ವದಂತಿಗಳು ಬಗ್ಗೆ ಅಭಿಷೇಕ್ ಬಚ್ಚನ್​ಗೆ ಭಯವೇ? ನಟ ಹೇಳೋದೇನು?

ಅಭಿಷೇಕ್ ಬಚ್ಚನ್ (Abhishek Bachchan) ಮತ್ತು ಐಶ್ವರ್ಯಾ ರೈ ನಡುವಿನ ವಿಚ್ಛೇದನ ಸುದ್ದಿ ಚಿತ್ರರಂಗಕ್ಕಾಗಲಿ ಅಥವಾ ಅಭಿಮಾನಿಗಳಿಗಾಗಲಿ ಹೊಸದೇನಲ್ಲ. ಕಳೆದ ಕೆಲವು ತಿಂಗಳುಗಳಿಂದ, ಅವರ ವೈವಾಹಿಕ ಜೀವನದಲ್ಲಿನ ಸಮಸ್ಯೆಗಳ ಬಗ್ಗೆ ಅನೇಕ ವದಂತಿಗಳು ಹಬ್ಬಿದ್ದವು. ಆದರೆ ಇಬ್ಬರೂ ಇದಕ್ಕೆ ಎಂದಿಗೂ ಪ್ರತಿಕ್ರಿಯಿಸಿಲ್ಲ. ಈಗ, ಇತ್ತೀಚಿನ ಸಂದರ್ಶನವೊಂದರಲ್ಲಿ, ಅಭಿಷೇಕ್ ಅವರು ಈ ಬಗ್ಗೆ ಬಹಿರಂಗವಾಗಿ ಹೇಳಿದ್ದಾರೆ. ಇದರೊಂದಿಗೆ, ಅವರು ಸಾಮಾಜಿಕ ಮಾಧ್ಯಮದ ಬಳಕೆಯನ್ನು ಕಡಿಮೆ ಮಾಡಿದ್ದಾರೆ ಎಂದೂ ತಿಳಿಸಿದ್ದಾರೆ.

‘ಇ ಟೈಮ್ಸ್’ ಜೊತೆಗಿನ ಈ ಸಂದರ್ಶನದಲ್ಲಿ ಅಭಿಷೇಕ್, ‘ಹೌದು, ನಾನು ಸಾಮಾಜಿಕ ಜಾಲತಾಣಗಳ ಬಳಕೆಯನ್ನು ತುಂಬಾ ಕಡಿಮೆ ಮಾಡಿದ್ದೇನೆ. ಹೆಚ್ಚಿನ ಸಾಮಾಜಿಕ ಮಾಧ್ಯಮಗಳು ನಿಮ್ಮನ್ನು ಕೆರಳಿಸಲು ಮಾತ್ರ  ಬಳಕೆ ಆಗುತ್ತದೆ. ನೀವು ಇಲ್ಲಿ ಉತ್ತಮ ಚರ್ಚೆ ನಡೆಸಲು ಸಾಧ್ಯವಿಲ್ಲ. ಸಾಮಾಜಿಕ ಜಾಲತಾಣ ಅಸ್ತಿತ್ವಕ್ಕೆ ಬಂದಾಗ, ಪರಿಸ್ಥಿತಿ ವಿಭಿನ್ನವಾಗಿತ್ತು. ಈಗ ಅದು ಹಾಗೆ ಅಲ್ಲ. ಈಗ ನಾನು ಅದನ್ನು ಕೆಲಸಕ್ಕಾಗಿ ಮಾತ್ರ ಬಳಸುತ್ತೇನೆ’ಎಂದು ಹೇಳಿದರು.

