‘ಪುಷ್ಪ 2’ ಟೀಸರ್​ ಬಿಡುಗಡೆಗೆ ದಿನಾಂಕ ನಿಗದಿ; ಜಾತ್ರೆಗೆ ಸಜ್ಜಾದ ಅಲ್ಲು ಅರ್ಜುನ್​ ಫ್ಯಾನ್ಸ್​

ಇನ್ಮುಂದೆ ‘ಪುಷ್ಪ 2’ ಸಿನಿಮಾ (Pushpa 2 Movie) ತಂಡದಿಂದ ಒಂದರ ಹಿಂದೊಂದು ಅಪ್​ಡೇಟ್​ ಸಿಗಲಿದೆ. ಯಾಕೆಂದರೆ, ಈ ಸಿನಿಮಾದ ಬಿಡುಗಡೆಗೆ ಉಳಿದಿರುವುದು ಕೆಲವೇ ತಿಂಗಳು ಮಾತ್ರ. ಅಲ್ಲು ಅರ್ಜುನ್​ (Allu Arjun) ಅವರು ಈ ಚಿತ್ರದಲ್ಲಿ ಪುಷ್ಪರಾಜ್​ ಎಂಬ ಪಾತ್ರ ಮಾಡುತ್ತಿದ್ದು, ಆ ಪಾತ್ರದ ಗೆಟಪ್​ ತುಂಬ ಖಡಕ್​ ಆಗಿರಲಿದೆ. ಅಲ್ಲದೇ ಅವರು ಸ್ತ್ರೀ ವೇಷದಲ್ಲೂ ಕಾಣಿಸಿಕೊಳ್ಳಲಿದ್ದಾರೆ. ಈಗಾಗಲೇ ಅದರ ಪೋಸ್ಟರ್​ ಅನಾವರಣ ಆಗಿದೆ. ಈಗ ಟೀಸರ್​ ಬಿಡುಗಡೆ ಬಗ್ಗೆ ಚಿತ್ರತಂಡದಿಂದ ಅಪ್​ಡೇಟ್​ ಸಿಕ್ಕಿದೆ. ಏಪ್ರಿಲ್​ 8ರಂದು ‘ಪುಷ್ಪ 2’ ಸಿನಿಮಾದ ಟೀಸರ್​ (Pushpa 2 Teaser) ರಿಲೀಸ್​ ಆಗಲಿದೆ.

ಏಪ್ರಿಲ್​ 8ರಂದು ಅಲ್ಲು ಅರ್ಜುನ್​ ಅವರ ಜನ್ಮದಿನ. ಹಾಗಾಗಿ ಆ ವಿಶೇಷ ದಿನದಂದು ಅಭಿಮಾನಿಗಳಿಗೆ ಟ್ರೀಟ್​ ನೀಡಲು ‘ಪುಷ್ಪ 2’ ಚಿತ್ರತಂಡದವರು ಸಜ್ಜಾಗಿದ್ದಾರೆ. ಅಂದು ಟೀಸರ್​ ಬಿಡುಗಡೆ ಆಗಲಿದೆ. ಈ ವಿಚಾರವನ್ನು ತಿಳಿಸಲು ಹೊಸ ಪೋಸ್ಟರ್​ ಹಂಚಿಕೊಳ್ಳಲಾಗಿದೆ. ಅದರಲ್ಲಿ ಗೆಜ್ಜೆ ಕಟ್ಟಿಕೊಂಡಿರುವ ಕಾಲಿನ ಚಿತ್ರ ಇದೆ. ಇದನ್ನು ನೋಡಿ ಸಿನಿಪ್ರಿಯರ ಕುತೂಹಲ ಹೆಚ್ಚಾಗಿದೆ.

ಇದನ್ನೂ ಓದಿ: ಅಟ್ಲಿ ಜೊತೆಗಿನ ಅಲ್ಲು ಅರ್ಜುನ್ ಸಿನಿಮಾಗೆ ಸಮಂತಾ ರುತ್​ ಪ್ರಭು ನಾಯಕಿ?

‘ಪುಷ್ಪ ಮಾಸ್​ ಜಾತ್ರೆ ಶುರುವಾಗಲಿ. ಬಹುನಿರೀಕ್ಷಿತ ಪುಷ್ಪ 2 ಸಿನಿಮಾದ ಟೀಸರ್​ ಏಪ್ರಿಲ್​ 8ಕ್ಕೆ ಬಿಡುಗಡೆ ಆಗಲಿದೆ. ಡಬಲ್​ ಫೈರ್​ ಜೊತೆ ಪುಷ್ಪ ಬರುತ್ತಿದ್ದಾನೆ’ ಎಂಬ ಕ್ಯಾಪ್ಷನ್​ನೊಂದಿಗೆ ‘ಪುಷ್ಪ 2’ ಸಿನಿಮಾದ ಹೊಸ ಪೋಸ್ಟರ್​ ಅನಾವರಣ ಮಾಡಲಾಗಿದೆ. ಅಲ್ಲು ಅರ್ಜುನ್​ ಅವರ ಅಭಿಮಾನಿಗಳ ವಲಯದಲ್ಲಿ ಈ ಪೋಸ್ಟರ್ ಸಖತ್​ ವೈರಲ್​ ಆಗಿದೆ. ಈಗ ಎಲ್ಲರ ಗಮನ ಏಪ್ರಿಲ್​ 8ರ ಮೇಲೆ ನೆಟ್ಟಿದೆ.

ಸುಕುಮಾರ್​ ಅವರ ನಿರ್ದೇಶನದಲ್ಲಿ ಮೂಡಿಬರುತ್ತಿರುವ ‘ಪುಷ್ಪ 2’ ಸಿನಿಮಾದಲ್ಲಿ ಅಲ್ಲು ಅರ್ಜುನ್​ ಅವರಿಗೆ ಜೋಡಿಯಾಗಿ ರಶ್ಮಿಕಾ ಮಂದಣ್ಣ ನಟಿಸುತ್ತಿದ್ದಾರೆ. ಕೆಲವೇ ದಿನಗಳ ಹಿಂದೆ ಶೂಟಿಂಗ್ ಸೆಟ್​ನಿಂದ ಅವರ ವಿಡಿಯೋ ಲೀಕ್ ಆಗಿತ್ತು. ಟೀಸರ್​ನಲ್ಲಿ ರಶ್ಮಿಕಾ ಮಂದಣ್ಣ ಕಾಣಿಸಿಕೊಳ್ಳುತ್ತಾರಾ ಎಂಬ ಕೌತುಕ ಕೂಡ ಇದೆ. ‘ಮೈತ್ರಿ ಮೂವೀ ಮೇಕರ್ಸ್​’ ನಿರ್ಮಾಣ ಸಂಸ್ಥೆಯ ಮೂಲಕ ‘ಪುಷ್ಪ 2’ ಸಿನಿಮಾ ತಯಾರಾಗುತ್ತಿದೆ. ಡಾಲಿ ಧನಂಜಯ್​, ಫಹಾದ್​ ಫಾಸಿಲ್​ ಮುಂತಾದವರು ಕೂಡ ಈ ಸಿನಿಮಾದ ಪಾತ್ರವರ್ಗದಲ್ಲಿ ಇದ್ದಾರೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.