2 ಬಾರಿ ಪ್ರಿಲಿಮ್ಸ್ ಫೇಲ್, 14 ಅಂಕಗಳಲ್ಲಿ ತಪ್ಪಿದ್ದ ಐಎಎಸ್ ಕನಸು: 4ನೇ ಯತ್ನದಲ್ಲಿ ಯುಪಿಎಸ್ಸಿ 26ನೇ ರ್ಯಾಂಕ್ ಪಡೆದ ಇಷಿತಾ ಶರ್ಮಾ
ಗೋರಖ್ಪುರದ ಇಷಿತಾ ಶರ್ಮಾ ಯುಪಿಎಸ್ಸಿ ಸಿವಿಲ್ ಸೇವಾ ಪರೀಕ್ಷೆ 2025 ರಲ್ಲಿ AIR 26 ಗಳಿಸಿ ಐಎಎಸ್ ಕನಸು ನನಸಾಗಿಸಿಕೊಂಡಿದ್ದಾರೆ. ಸತತ ವೈಫಲ್ಯಗಳು, ಪ್ರಿಲಿಮ್ಸ್ ಮತ್ತು ಕೇವಲ 14 ಅಂಕಗಳಿಂದ ಐಎಎಸ್ ಅವಕಾಶ ಕೈತಪ್ಪಿದರೂ ಕುಗ್ಗದೆ ನಾಲ್ಕನೇ ಪ್ರಯತ್ನದಲ್ಲಿ ಯಶಸ್ಸು ಕಂಡರು. ಸ್ವಯಂ ಅಧ್ಯಯನ ಮತ್ತು ಕುಟುಂಬದ ಬೆಂಬಲದಿಂದ ಇದು ಸಾಧ್ಯವಾಯಿತು. ಅವರ ಕಥೆ ಲಕ್ಷಾಂತರ ಆಕಾಂಕ್ಷಿಗಳಿಗೆ ಪ್ರೇರಣೆ.
Updated on: Sep 28, 2026 | 10:04 AM
ಗೋರ್ಖ್ಪುರ, ಸೆ.28: “ಸೋಲು ಎಂಬುದು ಸಾಧನೆಯ ಹಾದಿಯಲ್ಲಿ ಬರುವ ಸಣ್ಣ ತಡೆಗೋಡೆಯಷ್ಟೇ ಹೊರತು ಅದು ಅಂತ್ಯವಲ್ಲ” ಎಂಬುದಕ್ಕೆ ಅತ್ಯುತ್ತಮ ನಿದರ್ಶನ ಉತ್ತರ ಪ್ರದೇಶದ ಗೋರ್ಖ್ಪುರ ಮೂಲದ ಇಷಿತಾ ಶರ್ಮಾ . ಎರಡು ಬಾರಿ ಪ್ರಿಲಿಮ್ಸ್ ಪರೀಕ್ಷೆಯಲ್ಲೇ ವಿಫಲರಾಗಿ, ಮೂರನೇ ಯತ್ನದಲ್ಲಿ ಕೇವಲ 14 ಅಂಕಗಳಿಂದ ಐಎಎಸ್ ಕನಸು ಕೈತಪ್ಪಿದರೂ ಕುಗ್ಗದೇ ಧೈರ್ಯದಿಂದ ಮುನ್ನುಗ್ಗಿದ ಇಷಿತಾ, ಕೊನೆಗೂ ತಮ್ಮ ನಾಲ್ಕನೇ ಯತ್ನದಲ್ಲಿ ಯುಪಿಎಸ್ಸಿ ನಾಗರಿಕ ಸೇವಾ ಪರೀಕ್ಷೆ 2025ರಲ್ಲಿ ಅಖಿಲ ಭಾರತ ಮಟ್ಟದಲ್ಲಿ 26ನೇ ರ್ಯಾಂಕ್ (AIR 26) ಗಳಿಸಿ ಐಎಎಸ್ ಅಧಿಕಾರಿಯಾಗುವ ಬಾಲ್ಯದ ಕನಸನ್ನು ನನಸು ಮಾಡಿಕೊಂಡಿದ್ದಾರೆ.
