NEET MDS Counselling 2021: ನೀಟ್ ಎಂಡಿಎಸ್ ಕೌನ್ಸೆಲಿಂಗ್ ಆರಂಭ; ಆನ್​ಲೈನ್​ನಲ್ಲಿ ಸೀಟ್ ಆಯ್ಕೆ ಮಾಡಿಕೊಳ್ಳುವುದು ಹೇಗೆ?

ನವದೆಹಲಿ: 2020ರಲ್ಲಿ ನಡೆಸಲಾಗಿದ್ದ ನೀಟ್ ಎಂಡಿಎಸ್​ (NEET MDS 2021) ಪರೀಕ್ಷೆಯ ಕೌನ್ಸಿಲಿಂಗ್ ಶುಕ್ರವಾರದಿಂದ (ಆ. 20) ಆರಂಭವಾಗಿದೆ. ಅಕ್ಟೋಬರ್ 10ರವರೆಗೆ ನೀಟ್ ಎಂಡಿಎಸ್ (Masters of Dental Surgery Counselling) ಕೌನ್ಸಿಲಿಂಗ್ ನಡೆಯಲಿದೆ. ನೀಟ್ ಎಂಡಿಎಸ್ ಪ್ರವೇಶಾತಿ ಕೌನ್ಸಿಲಿಂಗ್ mcc.nic.in ವೆಬ್​ಸೈಟ್ ಮೂಲಕ ನಡೆಯಲಿದೆ. ಕಳೆದ ವರ್ಷ ನೀಟ್ ಎಂಡಿಎಸ್ ಪ್ರವೇಶ ಪರೀಕ್ಷೆ ಬರೆದು ತೇರ್ಗಡೆಯಾಗಿರುವ ಅಭ್ಯರ್ಥಿಗಳು ತಮ್ಮ ಮೆರಿಟ್​ಗೆ ಅನುಗುಣವಾಗಿ ಸೀಟ್​ಗಳನ್ನು ಬುಕ್ ಮಾಡಬಹುದು.

ಆ. 25 ಮತ್ತು 26ರಂದು ಎಂಡಿಎಸ್​ ಸೀಟ್​ಗಳ ಹಂಚಿಕೆ ಪ್ರಕ್ರಿಯೆ ನಡೆಯಲಿದೆ. ಆ. 24ರೊಳಗೆ ಅಭ್ಯರ್ಥಿಗಳು ತಮ್ಮ ಸೀಟ್​ಗಳನ್ನು ಬುಕ್ ಮಾಡಿಕೊಳ್ಳಬೇಕು. ಆ. 24ಕ್ಕೆ ಮೊದಲ ಸುತ್ತಿನ ನೋಂದಣಿ ಪ್ರಕ್ರಿಯೆ ಮುಗಿಯಲಿದೆ. ನೀಟ್ ಪರೀಕ್ಷೆಯಲ್ಲಿ ತೇರ್ಗಡೆಯಾಗಿರುವ ಅಭ್ಯರ್ಥಿಗಳಿಗೆ ಆನ್​ಲೈನ್ ಮೂಲಕವೇ ಎಂಡಿಎಸ್ ಕೌನ್ಸೆಲಿಂಗ್ ನಡೆಯಲಿದೆ. ಹಾಗೇ, ಆ. 27ರಂದು ಫಲಿತಾಂಶ ಪ್ರಕಟವಾಗಲಿದೆ. ಅಭ್ಯರ್ಥಿಗಳಿಗೆ ನೀಡಲಾಗುವ ಕಾಲೇಜುಗಳಿಗೆ ಭೇಟಿ ನೀಡಿ ಆ. 28ರಿಂದ ಸೆ. 1ರೊಳಗೆ ಅಭ್ಯರ್ಥಿಗಳು ಪ್ರವೇಶ ಪಡೆಯಬಹುದು.

ಕೇಂದ್ರ ಸರ್ಕಾರವು ಎಂಡಿಎಸ್​ ಸೀಟ್​ಗೆ ಒಬಿಸಿಗೆ ಶೇ. 27ರಷ್ಟು ಮೀಸಲಾತಿ, ಆರ್ಥಿಕವಾಗಿ ಹಿಂದುಳಿದ ವರ್ಗಕ್ಕೆ (EWS) ಶೇ. 10ರಷ್ಟು ಮೀಸಲಾತಿ ನೀಡುವುದಾಗಿ ತಿಳಿಸಿದೆ.

ನೀಟ್ ಎಂಡಿಎಸ್ ಕೌನ್ಸಿಲಿಂಗ್​ಗೆ 1,000 ರೂ. ಶುಲ್ಕ ನಿಗದಿಪಡಿಸಲಾಗಿದೆ. ಎಂಡಿಎಸ್​ ಕೌನ್ಸಿಲಿಂಗ್​ನಲ್ಲಿ ಪಾಲ್ಗೊಳ್ಳಲು ಎನ್​ಬಿಎಯಿಂದ ನೀಡಲಾಗಿರುವ ಅಡ್ಮಿಟ್ ಕಾರ್ಡ್, ಫಲಿತಾಂಶ ಅಥವಾ ರ್ಯಾಂಕ್ ಲೆಟರ್, ಎಂಬಿಬಿಎಸ್​/ ಬಿಡಿಎಸ್​ನ 1, 2, 3ನೇ ಪರೀಕ್ಷೆಯ ಅಂಕ ಪಟ್ಟಿ, ಎಂಬಿಬಿಎಸ್​/ ಬಿಡಿಎಸ್ ಡಿಗ್ರಿ ಸರ್ಟಿಫಿಕೆಟ್ ನೀಡಬೇಕಾಗುತ್ತದೆ.

