ಬಾಬಿ ಡಿಯೋಲ್ ಜನ್ಮದಿನ: 2023ರಲ್ಲಿ 3 ಸೂಪರ್ ಹಿಟ್ ಚಿತ್ರ ನೀಡಿದ ತಂದೆ-ಮಕ್ಕಳು
ಬಾಬಿ ಡಿಯೋಲ್ ಅವರ ಸಹೋದರ ಸನ್ನಿ ಡಿಯೋಲ್ ಹಾಗೂ ತಂದೆ ಧರ್ಮೇಂದ್ರ ಅವರು ಬಾಲಿವುಡ್ನಲ್ಲಿ ತಮ್ಮದೇ ಛಾಪು ಮೂಡಿಸಿದ್ದಾರೆ. ಕಳೆದ ವರ್ಷ ಈ ಮೂವರಿಗೂ ಯಶಸ್ಸು ಸಿಕ್ಕಿತ್ತು. ಹಾಗಾಗಿ ಅವರ ಡಿಮ್ಯಾಂಡ್ ಹೆಚ್ಚಾಗಿದೆ. ಅದೇ ಖುಷಿಯಲ್ಲಿ ಈಗ ಬಾಬಿ ಡಿಯೋಲ್ ಅವರ ಜನ್ಮದಿನವನ್ನು ಸಂಭ್ರಮದಿಂದ ಆಚರಿಸಲಾಗಿದೆ.
ಬಾಲಿವುಡ್ ನಟ ಬಾಬಿ ಡಿಯೋಲ್ (Bobby Deol) ಅವರಿಗೆ ಇಂದು (ಜನವರಿ 27) ಜನ್ಮದಿನದ (Bobby Deol Birthday) ಸಂಭ್ರಮ. ಈ ಖುಷಿಯಲ್ಲಿ ಅವರ ಸಹೋದರ ಸನ್ನಿ ಡಿಯೋಲ್ (Sunny Deol) ವಿಶ್ ಮಾಡಿದ್ದಾರೆ. ತಮ್ಮನ ಫೋಟೋವನ್ನು ಹಂಚಿಕೊಂಡು ಅವರು ಹುಟ್ಟುಹಬ್ಬಕ್ಕೆ ಶುಭ ಕೋರಿದ್ದಾರೆ. ಅಲ್ಲದೇ ತಂದೆ ಧರ್ಮೇಂದ್ರ ಜೊತೆಗೆ ತಾವಿಬ್ಬರೂ ಇವರು ಫೋಟೋವನ್ನು ಕೂಡ ಸನ್ನಿ ಡಿಯೋಲ್ ಅವರು ಶೇರ್ ಮಾಡಿಕೊಂಡಿದ್ದಾರೆ. ಬಾಲಿವುಡ್ನಲ್ಲಿ ಈ ತಂದೆ-ಮಕ್ಕಳು ತಮ್ಮದೇ ಛಾಪು ಮೂಡಿಸಿದ್ದಾರೆ. 2023ರಲ್ಲಿ ಈ ಮೂವರು ಕೂಡ ಸೂಪರ್ ಹಿಟ್ ಸಿನಿಮಾಗಳನ್ನು ನೀಡಿದ್ದಾರೆ. ಆ ಕಾರಣದಿಂದ ಅವರ ಕುಟುಂಬದಲ್ಲಿ ಸಂಭ್ರಮ ಮನೆ ಮಾಡಿದೆ. ಅದೇ ಖುಷಿಯಲ್ಲಿ ಸನ್ನಿ ಡಿಯೋಲ್ ಅವರ ಹುಟ್ಟುಹಬ್ಬ ಆಚರಿಸಲಾಗುತ್ತಿದೆ.
