ದಾಖಲೆ ಬರೆದ ಹೆಣ್ಮಕ್ಕಳು; ‘ಕ್ರೂ’ ಸಿನಿಮಾ ಕಲೆಕ್ಷನ್​ ಕಂಡು ಬೆರಗಾದ ಬಾಲಿವುಡ್​

ನಾಯಕಿ ಪ್ರಧಾನ ಸಿನಿಮಾಗಳು ಬಾಕ್ಸ್​ ಆಫೀಸ್​ನಲ್ಲಿ ಮೋಡಿ ಮಾಡಿದ್ದು ಕಡಿಮೆ. ಅಪರೂಪಕ್ಕೆ ಎಂಬಂತೆ ಬಾಲಿವುಡ್​ನ ‘ಕ್ರೂ’ ಸಿನಿಮಾ (Crew Movie) ಮ್ಯಾಜಿಕ್​ ಮಾಡಿದೆ. ಮಾರ್ಚ್​ 29ರಂದು ಬಿಡುಗಡೆ ಆದ ಈ ಸಿನಿಮಾಗೆ ಫ್ಯಾನ್ಸ್​ ಮೆಚ್ಚುಗೆ ಸೂಚಿಸಿದ್ದಾರೆ. ಕರೀನಾ ಕಪೂರ್​ ಖಾನ್​ (Kareena Kapoor Khan), ಟಬು, ಕೃತಿ ಸನೋನ್ ಅವರು ಈ ಸಿನಿಮಾದಲ್ಲಿ ಮುಖ್ಯ ಭೂಮಿಕೆ ನಿಭಾಯಿಸಿದ್ದಾರೆ. ಮೊದಲ ದಿನ ‘ಕ್ರೂ’ ಸಿನಿಮಾ 10.28 ಕೋಟಿ ರೂಪಾಯಿ ಕಲೆಕ್ಷನ್​ (Crew Movie Collection) ಮಾಡಿದೆ. ವಿದೇಶದ ಗಳಿಕೆಯನ್ನೂ ಸೇರಿಸಿದರೆ ಮೊದಲ ದಿನವೇ 20.07 ಕೋಟಿ ರೂಪಾಯಿ ಆಗಿದೆ. ಮಹಿಳೆಯರೇ ಪ್ರಮುಖ ಪಾತ್ರದಲ್ಲಿ ನಟಿಸಿದ ಸಿನಿಮಾಗೆ ಮೊದಲ ದಿನ ಈ ಪರಿ ಕಲೆಕ್ಷನ್​ ಆಗಿದ್ದು ಇದೇ ಮೊದಲು. ಆ ಮೂಲಕ ಬಾಲಿವುಡ್​ ಬಾಕ್ಸ್​ ಆಫೀಸ್​ನಲ್ಲಿ ‘ಕ್ರೂ’ ಸಿನಿಮಾ ದಾಖಲೆ ಬರೆದಿದೆ.

ಕಾಮಿಡಿ ಕಥಾಹಂದರವನ್ನು ‘ಕ್ರೂ’ ಸಿನಿಮಾ ಹೊಂದಿದೆ. ಗಗನ ಸಖಿಯರ ಪಾತ್ರದಲ್ಲಿ ಕೃತಿ ಸನೋನ್​, ಟಬು ಹಾಗೂ ಕರೀನಾ ಕಪೂರ್​ ಅವರು ನಟಿಸಿದ್ದಾರೆ. ಟ್ರೇಲರ್ ನೋಡಿದಾಗಲೇ ಸಿನಿಪ್ರಿಯರಿಗೆ ಈ ಸಿನಿಮಾ ಮೇಲೆ ನಿರೀಕ್ಷೆ ಮೂಡಿತ್ತು. ಮೊದಲ ದಿನ ಮುಗಿಬಿದ್ದು ಜನರು ಈ ಸಿನಿಮಾ ನೋಡಿದ್ದಾರೆ. ಅದರ ಪರಿಣಾಮವಾಗಿ ಉತ್ತಮ ಓಪನಿಂಗ್​ ಸಿಕ್ಕಿದೆ. ಎರಡನೇ ದಿನ ಕೂಡ ಈ ಸಿನಿಮಾದ ಗಳಿಕೆಯಲ್ಲಿ ಏರಿಕೆ ಆಗಿದೆ.

