ವಿಶ್ವಬ್ಯಾಂಕ್ ವರದಿ 2026: AI ಬಳಕೆಯಿಂದ ಹೋಮ್‌ವರ್ಕ್‌ನಲ್ಲಿ ಹೆಚ್ಚು ಅಂಕ, ಪರೀಕ್ಷೆಯಲ್ಲಿ ಮಾರ್ಕ್ಸ್ ಕಮ್ಮಿ!

ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ (AI) ತಂತ್ರಜ್ಞಾನವು ವಿದ್ಯಾರ್ಥಿಗಳ ಕಲಿವಿನ ಶೈಲಿಯನ್ನು ಸಂಪೂರ್ಣವಾಗಿ ಬದಲಾಯಿಸಿದೆ. ಪ್ರಪಂಚದಾದ್ಯಂತ ಲಕ್ಷಾಂತರ ವಿದ್ಯಾರ್ಥಿಗಳು ತಮ್ಮ ದಿನನಿತ್ಯದ ಅಭ್ಯಾಸ ಹಾಗೂ ಹೋಮ್‌ವರ್ಕ್‌ಗಾಗಿ ಎಐ ಉಪಕರಣಗಳನ್ನು ವ್ಯಾಪಕವಾಗಿ ಬಳಸುತ್ತಿದ್ದಾರೆ. ಭಾರತೀಯ ವಿದ್ಯಾರ್ಥಿಗಳು ಸಹ ಇದರಿಂದ ಹೊರತಾಗಿಲ್ಲ. ಆದರೆ, ಶಿಕ್ಷಣದಲ್ಲಿ ಎಐ ಬಳಕೆಯು ನಿಜವಾಗಿಯೂ ಅನುಕೂಲಕರವೇ ಅಥವಾ ಇದು ವಿದ್ಯಾರ್ಥಿಗಳ ಭವಿಷ್ಯದ ಮೇಲೆ ಕೆಟ್ಟ ಪರಿಣಾಮ ಬೀರುತ್ತಿದೆಯೇ ಎಂಬ ಚರ್ಚೆ ಜಾಗತಿಕ ಮಟ್ಟದಲ್ಲಿ ನಡೆಯುತ್ತಿದೆ.

ಈ ನಡುವೆ, ‘ವರ್ಲ್ಡ್ ಬ್ಯಾಂಕ್’ (ವಿಶ್ವಬ್ಯಾಂಕ್) ನಡೆಸಿರುವ ಹೊಸ ಅಧ್ಯಯನವೊಂದು ಅತ್ಯಂತ ಆತಂಕಕಾರಿ ಹಾಗೂ ಕುತೂಹಲಕಾರಿ ವಿಷಯವನ್ನು ಹೊರಹಾಕಿದೆ. ಎಐ ಬಳಕೆಯಿಂದ ವಿದ್ಯಾರ್ಥಿಗಳು ಹೋಮ್​​ ವರ್ಕ್​​​ ಸುಲಭವಾಗಿ ಮುಗಿಸಿ ಹೆಚ್ಚು ಅಂಕ ಪಡೆಯುತ್ತಿದ್ದಾರೆ. ಆದರೆ, ಅದೇ ವಿದ್ಯಾರ್ಥಿಗಳು ಶಾಲಾ-ಕಾಲೇಜು ಪರೀಕ್ಷೆಗಳಲ್ಲಿ ತೀವ್ರ ಹಿನ್ನಡೆ ಅನುಭವಿಸಿ ಫಲಿತಾಂಶ ಕಳೆದುಕೊಳ್ಳುತ್ತಿದ್ದಾರೆ ಎಂದು ಈ ವರದಿ ಎಚ್ಚರಿಸಿದೆ.

