Vikram Vedha Teaser: ‘ಈ ಕಥೆಯಲ್ಲಿ ಇಬ್ಬರೂ ಕೆಟ್ಟವರು’: ‘ವಿಕ್ರಮ್​ ವೇದ’ ಟೀಸರ್​ನಲ್ಲಿ ಹೃತಿಕ್​-ಸೈಫ್​ ಮುಖಾಮುಖಿ

ಈ ವರ್ಷದ ಬಹುನಿರೀಕ್ಷಿಯ ಸಿನಿಮಾಗಳ ಪಟ್ಟಿಯಲ್ಲಿ ಹಿಂದಿಯ ‘ವಿಕ್ರಮ್​ ವೇದ’ ಚಿತ್ರ ಕೂಡ ಇದೆ. ಈ ಸಿನಿಮಾದಲ್ಲಿ ಸೈಫ್​ ಅಲಿ ಖಾನ್​ ಹಾಗೂ ಹೃತಿಕ್​ ರೋಷನ್​ (Hrithik Roshan) ನಟಿಸುತ್ತಿದ್ದಾರೆ. ಪುಷ್ಕರ್​-ಗಾಯತ್ರಿ ನಿರ್ದೇಶನದ ಈ ಸಿನಿಮಾದ ಟೀಸರ್​ ಈಗ ಬಿಡುಗಡೆ ಆಗಿದೆ. ಟೀಸರ್ (Vikram Vedha Teaser)​ ನೋಡಿದ ಎಲ್ಲರಿಗೂ ಸಖತ್​ ಕೌತುಕ ಮೂಡಿದೆ. ಖಡಕ್​ ಆದಂತಹ ಡೈಲಾಗ್​ಗಳ ಮೂಲಕ ಹೃತಿಕ್​ ರೋಷನ್​ ಗಮನ ಸೆಳೆದಿದ್ದಾರೆ. ಬಿಡುಗಡೆಯಾದ ಕೆಲವೇ ನಿಮಿಷಗಳಲ್ಲಿ ಈ ಸಿನಿಮಾದ ಟೀಸರ್​ 13 ಲಕ್ಷಕ್ಕೂ ಅಧಿಕ ಬಾರಿ ವೀಕ್ಷಣೆ ಕಂಡಿದೆ. ಪ್ರೇಕ್ಷಕರಿಗೆ ಈ ಚಿತ್ರದ ಮೇಲೆ ಎಷ್ಟು ನಿರೀಕ್ಷೆ ಇದೆ ಎಂಬುದಕ್ಕೆ ಇದೇ ಸಾಕ್ಷಿ. ಸೆಪ್ಟೆಂಬರ್​ 30ರಂದು ‘ವಿಕ್ರಮ್​ ವೇದ’ (Vikram Vedha) ಸಿನಿಮಾ ಬಿಡುಗಡೆ ಆಗಲಿದೆ.

ಎಲ್ಲರಿಗೂ ತಿಳಿದಿರುವಂತೆ ಇದು ತಮಿಳಿನ ‘ವಿಕ್ರಮ್ ವೇದ’ ಸಿನಿಮಾದ ಹಿಂದಿ ರಿಮೇಕ್​. ಮೂಲ ಹೆಸರನ್ನೇ ಇಟ್ಟುಕೊಂಡು ರಿಮೇಕ್​ ಮಾಡಲಾಗುತ್ತಿದೆ. ಪೊಲೀಸ್​ ಅಧಿಕಾರಿ ಪಾತ್ರದಲ್ಲಿ ಸೈಫ್​ ಅಲಿ ಖಾನ್​ ನಟಿಸಿದ್ದರೆ, ಗ್ಯಾಂಗ್​ಸ್ಟರ್​ ಆಗಿ ಹೃತಿಕ್​ ರೋಷನ್​ ಮನರಂಜನೆ ನೀಡಲಿದ್ದಾರೆ. ಇಬ್ಬರ ನಡುವೆ ಈ ಸಿನಿಮಾದಲ್ಲಿ ಹಲವು ಮುಖಾಮುಖಿ ದೃಶ್ಯಗಳು ಇರಲಿವೆ. ಭರ್ಜರಿ ಸಾಹಸ ಸನ್ನಿವೇಶಗಳು ಕೂಡ ಇವೆ ಎಂಬುದಕ್ಕೆ ಟೀಸರ್​ನಲ್ಲಿ ಸುಳಿವು ಸಿಕ್ಕಿದೆ. ರಗಡ್​ ಗೆಟಪ್​ನಲ್ಲಿ ಹೃತಿಕ್​ ರೋಷನ್​ ಕಾಣಿಸಿಕೊಂಡಿದ್ದಾರೆ.

