ಮಂಜು ವಿಚಾರಕ್ಕೆ ದಿವ್ಯಾ ಸುರೇಶ್​ ಕಣ್ಣೀರಿನಲ್ಲಿ ಕೈ ತೊಳೆಯುವಂತೆ ಮಾಡಿದ ಚಕ್ರವರ್ತಿ ಚಂದ್ರಚೂಡ್​

ಚಕ್ರವರ್ತಿ ಚಂದ್ರಚೂಡ್ ಅವರು ‘ಬಿಗ್​ ಬಾಸ್​ ಕನ್ನಡ ಸೀಸನ್​ 8’ಕ್ಕೆ ಕಾಲಿಟ್ಟ ಮೊದಲ ದಿನವೇ ಎಲ್ಲರನ್ನೂ ದಂಗುಬಡಿಸಿದ್ದರು. ಆದರೆ ನಂತರದ ದಿನಗಳಲ್ಲಿ ಅವರು ಮೆತ್ತಗಾಗಿದ್ದರು. ಆದರೆ ಈಗ ಎರಡನೇ ಇನ್ನಿಂಗ್ಸ್​ಗೆ ಬಂದಿರುವ ಚಕ್ರವರ್ತಿ ಸಿಕ್ಕಾಪಟ್ಟೆ ವೈಲೆಂಟ್​ ಆಗಿದ್ದಾರೆ. ತಮ್ಮೆದುರು ನಡೆಯುತ್ತಿರುವ ನಾಟಕಗಳನ್ನು ನೇರಾನೇರ ಖಂಡಿಸುತ್ತಿದ್ದಾರೆ. ಅದಕ್ಕೆ ಮೊದಲು ಗುರಿಯಾಗಿರುವುದು ದಿವ್ಯಾ ಸುರೇಶ್​ ಮತ್ತು ಮಂಜು ಪಾವಗಡ. ಈ ಜೋಡಿಯ ಲವ್​, ಮದುವೆ ನಾಟಕದ ಬಗ್ಗೆ ಚಕ್ರವರ್ತಿ ತೀವ್ರ ಟೀಕೆ ಮಾಡಿದ್ದಾರೆ.

ಜೂ.27ರ ‘ಸೂಪರ್​ ಸಂಡೇ ವಿತ್​ ಸುದೀಪ’ ಎಪಿಸೋಡ್​ನಲ್ಲಿ ಚಕ್ರವರ್ತಿ ಚಂದ್ರಚೂಡ್​ ಅವರು ತಮ್ಮ ಅಸಮಾಧಾನವನ್ನು ಹೊರ ಹಾಕಿದರು. ಮಂಜು ಮತ್ತು ದಿವ್ಯಾ ಸುರೇಶ್​ ನಡುವಿನ ಸಂಬಂಧದ ಬಗ್ಗೆ ಅವರು ಏರುಧ್ವನಿಯಲ್ಲಿ ಆಕ್ಷೇಪ ಎತ್ತಿದರು. ಅದನ್ನು ಕೇಳಿಸಿಕೊಂಡ ದಿವ್ಯಾ ಸುರೇಶ್​ ಗಳಗಳನೆ ಅಳಲು ಆರಂಭಿಸಿದರು. ಮನೆಯವರೆಲ್ಲ ಸಮಾಧಾನ ಮಾಡಲು ಬಂದರೂ ಕೂಡ ಒಂದಷ್ಟು ಸಮಯದವರೆಗೆ ದಿವ್ಯಾ ಕಣ್ಣೀರು ನಿಲ್ಲಲೇ ಇಲ್ಲ. ‘ಇದನ್ನೆಲ್ಲ ಹ್ಯಾಂಡಲ್​ ಮಾಡಲು ನಾನು ತುಂಬ ಚಿಕ್ಕವಳು’ ಎಂದು ಅವರು ಕಂಬನಿ ಸುರಿಸಿದರು.

