ಉಲ್ಲೇಖಿಸಿದ್ದಾರೆ. ಇದಕ್ಕೆ ಹೋಲಿಸಿದರೆ, ಬಳಕೆಯ ಸುಲಭತೆ (64%), ವಿಶ್ವಾಸ ಮತ್ತು ಕಸ್ಟಮರ್ ಸಪೋರ್ಟ್ ಅಂಶ (61%) ಹಾಗೂ ಪಾವತಿಯ ಸುಲಭತೆಗಾಗಿ (28%) ಆ್ಯಪ್‌ ಅನ್ನು ಬದಲಾಯಿಸಿದವರ ಸಂಖ್ಯೆಗಿಂತ ಇದು ಗಮನಾರ್ಹವಾಗಿದೆ. ಈ ಅಂಕಿ-ಅಂಶಗಳು, ಡಿಜಿಟಲ್ ಪಾವತಿ ಪ್ಲಾಟ್‌ಫಾರ್ಮ್‌ಗಳಿಗೆ ರಿವಾರ್ಡ್‌ಗಳು ಕೇವಲ ಹೊಸ ಗ್ರಾಹಕರನ್ನು ಸೆಳೆಯುವ ಸಾಧನವಾಗಿ ಉಳಿದಿಲ್ಲ; ಬದಲಿಗೆ ಅವು ಗ್ರಾಹಕರನ್ನು ತಮ್ಮಲ್ಲೇ ದೀರ್ಘಕಾಲದವರೆಗೆ ಉಳಿಸಿಕೊಳ್ಳುವಲ್ಲಿ ನಿರ್ಣಾಯಕ ಪಾತ್ರ ವಹಿಸುವ ಅಂಶವಾಗಿ ಮಾರ್ಪಟ್ಟಿವೆ ಎಂಬುದನ್ನು ಸ್ಪಷ್ಟಪಡಿಸುತ್ತವೆ.

ಈ ಸಂಶೋಧನೆಗಳ ಕುರಿತು ಪ್ರತಿಕ್ರಿಯಿಸಿದ ಎಂಪವರ್ ಇಂಡಿಯಾದ ಮಹಾನಿರ್ದೇಶಕರಾದ ಕೆ. ಗಿರಿ ಅವರು “ವಿಶ್ವದಲ್ಲೇ ಅತ್ಯುತ್ತಮ ರಿಯಲ್ ಟೈಮ್ ಪೇಮೆಂಟ್ ಇನ್​ಫ್ರಾಸ್ಟ್ರಕ್ಚರ್​ಗಳಲ್ಲಿ ಒಂದನ್ನು ಭಾರತ ನಿರ್ಮಿಸಿದೆ. ಆದರೆ, ಯುಪಿಐ ಬೆಳವಣಿಗೆಯ ಮುಂದಿನ ಹಂತವು ಹೊಸ ಗ್ರಾಹಕರ ಸೇರ್ಪಡೆಯಿಂದಲ್ಲ, ಬದಲಿಗೆ ಗ್ರಾಹಕರ ನಿರಂತರ ಒಳಗೊಳ್ಳುವಿಕೆಯಿಂದ (Inclusivity) ನಿರ್ಧರಿಸಲ್ಪಡುತ್ತದೆ. ನಮ್ಮ ಸಂಶೋಧನೆಯು ಗ್ರಾಹಕರು ಪ್ರತಿ ವಹಿವಾಟಿನಿಂದಲೂ ನೇರವಾದ ಅಥವಾ ಕಣ್ಣಿಗೆ ಕಾಣುವ ಮೌಲ್ಯವನ್ನು ನಿರೀಕ್ಷಿಸುತ್ತಿದ್ದಾರೆ ಎಂಬುದನ್ನು ತೋರಿಸುತ್ತದೆ. ಇದು ರಿವಾರ್ಡ್‌ಗಳನ್ನು ಕೇವಲ ಒಂದು ಮಾರ್ಕೆಟಿಂಗ್ ಕೊಡುಗೆಯಾಗಿ ಉಳಿಸದೆ, ಡಿಜಿಟಲ್ ಪಾವತಿ ಅನುಭವದ ಒಂದು ಅವಿಭಾಜ್ಯ ಅಂಗವನ್ನಾಗಿಸಿದೆ. ಮಾರುಕಟ್ಟೆಯಲ್ಲಿ ಪೈಪೋಟಿ ತೀವ್ರಗೊಳ್ಳುತ್ತಿರುವಂತೆ, ನಂಬಿಕಸ್ಥ ಪಾವತಿ ಅನುಭವದೊಂದಿಗೆ ಅರ್ಥಪೂರ್ಣವಾದ ದೈನಂದಿನ ಮೌಲ್ಯವನ್ನು ಒದಗಿಸುವ ಪ್ಲಾಟ್‌ಫಾರ್ಮ್‌ಗಳು ಮಾತ್ರ ಗ್ರಾಹಕರನ್ನು ತಮ್ಮಲ್ಲಿ ಉಳಿಸಿಕೊಳ್ಳುವಲ್ಲಿ ಯಶಸ್ವಿಯಾಗಲಿವೆ”ಎಂದು ಹೇಳಿದರು.

