ಹೊಸ ಹೇರ್​ ಸ್ಟೈಲ್​ನಲ್ಲಿ ಕಾಣಿಸಿಕೊಂಡ ಆಮಿರ್​ ಖಾನ್​; ಅಭಿಮಾನಿಗಳಿಗೆ ಬೇರೆ ಚಿಂತೆ

ಬಾಲಿವುಡ್​ ನಟ ಆಮಿರ್​ ಖಾನ್​ (Aamir Khan) ಅವರು ಈಗ ಮೊದಲಿನಂತಿಲ್ಲ. ಅವರು ಕೈ ಹಾಕಿದ ಪ್ರಾಜೆಕ್ಟ್​ಗಳು ಗೆಲ್ಲುತ್ತಿಲ್ಲ. ಆ ಕಾರಣದಿಂದ ಅವರ ಅಭಿಮಾನಿಗಳಿಗೆ ಬೇಸರ ಆಗಿದೆ. ಆಮಿರ್​ ಖಾನ್​ ಅನೌನ್ಸ್​ ಮಾಡಲಿರುವ ಮುಂದಿನ ಸಿನಿಮಾ ಬಗ್ಗೆ ಕುತೂಹಲ ಮೂಡಿದೆ. ಹಾಗಾಗಿ ಅವರ ಪ್ರತಿ ನಡೆಯನ್ನೂ ಫ್ಯಾನ್ಸ್​ ಸೂಕ್ಷ್ಮವಾಗಿ ಗಮನಿಸುತ್ತಿದ್ದಾರೆ. ಈಗ ಆಮಿರ್​ ಖಾನ್​ ಅವರ ಹೇರ್​ ಸ್ಟೈಲ್​ (Aamir Khan Hairstyle) ಬದಲಾಗಿದೆ. ಅದನ್ನು ನೋಡಿ ಅಭಿಮಾನಿಗಳು ಬಗೆಬಗೆಯಲ್ಲಿ ಕಮೆಂಟ್​ ಮಾಡುತ್ತಿದ್ದಾರೆ. ಅವಿನಾಶ್​ ಗೋವಾರಿಕರ್​ ಬರ್ತ್​ಡೇ ಪಾರ್ಟಿಯಲ್ಲಿ ಆಮಿರ್​ ಖಾನ್​ ಕಾಣಿಸಿಕೊಂಡಿದ್ದಾರೆ. ಅವರ ವಿಡಿಯೋ (Aamir Khan Viral Video) ವೈರಲ್​ ಆಗಿದೆ.

ಅವಿನಾಶ್​ ಗೋವಾರಿಕರ್​ ಆಯೋಜಿಸಿದ್ದ ಬರ್ತ್​ಡೇ ಪಾರ್ಟಿಗೆ ಆಮಿರ್ ಖಾನ್​ ಅವರು ಸಖತ್​ ಸಿಂಪಲ್​ ಆಗಿ ಬಂದಿದ್ದಾರೆ. ಅವರ ಮುಖದಲ್ಲಿ ಹೆಚ್ಚು ಉತ್ಸಾಹ ಕಾಣಿಸಿಲ್ಲ. ಫ್ಯಾಷನ್​ ಬಗ್ಗೆಯೂ ಅವರು ತಲೆ ಕೆಡಿಸಿಕೊಂಡಿಲ್ಲ. ಸ್ಥಳದಲ್ಲಿ ಇದ್ದ ಅಭಿಮಾನಿಗಳಿಗೆ ಕೈ ಕುಲುಕಿ ಅವರು ಮುಂದೆ ಸಾಗಿದ್ದಾರೆ. ಆದಷ್ಟು ಬೇಗ ಆಮಿರ್​ ಖಾನ್​ ಅವರು ಹೊಸ ಸಿನಿಮಾ ಅನೌನ್ಸ್​ ಮಾಡಲಿ ಎಂದು ಫ್ಯಾನ್ಸ್​ ಕಾಯುತ್ತಿದ್ದಾರೆ. ಆ ಬಗ್ಗೆ ಅಪ್​ಡೇಟ್​ ತಿಳಿಯುವ ಹಂಬಲ ಉಂಟಾಗಿದೆ.