ಇಷಿತಾ ಶರ್ಮಾ ಅವರಿಗೆ ಐಎಎಸ್ ಅಧಿಕಾರಿಯಾಗಬೇಕು ಎಂಬುದು ಪದವಿ ಮುಗಿಸಿದ ನಂತರ ಬಂದ ಆಲೋಚನೆಯಲ್ಲ; ಶಾಲಾ ದಿನಗಳಿಂದಲೇ ಅವರ ಮನಸ್ಸಿನಲ್ಲಿ ಆಳವಾಗಿ ಬೇರೂರಿದ್ದ ಶ್ರೇಷ್ಠ ಕನಸಾಗಿತ್ತು. ಪಿಯುಸಿ (12ನೇ ತರಗತಿ) ಬೋರ್ಡ್ ಪರೀಕ್ಷೆಯಲ್ಲಿ ಶಾಲೆಗೆ ಟಾಪರ್ ಆಗಿದ್ದ ಇಷಿತಾ, ದೆಹಲಿ ವಿಶ್ವವಿದ್ಯಾಲಯದಿಂದ ಬಿ.ಕಾಮ್ (B.Com) ಹಾಗೂ ಎಂ.ಕಾಮ್ (M.Com) ಸ್ನಾತಕೋತ್ತರ ಪದವಿ ಪೂರ್ಣಗೊಳಿಸಿದರು.
ತಮ್ಮ ಮೊದಲ ಪ್ರಯತ್ನದಲ್ಲೇ ವಾಣಿಜ್ಯ ಶಾಸ್ತ್ರ ವಿಷಯದಲ್ಲಿ ಅತ್ಯಂತ ಕಠಿಣವೆನಿಸುವ UGC NET-JRF ಪರೀಕ್ಷೆಯಲ್ಲಿ ತೇರ್ಗಡೆಯಾಗುವ ಮೂಲಕ ತಮ್ಮ ಅಕಾಡೆಮಿಕ್ ಸಾಮರ್ಥ್ಯವನ್ನು ಸಾಬೀತುಪಡಿಸಿದ್ದರು. ಇದೇ ವಾಣಿಜ್ಯ ಶಾಸ್ತ್ರವನ್ನು ಅವರು ಯುಪಿಎಸ್ಸಿ ಪರೀಕ್ಷೆಯ ಐಚ್ಛಿಕ ವಿಷಯವನ್ನಾಗಿ (Optional Subject) ಆಯ್ಕೆ ಮಾಡಿಕೊಂಡಿದ್ದರು. ಇಷಿತಾ ಅವರ ಸಿವಿಲ್ ಸರ್ವಿಸಸ್ ಪಯಣ ಸುಲಭದ್ದಾಗಿರಲಿಲ್ಲ. ಸತತವಾಗಿ ಎದುರಾದ ಹಿನ್ನಡೆಗಳು ಅವರ ಸಹನೆಯನ್ನು ಪರೀಕ್ಷಿಸಿದ್ದವು.
ಪರೀಕ್ಷೆಯ ಮೊದಲ ಹಂತವಾದ ಪ್ರಿಲಿಮ್ಸ್ (Prelims) ಪಾಸಾಗಲು ಸಾಧ್ಯವಾಗದೆ ತೀವ್ರ ನಿರಾಸೆ ಅನುಭವಿಸಿದರು. ಸತತ ಪರಿಶ್ರಮದಿಂದ ಪ್ರಿಲಿಮ್ಸ್ ಹಾಗೂ ಮೇನ್ಸ್ ಪಾಸಾಗಿ ಇಂಟರ್ವ್ಯೂ ಹಂತ ತಲುಪಿದರೂ, ಅಂತಿಮ ಆಯ್ಕೆ ಪಟ್ಟಿಯಲ್ಲಿ ಕೇವಲ 14 ಅಂಕಗಳ ಅಂತರದಲ್ಲಿ ರ್ಯಾಂಕ್ ಕೈತಪ್ಪಿತು. ಈ ಹಂತದಲ್ಲಿ ಯಾರೇ ಆದರೂ ಮಾನಸಿಕವಾಗಿ ಕುಗ್ಗಿಹೋಗುತ್ತಿದ್ದರು. ಆದರೆ ಇಷಿತಾ ಇದನ್ನು ಸವಾಲಾಗಿ ಸ್ವೀಕರಿಸಿ, ತಮ್ಮ ತಪ್ಪುಗಳನ್ನು ಸರಿಪಡಿಸಿಕೊಂಡು ನಾಲ್ಕನೇ ಪ್ರಯತ್ನಕ್ಕೆ ದ್ವಿಗುಣ ಉತ್ಸಾಹದಿಂದ ಸಜ್ಜಾದರು.