ಇದನ್ನೂ ಓದಿ: ಇಸ್ರೇಲ್​ಗೆ ಶೇ 12.5, ಭಾರತಕ್ಕೆ ಶೇ. 10 ಸುಂಕ; ಅಮೆರಿಕದ ಪರಮಮಿತ್ರ ದೇಶಕ್ಕೆ ಹೆಚ್ಚಿನ ಟ್ಯಾರಿಫ್ ಯಾಕೆ?

ಅಮೆಜಾನ್ ಪೇಗೆ ಅತ್ಯುನ್ನತ ರೇಟಿಂಗ್

ಪ್ರಮುಖ ಯುಪಿಐ ಪ್ಲಾಟ್‌ಫಾರ್ಮ್‌ಗಳು ನೀಡುವ ರಿವಾರ್ಡ್‌ಗಳ ಕುರಿತು ಗ್ರಾಹಕರು ಹೊಂದಿರುವ ತೃಪ್ತಿಯ ಮಟ್ಟವನ್ನು ಈ ಸಂಶೋಧನಾ ಫಲಿತಾಂಶಗಳು ತೋರ್ಪಡಿಸಿವೆ. ಕೆಲ ಪ್ರಮುಖ ಅಂಶಗಳು ಈ ಕೆಳಕಂಡಂತಿವೆ:

• ಅಮೆಜಾನ್ ಪೇ ಅತ್ಯುನ್ನತ ರೇಟಿಂಗ್ ಪಡೆದ ಪ್ಲಾಟ್‌ಫಾರ್ಮ್ ಆಗಿ ಹೊರಹೊಮ್ಮಿದೆ; ಇದರ ಶೇಕಡಾ 74 ರಷ್ಟು ಬಳಕೆದಾರರು ತಾವು ಪಡೆಯುವ ರಿವಾರ್ಡ್‌ಗಳ ಬಗ್ಗೆ ‘ಬಹಳ ತೃಪ್ತಿ’ ಹೊಂದಿದ್ದೇವೆ ಎಂದು ಹೇಳಿದ್ದಾರೆ
• ಫೋನ್‌ಪೇ ಮತ್ತು ಗೂಗಲ್ ಪೇ ಸಂಸ್ಥೆಗಳು ವಿಶ್ವಾಸಾರ್ಹತೆ ಹಾಗೂ ಭದ್ರತೆಗೆ ಸಂಬಂಧಿಸಿದಂತೆ ಉತ್ತಮವಾಗಿ ಕಾರ್ಯನಿರ್ವಹಿಸಿವೆ.
• ಬಳಕೆಯ ಸುಲಭತೆಯ ವಿಷಯದಲ್ಲಿ ಪೇಟಿಎಂ ಉತ್ತಮ ಅಂಕಗಳನ್ನು ಪಡೆದುಕೊಂಡಿದೆ.
• ಅಮೆಜಾನ್ ಪೇ ಬಳಕೆದಾರರ ಪೈಕಿ ಶೇ. 87 ರಷ್ಟು ಜನರು ತಾವು ಪಡೆಯುವ ರಿವಾರ್ಡ್‌ಗಳು ಮತ್ತು ಕ್ಯಾಶ್‌ಬ್ಯಾಕ್‌ಗಳ ಮೂಲಕ ಸಿಗುವ ದೈನಂದಿನ ಮೌಲ್ಯಕ್ಕಾಗಿ ಈ ಪ್ಲಾಟ್‌ಫಾರ್ಮ್ ಅನ್ನು ಆಯ್ದುಕೊಂಡಿದ್ದೇವೆ ಎಂದು ಹೇಳಿದ್ದಾರೆ;
• ರಿವಾರ್ಡ್ಸ್, ಕ್ಯಾಷ್​ಬ್ಯಾಕ್​ಗಳಿಗಾಗಿ ಗೂಗಲ್ ಪೇ ಬಳಸುವ ಗ್ರಾಹಕರ ಪ್ರಮಾಣವು ಶೇ. 73 ರಷ್ಟಿದೆ.
• ಅಮೆಜಾನ್ ಪೇ ಬಳಕೆದಾರರ ಪೈಕಿ ಶೇ. 50 ರಷ್ಟು ಜನರು ದೈನಂದಿನ ಪಾವತಿಗಳ ಮೇಲಿನ ಕ್ಯಾಶ್‌ಬ್ಯಾಕ್ ಅನ್ನು ಈ ಆ್ಯಪ್‌ ಬಳಸಲು ಪ್ರಮುಖ ಕಾರಣ ಎಂದು ಉಲ್ಲೇಖಿಸಿದ್ದಾರೆ; ಫೋನ್‌ಪೇ (38%) ಮತ್ತು ಗೂಗಲ್ ಪೇ (35%) ಬಳಕೆದಾರರಿಗೆ ಹೋಲಿಸಿದರೆ ಇದು ಗಮನಾರ್ಹವಾಗಿದೆ.
• ರಿವಾರ್ಡ್‌ಗಳನ್ನು ರಿಡೀಮ್ ಮಾಡಿಕೊಳ್ಳುವ ಸುಲಭತೆಯ ವಿಷಯದಲ್ಲಿ ಗೂಗಲ್ ಪೇ ಶೇ. 70 ಬಳಕೆದಾರರಿಂದ ಸೈ ಎನಿಸಿಕೊಂಡಿದೆ. ಫೋನ್‌ಪೇ ಮತ್ತು ಅಮೆಜಾನ್ ಪೇ (68%) ಈ ವಿಷಯದಲ್ಲಿ ಹಿಂದೆ ಬಿದ್ದಿಲ್ಲ.