‘ನಿಮಗೊಂದು ಕಥೆ ಹೇಳಲೇ? ಕಾಳಜಿ ಮತ್ತು ತಾಳ್ಮೆ ಇಟ್ಟುಕೊಂಡು ಇದನ್ನು ಕೇಳಿ. ಈ ಬಾರಿ ಬರೀ ಮನರಂಜನೆ ಮಾತ್ರವಲ್ಲ, ಅಚ್ಚರಿ ಕೂಡ ಇರಲಿದೆ’ ಎಂಬ ಸಂಭಾಷಣೆಯೊಂದಿಗೆ ಟೀಸರ್​ ಆರಂಭ ಆಗುತ್ತದೆ. 1 ನಿಮಿಷ 54 ಸೆಕೆಂಡ್​ಗಳ ಟೀಸರ್​ನಲ್ಲಿ ಹಲವು ಅಂಶಗಳನ್ನು ರಿವೀಲ್​ ಮಾಡಲಾಗಿದೆ. ‘ಒಳ್ಳೆಯದು ಮತ್ತು ಕೆಟ್ಟದ್ದರ ನಡುವೆ ಆಯ್ಕೆ ಮಾಡುವುದು ತುಂಬ ಸುಲಭ ಸರ್​. ಆದರೆ ಈ ಕಥೆಯಲ್ಲಿ ಇಬ್ಬರೂ ಕೆಟ್ಟವರು’ ಎಂದು ಹೃತಿಕ್​ ರೋಷನ್​ ಹೇಳಿರುವ ಡೈಲಾಗ್​ ಹೆಚ್ಚು ಹೈಲೈಟ್​ ಆಗಿದೆ. ಆ ಮೂಲಕ ಹಿಂದಿ ಪ್ರೇಕ್ಷಕರ ವಲಯದಲ್ಲಿ ಕೌತುಕ ಮೂಡಿಸಲು ಈ ಟೀಸರ್​ ಯಶಸ್ವಿ ಆಗಿದೆ.

ಸದ್ಯಕ್ಕೆ ಬಾಲಿವುಡ್​ ಪರಿಸ್ಥಿತಿ ಚಿಂತಾಜನಕ ಆಗಿದೆ. ಯಾವುದೇ ಸಿನಿಮಾಗಳು ಕೂಡ ನಿರೀಕ್ಷಿತ ಮಟ್ಟದಲ್ಲಿ ಗೆಲುವು ಕಾಣುತ್ತಿಲ್ಲ. ‘ವಿಕ್ರಮ್​ ವೇದ’ ಮೂಲಕವಾದರೂ ಹಿಂದಿ ಗಲ್ಲಾಪೆಟ್ಟಿಗೆಯಲ್ಲಿ ಚೇತರಿಕೆ ಕಾಣಲಿದೆಯೇ ಎಂಬುದನ್ನು ಕಾದು ನೋಡಬೇಕಿದೆ. ಟೀಸರ್​ ನೋಡಿದ ಪ್ರೇಕ್ಷಕರು ಪಾಸಿಟಿವ್​ ಪ್ರತಿಕ್ರಿಯೆ ನೀಡುತ್ತಿದ್ದಾರೆ.

ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.