ಅಷ್ಟಕ್ಕೂ ದಿವ್ಯಾ-ಮಂಜು ಸಂಬಂಧದ ಬಗ್ಗೆ ಚಕ್ರವರ್ತಿ ಚಂದ್ರಚೂಡ್​ ಆಡಿದ ಮಾತುಗಳೇನು? ‘ಮಂಜು ಪಾವಗಡ ಒಂದು ಹೆಣ್ಣುಮಗಳಿಗೆ ನಿನ್ನೆ ನುಗ್ಗೆಕಾಯಿ ತಿನ್ನಿಸಿದೆ, ಇವತ್ತು ಮಾವಿನ ಹಣ್ಣು ತಿನಿಸುತ್ತಿದ್ದೇನೆ ಎಂದರೆ ಅದು ಗಂಡ-ಹೆಂಡತಿಯ ನಾಟಕ. ಬಾರೆ ಸರಸಕ್ಕೆ ಅಂತ ಯಾರೂ ಸ್ನೇಹಿತರನ್ನು ಕರೆಯುವುದಿಲ್ಲ. ದಿವ್ಯಾ ಸುರೇಶ್​ ನನ್ನ ತಂಗಿ ಆಗಿದ್ದಕ್ಕೆ ಮಂಜು ನನ್ನನ್ನು ಭಾವವನ್ನಾಗಿ ಮಾಡಿಕೊಂಡಿದ್ರು. ಅದರ ಬಗ್ಗೆ ನಾನು ಹೊರಗಡೆ ಮಾತನಾಡಿದ್ದೀನಿ. ಒಂದು ಶೋಗೋಸ್ಕರ ಈ ಮನುಷ್ಯ ಒಂದು ಹೆಣ್ಣನ್ನು ಹೇಗೆ ಹೆಂಡತಿಯಾಗಿ ಮಾಡಿಕೊಳ್ಳುತ್ತಾನೆ’ ಎಂದು ಟೀಕಿಸಿದರು.

‘ಅದು ಅವರ ಇಷ್ಟ. ಹೇಗಾದರೂ ಇರಬಹುದು. ನಾನು ಈ ಮನೆಯ ಸದಸ್ಯ ಎಂದಮೇಲೆ ನಾನು ನನ್ನ ಅಭಿಪ್ರಾಯ ಹೇಳಿದ್ದೇನೆ. ಒಂದು ಹೆಣ್ಣನ್ನು ಸರಸಕ್ಕೆ ಕರೆಯೋದು, ಮಾವಿನಹಣ್ಣಿನ ಜೋಕ್​ ಮಾಡೋದು, ಪತ್ರವಳ್ಳಿ ಅಂತ ಪದಬಳಸೋದು ನನ್ನ ತಂದೆ-ತಾಯಿ ನನಗೆ ಹೇಳಿಕೊಟ್ಟಿಲ್ಲ. ಪತ್ರವಳ್ಳಿ ಎಂದರೆ ಬೇಲಿ ಸಂದಿಯಲ್ಲಿ ನಡೆಯುವಂತಹ ಕಾಮ ಅಂತ ಅರ್ಥ. ಇದು ನಾನು ಹುಟ್ಟುಹಾಕಿದ ಪದ ಅಲ್ಲ. ಬಿಗ್​ ಬಾಸ್​ ಮನೆಯಲ್ಲಿ ಮಂಜು ಕರೆಯುತ್ತಿರುವುದು ಅದು’ ಎಂದು ಚಕ್ರವರ್ತಿ ಕೂಗಾಡಿದರು. ಈ ಮಾತುಗಳಿಂದ ದಿವ್ಯಾ ಸುರೇಶ್​ಗೆ ತುಂಬ ನೋವಾದಂತೆ ಕಂಡಿತು.

ಇದನ್ನೂ ಓದಿ:

ಚಂದ್ರಚೂಡ್​ ಮಾಜಿ ಪತ್ನಿ ಶ್ರುತಿ ವಿಚಾರ ಕೆದಕಿದ ಮಂಜು; ಬಿಗ್​ ಬಾಸ್​ನಲ್ಲಿ ನಡೆಯಿತು ಯುದ್ಧ

Bigg Boss Kannada: ಮಂಜು-ದಿವ್ಯಾ ಮದುವೆ ವಿಚಾರ ಸ್ಫೋಟ; ಸುದೀಪ್​ ಎದುರಲ್ಲೇ ಸಿಡಿದೆದ್ದ ಚಂದ್ರಚೂಡ್​