ಪರಿಪಕ್ವತೆಯ ಹಂತಕ್ಕೆ ಬಂದಿರುವ ಯುಪಿಐ ಇಕೋಸಿಸ್ಟಂ

ಕೇವಲ ವಿವಿಧ ಪ್ಲಾಟ್‌ಫಾರ್ಮ್‌ಗಳ ಹೋಲಿಕೆಯನ್ನೂ ಮೀರಿ, ಭಾರತದ ಯುಪಿಐ ವ್ಯವಸ್ಥೆಯು ಈಗ ಪರಿಪಕ್ವತೆಯ ಒಂದು ಹೊಸ ಹಂತವನ್ನು ತಲುಪಿದೆ ಎಂದು ಈ ಸಂಶೋಧನಾ ಫಲಿತಾಂಶಗಳು ತೀರ್ಮಾನಿಸಿವೆ. ವಹಿವಾಟಿನ ವೇಗ, ವಿಶ್ವಾಸಾರ್ಹತೆ, ಭದ್ರತೆ ಮತ್ತು ವ್ಯಾಪಾರಿಗಳಿಂದ ಕ್ಯೂಆರ್ ಕೋಡ್ ಸ್ವೀಕೃತಿಯಂತಹ ಮೂಲಭೂತ ಸೌಲಭ್ಯಗಳು ಈಗ ಕಂಪನಿಗಳಿಗೆ ಸ್ಪರ್ಧಾತ್ಮಕ ಲಾಭಗಳನ್ನು ನೀಡುವ ವಿಶೇಷ ಮೂಲಗಳಾಗಿ ಉಳಿದಿಲ್ಲ; ಬದಲಿಗೆ ಅವು ಗ್ರಾಹಕರ ಕನಿಷ್ಠ ನಿರೀಕ್ಷೆಗಳಾಗಿ ಬದಲಾಗಿವೆ. ಆ್ಯಪ್‌ಗಳ ನಡುವಿನ ಇಂತಹ ತಾಂತ್ರಿಕ ವ್ಯತ್ಯಾಸಗಳು ಕಡಿಮೆಯಾಗುತ್ತಿರುವಂತೆ, ನಿರಂತರವಾದ, ಅರ್ಥಪೂರ್ಣವಾದ ಮತ್ತು ಬಳಸಲು ಸುಲಭವಾದ ರಿವಾರ್ಡ್‌ಗಳನ್ನು ಒದಗಿಸುವ ಮೂಲಕ ಗ್ರಾಹಕರಿಗೆ ನಿಖರವಾದ ದೈನಂದಿನ ಆರ್ಥಿಕ ಮೌಲ್ಯವನ್ನು ತಲುಪಿಸುವ ಪ್ಲಾಟ್‌ಫಾರ್ಮ್‌ಗಳ ಸಾಮರ್ಥ್ಯದ ಆಧಾರದ ಮೇಲೆಯೇ ಗ್ರಾಹಕರ ಒಲವು ಮತ್ತು ಆಯ್ಕೆಗಳು ನಿರ್ಧರಿತವಾಗುತ್ತಿವೆ.