ಪ್ರತಿ ಸಿನಿಮಾಗೆ ಆಮಿರ್​ ಖಾನ್​ ಅವರು ಸಾಕಷ್ಟು ಸಮಯ ತೆಗೆದುಕೊಳ್ಳುತ್ತಾರೆ. ಆ ಕಾರಣಕ್ಕಾಗಿಯೇ ಅವರನ್ನು ಮಿಸ್ಟರ್​ ಪರ್ಫೆಕ್ಟ್​ ಅಂತ ಅಭಿಮಾನಿಗಳು ಕರೆಯೋದು. ‘ಥಗ್ಸ್​ ಆಫ್​ ಹಿಂದೂಸ್ತಾನ್​’ ಹಾಗೂ ‘ಲಾಲ್​ ಸಿಂಗ್​ ಚಡ್ಡಾ’ ಸಿನಿಮಾಗಳ ಸೋಲಿನಿಂದ ಆಮಿರ್​ ಖಾನ್​ಗೆ ಸಖತ್​ ಹಿನ್ನಡೆ ಆಗಿದೆ. ಈ ಎರಡೂ ಚಿತ್ರಗಳ ಮೇಲೆ ಅವರು ಭಾರಿ ನಿರೀಕ್ಷೆ ಇಟ್ಟುಕೊಂಡಿದ್ದರು. ಆದರೆ ಸೋಲು ಅವರ ಹೆಗಲೇರಿತು. ಆ ಬಳಿಕ ಅವರು ಡಲ್​ ಆಗಿದ್ದಾರೆ ಎಂಬುದು ಅಭಿಮಾನಿಗಳ ಭಾವನೆ. ‘ಒಂದೆರಡು ಸಿನಿಮಾ ಸೋತರೆ ಏನಾಯಿತು? ಹೀಗೇಕೆ ಡಲ್​ ಆಗಿದ್ದೀರಿ’ ಎಂದು ಅನೇಕರು ಕಮೆಂಟ್​ ಮಾಡಿದ್ದಾರೆ.

ಇದನ್ನೂ ಓದಿ: ಆಮಿರ್​ ಖಾನ್​ ಮಗಳು ಇರಾ ಖಾನ್​ ಮದುವೆ ತಯಾರಿ ಹೇಗಿದೆ?

ನಟನೆಯಿಂದ ಆಮಿರ್​ ಖಾನ್​ ಅವರು ಅಂತರ ಕಾಯ್ದುಕೊಂಡಿದ್ದರೂ ಕೂಡ ಸಿನಿಮಾ ಮೇಲಿನ ಆಸಕ್ತಿ ಕಳೆದುಕೊಂಡಿಲ್ಲ. ನಿರ್ಮಾಪಕನಾಗಿ ಅವರು ಸಕ್ರಿಯರಾಗಿದ್ದಾರೆ. ‘ಗದರ್ 2’ ಸಿನಿಮಾ ಮೂಲಕ ಸೂಪರ್​ ಸಕ್ಸಸ್​ ಕಂಡಿರುವ ಸನ್ನಿ ಡಿಯೋಲ್​ ನಟನೆಯ ಹೊಸ ಸಿನಿಮಾಗೆ ಆಮಿರ್​ ಖಾನ್​ ಬಂಡವಾಳ ಹೂಡಲಿದ್ದಾರೆ. ಈ ಸಿನಿಮಾಗೆ ‘ಲಾಹೋರ್​ 1947’ ಎಂದು ಶೀರ್ಷಿಕೆ ಇಡಲಾಗಿದೆ. ಇನ್ನು, ಆಮಿರ್​ ಖಾನ್​ ಮಗಳು ಇರಾ ಖಾನ್​ ಮದುವೆಗೂ ತಯಾರಿ ನಡೆಯುತ್ತಿದೆ. ಆ ಕೆಲಸಗಳಲ್ಲೂ ಅವರು ಬ್ಯುಸಿ ಆಗಿದ್ದಾರೆ.

ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.