ಶೇ. 80 ಕ್ಕೂ ಹೆಚ್ಚು ವಿದ್ಯಾರ್ಥಿಗಳಿಂದ ಎಐ ಬಳಕೆ:

ವರ್ಲ್ಡ್ ಬ್ಯಾಂಕ್ ಇತ್ತೀಚೆಗೆ ಪ್ರಕಟಿಸಿರುವ ‘ವರ್ಲ್ಡ್ ಡೆವಲಪ್‌ಮೆಂಟ್ ರಿಪೋರ್ಟ್ 2026’ ವರದಿಯಲ್ಲಿ ಈ ಅಧ್ಯಯನದ ವಿವರಗಳನ್ನು ನೀಡಲಾಗಿದೆ. ಚೀನಾದ 7 ರಿಂದ 12 ನೇ ತರಗತಿಯ ವಿದ್ಯಾರ್ಥಿಗಳ ನಡುವೆ ನಡೆಸಲಾದ ಈ ಸುದೀರ್ಘ ಸಂಶೋಧನೆಯ ಪ್ರಕಾರ, 2022 ರಿಂದ 2025 ರ ಅವಧಿಯಲ್ಲಿ ವಿದ್ಯಾರ್ಥಿಗಳಲ್ಲಿ ಎಐ ಬಳಕೆ ಶೂನ್ಯದಿಂದ ಶೇಕಡಾ 80 ಕ್ಕೆ ಏರಿಕೆಯಾಗಿದೆ. ಮೊದಲ ಬಾರಿಗೆ ಎಐ ತಂತ್ರಜ್ಞಾನವನ್ನು ಅಧ್ಯಯನಕ್ಕಾಗಿ ಬಳಸಿದ ವಿದ್ಯಾರ್ಥಿಗಳ ಸಂಖ್ಯೆ ಈ ಅವಧಿಯಲ್ಲಿ ಭಾರೀ ಪ್ರಮಾಣದಲ್ಲಿ ಹೆಚ್ಚಾಗಿದೆ ಎಂದು ವರದಿ ತಿಳಿಸಿದೆ.

ಹೋಮ್‌ವರ್ಕ್ ಅಂಕ ಶೇ.18 ಹೆಚ್ಚಳ, ಪರೀಕ್ಷೆಯಲ್ಲಿ ಶೇ. 20 ಕುಸಿತ:

ಅಧ್ಯಯನದ ಪ್ರಕಾರ, ಶಾಲಾ ವಿದ್ಯಾರ್ಥಿಗಳು ತಮ್ಮ ಹೋಮ್‌ವರ್ಕ್ ಮತ್ತು ಅಸೈನ್‌ಮೆಂಟ್ ಪೂರ್ಣಗೊಳಿಸಲು ಎಐ ಸಹಾಯ ಪಡೆಯುತ್ತಿದ್ದಾರೆ. ಇದರಿಂದಾಗಿ ಅವರ ಹೋಮ್‌ವರ್ಕ್ ಸ್ಕೋರ್‌ನಲ್ಲಿ ಶೇಕಡಾ 18 ರಷ್ಟು ಸುಧಾರಣೆ ಕಂಡುಬಂದಿದೆ. ಆದರೆ, ಕೇವಲ ಎಐ ಮೇಲೆ ಅವಲಂಬಿತರಾದ ಕಾರಣ ವಿದ್ಯಾರ್ಥಿಗಳ ಸ್ವಯಂ ಆಲೋಚನಾ ಶಕ್ತಿ ಕುಂದಿದೆ. ಇದರ ಪರಿಣಾಮವಾಗಿ, ತರಗತಿಯಲ್ಲಿ ನಡೆಯುವ ಮಾಸಿಕ ಪರೀಕ್ಷೆಗಳಲ್ಲಿ (Monthly Exams) ವಿದ್ಯಾರ್ಥಿಗಳ ಅಂಕಗಳು ಶೇಕಡಾ 20 ರಷ್ಟು ಕುಸಿದಿವೆ.