ಇದನ್ನೂ ಓದಿ: ಏನಿದು ‘ಸೆಕ್ಷನ್ 301’? ಡೊನಾಲ್ಡ್ ಟ್ರಂಪ್ ಇದನ್ನು ಅಸ್ತ್ರವಾಗಿಸಿಕೊಂಡಿದ್ದೇಕೆ? ಒಂದೇ ತಕ್ಕಡಿಯಲ್ಲಿ ಭಾರತ, ಪಾಕಿಸ್ತಾನ

ಬಳಕೆದಾರರನ್ನು ಉಳಿಸಿಕೊಳ್ಳುವುದು ಈಗ ಸವಾಲಿನ ಕೆಲಸ

ಯುಪಿಐ ಬೆಳವಣಿಗೆಯ ಮುಂದಿನ ಹಂತವು ಹೊಸ ಗ್ರಾಹಕರ ಸೇರ್ಪಡೆಯಿಂದಲ್ಲ, ಬದಲಿಗೆ ಪ್ರಸ್ತುತ ಇರುವ ಗ್ರಾಹಕರನ್ನು ಉಳಿಸಿಕೊಳ್ಳುವ ಸಾಮರ್ಥ್ಯದಿಂದ ಮುನ್ನಡೆಯಲಿದೆ ಎಂದು ಈ ಸಂಶೋಧನೆಯು ಸೂಚಿಸುತ್ತದೆ. ಇದು ಒಂದು ಪರಿಪಕ್ವ ಹಾಗೂ ಒಳಗೊಳ್ಳುವಿಕೆಯ ಡಿಜಿಟಲ್ ಪಾವತಿ ವ್ಯವಸ್ಥೆಯನ್ನು ನಿರ್ಮಿಸಬೇಕೆಂಬ ಭಾರತೀಯ ರಿಸರ್ವ್ ಬ್ಯಾಂಕ್‌ನ ದೂರದೃಷ್ಟಿಯನ್ನು ಮತ್ತಷ್ಟು ಬಲಪಡಿಸುತ್ತದೆ. ಮಾರುಕಟ್ಟೆಯಲ್ಲಿ ಪೈಪೋಟಿ ತೀವ್ರಗೊಳ್ಳುತ್ತಿರುವಂತೆ, ಪ್ಲಾಟ್‌ಫಾರ್ಮ್‌ಗಳು ಕೇವಲ ಪಾವತಿಯ ತಾಂತ್ರಿಕ ಸೌಲಭ್ಯಗಳ ಆಧಾರದ ಮೇಲೆ ಮಾತ್ರವಲ್ಲದೆ, ಅರ್ಥಪೂರ್ಣವಾದ ರಿವಾರ್ಡ್‌ಗಳು ಮತ್ತು ಅತ್ಯುತ್ತಮ ಬಳಕೆದಾರ ಅನುಭವದ ಮೂಲಕ ಗ್ರಾಹಕರೊಂದಿಗೆ ಸಧೃಡ ಸಂಬಂಧವನ್ನು ನಿರ್ಮಿಸುವ ಮೂಲಕ ತಮ್ಮ ವಿಶಿಷ್ಟತೆಯನ್ನು ಪ್ರದರ್ಶಿಸಬೇಕಾಗುತ್ತದೆ. ಒಂದು ಆ್ಯಪ್‌ನಿಂದ ಮತ್ತೊಂದು ಆ್ಯಪ್‌ಗೆ ಬದಲಾಗಲು ಗ್ರಾಹಕರಿಗೆ ಯಾವುದೇ ಹೆಚ್ಚುವರಿ ವೆಚ್ಚ ಅಥವಾ ಶ್ರಮ ಇಲ್ಲದ ಇಂದಿನ ವ್ಯವಸ್ಥೆಯಲ್ಲಿ, ಕೇವಲ ವಹಿವಾಟನ್ನು ಮೀರಿ ನಿರಂತರವಾಗಿ ಹೆಚ್ಚುವರಿ ಆರ್ಥಿಕ ಪ್ರಯೋಜನ ಅಥವಾ ಮೌಲ್ಯವನ್ನು ಒದಗಿಸುವ ಪ್ಲಾಟ್‌ಫಾರ್ಮ್‌ಗಳು ಮಾತ್ರ ಗ್ರಾಹಕರ ದೀರ್ಘಕಾಲದ ನಿಷ್ಠೆಯನ್ನು ಉಳಿಸಿಕೊಳ್ಳಲು ಸಾಧ್ಯವಾಗುತ್ತದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

Published On - 2:12 pm, Fri, 24 July 26