ಯುಪಿಎಸ್ಸಿ ಎಂದರೆ ದೆಹಲಿಯ ದೊಡ್ಡ ಕೋಚಿಂಗ್ ಸೆಂಟರ್ಗಳಿಗೆ ಹೋಗಲೇಬೇಕು ಎಂಬ ಕಲ್ಪನೆಯನ್ನು ಇಷಿತಾ ಸುಳ್ಳಾಗಿಸಿದ್ದಾರೆ. ಅವರು ತಮ್ಮ ಸ್ವಂತ ಊರಾದ ಗೋರ್ಖ್ಪುರದಲ್ಲೇ ಕುಳಿತು ಸ್ವಯಂ ಅಧ್ಯಯನ ನಡೆಸಿದರು. ಶಿಸ್ತುಬದ್ಧ ಸ್ವಯಂ-ಅಧ್ಯಯನ, ಆನ್ಲೈನ್ ಮಾರ್ಗದರ್ಶನ, ಸತತ ಪುನರಾವರ್ತನೆ (Revision), ಅಣಕು ಪರೀಕ್ಷೆಗಳು ಮತ್ತು ಉತ್ತರ ಬರೆಯುವ ಅಭ್ಯಾಸ ಅವರ ಯಶಸ್ಸಿನ ಮೂಲ ಮಂತ್ರವಾಗಿತ್ತು. ತಂದೆ ಡಿ.ಕೆ. ಶರ್ಮಾ (ಬ್ಯಾಂಕ್ ಮ್ಯಾನೇಜರ್), ತಾಯಿ ಅರ್ಚನಾ ಶರ್ಮಾ (ಗೃಹಿಣಿ) ಹಾಗೂ ಸಹೋದರ ನೀಡಿದ ನಿರಂತರ ಬೆಂಬಲ ಇಷಿತಾ ಅವರ ಸುದೀರ್ಘ ಪಯಣದಲ್ಲಿ ಬಂಡೆಯಂತೆ ಜೊತೆಗಿತ್ತು.
ಇದನ್ನೂ ಓದಿ: ಸತತ 3 ಬಾರಿ ಸೋಲು…4ನೇ ಪ್ರಯತ್ನದಲ್ಲಿ IAS ಕನಸು ನನಸು ಮಾಡಿಕೊಂಡ ನೇಹಾ ಬ್ಯಾಡ್ವಾಲ್: ಯಶಸ್ಸಿನ ಸೀಕ್ರೆಟ್ ಇಲ್ಲಿದೆ!
ಇಷಿತಾ ಅವರ ಮಹಾಸಾಧನೆ (UPSC CSE 2025):
| ಪರೀಕ್ಷಾ ಹಂತ | ಗಳಿಸಿದ ಅಂಕಗಳು |
| ಲಿಖಿತ ಪರೀಕ್ಷೆ (Mains Written) | 806 ಅಂಕಗಳು |
| ವ್ಯಕ್ತಿತ್ವ ಪರೀಕ್ಷೆ (Interview/Personality Test) | 215 ಅಂಕಗಳು |
| ಒಟ್ಟು ಅಂಕಗಳು (Total Score) | 1,021 ಅಂಕಗಳು |
| ಅಖಿಲ ಭಾರತ ರ್ಯಾಂಕ್ (AIR) | 26ನೇ ರ್ಯಾಂಕ್ |
ಇಷಿತಾ ಶರ್ಮಾ ಅವರ ಈ ಯಶಸ್ಸಿನ ಕಥೆಯು, ದೇಶದ ಲಕ್ಷಾಂತರ ಯುಪಿಎಸ್ಸಿ ಆಕಾಂಕ್ಷಿಗಳಿಗೆ ಸೋಲು ಶಾಶ್ವತವಲ್ಲ, ನಿರಂತರ ಪ್ರಯತ್ನ ಮತ್ತು ಬದ್ಧತೆಯಿದ್ದರೆ ಯಶಸ್ಸು ಖಂಡಿತ ಎಂಬ ಪ್ರೇರಣಾದಾಯಿ ಸಂದೇಶವನ್ನು ನೀಡುತ್ತದೆ.
ಶಿಕ್ಷಣಕ್ಕೆ ಸಂಬಂಧಿಸಿದ ಮತ್ತಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
