ಕನ್ನಡದ ನಿರ್ದೇಶಕನ ಜೊತೆ ಅಜಯ್​ ದೇವಗನ್​ ಸಿನಿಮಾ? ನಡೆಯುತ್ತಿದೆ ಮಾತುಕಥೆ

ಬಾಲಿವುಡ್​ನ ಸ್ಟಾರ್​ ನಟ ಅಜಯ್​ ದೇವಗನ್​ (Ajay Devgn) ಅವರು ಸಿಕ್ಕಾಪಟ್ಟೆ ಬ್ಯುಸಿ ಆಗಿದ್ದಾರೆ. ಬ್ಯಾಕ್​ ಟು ಬ್ಯಾಕ್​ ಸಿನಿಮಾಗಳನ್ನು ಒಪ್ಪಿಕೊಳ್ಳುತ್ತಿದ್ದಾರೆ. ವಿಶೇಷ ಏನೆಂದರೆ, ಈಗ ಅವರು ಕನ್ನಡದ ನಿರ್ದೇಶಕನ ಜೊತೆ ಮಾತುಕಥೆ ನಡೆಸುತ್ತಿದ್ದಾರೆ ಎನ್ನಲಾಗಿದೆ. ಮುಂದಿನ ಸಿನಿಮಾ (Ajay Devgn Upcoming Movie) ಸಲುವಾಗಿ ಈ ಮೀಟಿಂಗ್​ ನಡೆದಿದೆ. ಕನ್ನಡದ ನಿರ್ದೇಶಕ ಹೇಳಿದ ಕಥೆ ಕೂಡ ಅಜಯ್​ ದೇವಗನ್​ ಅವರಿಗೆ ಇಷ್ಟ ಆಗಿದೆ. ಎಲ್ಲವೂ ಅಂದುಕೊಂಡಂತೆ ನಡೆದರೆ ಶೀಘ್ರದಲ್ಲೇ ಅವರಿಂದ ಗ್ರೀನ್​ ಸಿಗ್ನಲ್​ ಸಿಗಲಿದೆ. ಅಷ್ಟಕ್ಕೂ ಆ ಕನ್ನಡದ ನಿರ್ದೇಶಕ ಯಾರು? ಜಗನ್ ಶಕ್ತಿ! ಹೌದು, ಜಗನ್​ ಶಕ್ತಿ (Jagan Shakti) ಮತ್ತು ಅಜಯ್​ ದೇವಗನ್​ ಅವರು ಹೊಸ ಸಿನಿಮಾ ಕುರಿತು ಈಗಾಗಲೇ ಒಂದು ಸುತ್ತಿನ ಮಾತುಕಥೆ ನಡೆಸಿದ್ದಾರೆ ಎನ್ನಲಾಗಿದೆ.

ಜಗನ್​ ಶಕ್ತಿ ಅವರು ಅಪ್ಪಟ ಕನ್ನಡದ ಪ್ರತಿಭೆ. ಬೆಂಗಳೂರಿನಲ್ಲಿ ಬೆಳೆದ ಅವರು ತುಂಬ ಚೆನ್ನಾಗಿ ಕನ್ನಡ ಮಾತನಾಡುತ್ತಾರೆ. ಆದರೆ ಅವರು ವೃತ್ತಿಜೀವನ ಆರಂಭಿಸಿದ್ದು ಬಾಲಿವುಡ್​ನಲ್ಲಿ. ನಿರ್ದೇಶಕ ಆರ್​. ಬಾಲ್ಕಿ ಜೊತೆ ಸಹಾಯಕ ನಿರ್ದೇಶಕನಾಗಿ ಕೆಲಸ ಮಾಡಿದ ಅನುಭವ ಜಗನ್​ ಶಕ್ತಿ ಅವರಿಗೆ ಇತ್ತು. ಬಳಿಕ ಅವರು ‘ಮಿಷನ್​ ಮಂಗಲ್​’ ಸಿನಿಮಾಗೆ ನಿರ್ದೇಶನ ಮಾಡಿ ದೊಡ್ಡ ಗೆಲುವು ಕಂಡರು.

ಜಗನ್​ ಶಕ್ತಿ

‘ಮಿಷನ್​ ಮಂಗಲ್​’ ಸಿನಿಮಾ ತೆರೆಕಂಡಿದ್ದು 2019ರಲ್ಲಿ. ಈಗ ದೊಡ್ಡ ಗ್ಯಾಪ್​ ಬಳಿಕ ಅವರು ಅಜಯ್​ ದೇವಗನ್​ ಜೊತೆ ಸಿನಿಮಾ ಮಾಡಲು ತೀರ್ಮಾನಿಸಿದ್ದಾರೆ ಎನ್ನಲಾಗಿದೆ. ಕಥೆ, ಪಾತ್ರ ಎಲ್ಲವೂ ಒಪ್ಪಿಗೆಯಾದರೆ ಅಜಯ್​ ದೇವಗನ್​ ಅವರು ಈ ಸಿನಿಮಾದಲ್ಲಿ ನಟಿಸುವುದರ ಜೊತೆಗೆ ನಿರ್ಮಾಣವನ್ನು ಕೂಡ ಮಾಡಲಿದ್ದಾರೆ ಎಂದು ಕೆಲವು ಮಾಧ್ಯಮಗಳು ವರದಿ ಮಾಡಿವೆ.

ಇದನ್ನೂ ಓದಿ: IPL ಪ್ರಸಾರದ ವೇಳೆ ಜಾಹೀರಾತು; ಮುಂಚೂಣಿಯಲ್ಲಿ ಶಾರುಖ್​, ಅಜಯ್​ ದೇವಗನ್​

ಮೊದಲ ಸಿನಿಮಾ ‘ಮಿಷನ್​ ಮಂಗಲ್​’ನಲ್ಲಿ ಕನ್ನಡಿಗ ಜಗನ್​ ಶಕ್ತಿ ಅವರು ಮಂಗಳಯಾನದ ಕಥೆಯನ್ನು ಆಯ್ಕೆ ಮಾಡಿಕೊಂಡಿದ್ದರು. ಈಗ ಅವರು ಅಜಯ್​ ದೇವಗನ್​ ಜೊತೆ ಮಾಡುವ ಸಿನಿಮಾ ಯಾವ ಶೈಲಿಯಲ್ಲಿ ಇರಲಿದೆ ಎಂಬುದು ಸದ್ಯಕ್ಕೆ ರಿವೀಲ್​ ಆಗಿಲ್ಲ. ‘ಮಿಷನ್​ ಮಂಗಲ್​’ ಸಿನಿಮಾ ಸೂಪರ್​ ಹಿಟ್​ ಆಗಿತ್ತು. ಬಾಕ್ಸ್​ ಆಫೀಸ್​ನಲ್ಲಿ 200 ಕೋಟಿ ರೂಪಾಯಿ ಗಳಿಸಿತ್ತು. ಹಾಗಾಗಿ ಜಗನ್​ ಶಕ್ತಿ ಅವರ ಮೇಲೆ ಜನರಿಗೆ ಒಂದು ಭರವಸೆ ಇದೆ. ಅಜಯ್​ ದೇವಗನ್​ ಜೊತೆ ಅವರು ಕೈ ಜೋಡಿಸುವ ಸಾಧ್ಯತೆ ಇದೆ ಎಂಬ ಸುದ್ದಿಯನ್ನು ಕೇಳಿ ಅಭಿಮಾನಿಗಳಿಗೆ ಖುಷಿ ಆಗಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.