ಎಂಡಿಎಸ್​ ಕೌನ್ಸಿಲಿಂಗ್​ನಲ್ಲಿ ಆನ್​ಲೈನ್​ನಲ್ಲಿ ಪಾಲ್ಗೊಳ್ಳಲು ನೀವು ಮಾಡಬೇಕಾದ್ದು ಇಷ್ಟು… 1. ಕಂಪ್ಯೂಟರ್​ನಲ್ಲಿ mcc.nic.in ವೆಬ್​ಸೈಟ್ ಓಪನ್ ಮಾಡಿ. 2. ವೆಬ್​ಸೈಟ್​ನ ಹೋಂ ಪೇಜಿನಲ್ಲಿ ನೀಟ್​ ಎಂಡಿಎಸ್ 2021 (NEET MDS 2021) ಮೇಲೆ ಕ್ಲಿಕ್ ಮಾಡಿ. 3. ಆ ಹೊಸ ಪೇಜ್ ಓಪನ್ ಆಗುತ್ತದೆ. ಅಲ್ಲಿ ನಿಮ್ಮ ಲಾಗಿನ್ ಡೀಟೇಲ್​ಗಳನ್ನು ತುಂಬಿ. 4. ಹೊಸ ಪೇಜಿನಲ್ಲಿ ಅಪ್ಲಿಕೇಷನ್ ಫಾರ್ಮ್ ಓಪನ್ ಆಗುತ್ತದೆ. ಅಲ್ಲಿ ಕೇಳಿದ ಮಾಹಿತಿಗಳೊಂದಿಗೆ ಅದನ್ನು ಭರ್ತಿ ಮಾಡಿ ಎಲ್ಲ ದಾಖಲೆಗಳನ್ನೂ ಅಟ್ಯಾಚ್ ಮಾಡಿ. 5. ನೀವು ಹಾಕಿರುವ ಮಾಹಿತಿಯನ್ನು ಮರು ಪರಿಶೀಲನೆ ಮಾಡಿಕೊಳ್ಳಿ. ಬಳಿಕ ಶುಲ್ಕವನ್ನು ಪಾವತಿ ಮಾಡಿ. 6 ಶುಲ್ಕ ಪಾವತಿಸಿದ ನಂತರ ಸಬ್ಮಿಟ್ ಬಟನ್ ಒತ್ತಿರಿ.

ಅಕ್ಟೋಬರ್ 10ರವರೆಗೆ ನೀಟ್ ಎಂಡಿಎಸ್ ಕೌನ್ಸಿಲಿಂಗ್ ಪ್ರಕ್ರಿಯೆಗಳು ನಡೆಯಲಿದೆ. 2020ರ ಡಿಸೆಂಬರ್ 16ರಂದು ನೀಟ್- ಎಂಡಿಎಸ್ ಪರೀಕ್ಷೆ ನಡೆದಿತ್ತು. ಆದರೆ, ಕೊವಿಡ್​ನಿಂದಾಗಿ ಇನ್ನೂ ದಾಖಲಾತಿ ಶುರುವಾಗಿರಲಿಲ್ಲ. ಈ ಬಗ್ಗೆ ಮೆಡಿಕಲ್ ಕೌನ್ಸೆಲಿಂಗ್ ಕಮಿಟಿ ಮತ್ತು ಯೂನಿಯನ್ ಆಫ್ ಇಂಡಿಯಾ ಇಂದು ಸುಪ್ರೀಂ ಕೋರ್ಟ್​ಗೆ ಅಫಿಡವಿಟ್ ಸಲ್ಲಿಸಿತ್ತು. ಕೌನ್ಸೆಲಿಂಗ್ ವಿಳಂಬವಾಗುತ್ತಿರುವುದರಿಂದ ವಿದ್ಯಾರ್ಥಿಗಳಿಗೆ ತೊಂದರೆಯಾಗುತ್ತದೆ ಎಂದು ನ್ಯಾಯಮೂರ್ತಿ ಡಿವೈ ಚಂದ್ರಚೂಡ ಹಾಗೂ ನ್ಯಾಯಮೂರ್ತಿ ಎಂಆರ್ ಶಾ ಅವರ ನ್ಯಾಯಪೀಠ ಅಸಮಾಧಾನ ಹೊರಹಾಕಿತ್ತು. ಈ ಹಿನ್ನೆಲೆಯಲ್ಲಿ ತುರ್ತಾಗಿ ನಿನ್ನೆಯಿಂದಲೇ ಎಂಡಿಎಸ್ ಕೌನ್ಸಿಲಿಂಗ್ ಪ್ರಕ್ರಿಯೆ ಆರಂಭಿಸಲಾಗಿದೆ.

ಇದನ್ನೂ ಓದಿ: NEET 2021 Entrance Exam: ನೀಟ್ ಪರೀಕ್ಷಾ ಕೇಂದ್ರಗಳ ಪಟ್ಟಿ ಬಿಡುಗಡೆ; ಈ ಬಾರಿ ಎಕ್ಸಾಂ ಬರೆಯಲಿದ್ದಾರೆ 16 ಲಕ್ಷ ವಿದ್ಯಾರ್ಥಿಗಳು

OBC Reservation: ಒಬಿಸಿ ವಿದ್ಯಾರ್ಥಿಗಳಿಗೆ ವೈದ್ಯಕೀಯ ಶಿಕ್ಷಣದಲ್ಲಿ ಶೇ. 27ರಷ್ಟು ಮೀಸಲಾತಿ; ಕೇಂದ್ರ ಸರ್ಕಾರ ಘೋಷಣೆ

(NEET MDS Counselling 2021 How to Register in Website and Book a Seat)