2023ರ ಡಿಸೆಂಬರ್ 1ರಂದು ‘ಅನಿಮಲ್’ ಸಿನಿಮಾ ತೆರೆಕಂಡಿತು. ಆ ಚಿತ್ರದಲ್ಲಿ ಅಬ್ರಾರ್ ಹಖ್ ಎಂಬ ಪಾತ್ರದಲ್ಲಿ ಬಾಬಿ ಡಿಯೋಲ್ ನಟಿಸಿದರು. ಒಂದೇ ಒಂದು ಡೈಲಾಗ್ ಇಲ್ಲದ ಆ ಪಾತ್ರವನ್ನು ಅವರು ತುಂಬ ಚೆನ್ನಾಗಿ ನಿಭಾಯಿಸಿದರು. ಜನವರಿ 26ರಂದು ಆ ಸಿನಿಮಾ ಒಟಿಟಿಯಲ್ಲಿ ವೀಕ್ಷಣೆಗೆ ಲಭ್ಯವಾಗಿದೆ. ಬಾಬಿ ಡಿಯೋಲ್ ಅವರ ಜನ್ಮದಿನದ ಸಂದರ್ಭದಲ್ಲೇ ‘ಅನಿಮಲ್’ ಒಟಿಟಿಗೆ ಬಂದಿರುವುದು ವಿಶೇಷ.
ತಮ್ಮನ ಜನ್ಮದಿನದಂದು ಸನ್ನಿ ಡಿಯೋಲ್ ಅವರು ಮನಸಾರೆ ಹಾರೈಸಿದ್ದಾರೆ. ಸನ್ನಿ ಡಿಯೋಲ್ ಅವರಿಗೂ ಕಳೆದ ವರ್ಷ ಆಶಾದಾಯಕ ಆಗಿತ್ತು. ಅವರು ನಟಿಸಿದ ‘ಗದರ್ 2’ ಸಿನಿಮಾ ಸೂಪರ್ ಹಿಟ್ ಆಯಿತು. ಗಲ್ಲಾಪೆಟ್ಟಿಗೆಯಲ್ಲಿ 500 ಕೋಟಿ ರೂಪಾಯಿಗೂ ಹೆಚ್ಚು ಕಲೆಕ್ಷನ್ ಮಾಡಿ ಗಮನ ಸೆಳೆಯಿತು. ‘ಗದರ್ 2’ ಗೆಲುವಿನ ಬಳಿಕ ಸನ್ನಿ ಡಿಯೋಲ್ ಅವರ ಬೇಡಿಕೆ ಡಬಲ್ ಆಗಿದೆ. ಹೊಸ ಹೊಸ ಸಿನಿಮಾಗಳ ಆಫರ್ ಅವರಿಗೆ ಸಿಗುತ್ತಿದೆ.
ಇದನ್ನೂ ಓದಿ: ‘ಆ ಸೀನ್ ಇಲ್ಲ’: ಒಟಿಟಿಯಲ್ಲಿ ‘ಅನಿಮಲ್’ ಸಿನಿಮಾ ನೋಡಿದ ಪ್ರೇಕ್ಷಕರಿಗೆ ಬೇಸರ
ಸನ್ನಿ ಡಿಯೋಲ್ ಮತ್ತು ಬಾಬಿ ಡಿಯೋಲ್ ಅವರ ತಂದೆ ಧರ್ಮೇಂದ್ರ ಕೂಡ 2023ರಲ್ಲಿ ದೊಡ್ಡ ಗೆಲುವು ಕಂಡರು. ಅವರು ನಟಿಸಿದ ‘ರಾಕಿ ಔರ್ ರಾಣಿ ಕಿ ಪ್ರೇಮ್ ಕಹಾನಿ’ ಸಿನಿಮಾ ಜನಮೆಚ್ಚುಗೆ ಗಳಿಸಿತು. ಗಲ್ಲಾಪೆಟ್ಟಿಗೆಯಲ್ಲಿ ನೂರಾರು ಕೋಟಿ ರೂಪಾಯಿ ಕಲೆಕ್ಷನ್ ಮಾಡಿದ ಈ ಸಿನಿಮಾದಲ್ಲಿ ಧರ್ಮೇಂದ್ರ ಅವರಿಗೆ ಒಂದು ಮುಖ್ಯ ಪಾತ್ರವಿತ್ತು. ಒಟ್ಟಿನಲ್ಲಿ ಈ ತಂದೆ-ಮಕ್ಕಳ ಸಿನಿಮಾಗಳು ಯಶಸ್ಸು ಕಂಡಿರುವುದರಿಂದ ಧರ್ಮೇಂದ್ರ ಅವರ ಕುಟುಂಬಕ್ಕೆ ಈಗ ಒಳ್ಳೆಯ ಕಾಲ ಬಂದಿದೆ.
ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