ಇದನ್ನೂ ಓದಿ: ಯಶ್​ ಸಹೋದರಿ ಪಾತ್ರದಲ್ಲಿ ಕರೀನಾ ಕಪೂರ್​? ‘ಟಾಕ್ಸಿಕ್​’ ಚಿತ್ರದ ಬಗ್ಗೆ ಬಿಗ್ ನ್ಯೂಸ್​

ಎರಡನೇ ದಿನವಾದ ಶನಿವಾರ (ಮಾರ್ಚ್​ 30) ‘ಕ್ರೂ’ ಸಿನಿಮಾದ ಬಿಸ್ನೆಸ್​ ಏರಿಕೆ ಕಂಡಿದೆ. 2ನೇ ದಿನ ಈ ಸಿನಿಮಾಗೆ 10.87 ಕೋಟಿ ರೂಪಾಯಿ ಕಲೆಕ್ಷನ್​ ಆಗಿದೆ. ಇದು ಸಿನಿಮಾ ತಂಡದ ಖುಷಿಗೆ ಕಾರಣ ಆಗಿದೆ. ಭಾನುವಾರ (ಮಾರ್ಚ್​ 31) ಕೂಡ ಅನೇಕ ಕಡೆಗಳಲ್ಲಿ ಹೌಸ್​ಫುಲ್​ ಪ್ರದರ್ಶನ ಕಾಣುತ್ತಿದೆ. ಸಿನಿಮಾದಲ್ಲಿನ ಕಾಮಿಡಿಗೆ ಜನರು ಮೆಚ್ಚುಗೆ ಸೂಚಿಸುತ್ತಿದ್ದಾರೆ. ಒಟ್ಟು ಕಲೆಕ್ಷನ್​ ಎಷ್ಟಾಗಲಿದೆ ಎಂಬುದನ್ನು ತಿಳಿಯುವ ಕೌತುಕ ಎಲ್ಲರಲ್ಲೂ ಮೂಡಿದೆ.

ಇದನ್ನೂ ಓದಿ: ‘ಮತ್ತೆ ನಾನು ಅಷ್ಟು ತೆಳ್ಳಗಾಗಲ್ಲ’: ನಿರ್ಧಾರದ ಜೊತೆ ಕಾರಣ ತಿಳಿಸಿದ ಕರೀನಾ

ಚೆನ್ನೈ, ಬೆಂಗಳೂರು, ಮುಂಬೈ, ಹೈದರಾಬಾದ್​ ಮುಂತಾದ ಕಡೆಗಳಲ್ಲಿ ‘ಕ್ರೂ’ ಸಿನಿಮಾಗೆ ಉತ್ತಮ ಪ್ರತಿಕ್ರಿಯೆ ಸಿಗುತ್ತಿದೆ. ವೀಕೆಂಡ್​ನಲ್ಲಿ ಜನರು ಈ ಸಿನಿಮಾ ನೋಡಿ ಎಂಜಾಯ್​ ಮಾಡುತ್ತಿದ್ದಾರೆ. ಭಾರತದ ಬಾಕ್ಸ್​ ಆಫೀಸ್​ನಲ್ಲಿ ಈ ಸಿನಿಮಾ ಎರಡು ದಿನದಲ್ಲಿ 21.15 ಕೋಟಿ ರೂಪಾಯಿ ಬಾಚಿಕೊಂಡಿದೆ.

ಭಾನುವಾರ ‘ಕ್ರೂ’ ಸಿನಿಮಾದ ಕಲೆಕ್ಷನ್​ನಲ್ಲಿ ಗಣನೀಯ ಏರಿಕೆ ಆಗಲಿದೆ ಎಂದು ಟ್ರೇಡ್​ ವಿಶ್ಲೇಷಕ ತರಣ್​ ಆದರ್ಶ್​ ಅವರು ಅಭಿಪ್ರಾಯಪಟ್ಟಿದ್ದಾರೆ. ನಟಿ ಆಲಿಯಾ ಭಟ್​ ಅವರು ಈ ಸಿನಿಮಾದ ಯಶಸ್ಸಿಗೆ ಭೇಷ್​ ಎಂದಿದ್ದಾರೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.