ಈ ಸಂದರ್ಶನದಲ್ಲಿ ಅಭಿಷೇಕ್ ಅವರನ್ನು ಸಾಮಾಜಿಕ ಮಾಧ್ಯಮದಲ್ಲಿ ಟ್ರೋಲಿಂಗ್ ಅಥವಾ ನಕಲಿ ಸುದ್ದಿಗಳು ಅವರ ಮೇಲೆ ಪರಿಣಾಮ ಬೀರುತ್ತವೆಯೇ ಎಂದು ಕೇಳಲಾಯಿತು. ಇದಕ್ಕೆ ಅವರು, “ತಪ್ಪು ಮಾಹಿತಿ ಅಥವಾ ಸುಳ್ಳು ಮಾಹಿತಿಯನ್ನು ಹರಡುವ ವ್ಯಕ್ತಿಗೆ ತಪ್ಪುಗಳನ್ನು ಸ್ಪಷ್ಟಪಡಿಸುವ ಅಥವಾ ಸರಿಪಡಿಸುವ ಆಸಕ್ತಿ ಇರುವುದಿಲ್ಲ. ನನ್ನ ಬಗ್ಗೆ ಈ ಹಿಂದೆ ಹೇಳಲಾದ ವಿಷಯಗಳು ನನ್ನ ಮೇಲೆ ಯಾವುದೇ ಪರಿಣಾಮ ಬೀರಲಿಲ್ಲ. ಆದರೆ ಇಂದು ನನಗೆ ಒಂದು ಕುಟುಂಬವಿದೆ. ನಾನು ಏನನ್ನಾದರೂ ಸ್ಪಷ್ಟಪಡಿಸಿದರೂ ಅದನ್ನು ತಪ್ಪಾಗಿ ಅರ್ಥೈಸಲಾಗುತ್ತದೆ. ಏಕೆಂದರೆ ನಕಾರಾತ್ಮಕ ಸುದ್ದಿಗಳು ಹೆಚ್ಚು ಮಾರಾಟವಾಗುತ್ತವೆ’ ಎಂದಿದ್ದಾರೆ ಅವರು.

ಇದನ್ನೂ ಓದಿ:ಯೂರೋಪ್​​ನಲ್ಲಿ ಬೈಕ್​​ ರೈಡಿಂಗ್ ಮಾಡಿದ ಬಾಲಿವುಡ್ ನಟರು

‘ನೀವು ನನ್ನ ಜೀವನವನ್ನು ನಡೆಸುತ್ತಿಲ್ಲ. ಆದ್ದರಿಂದ ನಾನು ಆ ಜನರಿಗೆ ವಿವರಣೆ ಅಥವಾ ಯಾವುದೇ ಉತ್ತರವನ್ನು ನೀಡಲು ಬದ್ಧನಲ್ಲ. ಅಂತಹ ನಕಾರಾತ್ಮಕತೆಯನ್ನು ಹರಡುವವರು ತಮ್ಮ ಆಂತರಿಕ ಆತ್ಮದೊಂದಿಗೆ ಬದುಕಬೇಕು. ಅವರು ತಮ್ಮ ಆಂತರಿಕ ಆತ್ಮವನ್ನು ಎದುರಿಸಬೇಕು, ಅವರು ಉತ್ತರಿಸಬೇಕು. ನಾನು ಈ ಸುದ್ದಿಗಳಿಂದ ಪ್ರಭಾವಿತನಾಗಿಲ್ಲ’ ಎಂದು ಅಭಿಷೇಕ್ ಈ ಮಾತುಗಳಲ್ಲಿ ವ್ಯಕ್ತಪಡಿಸಿದರು.

ಅಭಿಷೇಕ್ ಬಚ್ಚನ್ ಪ್ರಸ್ತುತ ತಮ್ಮ ‘ಕಾಳಿಧರ್ ಲಪಟ’ ಚಿತ್ರಕ್ಕಾಗಿ ಸುದ್ದಿಯಲ್ಲಿದ್ದಾರೆ. ಈ ಚಿತ್ರವು ಜುಲೈ 4 ರಂದು OTT ಪ್ಲಾಟ್‌ಫಾರ್ಮ್ Zee5 ನಲ್ಲಿ ಬಿಡುಗಡೆಯಾಗಲಿದೆ. ಅವರು ಕಳೆದ ಕೆಲವು ದಿನಗಳಿಂದ ಚಿತ್ರದ ಪ್ರಚಾರದಲ್ಲಿ ತೊಡಗಿದ್ದಾರೆ. ಇದಲ್ಲದೆ, ಅವರು ಇತ್ತೀಚೆಗೆ ಜೂನ್ 30 ರಂದು ಚಲನಚಿತ್ರೋದ್ಯಮದಲ್ಲಿ 25 ವರ್ಷಗಳನ್ನು ಪೂರೈಸಿದ್ದಾರೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