ಅಷ್ಟೇ ಅಲ್ಲದೆ, ಎಂದಾದರೂ ಎಐ ಬಳಸಿ ಅಭ್ಯಾಸ ಮಾಡಿದ್ದ ವಿದ್ಯಾರ್ಥಿಗಳು ಕಾಲೇಜು ಪ್ರವೇಶ ಪರೀಕ್ಷೆಗಳಲ್ಲಿ (College Entrance Exams) ಶೇಕಡಾ 5 ರಿಂದ 7 ರಷ್ಟು ಕಡಿಮೆ ಅಂಕಗಳನ್ನು ಗಳಿಸಿದ್ದಾರೆ. ದೀರ್ಘಕಾಲದವರೆಗೆ ಎಐ ಬಳಸಿದವರಲ್ಲಿ ಈ ನಕಾರಾತ್ಮಕ ಪರಿಣಾಮವು ಶೇಕಡಾ 20 ರಷ್ಟಕ್ಕೆ ತಲುಪಿದೆ ಎಂದು ವರದಿ ಸ್ಪಷ್ಟಪಡಿಸಿದೆ.

ಇದನ್ನೂ ಓದಿ: ಕಾಲೇಜಿನಲ್ಲಿ ರಾತ್ರಿ ಕಾವಲುಗಾರನ ಕೆಲಸ ಮಾಡುತ್ತಲೇ ಓದಿ ಸತತ 3 ಸರ್ಕಾರಿ ಉದ್ಯೋಗ ಗಿಟ್ಟಿಸಿಕೊಂಡ ಸಾಧಕ!

“ಎಐ ಬಳಕೆಯಿಂದ ವಿದ್ಯಾರ್ಥಿಗಳು ತಮ್ಮ ಅಸೈನ್‌ಮೆಂಟ್‌ಗಳನ್ನು ವೇಗವಾಗಿ ಮತ್ತು ಉತ್ತಮವಾಗಿ ಪೂರ್ಣಗೊಳಿಸುತ್ತಿರಬಹುದು. ಆದರೆ, ವಿಷಯದ ಆಳವಾದ ಜ್ಞಾನ ಮತ್ತು ಕೌಶಲ್ಯಗಳನ್ನು (Knowledge & Skills) ಮೈಗೂಡಿಸಿಕೊಳ್ಳುವಲ್ಲಿ ಅವರು ವಿಫಲರಾಗುತ್ತಿದ್ದಾರೆ.”
— ವರ್ಲ್ಡ್ ಡೆವಲಪ್‌ಮೆಂಟ್ ರಿಪೋರ್ಟ್ 2026

ಸಮಯವೂ ದುಪ್ಪಟ್ಟು ಪೋಲು:

ಎಐ ತಂತ್ರಜ್ಞಾನವು ಸಮಯ ಉಳಿಸುತ್ತದೆ ಎಂಬ ಸಾರ್ವತ್ರಿಕ ನಂಬಿಕೆಯಿದೆ. ಆದರೆ ಈ ಅಧ್ಯಯನವು ಮತ್ತೊಂದು ವಿಚಿತ್ರ ಸತ್ಯವನ್ನು ಬಯಲು ಮಾಡಿದೆ. ಎಐ ಬಳಸಿ ಹೋಮ್‌ವರ್ಕ್ ಮಾಡುವ ವಿದ್ಯಾರ್ಥಿಗಳು ನಂತರವೂ ಅದೇ ಕೆಲಸಕ್ಕಾಗಿ ಹೆಚ್ಚುವರಿ ಸಮಯವನ್ನು ವ್ಯಯಿಸುತ್ತಿದ್ದಾರೆ. ಅಂದರೆ, ಸಾಮಾನ್ಯ ಅವಧಿಗಿಂತಲೂ ದುಪ್ಪಟ್ಟು ಸಮಯವನ್ನು ವಿದ್ಯಾರ್ಥಿಗಳು ಎಐ ಜೊತೆ ಕಳೆಯುತ್ತಿದ್ದು, ಇದು ಅವರ ನೇರ ತರಗತಿಯ ಪರೀಕ್ಷಾ ಕಾರ್ಯಕ್ಷಮತೆಯ (Class Performance) ಮೇಲೆಯೂ ಗಂಭೀರ ಪರಿಣಾಮ ಬೀರುತ್ತಿದೆ.

ಮತ್ತಷ್ಟು ಶಿಕ್ಷಣ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